23. oktober 1998

UKA 1998/23

 

Raajanut akitsuutit pillugit Inatsisartut inatsisaata allanngortinneqarneranik

Inatsisartut inatsisissaattut siunnersuut

pillugu

Inatsisartut Akileraartarnermut ataatsimiititaanit

ILASSUTITUT ISUMALIUTISSIISSUT

aappassaaneerlugu suliarinninnissamut tunniunneqartoq

Suliassamik suliarinninnermini Inatsisartut Akileraartarnermut ataatsimiititaanit peqataapput

inatsisartuni ilaasortaq Karl Lyberth (S), siulittaasoq
inatsisartuni ilaasortaq Lars Karl Jensen (S) Laannguaq Lyngemut sinniisussaq
inatsisartuni ilaasortaq Siverth K. Heilmann (A)
inatsisartuni ilaasortaq Otto Storch (A) Knud Sørensenimut sinniisussaq
inatsisartuni ilaasortaq Manasse Berthelsen (IA)

Inatsisartut Akileraartarnermut ataatsimiititaat 7., 18. aamma 23. oktober 1998 ataatsimiinnermini raajanut akitsuutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut oqaluuseraa. Siunnersuummik suliarinninnermut atugassanik ataatsimiititaq Aningaasaqarnermut Ineqarnermullu Naalakkersuisumit paasissutissanik piniarpoq.

Akileraartarnermut ataatsimiititami amerlanerussuteqartut, Siumut Inuit Ataqatigiillu, raajanut akitsuutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut saqqummiunneqartoq Inatsisartunit akueqineqarnissaa matumuuna inassutigaat.

Amerlanerussuteqartut isumaqarput misissuinerit ingerlanneqartut takutikkaat avataasiorluni raajarniarneq ullumikkut patajaatsutut isigisariaqartoq, taamaattumik amerlanerussuteqartut naliliipput raajanut akitsuummik 3 %-imut qaffaaneq taamatut raajarniarnerup nammassinnaagaa, amerlanerussuteqartut tassunga atatillugu oqaatigissavaat avataani raajat tunisassiarineqartut kisimik akitsuuserneqarmata.

Akileraartarnermut ataatsimiititami ikinnerussuteqartut, Siverth K. Heilmann, Atassut, aamma Otto Storch, Atassut, akuerisinnaanngilaat Kalaalit Nunaanni inuussutissarsiutit pingaarnersaannut akornutaaqqissinnaasunik pilersitsisoqarnissaa, nunarsuarmimi aningaasaqarniarnikkut pissutsit ajorsiartortut raajat avammut nioqqutigineqarnerat eqqorsimammassuk.

Taamaammat ikinnerussuteqartut taakku siunnersuutigaat Naalakkersuisut peqquneqassasut raajanut akitsuutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut atorunnaarseqqullugu.

 

	Karl Lyberth (S) ataatsimiititami siulittaasoq
Lars Karl Jensen (S)		Siverth K. Heilmann (A)
Otto Storch (A)		Manasse Berthelsen (IA)