Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisaat nr. 9, 29. oktober 1999-imeersoq.

 

§ 1

Aningaasarsianit akileraarutit pillugit Inatsisartut inatsisaanni nr. 5, 19. maj 1979-imeersumi, kingullermik Inatsisartut inatsisaatigut nr. 15, 30. oktober 1998-imeersukkut allanngortinneqartumi makku allannguutigitinneqarput:

1. § 2, imm. 1, nr. 5 ima oqaasertaqassaaq:
"5) aktie-, anparts- imaluunniit andelsselskabimit il.il. Kalaallit Nunaanni angerlarsimaffeqartutut nalunaarsorneqarsimasumit iluanaarutisianik pissarsisartut."

2. § 13-imi immikkoortutut nutaatut ilanngunneqassaaq:
"Imm. 5. Pisassarisanik ernialinnik tunisinermut atatillugu taakku erniaannut tapullugit tunineqartunut imaluunniit erniaannut tapullugit tunineqanngitsunut akiliutit, akiliutinik pissarsisup aningaasarsiaasa naatsorsorneranni ilanngunneqassapput. Akiliutinik akiliisussaatitaasup aningaasarsiaasa naatsorsorneranni akiliutit ilanngaatigineqassapput.Akiliutit ukiumi aningaasarsiorfiusumi niuerfiusumi, akileraartussaatitaasup erniatigut isertitaasa naatsorsorneqarneranni ilanngunneqarlutillu ilanngaatigineqassapput. Erniat tapullugit tunineqartut imaluunniit tapullugit tunineqanngitsut akiliummut naapertuuttut ukiumi aningaasarsiorfiusumi akiligassanngorfiini, akileraartussaatitaasup erniatigut isertitaasa naatsorsorneqarneranni ilanngunneqassapput. Immikkoortumili matumani maleruagassat akileraartussaatitaasunut imm. 3-mi oqaaseqatigiit sisamaanni taaneqartutut ernianut aningaasartuutinik erniatigullu isertitanik agguaasartunut atuutinngillat."

Imm. 5 taamaalilluni imm. 6-inngorpoq.

3. § 14 b-p kingornatigut paragrafitut nutaatut ilanngunneqassaaq:
"§ 14 c. Aningaasarsiat akileraaruteqaataasussat naatsorsorneranni biilip, akileraartartup sulisitsisuminit atorfinitsitaanerminut allatulluunniit ikiuulluni sulinissaminik isumaqatigiissuteqarnerminut atatillugu privatimik atorsinnaasaata nalinga ilanngunneqassaaq, tak. imm. 2-miit 8-mut. Tamanna aamma atuuppoq inunnut siulersuisuni, ataatsimiititaliani, kommissionini, siunnersuisoqatigiinni, immikkut qinikkani allatulluunniit ataatsimoorfiusuni, matumani ilanngullugit Naalakkersuisunut, Inatsisartunut kommunalbestyrelsinullu ilaasortatut ikiortitulluunniit qinerneqarsimasunut.
Imm. 2. Illoqarfik biilip privatimik atorneqarfia 75.000 kvm.-isut annertutigisumik annertunerusumilluunniit aqqusineqarpat, biilip imm. 1-imi pineqartup akileraarutitigut nalinga ukiumut 40.000 kr.-inik angissusilerneqassaaq.
Imm. 3. Illoqarfik biilip privatimik atorneqarfia 25.000 kvm.-it 75.000 kvm.-illu akornannik annertutigisumik aqqusineqarpat, angissusiliussaq imm. 2-mi taaneqartoq 20.000 kr.-inut appartinneqassaaq.
Imm. 4. Illoqarfik biilip privatimik atorneqarfia 25.000 kvm.-it inorlugit annertutigisumik aqqusineqarpat, angissusiliussaq imm. 2-mi taaneqartoq 10.000 kr.-inut appartinneqassaaq.
Imm. 5. Sulliviit biiliinik biilinillu immikkut sanaajusunik allanik privatimik atuineq angissusiliussat imm. 2-miit 4-mut taaneqartut affaannut angissusilerneqassaaq. Biilit taamaattut sulisitsisup allaganngorlugu peqqussuteqarneratigut angerlarsimaffiup suliffiullu akornanniinnaq atorneqartarpata angissusiliussat imm. 2-miit 4-mut taaneqartut sisamararterutaannut angissusilerneqassapput.
Imm. 6. Lastbiilinik 4 t.-it sinnerlugit oqimaassusilinnik kiisalu biilinik tankiminni usisartunik, kraninik kivitsissutinik aammalu eqqaasut biiliinik privatimik atuineq akileraaruserneqartussaanngilaq.
Imm. 7. Biilit ukiup ilaannaani atugassaritinneqarpata nalingat akileraaruteqaataasussaq ullunik biilinik atuiffiunngitsunik ilanngarlugu appartinneqassaaq. Akileraartussaatitaasoq biilit atorsinnaanerinut akiliuteqarpat nalingat akileraaruteqaataasussaq aningaasanik akiliutigineqarsimasunik ilanngarlugu appartinneqassaaq.
Imm. 8. Sulisitsisup allaganngorlugu peqqussutigisimappagu akileraartussaatitaasoq suliartoqquneqarnermini biilinik atuissasoq, aatsaalli akileraartussaatitaasup suliartoqquneqarsinnaanermi nalaani biilit privatimik atussanngippagit angerlarsimaffimmik suliffimmillu akornanni biilimik atuinerat akileraartussaatitaasup privatimik atuineratut isigineqassanngilaq."

4. § 17 b, imm. 1-imi "aapparisap" kingornanut ilanngunneqassaaq: "imaluunniit inooqatigisap soraarnerussutisiassanit pisartagaqartinnissaanut".

5. § 17 b, imm. 1-imi normutut nutaatut ilanngunneqassaaq:
"Nr. 4) aappaasumut imaluunniit inooqatigisamut soraarnerussutisiassat aappaasumut, aappaasumut avinneqarsimasumut imaluunniit inooqatigisamut toqukkut qimagaasumut pisartagaritinneqarsinnaapput. Inooqatigisaq tassaavoq inuk kinaassusaatigut ilisimaneqartoq atortuulersitsinerullu nalaani toqusumik najugaqateqarsimasoq, imaluunniit inuk toqusup katissimasinnaasaralua imaluunniit katinngikkaluarlugu aapparisamisut nalunaarsorteqatigisinnaasaralua, tassa toqusup toqunissani sivikinnerpaamik qaammatinik pingasunik sioqqullugu testamentiliornermigut kingornussisussami minnerpaamik pisassaasut annertutigisumik, kingornussisarnermullu inatsit naapertorlugu aappaasup pisassaasut annertutigisumik kingornusseqataasussatut nalunaarsimasaa, aammalu toqunissaq sioqqullugu ukiut marluk kingulliit aalajangersimasumik najugaqatigisimasaa imaluunniit sivikinnerpaamik ukiuni marlunni ingerlaannartumik aalajangersimasumik najugaqatigisimasaa, tassa najugaqatigiinneq paaqqinniffimmut, matumani ilanngullugu utoqqarnik paaqqinniffimmut inissinneqarneq peqqutigiinnarlugu kipisimappat,"

Nr. 4-miit 6-imut matuma kingorna nr. 5-imiit 7-nngorput.

6. § 17 b, nr. 4-mi nr. 5-inngortumi "aappaasumut avinneqarsimasumut" kingornanut ilanngunneqassaaq : "imaluunniit inooqatigisamut".

7. § 17 b, nr. 5-imi nr. 6-inngortumi allassimasoq "taamaattorli qitornanut toqukkut qimagaasunut" allanngortinneqassaaq ima: "toqusup qitornaanut toqukkut qimagaasunut".

8. § 63, imm. 2 ima oqaasertaqassaaq:
"Imm. 2. Akileraarutit sippuutaasa utertinneqarneranni akileraartussaatitaq aningaasat 4 pct.-iinik taartisiaqartinneqassaaq. Taartisiat kommunip akileraarfiup akilissavai. Akileraarutit sippuutaat aningaasanit § 46 malillugu akiliutigineqarsimasunik illua´tungissaqartinneqarpata taartisiaqartitsisoqassanngilaq."

9. § 115-imi imm. 4-tut nutaatut ilanngunneqassaaq:
"Imm. 4. Skatterådip siulittaasuni rådi sinnerlugu suliassani utaqqisinneqarsinnaanngitsuni aalajangiinissamut kiisalu suliassanik Skatterådimut saqqummiunneqareersimasunik malinnaaviginninnissamut piginnaatissinnaavaa. Siulittaasup aalajangiineri il.il. rådip tullissaanik ataatsimiinnerani saqqummiunneqartassapput."

10. § 115-imi imm. 5-itut nutaatut ilanngunneqassaaq:
"Imm. 5. Skatterådip allattoqarfini rådi sinnerlugu naammagittaaliuutinik, naammagittaalliortoq tamakkiisumik isumaqatigineqartillugu appartitsisinnaanermut, nammineerluni suliassanik suliareqqiinissamut, kommunini kommissionik akileraarusiisartunik namminneerlutik suliassanik suliareqqiinissaannut piginnaatitsisinnaanermut, kiisalu pissutsit immikkut ittut atuutsillugit naammagittaalliuutigineqartunut akileraarutissat, tamakkiisumik ilaannakortumilluunniit akilinngikkallarnissaannik nalunaaruteqarsinnaanermut piginnaatissinnaavaa. Allattoqarfiup aalajangiineri il.il. rådip tullissaanik ataatsimiinnerani saqqummiunneqartassapput."

Imm. 4-miit 8-mut matuma kingorna imm. 6-imiit 10-nngorput.

 

§ 2

Inatsit ulloq 8. november 1999 aallarnerfigalugu atuutilerlunilu atortuulerpoq. Ulloq taanna aallarnerfigalugu pisut § 1, nr. 1-imut, 2-mut 8-mullu atortuulerput. Taamaattorli § 1, nr. 3 ukioq aningaasarsiorfiusoq 2000 aallarnerfigalugu atortuulerpoq.

Namminersornerullutik Oqartussat, ulloq 29. oktober 1999

Jonathan Motzfeldt

/

Josef Motzfeldt