16. oktober 1998

UKA 1998/21

 

Inatsisartut Akileraartarnermut ataatsimiititaata Aningaasarsianit akileraarutit pillugit Inatsisartut inatsisaata

allanngortinneqarneranik Inatsisartut inatsisissaattut siunnersuut

pillugu

ISUMALIUTISSIISSUTAA

Aappassaaneerlugu suliarineqarnissaanut tunniunneqartoq

Suliamik suliarinninnermi Inatsisartut Akileraartarnermut ataatsimiititaannit peqataapput

inatsisartuni ilaasortaq Karl Lyberth (S), siulittaasoq
inatsisartuni ilaasortaq Laannguaq Lynge (S)
inatsisartuni ilaasortaq Siverth K. Heilmann (A)
inatsisartuni ilaasortaq Otto Storch (A) Knud Sørensenimut sinniisussatut
inatsisartuni ilaasortaq Manasse Berthelsen (IA)

Inatsisartut Akileraartarnermut ataatsimiititaat 25. september aamma 7. oktober 1998 ataatsimiimmat Aningaasarsianit akileraarutit pillugit Inatsisartut inatsisaata allanngortinneqarneranik Inatsisartut inatsisissaattut siunnersuut suliarineqarpoq. Suliarinninnerminut atugassamik ataatsimiititaq Aningaasaqarnermut Ineqarnermullu Naalakkersuisumik 7. oktober 1998 isumasioqatiginnippoq, soorluttaaq ataatsimiititaq Naalakkersuisuni ilaasortamit paasissutissanik allaganngorlugu pissarsisoq.

Selskabip pigisaasa akiligassaasalu ilaasa tamarmiusulluunniit selskabimut allamut tunniunneqarneranni nalinginnaasuuvoq pigisat akiligassallu ataasiakkaat pillugit maleruagassat atuuttut naapertorlugit selskabimi unittumi akileraaruserneqartarnerat.

Mannali tikillugu Skatterådip akileraarutitigut sunniuteqanngitsumik kattunnerit nangitsinermik tunngaveqartut amerlanngitsut akuerisarsimavai.

Taamaammat siunnersuutip siunertaraa selskabit akileraarutitigut sunniuteqanngitsumik kattussinnaanerisa inatsisiliuunneqarnissaat.

Kattunnerit akileraarutitigut maleruagassartaat nangitsinermik tunngaveqarput. Tassa imaappoq selskabip unittup pigisamigut aamma akiliagassamigut, kattunnermi, pigisanik agguataarinermi nuussinermiluunniit selskabimut ingerlaqqittumut nuunneqartutigut iluanaarutai imaluunniit annaasai selskabimi unittumi akileraaruserneqarneq ajortut. Akileraarusiineq aatsaat pissaaq selskabip ingerlaqqittup pigisat akiligassallu nanginneqarsimasut tunippagit. Taavali pigisat akiligassallu nanginneqartut selskabip ingerlaqqittup aningaasarsiaasa naatsorsorneqarneranni, selskabip unittup piffissani taakkuninnga pissarsiffiini pissarsiatut isigineqassapput, aammalu selskabip unittup akiliutigisimasaatulli akilittut isigineqassallutik, soorluttaaq selskabip unittup akileraarutitigut nalikilliliissutigisimasinnaasai il.il. selskabimit ingerlaqqittumit taamatut pineqarsimasutut isigineqassasut.

Akileraarutitaqanngitsumik kattunneq siunertarineqanngitsunik iluaqutissartaqaqqunagu siunnersuutigineqarpoq akileraarutitigut sunniuteqanngitsumik kattunniarneq pillugu Skatterådimut qinnuteqartoqartarnissaa, kiisalu aamma kattunnermi akileraarutitigut iluaqutissaasinnaasut siunertarineqanngitsut sunniuteqannginnissaat pillugit Skatterådi immikkut piumasarisaasunik aalajangersaasinnaassasoq. Aammattaaq siunnersuutaavoq kattunneq akileraannginnissamik siunertaqarpat imaluunniit akileraannginnissaq siunertanut pingaarnernut ilaappat Skatterådip itigartitsinissaminut periarfissaqarnissaa.

Siunnersuut imarisamigut teknikertalerujussuummat Akileraartarnermut ataatsimiititaq Aningaasaqarnermut Ineqarnermullu Naalakkersuisumik ilaatigut isumasiuisimavoq, ilaatigullu Naalakkersuisumit pineqartumit allakkatigut paasissutissanik aamma pissarsisimalluni.

Akileraartarnermut ataatsimiititap siunnersuutip kingunerisinnaasai immikkut samminiarsimavai, aammattaarli Akileraartarnermut ataatsimiititap naammagisimaarlugu maluginiarpaa akileraarutitigut arlaatigulluunniit kinguneqartussaanngitsumik kattussisinnaaneq, Skatterådip akuersineratigut, ingerlanneqarsinnaasassasoq.

Akileraartarnermut ataatsimiititap isumaqatigiittup ilimagaa, Skatterådip, akileraarutitigut arlaatigulluunniit kinguneqartussaanngitsumik kattussinissaq, akuerinavianngikkaa kattussiniarneq akileraarutitigut iluaqutissat kisiisa pillugit tamakkiisumik ilaannakortumilluunniit ingerlanniarneqarpat, aatsaalli tamanna pisassasoq aningaasaqarnikkut illersorneqarsinnaasumik pineqartoq ingerlanneqarsinnaappat, assersuutigalugu nutaamik aaqqissuusseqqinnermi imaluunniit selskabini pisariillisaanerit ingerlanneqassatillugit, tamatumani selskabit pineqartut, Skatterådimit akuerineqarsinnaasumik, akileraarutitigut arlaatigulluunnit kinguneqartussaanngitsumik kattussinissamut atatillugu niueqateqarpata.

Naalakkersuisuni ilaasortaq siunnersuutip kingunerisinnaasai pillugit nassuiaateqarnermini Akileraartarnermut ataatsimiititamut assersuumminik saqqummiussaqarpoq. Assersuummi ilaatigut paasissutissiissutigineqarpoq akileraarutitigut kingunerisinnaasat siunnersuummi maleruagassat atoraanni qanoq issanersut, aamma maleruagassat ullumikkut atuuttut atoraanni atugarisat qanoq inissisimasarnersut.

Naalakkersuisuni ilaasortap nassuiaataata takutippaa siunnersuutikkut pineqartoq tassarpiaasoq akileraarutitigut iluaqutissaq selskabimi ingerlaqqittumiiginnassasoq, kattunnikkut naliliutigilikkat selskabimit tunineqarnissaasa tungaanut, taamaalillunilu selskabip ingerlaqqittup aningaasaqarnera pitsaanerulissalluni kiisalu selskabi ingerlaqqittoq, selskabip tiguneqartup akileraarutitigut inissisimaneranik tigusisussaammat, kattunnikkut eqqunngitsumik tunngavilimmik akileraarutitigut iluaqutissarsissanngitsoq.

Siunnersuummi immikkoortup aappaa tassaavoq selskabini, kinguaariinnit tulliuttunit ingerlanneqalernissaminnut piukunnarsisuni, sulisut aningaasarsiamik akileraaruserneqarnissaraluannik kinguartitsisinnaalissasut 50.000 kr. pallillugit nalinginut, tamatumani aningaasarsiat pineqartut atorneqassappata selskabimi kinguaariinnit tulliuttunit ingerlanneqalernissaminut piukkunnarsisumi aktianik, imaluunniit piginneqataassutinik (anpartinik) pisinermut, soorluttaaq sulisorineqartup iluanaarutaanit akileraarusiinissaq 50.000 kr. palillugit nalinganik kinguartitsisinnaaneq pisinnaassasoq sulisorineqartoq selskabimi kinguaariinnit tulliuttunit ingerlanneqalernissaminut piukkunarsisumi aktianik, imaluunniit piginneqataassutinik (anpartinik) nalingi naapertuun-nerakkat ataallugit pisimappat.

Akileraartarnermut ataatsimiititaq isumaqatigiittoq isumaqarpoq sulisorineqartup isertitarisaanit akileraarusiinissamut 100.000 kr. nalingat pallillugu kinguartitsisinnaanissaq periarfissaalluartoq selskabimi pineqartuni kinguaariinnut tulliuttunut tunniussisinnaasoqartalernissaanut.

Akileraartarnermut ataatsimiititap immikkut naammagisimaarlugu maluginiarpaa selskabimi sulisorineqartoq aamma aktianik amerlanerpaanik pigisaqartoq siunnersuut naapertorlugu periarfissaqalissammata taamatut kinguaariinnut tulliuttunut naapertuulluartumik nuussisoqarsinnaasalernissaanut.

Akileraartarnermut ataatsimiititami amerlanerussuteqartut, Siumut Atassullu, matumuuna inassutigissavaat aningaasarsianit akileraarutit pillugit Inatsisartut inatsisaata allanngortinneqarnissaanik Inatsisartut inatsisaattut siunnersuut saqqummiunneqartoq akuereqqullugu, amerlanerussuteqartut isumaqarmata inuussutissarsiummik ingerlatsisut pitsaanerpaamik periarfissaqartinneqarlutik sulisinnaasariaqartut, taamaammallu inuussutissarsiummik ingerlatsisut selskabit kattunnerisigut eqiterinissamik pisariaqartitsinerat akileraartarnermut tunngasutigut akornuserniarneqassanngitsoq, taakkumi ilusiliinerup iluarsiivigineqarneratigut siunertamut naapertuuttutut isigineqartariaqarmata kiisalu selskabip ingerlaqqittup aningaasarissaarnerulernera kattussinerup ilumut piviusunngortinneqarsinnaaneranut aalajangiisuulluinnassammat.

Ataatsimiititami ikinnerussuteqartut, Inuit Ataqatigiit, isumaqataanngilaq selskabit kattunnerminni akileraarutitigut sunniuteqanngitsumik pitsaanerusumik periarfissinneqarnissaannut, Inuit Ataqatigiimmi isumaqarmata selskabit angisuut suli pitsaanerusumik periarfissaqalissasut selskabinik mikinerusunik tigusiortornissaminnut, tamatumalu kingunerissagaa eqiterinerit pisariillisaanerillu inuiaqatigiinni suliffissaqartitsinerup annikinnerulernissaanik.

Selskabit eqiterillutik pisariillisaaniarlutillu kattunnissartik kissaatigippassuk Inuit Ataqatigiit isumaqarput inuiaqatigiit akileraarutitigut iluanaarnarnerusumik aaqqissuisariaqanngitsut, eqiterinerimmi pisariillisaanerillu imminni selskabimut ingerlaqqittumut ingerlaannarnissamik periarfissiisussaammata.

Taamaammat Inuit Ataqatigiit §§ 25 c, 25 d, 25 e, 25 f, 25 g, 25 h, 25 i, 25 j aamma 25 k-mik Inatsisartut aningaasarsianit akileraarutit pillugit inatsisaata allanngortinneqarnissaanik Inatsisartut inatsisissaattut siunnersuumiittunik akuerseqataallutik taaseqataasinnaanngillat.

 

	Karl Lyberth ataatsimiititami siulittaasoq
Laannguaq Lynge (S)		Sivert K. Heilmann (A)
Otto Storch (A)		Manasse Berthelsen (IA)