24. august 1998 UKA 1998/23
Oqaaseqaatit nalinginnaasut
Naalakkersuisut 1999-imi aningaasanut inatsisissamut siunnersuutaannut atatillugu siunnersuutigineqarpoq raajanut akitsuutip, ulloq 1. januar 1999 aallarnerfigalugu, 1 procent-imiit 3 procent-imut qaffanneqarnissaa. Ilutigitillugu ilanngaatip umiarsuarmut ataatsimut 4.000.000 koruuniusup atorunnaarsinneqarnissaa siunnersuutaavoq.
Siunnersuutip aningaasaqarniarnikkut siunertaraa kilisaatit raajanik tunisassiortut raajarniarsinnaanerminnut atatillugu aningaasartuutinik akilersuisuunissaat pissusissamisoortutut isigineqarmat, tassa aalisarnermik nakkutilliisoqarnerup aningaasalersornissaanut, kilisaatimmi atorlugit raajarniarneq pissutiginerullugu nakkutilliinermik aaqqissuussineq pilersinneqarnikuummat-.
Raajanut akitsuutip qaffanneqarnerata il.il. kingunerisaannik ukiumi naatsorsuuteqarfiusumi 1999-imi aammalu ukiuni missingersuusiorfiusuni isertitassat 14 mio. koruuninik qaffannissaat naatsorsuutigineqarpoq, taamaalillutik raajanut akitsuutit ukiumut katillutik 20,5 mio. koruuniussallutik. Raajanut akitsuutip qaffanneqarneratigut inuttat akissarsiaannit akileraarutissat malunnanngingajattumik annikillissapput, kiisalu aamma selskabit akileraarutaannut malunniutissalluni, tassami selskabip aningaasarsiami akileraaruteqaataasussat naatsorsornerini raajanut akitsuut ilanngaatigisinnaammagu. Selskabilli killeqanngitsumik nalikilliliisinnaaneq aqqutigalugu akileraarutissaminnik annertuumik kinguartitsisarmata, ukiuni aggersuni selskabit akileraarutaasigut isertitassat annaasaqarfiunissaat naatsorsuutigineqanngilaq.
Akitsuummik qaffaaneq allaffissornermut sunniuteqartussaanngilaq.
Aalajangersakkanut ataasiakkaanut oqaaseqaatit
§ 1, nr. 1-imutSiunnersuutaavoq akitsuutip akitsuusigassat tunngaviisa 3 procent-iisut annertussuseqarnissaa.
§ 1, nr. 2-mutSiunnersuutigineqarpoq kvartalimut akitsuutissat naatsorsorneqarneranni ilanngaatissap 1 mio. koruuniusup atorunnaarsinneqarnissaa, tamatumalu kingunerisaanik ilanngaatissanik atunngitsuukkanik ukiumi akitsuuteqarfiusumi kvartalimut tullermut nuussisinnaanerup aammattaaq atorunnaarsinneqarnissaa.
§ 2-mutSiunnersuutigineqarpoq inatsisip ullormi 1. januar 1999-imi atortuulernissaa.