Tuttut eqqissisimatitaanerat piniagaanerallu pillugit Namminersornerullutik Oqartussat nalunaarutaat nr. 10, 26. juni 1999-imeersoq.

Piniarneq aallaaniarnerlu pillugit Inatsisartut inatsisaanni nr. 15-imi, 6. november 1997-imeersumi § 5, imm. 1-3, §§ 6 aamma 7, § 8, imm. 1-3, § 9, § 10, imm. 2 aamma § 12, imm. 2 kiisalu Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-imi, 12. november 1980-imeersumi § 2, imm. 3 aamma § 19 naapertorlugit aalajangersarneqarput:

 

Atuuffia.

§ 1. Nalunaarut tuttut (Rangifer tarandus) eqqissisimatitaanerannut piniarneqartarnerannullu atuuppoq, sumiiffiit nujuitsunik tuttuuteqarfissanngortitat pinnagit.

 

Eqqissisimatitsineq.

§ 2. Nunami tamarmi tuttut eqqissisimatitaapput periarfissiissutit § 3-mi taaneqartut eqqaassanngikkaanni, taamaattoq tak. imm. 2.
Imm. 2. Tuttu qungatsimigut aappaluttoq qaamasumik (orange) 6 cm-imik silissusilimmik qaammataasanut radiukkut aallakaatitsissutitalimmik ikkussiffigineqarsimasoq, aalajangersakkat § 3-mi allassimasut apeqqutaatinnagit piniarneqassanngilaq.

 

Pisassiissutit, piffissap piniarfissap piniarfiillu sumiiffiisa aalajangersarneqarnerat.

§ 3. Naalakkersuisut ukiukkuutaartumik tuttut piniarnikkut pisarineqarsinnaasut (pisassiissutit) amerlassusissaat aalajangersarsinnaavaat.
Imm. 2. Pisassiissutit suiaassutsinut utoqqaassutsinullu aalajangersimasunut Naalakkersuisunit killilerneqarsinnaapput.
Imm. 3. Pisassiissutit Naalakkersuisunit pisassiissutinut ikinnerusunut agguataarneqarsinnaapput sumiiffiit killilikkat iluini piniarneqarsinnaasunngorlugit.
Imm. 4. Imm. 1 malillugu piniarnissamut piffissaq aalajangersarneqartoq tassaavoq 15. augustimiit 10. septemberip tungaanut, ullut taasat ilanngullugit.

 

Pisassiissutinik agguaassineq.

§ 4. § 3-mi, imm. 1-imiit 3-mut malillugit pisassiissutissatut aalajangersarneqartut, piniarnermut allagartat suussusii malillugit, kommuninut imaluunniit sumiiffinnut kommunit aggornerisa avataanniittunut Naalakkersuisunit agguaanneqassapput. Pisassiissutit Piniarneq pillugu Siunnersuisoqatigiit isumasioreerlugit agguaanneqassapput. KNAPK aamma KANUKOKA kiisalu suliamut attuumassuteqartut allat immikkoortillugit tusarniaavigineqarsinnaapput, pissutsit immikkut ittut tamanna pisariaqartippassuk.
Imm. 2. Ukiumoortumik pisassiissutit kiisalu tamatumani atugassarititaasut aalajangerneqartut piffissap tuttunniarfissap aallartinnginnerani nuna tamakkerlugu tusagassiorfitsigut tamanut saqqummiunneqassapput.

 

Akuersissutinik tunniussuineq.

§ 5. § 4, imm. 1 malillugu kommuninut pisassiissutigineqartunut kommunalbestyrelsi kommunimi pineqartumi najugaqartutut inuit nalunaarsorsimaffianni nalunaarsorsimasunut aammalu atuuttumik inuussutissarsiutigalugu imaluunniit sunngiffimmi piniarnermut allagartalinnut qinnuteqarsimasunut kiisalu sunngiffimmi piniarnermut allagartamik atuuttumik pigisaqartunut qinnuteqarsimasunut nunami allami ilinniagaqartunut aammalu sunngiffimmi piniarnermut allagartaminni kommunimi pineqartumi najugalittut nalunaarneqarsimasunut, tuttussinnaanermik akuersissutinik tunniussissapput, taamaattoq tak. imm. 5.
Imm. 2. § 4, imm. 1 malillugu sumiiffinnut kommunit aggornerisa avataaniittunut qinnuteqartunut sumiiffimmi pineqartumi najugaqartutut inuit nalunaarsorsimaffianni nalunaarsorneqarsimasunut aammalu atuuttumik inuussutissarsiutigalugu imaluunniit sunngiffimmi piniarnermut allagartalinnut Naalakkersuisut tuttussinnaanissamik akuersissutinik tunniussissapput, taamaattorli tak. imm. 4 aamma imm. 5. Naalakkersuisulli sumiiffimmi pineqartumi Nunaqqatigiit Siunnersuisoqatigiivi, borgerrådit, piginnaatissinnaavaat imm. 3 aamma imm. 4 malillugit akuersissutinik tunniussisinnaanissaannut.
Imm. 3. Qinnuteqartunut inuussutissarsiutigalugu piniarnermut allagartalinnut akuersissutinik tunniussineq sapinngisamik kommunimi qinnuteqartut amerlaqatigiinnik pinissaat siunertaralugu ingerlanneqassaaq. Tamanna pisinnaanngippat akuersissutinik sinneruttunik agguaaneq makitsinikkut ingerlanneqassaaq. Makitsineq ingerlanneqassaaq najukkami aalisartut piniartullu peqatigiiffiannit kikkunnilluunniillu malinnaavigineqarsinnaasumik.
Imm. 4. Sunngiffimmi piniarnermut allagartalinnut qinnuteqartunut akuersissutinik agguaassineq makitsinikkut pissaaq. Makitsineq ingerlanneqassaaq kikkunnilluunniit malinnaavigineqarsinnaasumik.
Imm. 5. Imm. 3 naapertorlugu inuussutissarsiutigalugu piniarnermut allagartamik pigisaqartunut akuersissutinik agguaassinermi, kiisalu imm. 3 aamma 4 naapertorlugu makitsinermi peqataanissamut piumasaqaataavoq, qinnuteqartut inuussutissarsiutigalugu aammalu sunngiffimmi piniarnermut allagartaat akilerneqarsimassasut taamalu ukiumi piniarnermut allagartaqarfiusumi 1. majimiit atuullutik.
Imm. 6. Inuussutissarsiutigalugu piniarnermut imaluunniit sunngiffimmi piniarnermut allagartamik atuuttumik pigisaqarnissamik piumasaqaatip saniatigut kommunalbestyrelsep, suliamut attuumassuteqartut tusarniareerlugit kommunemi ileqqoreqqusatigut allanik immikkut ittunik kinaassusersiunngitsunillu piumasaqaateqartoqarsinnaavoq, qinnuteqaateqartoq akuersissummik tunineqarsinnaassappat naammassineqarsimasussanik. Kommunemi ileqqoreqqusaq Naalakkersuisunut nassiunneqassaaq akuerisassanngorlugu.

 

Piniarnermut piumasaqaatit.

§ 6. Taamaallaat inuit akuersissummik § 5 imm. 1 imaluunniit imm. 2 malillugu tunniunneqarsimasumik pigisaqartut tuttussinnaatitaapput.
Imm. 2. Akuersissut inummut atiatigut taasamut tunniunneqassaaq allanullu tunniunneqaqqusaanani imaluunniit tunineqaqqusaanani. Inuit akuersissummik tunineqarsimasut taassuminngalu atuisinnaanngitsut atuerusunngitsulluunniit piaarnerpaamik akuersissut atorneqanngitsoq oqartussaasunut akuersissummik tunniussisartuusunut utertissavaat akuersissutinut utaqqisut allattorsimaffiat malillugu agguaateqqinneqarsinnaanngorlugu.
Imm. 3. Oqartussaasut akuersissutinik tunniussisartut akuersissutigineqartut aaneqarnissaannut piffissamik killiliussamik aalajangersaasinnaapput, taamaalilluni akuersissutit aaneqanngitsut agguaateqqinneqarsinnaassammata, tak. imm. 2, taamaattorli siusinnerpaamik piffissap piniarfiusup naanissaa sapaatip akunnerinik marlunnik sioqqullugu.
Imm. 4. Akuersissummi allassimassapput tuttut pisarineqarsinnaasut qassiunerat pisariaqassappallu suiaassusii qanorlu utoqqaatigissusissaat aammalu tuttunniarneq qaqugu sumilu ingerlanneqassanersoq.
Imm. 5. Tuttumik pisaqartoq kinaluunniit pinngitsoorani pisussaavoq nalunaarutigissallugit ulloq pisaqarfik, sumi pisaanera, suiaanera, utoqqaassusigigunagaa, pualassusia kulavaappallu norraqarnersoq kiisalu § 9, imm. 1 naapertorlugu nalunaaqutsiuttakkap normua uumasunik nujuartanik misissuinermi atugassatut.
Imm. 6. Naalakkersuisut tuttunniarnissamut akuersissutit tunniunneqarnerannut atasumik amerlanerusunik piumasaqaateqarsinnaapput, tassunga ilanngullugit pisap ilaanik tikiussinissamik aammalu paasissutissanik tunniussinissamut uumasunik nujuartanik misissuinermi atugassatut.
Imm. 7. Imm. 5 naapertorlugu paasissutissat akuersissummut, kommunimut piaarnerpaamik, kingusinnerpaamillu tuttunniarnerup naanera sapaatip akunnerinik pingasunik kingoqqullugu, tunniunneqartussamut, allattorneqassapput. Paasissutissat ataatsimoortillugit kommunimit Inuussutissarsiornermut Pisortaqarfimmut ingerlateqqinneqassapput.
Imm. 8. Imm. 6 malillugu misissugassatut tunniussat tunniunneqarnissaannik Pinngortitaleriffimmit, Box 570, 3900 Nuuk, aaqqissuunneqassaaq.

 

Piniariaatsit.

§ 7. Tuttunniarnermi taamaallaat qoorortooq atorneqarsinnaavoq. Kaliberi minnerpaaq akuerisaasoq .222-iuvoq. Timmiarsiutit, aallaasit eqittaannartakkat eqiinnartakkalluunniit qoorortuuaqqallu suugaluartulluunniit tuttunniarnermi atoqqusaanngillat.
Imm. 2. Tuttunniarfinni aavarnerup nalaani pitutaanngitsunik qimmilisartoqassanngilaq. Aavarnermi qimmit nassaqqusaanngillat, assartuutitullu qimussit atoqqusaanatik.
Imm. 3. Timmisartut, qulimiguullit kiisalu qamutit motorillit suulluunniit tuttunniarnermi imaluunniit tuttunniarnermut atatillugu assartuutitut atoqqusaanngillat.

 

Uumasut pisarineqartut atorneqarnissaat il.il.

§ 8. Tuttut pisarineqartut neqaat tamakkerlugit pisaqarfiusumi atorneqassapput imaluunniit tassanngaanniit nassarneqassallutik.
Imm. 2. Tuttutat neqaat taamaallaat tuniniarneqarsinnaapput piffissami tuttunniarfiup nalaani, aamma piffissap tuttunniarfiusup unitsinneqarnerata kingornatigut ullut arfineq marluk tikillugit. Politiit, piniarnermik aalisarnermillu nakkutilliisut imaluunniit inuit allat Naalakkersuisunit piginnaatitaasut piumasaqarnerisigut akuersissut imaluunniit nalunaaqutsiuttakkat ingerlaannartumik takutinneqassapput.
Imm. 3. Tuttut nassuinik katersisoqarsinnaavoq taamaallaat aavarfiup nalaani.

 

Nakkutilliineq.

§ 9. Inuit § 5, imm. 1 aamma 2 naapertorlugit tuttunniarnissamut akuersissuteqarfigineqartut akuersissummut ilanngullugu tuttumut ataatsimut nalunaaqutsiutassat assigiit ataasiaannarlugit atortakkat marluk normullit pissarsiarissavaat, tuttut pisarineqartut kingusinnerusukkut uppernarsineqarnissaannut atugassatut.
Imm. 2. Tuttup pisarineqarnerata kingornatigut sapinngisamik piaarnerpaamik kingusinnerpaamillu pisap angallammut tuttunniarnermi angallatigineqartumut ikineqarnerani, nalunaaqutsiutassat ataasiaannarlugit atugassat pisap quttoraanut aalajangerlugit ikkunneqassapput, katajaatsunngorlugit takulertorneqarsinnaasumut inissillugit.
Imm. 3. Nalunaaqutsiutassat ataasiaannarlugit atortakkat ikkusimatiinnarneqassapput pisap atorneqarnissaata tungaanut.
Imm. 4. Nalunaaqutsiutassat ataasiaannarlugit atortakkat tunniunneqarsimasut atorneqanngitsulli piaarnerpaamik kingusinnerpaamillu piffissap piniarfiusussap naanerata kinguninnguatigut kommunip allaffianut tunniunneqassapput. Taakku kommunip piaartumik Inuussutissarsiornermut Pisortaqarfimmut nassiutissavai.

§ 10. Tuttunniartoq kinaluunniit piniarnermik aalisarnermillu nakkutilliisut allalluunniit Naalakkersuisunit taamatut piginnaatitaasut kiisalu politiit piumasaqarnerisigut piniarsinnaatitaanerminut uppernarsaammik atuuttumik takutitsisinnaasariaqarpoq.
Imm. 2. Tuttut pissatat, ikillit, ajoqutillit allatulluunniit naalliuttut naammattoorneqarpata tamanna sapinngisamik piaartumik nakkutilliinermik suliaqartunut imm. 1-mi taaneqartunut nalunaarutigineqassaaq, taakku Naalakkersuisunit piginnaatinneqarsinnaapput tuttup pineqartup toqunneqarnissaanut. Taamaalereerpat tuttu toqunneqartoq Namminersornerullutik Oqartussanut pigisassanngortinneqassaaq.

 

Immikkut akuersissuteqarneq.

§ 11. Ilisimatusarnikkut siunertanut nalunaarummi aalajangersakkat atorneqannginnissaannut Naalakkersuisut immikkut akuersissuteqarsinnaapput, tassunga ilanngullugu ilisimatusarnermut atatillugu piniarsinnaanermut akuersissuteqarlutik. Ilisimatusarnermut atatillugu piniarsinnaanissamut Naalakkersuisut erseqqinnerusunik piumasaqaasiorsinnaapput.
Imm. 2. Taamatuttaaq Naalakkersuisut nalunaarummi aalajangersakkat atorneqannginnissaannik immikkut akuersissuteqarsinnaapput tuttut inunnik, timmisartunik allanilluunniit tamanik angallattunik navianartorsiortitsilissagaluarpata, politiinullu, piniarnermik aalisarnermillu nakkutilliisunut imaluunniit inuit allat piginnaatillugit tuttunik pineqartunik toqutsinissaannut akuersissuteqarlutik. Tuttut toqutat Namminersornerullutik Oqartussanut pigisassanngortinneqassapput.

 

Pineqaatissiinerit.

§ 12. § 2-mi aamma § 3, imm. 2-4-mi kiisalu §§-ini 6-imiit 10-mut aalajangersakkanik unioqqutitsinerit akiliisitsinernik pineqaatissiissutaasinnaapput.
Imm. 2. Tuttut § 2-mik aamma § 3, imm. 2-miit 4-mut kiisalu §§-inik 6-imiit 7-imut unioqqutitsilluni pisarineqartut neqaat, amii pisataallu allat arsaarinnissutigineqarsinnaapput Naalagaaffiup karsianut iluaqutissanngorlugit. § 10-mik aamma § 11, imm. 1-imik unioqqutitsisoqarpat tuttut, tamatumunnga atatillugu pisarineqartut, neqaat, amii pisataallu allat arsaarinnissutigineqarsinnaapput Naalagaaffiup karsianut iluaqutissanngorlugit.

 

Atuutilersitsineq il.il.

§ 13. Nalunaarut una atuutilerpoq 15. juli 1999.
Imm. 2. Peqatigalugu Tuttut eqqissisimatitaanerat piniagaanerallu pillugit Namminersornerullutik Oqartussat nalunaarutaat nr. 11, 26. marts 1998-imeersoq atorunnaarsinneqarpoq.

Namminersornerullutik Oqartussat, 26. juni 1999.

Simon Olsen

/

Peder Munk Pedersen