Umimmaat eqqissisimatitaanerat piniagaanerallu pillugit Namminersornerullutik Oqartussat nalunaarutaat nr. 11, 26. juni 1999-imeersoq.

 Piniarneq aallaniarnerlu pillugit inatsisartut inatsisaanni nr. 15-imi 6. november 1997-imeersumi § 5, imm. 1-3, §§ 6-7, § 8, imm. 1-3, § 9, §10, imm. 2 aamma § 12, imm. 2, Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi § 2, imm. 3 aamma § 19 kiisalu Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi Inatsisartut peqqussutaatigut nr. 14-ikkut 31. oktober 1996-imeersukkut allanngortinneqartumi § 7b aamma § 46, imm. 2, malillugit aalajangersarneqarput:

 

Atuuffii

§ 1. Nalunaarut Kalaallit Nunaanni umimmaat (Ovibus moschatus) eqqissisimatitaanerannut piniagaanerannullu atuuppoq.

 

Eqqissisimatitsineq

§ 2. Kalaallit Nunaanni tamarmi umimmaat eqqissisimatitaapput § 3-mi aamma § 4-mi taaneqartut eqqaassanngikkaanni.

 

Pisassiissutit, piffissat sumiiffiillu piniarfiusinnaasut aalajangersarneqarnerat

§ 3. Naalakkersuisut ukiukkuutaartumik sumiiffinni piffissanilu aallaaniarfiusussani imm. 2-miit 5-imut taaneqartuni umimmat aallaaniarnikkut pisarineqarsinnaasut (pisassiissutit) amerlassusissaat aalajangersarsinnaavaat. Pisassiissutit suiaassusiinut ukioqqortussusiinullu aalajangersimasunut Naalakkersuisunit killiliiffigineqarsinnaapput.
Imm. 2. Ittoqqortoormiit kommunianni piffissani 20. augustimiit 20. septemberimut aamma 10. novemberimiit 10. decemberimut umimmanniarnissamut akuersissuteqartoqarsinnaavoq.
Imm. 3. Ittoqqortoormiit kommunianni piffissani 20. augustimiit 20. septemberimut aamma 10. novemberimiit 10. decemberimut akiliilluni umimmanniarnissamut akuersissuteqartoqarsinnaavoq.
Imm. 4. Kangerlussuup nunaani umimmanniarnissamut akuersissuteqartoqarsinnaavoq
1) nunap ilaani tassaasuni Ammalortup Nunaata ilaani aamma Angujaartorfiup Nunaata ilaani, tak. nunap assingi ilanngussat 1, piffissami 1. augustimiit 10. septemberimut, aamma
2) nunap ilaani tassaasuni Ammalortup Nunaata ilaani, Iperaarissap Nunaata aamma Akuliarusiarsuup ilaani piffissami 1. februarimiit 1. martsimut.
Imm. 5. Kangerlussuup nunaani akiliilluni umimmanniartoqarsinnaaneranut akuersissuteqartoqarsinnaavoq
1) nunap ilaani tassaasumi Perserajuut Nunaata ilaani piffissami 15. julimiit 5. augustimut tak. nunap assinga ilanngussaq 1 (ataani takuuk), aamma
2) nunap ilaani tassaasumi Ammalortup Nunaata ilaani piffissami 15. martsimiit 5. aprilimut.
Imm. 6. Piffissani piniarfissani imm. 2-miit 5-imut nalunaarneqartuni ullut pinialerfissat piniarunnaarfissallu ilanngullugit pineqarput.
Imm. 7. Naalakkersuisut Piniarneq pillugu Siunnersuisoqatigiit isumasioreerlugit piniarsinnaanermut akuersinermut atatillugu piffissat sumiiffiillu piniarfigineqarsinnaasut imm. 4, nr. 1-2 malillugu nalunaarutigineqartut erseqqissumik aalajangersassavaat aammalu akiliilluni piniarsinnaanermik akuersissuteqarnermut atatillugu sumiiffiit umimmanniarfissat imm. 5, nr. 2 malillugu nalunaarutigineqartut erseqqissumik killilersorlugit. KNAPK aamma KANUKOKA kiisalu suliamut attuumassuteqartut allat immikkoortillugit tusarniaavigineqarsinnaapput, pissutsit immikkut ittut tamanna pisariaqalersippassuk.
Imm. 8. Pisassiissutit aammalu tamatumani piumasaqaatit piffissap umimmanniarfissap aallartinnginnerani nuna tamakkerlugu tusagassiuutitigut tamanut saqqummiunneqassapput.
Imm. 9. Avannaani Tunumilu Nunami Allanngutsaaliugassatut Immikkoortitami umimmaat eqqissisimatitaanerat pillugu immikkut aalajangersakkat atuupput. Aalajangersakkat Nuna Allanngutsaalisaq pillugu nalunaarummi immikkoortumi Kalaallit Nunaanni pinngortitamik allanngutsaaliuineq pillugu Inatsisartut inatsisaat malillugu nalunaarutigineqartumi aalajangersagaapput.

§ 4. Naalakkersuisut Ivittuut kommunianni kommunalbestyrelsip inassuteqarneratigut umimmaat aalajangersimasumik amerlassusillit Ivittuut kommunianni piffissani 1. martsimiit 31. martsimut, 15. junimiit 15. julimut aamma 1. novemberimiit 30. novemberimut piniarnikkut pisarineqarsinnaasut (pisassiissutit) ukiukkuutaartumik aalajangersarsinnaavaat. Pisassiissutit suiaassusiinut ukioqqortussusiinullu aalajangersimasunut killilerneqarsinnaapput.
Imm. 2. Naalakkersuisut Ivittuut kommunianni kommunalbestyrelsip inassuteqarneratigut akiliilluni piniarsinnaanermut akuersissuteqarsinnaapput piffissani 1. martsimiit 31. martsimut, 15. junimiit 15. julimut aamma 1. novemberimiit 30. novemberimut.
Imm. 3. Piffissani piniarfissani imm. 1-imi aamma imm. 2-mi nalunaarneqartuni ullut pinialerfissat piniarunnaarfissallu ilanngullugit pineqarput.
Imm. 4. Naalakkersuisut Ivittuut kommunianni kommalbestyrelsip inassuteqarneratigut imm. 1 aamma imm. 2 malillugit nalunaarutigineqartutut piniarsinnaanermik akuersissuteqarnermut atatillugu piffissat piniarfissat sumiiffiillu piniarfissat erseqqissumik aalajangersarsinnaavaat.

 

Pisassiissutit agguaanneqarnerat

§ 5. § 3-mi imm. 2 aamma imm. 4 malillugit pisassiissutit aalajangersarneqartut, piniarnermut allagartat suussusii malillugit, kommuninut imaluunniit sumiiffinnut kommunit aggornerisa avataanniittunut Naalakkersuisunit agguaanneqassapput. Pisassiissutit Piniarneq pillugu Siunnersuisoqatigiit isumasioreerlugit agguaanneqassapput. KNAPK aamma KANUKOKA kiisalu suliamut attuumassuteqartut allat immikkoortillugit tusarniaavigineqarsinnaapput, pissutsit immikkut ittut tamanna pisariaqalersippassuk.
Imm. 2. Ukiumoortumik pisassiissutit kiisalu tamatumani atugassarititaasut isumaqatigiissutigineqartut piffissap umimmanniarfissap aallartinnginnerani nuna tamakkerlugu tusagassiorfitsigut tamanut saqqummiunneqassapput.

§ 6. Naalakkersuisut Ivittuut kommunianni kommunalbestyrelsip inassuteqarneratigut pisassiissutit § 4, imm. 1-imi aalajangersarneqartut agguaassinnaavaat, piniarnermut allagartamik sorlermik pigisaqarneq naapertorlugu, kommuninut imaluunniit kommunit allat nunaqarfiinut kommunalbestyrelsimik pineqartumik isumasioqateqareernikkut.

 

Akuersissutinik tunniussuineq

§ 7. § 5 malillugu kommuninut pisassiissutigineqartunut kommunalbestyrelsi kommunimi pineqartumi najugaqartutut inuit nalunaarsorsimaffianni nalunaarsorsimasunut aammalu atuuttumik inuussutissarsiutigalugu imaluunniit sunngiffimmi piniarnermut allagartalinnut qinnuteqarsimasunut kiisalu sunngiffimmi piniarnermut allagartamik atuuttumik pigisaqartunut qinnuteqarsimasunut nunami allami ilinniagaqartunut aammalu sunngiffimmi piniarnermut allagartaminni kommunimi pineqartumi najugalittut nalunaarneqarsimasunut, tuttussinnaanermik akuersissutinik tunniussissapput, taamaattoq tak. imm. 4.
Imm. 2. § 5 malillugu kommunit aggornerisa avataanniittunut Naalakkersuisut qinnuteqartunut sumiiffimmi inuit nalunaarsorsimaffianni najugaqartutut nalunaarsorsimasunut aammalu atuuttumik inuussutissarsiutigalugu imaluunniit sunngiffimmi piniarnermut allagartalinnut umimmasinnaanermut akuersissutinik tunniussissapput, taamaattoq tak. imm. 6. Taamaattoq Naalakkersuisut sumiiffimmi pineqartumi Nunaqqatigiiit Siunnersuisoqatigiivi (borgerråd) akuersissutinik imm. 3 aamma imm. 4 malillugit tunniussinissaannut piginnaatissinnaavaat.
Imm. 3. Ivittuut Kommunianni piniarnissamut pisassiissutinut tunngatillugu, tak. § 6, Ivittuut kommunianni kommunalbestyrelsi qinnuteqartunut kommunimi inuit nalunaarsorsimaffianni najugaqartutut nalunaarsorsimasunut aammalu atuuttumik inuussutissarsiutigalugu imaluunniit sunngiffimmi piniarnermut allagartalinnut umimmannik pisaqarsinnaanermut akuersissutinik tunniussissaaq, tamaattoq tak. imm. 6. Ivittuut kommuniata saniatigut kommunit allat pisassiissutinik pissarsisimappata, Ivittuut kommunianni kommunalbestyrelsip kommunimi inuussutissarsiutigalugu aamma sunngiffimmi piniarnermut atuuttumik allagartalinnut qinnuteqarsimasunut kommunini pineqartuni kommunalbestyrelsi isumasioreerlugu agguaassineq ingerlatissavaa, taamaattoq tak. imm. 6.
Imm. 4. Qinnuteqartunut inuussutissarsiutigalugu piniarnermut allagartalinnut najukkami aalisartut piniartullu peqatigiiffiata isumasioreerneratigut akuersissutinik tunniussisoqartassaaq. Qinnuteqartunut sunngiffimmi piniarnermut allagartalinnut makitsinikkut agguaassisoqassaaq. Makitsisoqassaaq taamaaliorneq kikkunnilluunniit najuuffigineqarsinnaatillugu.
Imm. 5. Inuussutissarsiutigalugu piniarnermut imaluunniit sunngiffimmi piniarnermut allagartamik atuuttumik pigisaqarnissamik piumasaqaatip saniatigut kommunalbestyrelsep, suliamut attuumassuteqartut tusarniareerlugit kommunemi ileqqoreqqusatigut allanik immikkut ittunik kinaassusersiunngitsunillu piumasaqaateqartoqarsinnaavoq, qinnuteqaateqartoq akuersissummik tunineqarsinnaassappat naammassineqarsimasussanik. Kommunemi ileqqoreqqusaq Naalakkersuisunut nassiunneqassaaq akuerisassanngorlugu.
Imm. 6. Qinnuteqaateqartunut inuussutissarsiutigalugu imaluunniit sunngiffimmi piniarnermut allagartalinnut aasaanerani piniarnermut peqataanissakut akuersissutinik agguaassinermut peqataassagaanni, imm. 1, 2 aamma 3 takukkit, kiisalu makitsinermut peqataassagaanni, imm. 5 takuuk, piumasaqaataavoq qinnuteqaateqartup inuussutissarsiutigalugu piniarnermut allagartaa taamatullu sunngiffimmi piniarnermut allagartaa akilerneqarsimassasoq taamaalillunilu ukiumi piniarfiusumi pineqartumi 1. majimi atuuttuussalluni.
Imm. 7. Naalakkersuisut § 3-mi imm. 3 aamma 5 aamma § 4-mi imm. 2 malillugit pisassiissutaasut iluanni inunnut akiliilluni umimmanniarnermut peqataasunut akuersissutinik tunniussisinnaapput.

 

Piniarnermut piumasaqaatit

§ 8. Taamaallaat inuit akuersissummik § 7-imi imm. 1-imiit 4-mut aamma imm. 7 malillugit tunniunneqarsimasumik pigisaqartut umimmassinnaatitaapput.
Imm. 2. Akuersissut inuup nammineq pissaraa allanullu tuniniarneqartussaanani. Inuit akuersissummik pisimasut aammalu taassuminnga atuisinnaanatilluunniit atuerusunngitsut, piaarnerpaamik akuersissut atorneqanngitsoq oqartussaasunut akuersissummik tunniussisunut pisariaqarpat agguaateqqinneqarsinnaasunngorlugu utertissavaat. Oqartussaasut akuersissutinik tunniussisartuusut piffissamik akuersissutit tunniunneqartussat aaneqarnissaannut piffissamik killiliillutik aalajangersaasinnaapput, taamaalilluni akuersissutit aaneqanngitsut agguaateqqinneqarsinnaassammata, taamaattoq piaarnerpaamik piffissap piniarfiusup naanissaa sapaatip akunnerinik marlunnik sioqqullugu, akuersissutinut utaqqisut allattorsimaffiat malillugu.
Imm. 3. Akuersissummi allassimassapput umimmaat pisarineqarsinnaasut qassiunerat pisariaqassappallu suiaassusii qanorlu utoqqaatigissusissaat aamma umimmanniarneq qaqugukkut sumilu ingerlanneqassanersoq.
Imm. 4. Uumasunik nujuartanik misissuinermi atugassatut Naalakkersuisut piniartoq kinaluunniit umimmammik pisaqartoq pisussaaffilersinnaavaat ulloq sumiiffillu pisaqarfiusoq, pisap suiaanera utoqqaassusialu, naartunersoq aammalu nalunaaqutsiussap normua nalunaarutigeqqullugit, tak. § 12, imm. 1.
Imm. 5. Naalakkersuisut umimmanniarnermut akuersissutinik tunniussinerminnut atatillugu piumasaqaatinik annertunerusunik piumasaqarsinnaapput, tassunga ilanngullugu nersutip ilaanik tunniussisoqarnissaanik aamma uumasunik nujuartanik misissuinermut atugassanik paasissutissanik tunniussisoqarnissaanik kiisalu piniarnermut atatillugu umimmaat piniarfissat § 3-mi aalajangersarneqartut suatungaanni pisarineqarnissaannik erseqqinnerusumik tikkuaasoqarnissaanik. Piniarnermik aalisarnermillu nakkutilliisut imaluunniit Naalakkersuisut taamaaliornissamut pisinnaatitaat allat tikkuaasuussapput. § 4, imm. 1 aamma imm. 2 malillugit piniarnermi Ivittuut kommunianni kommunalbestyrelsi umimmanniarnissamut akuersissutinik tunniussinermut atasumik immikkut ittunik piumasaqaateqarsinnaavoq, tassunga ilanngulugu piumasarineqarsinnaalluni kommunip piniarnermik aalisarnermillu nakkutilliisuata tamatigut piniarnermi peqataasarnissaa nersummillu pisarineqarsinnaasumik toqqaasuusarnissaa.
Imm. 6. Imm. 4 naapertorlugu paasissutissat akuersissummut allanneqassapput, piaarnerpaamik kingusinnerpaamillu piniarnerup naaneranit sapaatip akunneri pingasut qaangiutsinnagit kommunimut tunniunneqassallutik. Tamatuma kingorna paasissutissat kommunimit katersorneqarsimasut ataatsimoortillugit Inuussutissarsiornermut Pisortaqarfimmut nassiunneqassapput.
Imm. 7. Imm. 5 malillugu misissugassatut tunniussat tunniunneqarnissaannik Pinngortitaleriffimmit, Box 570, 3900 Nuuk, aaqqissorneqassaaq.

 

Piniariaatsit.

§ 9. Umimmanniarnermi qoorortuut kisimik atorneqassapput. Qoorortuut atorneqarsinnaatitaasut sullukinnersaat 6,5 x 55 kaliberiuvoq. Qoorortuup imassai qaartartoqanngitsut (hel mantel) atorneqassapput. Qoorortuut eqittaannartakkat nusuinnartakkallu atorneqassanngillat. Taamaattorli akiliilluni piniarnermi atorneqartussaq sullukinnerpaaq 7,62 mm-iussaaq (30-06), aammalu imassat qaartartoqanngitsunit allaanerusut atorneqarsinnaapput.
Imm. 2. Timmisartut, qulimiguullit kiisalu qamutit motorillit suugaluartulluunniit umimmanniarnerup nalaani imaluunniit piniarfimmut piniarfimmiillu assartuutitut atorneqassanngillat.
Imm. 3. Naalakkersuisut snescooterit umimmanniarnermi § 3, imm. 4, nr. 2 aamma § 3, imm. 5, nr. 2, kiisalu § 4, imm. 1 aamma imm. 2 malillugit nalunaarutigineqartut tunngavigalugit pisanik assartuisinnaanermut atorneqarsinnaanerannik akuersinertik nalunaarutigisinnaavaat, taamaattorli tak. imm. 4-miit 6-imut.
Imm. 4. Taamaattorli nunami snescooterinik ingerlaffiusartumi nuna qerisimassaaq naanerillu apummit qallersimassallutik, taamaalilluni naanerit snescooterinit ajoquserneqassanatik. Naalakkersuisut aalajangernerat apeqqutaatinnagu snescooterinik atuineq unitsinneqassaaq sumiiffinni naasoqarfiusuni, snescooterinik ingerlaffiusartuni aput illersuutissatut naatsorsuutigineqartoq nunguppat.
Imm. 5. Kangerluup sikuani, kooqarfinni, tatsini aammalu nunani sikumik apummillu qallersimasuni naasoqanngitsuni angallassineq akuerineqarpoq, aputip issussusia apeqqutaatinnagu.
Imm. 6. Aputip issussusia piniarnermik aalisarnermillu nakkutilliisunit nalilerneqartassaaq. Taakku Inuussutissarsiornermut Pisortaqarfimmut sumiiffinni naasoqarfiusuni snescooterinik ingerlaffiusartuni aputip issussusia naammannersoq innersuussutigisassavaat.
Imm. 7. Snescooterinik angallannerup unitsinneqaratarsinnaanera, tak. imm. 4, Inuussutissarsiornermut Pisortaqarfiup piniarnermik aalisarnermillu nakkutilliisut isumasioqatigalugit aalajangertassavaa. Piniarnermik aalisarnermillu nakkutilliisut snescooterinik ingerlassisarnerup unitsinneqarneranik aalajangiisoqarnera piniartunut nalunaarutigisassavaat, aammalu pisariaqarnera naapertorlugu piniarfiusumiit angerlarnissaq isumannaarniarlugu ingerlassinermi aqqutissanik innersuussisassallutik.
Imm. 8. Naalakkersuisut aammattaaq qamutit motorillit allat umimmanniarnermi § 3-mi imm. 3, nr. 2 (10. novemberimiit 10. decemberimut), § 3-mi imm. 4, nr. 2 (1. februarimiit 10. martsimut) tunngavigalugit pisanik assartuisinnaanermut atorneqarsinnaanerannik akuersissuteqarnertik nalunaarutigisinnaavaat, tassungalu atatillugu atuinermi atugassarititaasut erseqqinnerusut nalunaarutigalugit. Tamatuma saniatigut Naalakkersuisut akiliilluni umimmanniarnermut atatillugu qulimiguullit piniarfimmut piniarfimmiillu assartuutitut atorneqarnissaannut akuersissuteqarnertik nalunaarutigisinnaavaat.

 

Qimussimik umimmanniarneq

§ 10. Kalaallit Nunaata kitaani umimmanniarnermi qimmit nassatarineqassanngillat. Qimmit pitunneqanngitsut piniarfimmiitinneqassanngillat.
Imm. 2. Immikkoortoq 1-mi aalajangersagaq apeqqutaatinnagu taamaattoq Naalakkersuisut immikkut akuersissuteqarsinnaapput nunap qerisimanera naanerillu qimussimik ingerlaffiusartuni apummit naammattumik issussusilimmik qallersimappata taamalu naanerit qimussinit ajoquserneqarsinnaanngippata umimmanniarnermi § 3-mi imm. 4, nr. 2 aamma § 3-mi imm. 5 nr. 2 malillugit nalunaarutigineqartut tunngavigalugit qimussimik piniarfimmut piniarfimmiillu assartuisinnaanermut tunngatillugu. Naalakkersuisut aalajangernerat apeqqutaatinnagu qimussimik atuineq unitsinneqassaaq aput naatsorsuutigineqaraluartoq, qimussimik ingerlaffiusartuni nunguppat.
Imm. 3. Aputip issussusia piniarnermik aalisarnermillu nakkutilliisunit nalilerneqartassaaq. Taakkua Inuussutissarsiornermut Pisortaqarfimmut sumiiffinni naasoqarfiusuni qimussimik ingerlaffiusartuni aputip issussusia naammannersoq innersuussutigisassavaat.

 

Umimmaat il.il. pisarineqartut atorneqarnissaat tuniniarneqarnerallu

§ 11. Umimmaat pisarineqartut neqaat amiilu tamarmik angerlaanneqassapput imaluunniit qimatulineqassallutik.
Imm. 2. Umimmaat neqaat taamaallaat tuniniarneqarsinnaapput piffissami umimmanniarfiup nalaani, aamma piffissap umimmanniarfiup unitsinneqarnerata kingornatigut ullut arfineq marluk tikillugit. Politiit, piniarnermik aalisarnermillu nakkutilliisut imaluunniit inuit allat Naalakkersuisunit piginnaatitaasut piumasaqarnerisigut akuersissut imaluunniit nalunaaqutsiuttakkat ingerlaannartumik takutinneqassapput.

 

Nakkutilliineq

§ 12. Inuit § 7-imi imm. 1-imiit 4-imut malillugit umimmanniarnissamut akuersissuteqarfigineqartut akuersissummut ilanngullugit umimmammut ataatsimut nalunaaqutsiutassat ataasiaannarlugit atortakkat marluk assigiinnik normullit pissarsiarissavaat, umimmaat pisarineqartut kingusinnerusukkut uppernarsineqarnissaannut atugassatut.
Imm. 2. Umimmaap pisarineqareerneratigut nalunaaqutsiussat ataasiarlugit atugassat umimmaap quttoraanut sukkanerpaamik kingusinnerpaamillu angallammut pisamik assartuissummut ikineqalernerani ivertinneqassapput katajaatsumut erseqqissumullu inissillugit.
Imm. 3. Nalunaaqutsiutassat ataasiaannarlugit atortakkat umimmammi ikkusimatiinnarneqassapput pisap tunineqarnissaata imaluunniit atorneqarnissaata tungaanut.
Imm. 4. Nalunaaqutsiutassat ataasiaannarlugit atortakkat tunniunneqarsimasut atorneqanngitsulli piaarnerpaamik kingusinnerpaamillu piffissap umimmanniarfissarititaasup naaneratigut kommunip allaffianut tunniunneqassapput. Taakku kommunip Inuussutissarsiornermut Pisortaqarfimmut ingerlateqqillugit nassiutissavai.

§ 13. Umimmanniartup kialuunniit politiit, piniarnermik aalisarnermillu nakkutilliisut imaluunniit inuit allat taamatut piginnaanilerneqarsimasut piumasaqaateqarnerisigut umimmanniarsinnaatitaanermut uppernarsaat atuuttoq takutissinnaasariaqarpaa.
Imm. 2. Umimmaat pissatat, ikillit, ajoqutillit allatulluunniit naalliuttut siumorneqarpata tamanna sapinngisamik piaartumik nakkutilliinermik suliaqartunut imm. 1-imi taaneqartunut nalunaarutigineqassaaq, taakku Naalakkersuisunit piginnaatinneqarsinnaapput umimmaat pineqartut toqunneqarnissaannut. Taamaalereerpat umimmaat toqunneqartut Namminersornerullutik Oqartussanut pigisassanngortinneqassapput.

 

Uumatillugit tigusinerit nuussinerillu

§ 14. Naalakkersuisut akuersiteqqaarsimatinnagit umimmaat nuunneqarnissaat, tamatumunnga ilanngullugu soriarsinnaajunnaarsinneqarnissaat tiguneqarnissaallu aammalu ungalusat iluiniitinneqarnissaat inerteqqutaavoq.
Imm. 2. Umimmaat pigineqanngitsut sumiiffinnut nutaanut nuunneqarnissaat Naalakkersuisut akuersiteqqaarlugit aatsaat pisinnaavoq.
Imm. 3. Imm. 1 aamma 2-mik unioqqutitsisoqartillugu Naalakkersuisut, unioqqutitsinerit unitsinniarlugit, inuup imaluunniit inuit unioqqutitsisut akiligassaannik iliuuseqarnissamik suliniuteqarsinnaapput.

 

Immikkut akuersissuteqartarneq

§ 15. Ilisimatusarnikkut siunertanut nalunaarummi aalajangersakkat atorneqannginnissaannut Naalakkersuisunit immikkut akuersissuteqarsinnaapput, tassunga ilanngullugu ilisimatusarnermut atatillugu piniarsinnaanermut akuersissuteqarlutik. Ilisimatusarnermut atatillugu piniarsinnaanissamut Naalakkersuisut erseqqinnerusunik piumasaqaasiorsinnaapput.
Imm. 2. Taamatuttaaq Naalakkersuisut nalunaarummi aalajangersakkat atorneqannginnissaannik immikkut akuersissuteqarsinnaapput umimmaat inunnik, timmisartunik allanilluunniit tamanik angallattunik navianartorsiortitsissagaluarpata, politiillu, piniarnermik aalisarnermillu nakkutilliisut imaluunniit inuit allat piginnaatillugit umimmannik pineqartunik toqutsinissaannut akuersissuteqarlutik. Taamaalereerpat umimmaat toqutat Namminersornerullutik Oqartussanut pigisassanngortinneqassapput.

 

Pineqaatissiinerit

§ 16. §§-ini 2-miit 4-mut aamma §§-ini 8-miit 14-mut aalajangersakkanik unioqqutitsinerit akiliisitsinermik pineqaatissiissutaasinnaapput.
Imm. 2. §§-ini 2-miit 4-mut aamma §§-ini 8-miit 11-mut aalajangersakkanik unioqqutitsilluni umimmaat pisarineqartut neqaat, amii allallu atorsinnaasut umimmammeersut Naalagaaffiup karsianut tunniussassanngorlugit arsaarinnissutigineqarsinnaapput.

 

Atuutilerfia il.il.

§ 17. Nalunaarut una atuutilerpoq 15. juli 1999.
Imm. 2. Peqatigitillugu umimmaat eqqissisimatitaanerat piniagaanerallu pillugit Namminersornerullutik Oqartussat nalunaarutaat nr. 1, 22. januar 1998-imeersoq aamma umimmaat eqqissisimatitaanerat piniagaanerallu pillugit nalunaarutip allanngortinneqarnera pillugu nalunaarut nr. 10, 26. marts 1998-imeersoq atorunnaarsinneqarput.

Namminersornerullutik Oqartussat, ulloq 26. juni 1999.

Simon Olsen

/

Peder Munk Pedersen

---

Ilanngussaq nunap assinga: