Kapisilinniarneq pillugu Namminersornerullutik Oqartussat nalunaarutaat nr. 13, 12. august 1999-imeersoq.

Aalisarneq pillugu Inatsisartut inatsisaanni nr. 18-mi 31. oktober 1996-meersumi § 5, § 8, § 10, § 23, § 24, imm 1, § 25, § 26, § 33, imm. 2 aamma § 34, imm. 3 kingullermik Aalisarneq pillugu Inatsisartut inatsisaata allanngortinneqarneranik Inatsisartut inatsisaatigut nr. 6, 20. maj 1998-imeersoq kiisalu pinngortitamik eqqissisimatitsineq pillugu Inatsisartut inatsisaat nr. 11, 12. november 1980-imeersoq naapertorlugit aalajangersarneqarput:

 

Atuuffii

§ 1. Nalunaarut kapisilinniarnermut tamarmut imartani Kalaallit Nunaata aalisarnikkut oqartussaaffigisaani Nunap Isuata kitaani NAFO-p sumiiffilersuiffiani 1-mi ingerlanneqartumut atuuppoq. Tunngaviusumik killigititamiit 40 sømilit avataanni aalisarneq inerteqqutaavoq.
Imm. 2. Kalaallit Nunaata Kangiata aalisarfittaani kapisilinniarnermi malittarisassat nalu- naarummi §§ 8, 9, 10, 11, 12 aamma § 13-mi taaneqartut taamatuttaaq atuupput. Tunngaviusumik killigitamiit 12 sømilit avataanni aalisarneq inerteqqutaavoq.
Imm. 3. Nalunaarut aammattaaq kapisilinnik pisinerup tunisinerullu nalunaarutigineqarnerinut kiisalu nammineq atugassanik kapisilinniarniarnermi pisat aamma akiliilluni kapisilinniarnermi pisat nalunaarutigineqarnerinut atuuppoq.

 

Nassuiaatit

§ 2. Inuussutissarsiutigalugu kapisilinniarneq nalunaarummi matumani paasineqassaaq pisat tamaasa ilaannaassaluunniit tuniniarnissaat siunertaralugu kapisilinniarnertut. Inuussutissarsiutigalugu kapisilinniarnissamut allagartallit kisimik kapisilinnik tuniniaasinnaatitaapput.
Imm. 2. Nammineq atugassanik kapisilinniarneq nalunaarummi matumani paasineqassaaq nammineq atugassanik kapisilinniarnertut.
Imm. 3. Kapisilinnik pisineq nalunaarummi matumani paasineqassaaq inunnit kapisilinniarnissamut allagartaqartunit toqqaanartumik pisineq tigusinerlu.

 

Kapisilittassat aalajangersarneqarnerat

§ 3. Ukiut tamaasa Kitaani kapisilittassat amerlassusissaat Naalakkersuisut aalajangertassavaat. Aalajangiineq pisassaaq ilaatigut nunat tamat akornanni isumaqatigiissutit tunngavigalugit.

§ 4. KNAPK-p aamma KANUKOKA-p isumasioqatigereernerisigut Naalakkersuisut inuussutissarsiutigalugu kapisilinniarnerup qaqugukkut aallartinnissaa aalajangertassavaat. Tamanna pillugu kommuninut ataasiakkaanut, KNAPK-mut aamma KANUKOKA-mut kiisalu nuna tamakkerlugu tusagassiorfiit aqqutigalugit nalunaaruteqartoqartassaaq.

 

Inuussutissarsiutigalugu kapisilinniarnermut piumasaqaatit

§ 5. Akuersissummik tunineqarsimasut kisimik inuutissarsiutigalugu kapisilinniarsinnaatitaapput. Inuussutissarsiutigalugu aalisarsinnaanermut akuersissutit Inuussutissarsionermut Naalakkersuisumit tunniunneqartarput. Taamaattorli akuersissutinik tunniussisarnermut akisussaaffik kommunimut tunniunneqarsinnaavoq Inuussutissarsiornermut Naalakkersuisoq isumaqatigiissuteqarfigalugu.
Imm. 2. Qinnuteqartunut piumasaqaatinik makkuninnga naammassinnissimasunut akuersissutinik tunniussisoqarsinnaavoq:
1) inuiaqatigiinnut kalaallinut attuumassuteqavissunut, tak. Aalisarneq pillugu inatsimmi § 3, imm. 4.
2) nammineq kapisilinnut qassutaateqartunut kapisilinniarnermullu angallateqartunut 12,8 meter (42 fod) tikillugit angissusilimmik aamma
3) qinnuteqarnermut atatillugu kapisilinnut qassutit pigisami qassiuneri qanorlu ittuuneri imaluunnit ilisarnaataat nalunaaruteqartunut.
Imm. 3. Angallatit raajarniarniarnermut atorneqartut inuussutissarsiutigalugu kapisilinniarnermut atorneqassanngillat.

§ 6. Inuussutissarsiutigalugu kapisilinniarnissamut qinnuteqaammut itigartitaaneq tunngavilersorlugu naammagittaalliuutigineqarsinnaavoq Inuussutissarsiornermut Naalakkersuisoqarfimmut, Box 269, 3900 Nuuk, imaluunniit fax 32 47 04-kkut. Itigartitaanermut naammagittaalliutit itigartitsissutip kommunip allaffianiit tiguneqarneraniit kingusinnerpaamik sapaatit akunnerisa pingasut qaangiunneranni Pisortaqarfimmiit tiguneqareersimassapput.
Imm. 2. Kommunit ataasiakkaat sapinngisamik piaarnerpaamik Inuussutissarsiornermut Pisortaqarfimmut akuersissummik pigisaqartut ataasiakkaat aqqi, inuttut normui, angallataasa angissusii, kapisilinnut qassutinik qassinik pigisaqarneri aammalu qassutit suuneri ilisarnaataalluunniit nalunaarutigissavaat.

 

Inuussutissarsiutigalugu kapisilinniarnermi piniutit

§ 7. Inuussutissarsiutigalugu kapisilinniarneq taamaallaat qarsorsat qassutilluunniit tasillugit 140 mm-inik nigartallit atorlugit ingerlanneqassaaq. Qassutit tissukartittakkat atorneqarsinnaapput, taamaattorli atuinermi ataatsimi amerlanerpaamik uiguleriit 20-it.
Imm. 2. Qassutit nigartaat uuttorneqassaaq aalisarnermik nakkutilliisut uuttuutaata ½ kiilumik oqimaalutserlugu nigartamut ikkunneratigut nakkartillugulu. Nigartat 20-it qimiaanut ungaseqatigiit uuttorneqassapput. Nigartat tamarmik imm. 1-imi piumasaqaat eqqortissavaat.
Imm. 3. Kapisilinnut qassutit atorneqartut tamarmik piginnittup aqqanik imaluunniit taassuma angallataata normuanik nalunaaqutserneqarsimassapput.
Imm. 4. Sila atussaatillugu kapisilinnut qassutit akuttunngitsumik alakkarneqartassapput pisat uumanissaminnut periarfissaat ajornerulertussaajunnaarlugit.

 

Inuussutissarsiutigalugu kapisilinniarnerup aqunneqarnera

§ 8. Inuussutissarsiutigalugu kapisilinniarneq aallartinneqassanngilaq ulloq aalajangerneqarsimasoq nallertinnagu, tak. § 4, imm. 1. Inuussutissarsiutigalugu kapisilinniarneq unittassaaq pisassiissutit nungunneqaraangata imaluunniit kingusinnerpaamik kapisilinniarnerup aallartinneranit sapaatit akunneri 12-it qaangiukkaangata.
Imm. 2. Inuussutissarsiutigalugu kapisilinniarneq pisassat tamarmiusut iluanni taamaallaat ingerlanneqarsinnaavoq, takuuk § 3.
Imm. 3. Inuussutissarsiutigalugu aalisarnermi pisat najukkami kalaalimineerninarfimmi imaluunniit hotelinut, neriniartarfinnut, neqaarniarfinnut napparsimmavinnut, ilinniarfinnut kiisalu kikkunnilluunniit neriffigineqarsinnaasunut allanut taamaallaat tunineqarsinnaapput.
Imm. 4. Inuussutissarsiutigalugu kapisilinniarnermit pisat Kalaallit Nunaata avataani tuniniaqqusaanngillat.

§ 9. Kapisilittassat nungungajalerpata Inuussutissarsiornermut Naalakkersuisup qaqugu inuussutissarsiutigalugu aalisarneq, pisanik tunisineq, pisanik pisineq inuussutissarsiutigalugulu aalisartut akuersissummik peqartut tunisisarnerat unissanersoq nalunaarutigissavaa.
Imm. 2. Tamanna kommuninut ataasiakkaanut, KNAPK-mut KANUKOKA-mullu aammalu nuna tamakkerlugu tusagassiorfiit aqqutigalugit nalunaarutigineqassaaq..
Imm. 3. Ukiumut pisassiissutit nungoreernerisigut aalisarnerulluunniit unitsinneqareerneratigut inuussutissarsiutigalugu kapisilinniarneq sunaluunniit inerteqqutaavoq, nunatta pilersorneqarnissaa siunertaralugu aalisarneq ilanngullugu.

 

Nammineq atugassanik kapisilinniarneq

§ 10. Qallunaatut innuttaassusillit Kalaallit Nunaanni najugaqavissut namminneq atugassaminnik kapisilinniarsinnaatitaapput, tak. Aalisarneq pillugu inatsimmi § 8, imm. 1. Danmarkiunngitsumi innuttaasut Kalaallit Nunaanni ukiuni atasuinnarni marlunni najugaqavissimasut qallunaatut innuttaassuseqartunut naligitinneqassapput.
Imm. 2. Nammineq atugassanik taamaallaat kapisilinniartoqarsinnaavoq inuussutissarsiutigalugu kapisilinniarnerup aallartinneraniit naaneranut, tak. § 4 aamma § 8, imm. 1. Pisassat aalajangikkat tamakkerneqangajalerpata nammnineq atugassanik kapisilinniarnerup qaqugukkut uninnissaa Inuussutissarsiornermut Pisortaqarfiup nalunaarutigissavaa.
Imm.3. Nammineq atugassanik kapisilinniarneq taamaallaat ingerlanneqarsinnaavoq angallatit siorpiaminniit aqorpiaminnut 12,8 meter (42 fod) angullugu angissusillit atorlugit. Nammineq atugassanik kapisilinniarnermi qarsorsat qissattaallu kiisalu angallammut ataatsimut qassutit nunamut pitutat 2000-inik putullit ataatsit (1), § 6-imi allaaserineqartutut, imaluunnit tissukartittakkat nalinginnaasumik takissusillit ataatsit (1), § 7-imi allaaserineqartutut, atorneqarsinnaapput.
Imm. 4. Kapisilinnut qassutit piginnittup aqqanik imaluunniit angallatip normuanik ilisarnaaserneqarsimassapput. Kapisilinnut qassutit nalunaaquttap akunneri 24-it qaangiutsinnagit pisaajarneqartassapput.
Imm. 5. Sila atussaatillugu kapisilinnut qassutit akuttunngitsumik alakkarneqartassapput pisat uumanissaminnut periarfissaat ajornerulertussaajunnaarlugit.
Imm. 6. Imm. 1 malillugu kapisilittat Kalaallit Nunaanni nunaniluunniit allani tuniniaqqusaanngillat.

 

Akiliilluni kapisilinniarneq

§ 11. Takornariat taamaallaat kapisilinniarsinnaapput akiliilluni aallaaniarneq aalisarnerlu pillugit nalunaarut nr 26, 9. september 1993-imeersoq naapertorlugu.
Imm. 2. Nammineq atugassanik taamaallaat kapisilinniartoqarsinnaavoq inuussutissarsiutigalugu kapisilinniarnerup aallartinneraniit naaneranut, tak. § 4 aamma § 8, imm. 1. Pisassat aalajangikkat tamakkerneqangajalerpata nammnineq atugassanik kapisilinniarnerup qaqugukkut uninnissaa Inuussutissarsiornermut Pisortaqarfiup nalunaarutigissavaa.
Imm. 3. Akiliilluni kapisilinniarnermi qarsorsat qissattaatillu kisimik atorneqarsinnaapput.
Imm. 4. Kapisillit imm. 1 naapertorlugu pisarineqartut Kalaallit Nunaanni nunaniluunniit allani tuniniarneqarsinnaanatillu pisiareqqusaanngillat.

 

Kapisilinniarneq pillugu kommunit ileqqoreqqusaat

§ 12. Kommunalbestyrelsi aalisarneq pillugu inatsimmi tamanna pillugu aalajangersakkat iluanni najukkami aalisartut piniartullu peqatigiiffiat tusarniaavigereerlugu pissutsit immikkut ittut tamanna pisariaqartippassuk kommunip ileqqoreqqusaatigut kapisilinniarneq eqqarsaatigalugu § 7, imm. 1 aamma § 10, imm. 2 - 3-mi aalajangersakkanit sukanganerusunik aalajangersaasinnaavoq.

 

Inuussutissarsiutigalugu kapisilinniarnermi pisanik nalunaaruteqartarnerit

§ 13. Kapisilittat tamarmik aalisarneq pillugu inatsit naapertorlugu nalunaarutigineqassapput. Inuussutissarsiutigalugu kapisilinniarnissaminnut akuersissuteqarfigineqarsimasut kalaaliaqqakkut kapisileerutitik imaluunniit kalaalimineerniarfiit avataatigut toqqaannartumik tunisatik nalunaarutigisassavaat, tak. imm. 2. Kapisillit tunilersaarlugit pisat tunineqanngitsoortut § 14-imi malittarisassat naapertorlugit nalunaarutigineqassapput.
Imm. 2 Imm. 1 naapertorlugu ullormut pisat tunisallu KANUAANA-mut nalunaarutigineqassapput. Tamanna pissaaq pisinermut tunisinermullu allattuiffiit atorlugit, tak. imm. 3 imaluunniit oqarasuaat atorlugu nalunaaruteqarnikkut, tak. imm. 4.
Imm. 3. Pisianik tunisanillu allattuiffiit (tak. nalunaarummut ilanngussaq 1) ullut tamaasa KANUAANA-mut, Postboks 501, 3900 Nuuk, Telefax 32 32 35, imaluunniit 32 32 36 atorlugit nassiunneqartassapput.
Imm. 4. Oqarasuaatikkut nalunaarutit KANUAANA-mut oqarasuaat 34 50 00 atorlugu ulluinnarni tamani nal. 8.00 aamma 11.00 akornanni nalunaarutigineqarsinnaapput. Tallimanngornermit, arfininngornermit sapaammillu nalunaarutit ataasinngornermi tullermi nalunaarutgineqartassapput. Oqarasuaatikkut nalunaarutit paasissutissartaasa pisianik tunisanillu allattuiffinni paasissutissat assigissavaat.

 

Nammineq atugassanik kapisilinniarnermit pisanik nalunaaruteqartarneq.

§ 14. Nammineq atugassanik kapisilinniarnermi pisanik nalunaaruteqarneq pisianik tunisanillu allattuiffiit atorlugit pisassaaq (tak. nalunaarummut ilanngussaq). Nalunaarutit kingusinnerpaamik kapisilinniarnerup aqaguani KANUAANA-mut, Postboks 501, 3900 Nuuk, Telefax 32 32 35, imaluunniit 32 32 36 atorlugu nalunaarutigineqartassapput.

 

Akiliilluni kapisilinniarnermit pisanik nalunaaruteqarneq

§ 15. Akiliilluni kapisilinniarnermit pisat pisanik nalunaaruteqarfissakkut akuersissummut ilanngussakkut nalunaarutigineqassapput. Pisnik nalunaaruteqarfissaq piaarnerpaamik Inuussutissarsiornermut Pisortaqarfimmut, Postboks 269, 3900 Nuuk, nassiunneqassaaq.

 

Pineqaatissiissutit

§ 16. § 2, imm. 1-imik, § 5 imm. 1-imik, § 7-imik, § 8, § 9, imm. 3-mik, § 10-mik, § 11-imik aamma § 13-imik unioqqutitsineq akiliisitsinermik aamma pisanik arsaarinninnermik kinguneqarsinnaapput. §§ 10 aamma 11-mik unioqqutitsineq taamatuttaaq piniutinik atorneqarsimasunik arsaarinninnermik kinguneqarsinnaavoq.§ 14 naapertorlugu paasissutissanik nalunaaruteqanngitsoorneq akiliisitsinermik kinguneqarsinnaavoq.

§ 17. Nalunaarut atortuulerpoq 15. august 1999. Tamatuma peqatigisaanik Kapisilinniarneq pillugu Namminersornerullutik Oqartussat nalunaarutaat nr. 23, 10. august 1998-imeersoq, kiisalu Kapisilinnik pisineq tunisinerlu kiisalu kapisilittanik nalunaaruteqartarneq pillugit Namminersornerullutik Oqartussat nalunaarutaat nr. 24, 10. august 1998-imeersoq atorunnaarsinneqarput.

Namminersornerullutik Oqartussat, ulloq 12. august 1999.

Simon Olsen

/

Peder Munk Pedersen

---

Kapisilinniarneq pillugu nalunaarummut ilanngussaq 1.

Tunisanillu nalunaarsuiffik uunga nassiunneqassaaq oqarasuaatikkulluunniit nalunaarutigineqassalluni: Aalisarsinnaanermut Akuersissutinik Nakkutilliisoqarfik (KANUAANA), Box 501, 3900 Nuuk.

Oqarasuaat 34 50 00, Telefax 32 32 35 imaluunniit 32 32 36.

Immersugassaq maskinamik naqitaasiorluniluunniit allaqqunaqaaq.

A. KAPISILINNIK TUNISANIK NALUNAARUT
Tunisisup aqqa:	Aalisakkat qassit: Kiilut qassit: (MHUI)
Cpr. nummer:
Kommuni:
Illoqarfik/nunaqarfik:
Angallatip normua/aqqa:
Angallatip angissusia:
A katillugit	_________________kg. kapisillit (MHUI)

(MHUI = kapisilik erlaveerlugu)

 

 

Sumiiffik kiisalu ulloq:____________________________________

Atsiorneq:______________________________________________

 

---

Kapisilinniarneq pillugu nalunaarummut ilanngussaq 2.

Pisanik nalunaarut uunga nassiunneqassaaq: Aalisarsinnaanermut Akuersissutinik Nakkutilliisoqarfik (KANUAANA), Box 501, 3900 Nuuk.

Oqarasuaat 34 50 00, Telefax 32 32 35 imaluunniit 32 32 36.

 

Immersugassaq maskinamik naqitaasiorluniluunniit allaqqunaqaaq.

B. KAPISILINNIK NAMMINEQ ATUGASSATUT PISANIK NALUNAARUT
Ateq:	Aalisakkat qassit:     Kiilunngorlugit. (MHUI):
Kommuni:
Illoqarfik/nunaqarfik:
C katillugit	_________________kg. kapisillit (MHUI)

(MHUI = kapisilik erlaveerlugu)

 

Sumiiffik kiisalu ulloq:_______________________________________________________

Atsiorneq:_____________________________________________________________