Ulloq 28. august 1998 UKA 1998/36
Oqaasiliortut pillugit Inatsisartut inatsisaata allanngortinneqarneranik Inatsisartut inatsisissaannut siunnersuummut oqaaseqaatit.
Nalinginnaasumik oqaaseqaatit:
Oqaasiliortut sulinerminni tunngavigaat Oqaasiliortut pillugit Inatsisartut inatsisaat nr. 12, 26. oktober 1989-imeersoq.
1995-imi upernaakkut Inatsisartut ataatsimiinneranni Inatsisartut ataatsimiititaliaqarnerat pillugu suleqatigiissitap atorfilinnik inuttaqartup isumaliutissiissutaata Inatsisartunit oqaluuserineqarnerani siunnersuisoqatigiinnut, ataatsimiititalianut sinniisoqarfinnullu ilaasortassanik toqqaasarnermi oqartussaassutsip Inatsisartunit Naalakkersuisunut nuunneqarnissaani isumaliutissiissummi kaammattuutigineqartoq Inatsisartut isumaqatigalugu akuersaarpaat.
Oqartussaassutsinik nuussinermut tunuliaqutaasutut pissutigitinneqartoq suleqatigiissitaliap ima oqaatigaa: "Inatsisartut inatsisiliornerinnarmik tunngaviatigut sapinngisamik sammisaqartariaqarput, taamaalillutik Kalaallit Nunaanni inatsisiliortut qullerpaatut inissisimallutik inatsisiliorneq suliarisariaqarlugu, inatsisinillu atuutsitsisut aalajangiiniartarnerannut toqqaannartumik akuliunnaveersaarlutik. Inatsisartunut ilaasortat ataatsimiititaliani sinniisoqarfinnilu inatsisiliornermut tunngassuteqanngitsuni peqataanermi annertuumik suliakkersorneqartarnikkut sapinngisamik annertuumik artukkernaveersaarneqartariaqarput."
Inatsisartut aalajangernerata kingunerisaanik Oqaasiliortut pillugit Inatsisartut inatsisaanni ilaasortassanik toqqaasussaatitaasut allanngortinneqassapput, tamannalu siunnersuummut matumunnga tunngaviuvoq.
Allannguutissatut siunnersuut manna Oqaasiliortut suliassaasa allanngortinneqarnerannik nassataqartussaanngilaq, Oqaasiliortunili ilaasortanik toqqaasussaatitaanerup Inatsisartunit Naalakkersuisunut nuunneqarnera kisiat kingunerissallugu.
Siunnersuut aningaasatigut allaffissornikkullu kinguneqassanngilaq.
Aalajangersakkanut ataasiakkaanut oqaaseqaatit:
§ 1-imut
Ataatsimut isigalugu nalinginnaasumik oqaaseqaatit innersuussutigineqarsinnaapput. Manna tikillugu § 2, imm. 2-mut 3-mullu tunngatillugu allanngortitsisoqanngilaq.
§ 2-mutInatsisartut inatsisaat januarip aallaqqaataani 1999-imi atuutilissaaq.
1998-imi januarip aallaqqaataaniit atuuttussamik nutaamik ilaasortassanik toqqaasoqarpoq 1998-imi januarip aallaqqaataanit 2001-imi decembarip 31-ianut atuuttussanik. Oqaasiliortunut ilaasortat arlalllit assigiinngitsunik pissuteqarlutik Oqaasiliortut sulinerannut peqataasinnaajunnaarmata ilaasortanik nutaanik toqqaasoqarnissaa pisariaqarpoq. Taamaattumik siunnersuutigineqarpoq naalakkersuisut 1999-imi januarip aallaqqaataani atuutilersussamik piffissamut ukiunut pingasunut, matumani 1999-imi januarip aallaqqaataaniit 2001-imi decembarip 31-ianut, ilaasortassanik toqqaassasut, tamatumalu kingorna piffissamut tamarmiusumut ukiuni sisamani ilaasortassanik toqqaasoqaqqissasoq.
Allatigut maannamut § 4-aasimasoq allanngortinneqanngilaq.