23. oktober 1998

UKA 1998/55 UKA 1998/82 UKA 1998/83

 

pillugu

Inatsisartut Inatsiseqarnermut ataatsimiititaanit

ISUMALIUTISSIISSUT

(UKA 1998/55)
Pisortat ingerlatsineranni suliassat suliarineqartarnerat pillugu Inatsisartut inatsisaata allanngortinneqarneranik Inatsisartut inatsisissaattut siunnersuut.

Siunnersuutip aappassaaneerlugu suliarineqarnissaanut tunniunneqartoq

(UKA 1998/82)
Pisortat ingerlatsineranni suliassat suliarineqartarnerat pillugu Inatsisartut inatsisaanni § 7a-p suliffeqarfinnut Namminersornerullutik Oqartussanit pigineqartunut atortuulersinneqarnissaanik Inatsisartut aalajangernissaannut siunnersuut.

Suliarineqarnerata nanginneqarnera.

(UKA 1998/83)
Suliffeqarfinni Namminersornerullutik Oqartussanit pigineqartuni oqaatsitigut sullinneqarneq pillugu Inatsisartut inatsisissaattut siunnersuummik saqqummiussisoqarnissaanik Inatsisartut aalajangiinissaannut siunnersuut.

Suliarineqarnerata nanginneqarnera.

Suliamik suliarininnermi Inatsisartut Inatsiseqarnermut ataatsimiititaanit peqataapput

inatsisartuni ilaasortaq Otto Steenholdt (A), siulittaasoq
inatsisartuni ilaasortaq Anders Nilsson (A)
inatsisartuni ilaasortaq Niels MįtāK (S)
inatsisartuni ilaasortaq Johan Lund Olsen (IA)

Inatsisartut Inatsiseqarnermut ataatsimiititaata Inatsisartut siullermeerinnereerneranni Inuit Ataqatigiinnit siunnersuutit pingasut oqaaseqaatitaat ilanngullugit misissuataarpai. Ataatsimiititap suliamik suliarinninnerani KANUKOKA, tamatuminnga qinnuigineqarnermi kingorna suliassat suliarineqartarnerat pillugu inatsimmut allannguutissatut siunnersuummut saqqummiunneqartumut tunngatillugu isummersuutiminik saqqummiussinissaminut aggersarneqarpoq, kiisalu suliassat suliarineqartarnerat pillugu inatsisip 1994-imi atortuulersinneqarnerata kingorna kommunit ingerlatsinerannut ataatsimut isigalugu qanoq sunniuteqarsimanersoq Kattuffik nalileeqquneqarpoq. Tamatuma kingorna Kanukokap inassuteqaatai ataatsimiititap aalajangiinermini ilanngullugit tunngavigai.

Inatsiseqarnermut ataatsimiititap erseqqissassavaa suliassat suliarineqartarnerat pillugu inatsimmut allannguutissatut siunnersuutit saqqummiunneqartut KANUKOKA-mit akerlerlilerneqanngimmata.

Ataatsimiititap isumaqatigiittup naapertuuttutut isigaa innuttaasut oqaatsitigut pisortanit oqartussaasunit sullinneqarneranni pisinnaatitaaffiisa suliassat suliarineqartarnerat pillugu inatsimmi ilanngunneqarnissaat, taamaalilluni taamatut inatsisitigut pisinnaatitaaffeqarneq ersarissumik paatsuugassanngitsumillu allassimalissaaq.

Inatsiseqarnermut ataatsimiititap tassunga atatillugu, KANUKOKA-llu kaammattuineratigut Naalakkersuisut kaammattorpai suleqatigiissitamik, pisortat oqartussaasut ulluinnarni sullissinerannut sanilliullugu sulianik suliarinnittarnermut inatsisip qanoq tulluartigineranik naliliisussamik, pilersitseqqullugit. Inatsimmi aalajangersakkat iluamik malitsinneqarnissaannut aporfissaqartoq paasineqarpat suleqatigiissitaq aaqqiissutissanik siunnersuusiortariaqarpoq.

Taama oqaaseqarluni ataatsimiititaq inassuteqarpoq Pisortat ingerlatsineranni suliassat suliarineqartarnerat pillugu Inatsisartut inatsisaata allanngortinneqarneranik Inatsisartut inatsisissaattut siunnersuut maannakkutut iluseqarluni aappassaaneerlugu suliarineqassasoq.

Pisortat ingerlatsineranni suliassat suliarineqartarnerat pillugu Inatsisartut inatsisaanni § 7a-p suliffeqarfinnut Namminersornerullutik Oqartussanit pigineqartunut atortuulersinneqarnissaanik Inatsisartut aalajangiinissaannut siunnersuut saqqummiunneqartoq aammalu Suliffeqarfinni Namminersornerullutik Oqartussanit pigineqartuni oqaatsitigut sullinneqarneq pillugu Inatsisartut aalajangiinissaannut siunnersuut saqqummiunneqartoq ataatsimiititap isumaqatigiittup ilanngullugit isumaqatigai.

Ataatsimiititaq isumaqarluinnarpoq pissusissamisoortuusoq piginneqatigiiffiit Nammiinersornerullutik Oqartussanit pigineqartut oqaatsit atorluarneqarsinnaanerusut aallaavigalugit sullissippata.

Taamaattorli ataatsimiititaq isumaqarpoq suliffeqarfiit namminersornerullutik oqartussanit pigineqarnerat tunngavigalugu immikkut ittumik piumasaqaateqarfigineqarsinnaassasut, minnerunngitsumik oqaatsitigut sullinneqarneq eqqarsaatigalugu.

Aalajangiinissamik siunnersuutit taakku marluk Inatsisartunit akuersissutigineqarnerisigut innuttaasut piginneqatigiiffinnut namminersornerullutik oqartussanit pigineqartunut attaveqarnerminni oqaatsit pineqartut arlaat atornissaat piumasaqaateqarsinnaanerat inatsisit tunngavigalugit pisinnaanngussaaq.

Taamatut oqaaseqarluni Inatsisartut Inatsiseqarnermut ataatsimiititaata Pisortat ingerlatsineranni suliassat suliarineqartarnerat pillugu Inatsisartut inatsisaanni § 7a-p suliffeqarfinnut Namminersornerullutik Oqartussanit pigineqartunut atortuulersinneqarnissaanik Inatsisartut aalajangiinissaannut siunnersuutip aammalu Suliffeqarfinni Namminersornerullutik Oqartussanit pigineqartuni oqatsitigut sullinneqarneq pillugu Inatsisartut inatsisissaattut siunnersuummik saqqummiisoqarnissaanik Inatsisartut aalajangiinissaannut siunersuutip Inatsisartunit siullermeerlugit suliarineqarnerisa nanginneqarnissaat inassutigaa.

 

	Otto Steenholdt (A) ataatsimiititami siulittaasoq
Anders Nilsson (A)		Niels MatāK (S)
Johan Lund Olsen (IA)