Inatsisartut Naatsorsueqqissaartarfik pillugu inatsisaat nr. 11, 29. oktober 1999-imeersoq.

 

Kapitali 1
Siunertaa suliassallu

§ 1. Naatsorsueqqissaartarfik Kalaallit Nunaanni kisitsisitigut paasissutissiortarnernut qitiusumik oqartussaqarfiuvoq.
Naatsorsueqqissaartarfiup siunertaraa
1) inuiaqatigiit ineriartornerisa misissoqqissaarneqarnerinut, naalakkersuinikkut allaffissornikkullu ingerlatsinikkut aalajangiinernut, pilersaarusiornermut kiisalu inuiaqatigiit ilisimatusarfigineqarnerinut paasissutissatigut tunngavissat qularnaassallugit,
2) paasissutissanik katersinissat, suliarinninnissat misissueqqissaarnissallu siunertaralugit periutsinik ineriartortitsissalluni,
3) paasissutissanik tunniussisartut attuumassuteqartut atuisullu suleqatigalugit kisitsisitigut paasissutissat tunngaviusut amerlisarneqarnissaannut kisitsisitigut tunngavissat pissarsiariniarneqartarnissaat isumagissallugu
4) inuiaqatigiit ilisimatusarfigissallugit - tassunga ilanngullugit pingaartumik aningaasaqarnermut, inuussutissarsiornerup ingerlaneranut, inooqatigiinnermut, inuiaqatigiit ajunngitsumik inuuneqarnerinut kiisalu inuit agguataarnerinut tunngasunik - Kalaallit Nunaannut pingaarutilinnik,
5) kisitsisitigut paasissutissanik inuiaqatigiinni pissutsinut tunngasunik ingerlatitseqqittassalluni kiisalu naatsorsueqqissaartarfiup ilisimatusarnerinit paasisanik tamanut ingerlatitseqqittassalluni.

§ 2. Naatsorsueqqissaartarfik
1) kisitsisitigut paasissutissanik inuiaqatigiinni pissutsinut tunngassunik katersisassaaq, suliarinnittassalluni kiisalu saqqummiussisassalluni,
2) akilerneqarluni kisitsisitigut paasissutissanik katersuisinnaavoq, suliaqarsinnaalluni saqqummiussisinnaallunilu kiisalu Namminersornerullutik Oqartussat sullissiveqarfii allat, kommunit, kattuffiit namminersortullu suliffeqarfiutaat il.il. sinnerlugit ilisimatusarnernik ingerlatsisinnaalluni,
3) pisortat oqartussaasuisa nalunaarsuiffiisa, pisortat inuussutissarsiortullu allaffissornikkut suliaminnik ingerlatsinerannut atorneqartut, kiisalu kisitsisitigut paasissutissiornermut atorneqarsinnaasut, aaqqissuunnerini atorneqarnerinilu isumaginnittuussaaq peqataalluniluunniit,
4) ataatsimiititalianut ataatsimiititaliarsuarnullu kisitsisitigut paasissutissanik ikiuussinnaavoq,
5) kisitsisitigut paasissutissanik misissueqqissaarsinnaavoq eqqoriaanernillu suliaqarsinnaalluni,
6) nunat tamalaat akornanni kisitsisitigut paasissutissanut tunngasutigut suleqatigiinnermi sulianik isumaginnittassaaq,
7) misissoqqissaakkanik saqqummersittakkat timitalerneqarnissaannut nalunaarsuiffinnik kisit-sinernillu paasissutissanik toqqortarinnittassaaq nutarterisassallunilu,
8) inuiaqatigiit ilisimatusarfigisassavai.
Imm. 2. Naatsorsueqqissaartarfik aammattaaq naalakkersuisut aalajangiinerisigut Namminersornerullutik Oqartussat allaffeqarfiisa Inatsisartullu atugassaannik kisitsisitigut paasissutissanik pissarsiniarniarneq isumagisassavaa.

§ 3. Pisortat oqartussaqarfiat suliffeqarfialluunniit nalunaarsuiffiliornialerpat kiisalu kisitsisitigut paasissutissanik katersinialerpat suliaqarnialerpallu Naatsorsueqqissaartarfik ilisimatinneqassaaq aaqqissueqatigiinnissaq siunertaralugu.

§ 4. Naatsorsueqqissaartarfik ilisimatusarnerminit paasisaminik tamanut saqqummiussisussaatitaavoq.

 

Kapitali 2
Naatsorsueqqissaartarfiup aqunneqarnera

§ 5. Naatsorsueqqissaartarfimmut qulliunerusumik akisussaasussatut siulersuisunik toqqaasoqassaaq.
Imm. 2. Siulersuisut tallimanik ilaasortaqassapput inuiaqatigiinnik ilisimasaqartunik. Naalakkersuisut siulersuisunut ilaasortanik ukiuni pingasuni ilaasortaasussanik toqqaasassapput.
Imm. 3. Siulersuisut namminneerlutik suleriaasissiussapput.
Imm. 4. Naatsorsueqqissaarnermut pisortaq siulersuisut ataatsimiinnerini ataatsimeeqataasartutut peqataasassaaq.

§ 6. Siulersuisut pisortat kisitsisitigut paasissutissaataasa ataqatigiissaarneqarnissaannut siunnersuusiussapput kiisalu Naatsorsueqqissaartarfiup siunertamut aalajangersakkat naapertorlugit sulinera nakkutigissallugu.
Imm. 2. Siulersuisut Naatsorsueqqissaartarfiup suliniuteqarfissamisut siumut pilersaarutaannik kiisalu ukiumut pilersaarutaanik akuersisassapput.
Imm. 3. Siulersuisut suliffeqarfiup ingerlatsinera pillugit ukiumoortumik naalakkersuisunut nalunaaruteqartassapput.
Imm. 4. Siulersuisut siunnersuisartussanik ataatsimiititaliorsinnaapput.

§ 7. Naatsorsueqqissaarnermut pisortaq Naatsorsueqqissaartarfiup ulluinnarni aqunneqarneranik isumaginnissaaq sullissiveqarfiullu avammut kiinnertartorissallugu.
Imm. 2. Siulersuisut inassuteqarneratigut naalakkersuisut naatsorsueqqissaarnermut pisortamik toqqaasassapput.

§ 8. Naalakkersuisut Naatsorsueqqissaarfiup aqunneqarnera pillugu sukumiinerusunik malittarisassiorsinnaapput.

 

Kapitali 3
Aalajangersakkat allat

§ 9. Naatsorsueqqissaartarfiup tunngaviusumik paasissutissiornissaanut, § 2, imm. 1, 3 aamma 6 naapertorlugit, kiisalu suliniutissaanut ukiumoortumik aningaasaliissutit aningaasanut inatsisikkut aalajangerneqartassapput.
Imm. 2. Aningaasaateqarfinnit aningaasat pissarsiat, avataanillu aningaasalersuinerit allat Naatsorsueqqissaartarfiup atorsinnaavai aningaasat atorneqarnissaannut siunertaliunneqartut naapertorlugit.

§ 10. Pisortat oqartussaqarfii Naatsorsueqqissaartarfimmit qinnuitigineqarnertik naapertorlugu kisitsitigut paasissutissiornermut suliassatut pilersaarutigineqartut aalajangikkat iluanni paasissutissaatigisaminnik nalunaaruteqartassapput.

§ 11. Inuussutissarsiummik ingerlataqartut, sulisitsisut, inissianik piginnittut attartortullu kiisalu kikkut tamarmik nunanit allanit, taakkununnga Savalimmiut Danmarkilu ilanngullugit, nioqqutissanik eqqussuisut taakkununngaluuniit nioqquteqartut imaluunniit nunani allani aningaasatigut isumagisassaqartut Naatsorsueqqissaartarfiup suliassatut pilersaarutini kisitsisitigut paasissutissiugassatut aalajangiunneqarsimasut suliariniarnerini pisariaqartitaanik Naatsorsueqqissaartarfimmit qinnuigineqarnertik naapertorlugu paasissutissanik tunniussisassapput.

§ 12. Naalakkersuisut paasissutissanik Naatsorsueqqissaartarfimmut tunniussisarneq pillugu malittarisassiussapput.

§ 13. Inuit ataasiakkaat suliffeqarfiilluuniit ataasiakkaat pillugit paasissutissat Naatsorsueqqissaartarfiup §§-ini 10 aamma 11 naapertorlugit pissarsiarisai allanut ingerlateqqinneqassanngillat.

§ 14. Piffissaq eqqorlugu paasissutissanik § 10 aamma 11 naapertorlugu piumasaqaatigineqartunik piffissaq eqqorlugu tunniussinngitsoq, piaaraluni imaluuniit mianersuaalliorujussuarluni paasissutissanik eqqunngitsunik tunniussisoq akiliisussanngorlugu eqqartuunneqarsinnaavoq.
Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik assigisaaluunniit unioqqutitsisuuppat, ingerlatseqatigiiffik taamaannermisut akiliisussanngortinneqarsinnaavoq. Namminersornerullutik Oqartussat, kommuni, kommunilluunniit suleqatigiiffiat, kommunalbestyrelsit, nunaqarfinni aqutsisut il.il. pillugit inatsisartut inatsisaanni § 64-imut ilaatinneqartoq, unioqqutitsisuuppat, Namminersornerullutik Oqartussat, kommuni, kommunilluunniit suleqatigiiffiat taamaannermisut akiliisussanngortinneqarsinnaavoq.

 

Kapitali 4
Ikaarsaariarnermut, atortuulersitsinermut atorunnaarsitsinermullu aalajangersakkat

§ 15. Siulersuisunut ilaasortanik qinerseqqaarnermi ilaasortat marluk ukiup aappaa avillugu ilaasortaasussatut toqqarneqassapput.

§ 16. Inatsit 1. januar 2000 atuutilerpoq.
Imm. 2. Tamatumunnga peqatigitillugu Kalaallit Nunaanni naatsorsueqqissaartarneq pillugu Inatsisartut inatsisaat nr. 5, 19. juli 1989-imeersoq atorunnaarsinneqarpoq.

Namminersornerullutik Oqartussat, ulloq 29. oktober 1999

Jonathan Motzfeldt

/

Josef Motzfeldt