24. august 1998 UKA 1998/21
Oqaaseqaatit nalinginnaasut
Selskabip pigisaasa akiligassaasalu ilaasa tamarmiusulluunniit selskabimut allamut tunniunneqarneranni nalinginnaasuuvoq pigisat akiligassallu ataasiakkaat pillugit maleruagassat atuuttut naapertorlugit selskabimi unittumi akileraaruserneqartarnerat.
Inuussutissarsiutinik ingerlatat aaqqissuussaanerisa allanngortinneqarnissaat oqilisaassiviginiarlugit siunnersuutigineqarpoq selskabit ilaasa, kattunneq, pigisanik agguataarineq imaluunniit nuussineq kapitalimi pineqartoq tunngavigalugu tunisaqaraangata, kattunneq pillugu kapitalimi maleruagassat malillugit akileraaruserneqarnissamik periarfissinneqarnissaat, tassa imaappoq akileraarutitigut sunniutitaqanngitsumik kattunnissaq, pigisanik agguataarinissaq nuussinissarluunniit kissaatigineqartillugu.
Kattunnerit akileraarutitigut maleruagassartaat nangitsinermik tunngaveqarput. Tassa imaappoq selskabip unittup pigisamigut aamma akiligassamigut, kattunnermi, pigisanik agguataarinermi nuussinermiluunniit selskabimut ingerlaqqittumut nuunneqartutigut iluanaarutai imaluunniit annaasai selskabimi unittumi akileraaruserneqarneq ajorput. Akileraarusiineq aatsaat pissaaq selskabip ingerlaqqittup pigisat akiligassallu nanginneqarsimasut tunippagit.
Taavali pigisat akiligassallu nanginneqartut selskabip ingerlaqqittup aningaasarsiaasa naatsorsorneqarneranni, selskabip unittup piffissani taakkuninnga pissarsiffiini pissarsiatut isigineqassapput, aammalu selskabip unittup akiliutigisimasaatulli akilittut isigineqassallutik, soorluttaaq selskabip unittup akileraarutitigut nalikilliliissutigisimasinnaasai il.il. selskabimit ingerlaqqittumit taamatut pineqarsimasutut isigineqassasut.
Aamma selskabimi unittumi piginneqataasut tassani aktiaatimik anpartiutimilluunniit selskabimi ingerlaqqittumi aktianik anpartinilluunniit taarsiissutisisut akileraarusiiffigineqassangillat. Akileraarusiisoqassapput tamanna aatsaat pissaaq selskabimi ingerlaqqittumi aktiaatit anpartilluunniit tunineqarpata. Taavali aktiat anpartilluunniit selskabimi ingerlaqqittumi, selskabip unittup piffissami aktianik anpartinilluunniit pissarsiffigisimasaani aammalu pissarsiarinerini akigisimasaattulli pissarsiatut isigineqassapput. Pigisanik nuussinermi selskabimi ingerlaqqittumi aktiat anpartilluunniit, pigisat akiligassallu nuunneqarnerini akileraarutitigut nalingisut annertutigisumik akilerlugit pissarsiatulli isigineqassapput.
Akileraarutitaqanngitsumik kattunneq siunertarineqanngitsunik iluaqutissartaqaqqunagu siunnersuutigineqarpoq akileraarutitigut sunniuteqanngitsumik kattunniarneq pillugu Skatterådimut qinnuteqartoqartarnissaa, kiisalu aamma kattunnermi akileraarutitigut iluaqutissaasinnaasut siunertarineqanngitsut sunniuteqannginnissaat pillugit Skatterådi immikkut piumasarisaasunik aalajangersaasinnaassasoq.
Aammattaaq siunnersuutaavoq kattunneq akileraannginnissamik siunertaqarpat imaluunniit akileraannginnissaq siunertanut pingaarnernut ilaappat Skatterådip itigartitsinissaminut periarfissaqarnissaa. Akileraannginnissap siunertarineqarnera imaluunniit siunertanut pingaarnernut ilaanera ilimagineqarsinnaavoq kattunneq aningaasarsiornermut qularnaatsumik ingerlanneqanngippat, soorlu selskabit kattunnernut peqataasut aaqqissuussaanerisa allanngortiterneqarnerisigut imaluunniit pisariillisaavigineqarnerisigut.
Aalajangersakkat atuutissapput Kalaallit Nunaanni aktieselskabit aamma anpartsselskabit kattunnerini, aammalu Kalaallit Nunaanni sulliviit suleqatigiiffiusut kattunnerini kiisalu Kalaallit Nunaanni nunanilu allani selskabit ilaasa kattunnerini. Aammattaaq aalajangersakkat atuutissapput Kalaallit Nunaanni suliffeqarfiit ilaasa aggulunnerini kiisalu Kalaallit Nunaanni suliffeqarfiit ilaannut pigisanik nuussinerni.
Kinguaariinnut tullernut tunniussinissat oqilisaassivigiumallugit siunnersuutigineqarpoq sulisup piginnittunngorumaartussallu aningaasarsiaasa ilaasa, selskabimi aktianik pisinerminut atugaasa akileraaruserneqarnissaat kinguartinneqassasoq. Akileraarusiinissap kinguartinneqarsinnaanissaanut piumasaqaataassaaq sulisup aammalu amerlanerpaanik aktiaatillup akornanni kinguaariinnut tullernut tunniussiartuaarnissaq pillugu allakkatigut isumaqatigiissuteqartoqarsimanissaa. Akileraarusiinissaq pineqartup aktiaatiminik tunisinissaanut kinguartinneqassaaq.
Aammattaaq amerlanerpaanik aktiaatilik kinguaariinnut tullernut tunniussisoqarnissaanut aningaasaleeqataarusulersinniarlugu siunnersuutigineqarpoq aktiat, sulisorisap piginnittunngorumaartussallu nalikinnerutillugit pissarsiaasa nalingata akileraaruserneqarnissaa aammattaaq kinguartinneqarsinnaanissaa, pineqartup aktiaatimi tuninissaasa tungaanut.
Inatsisissatut siunnersuut isertitassatigut pingaaruteqanngitsuinnarnik annikitsuinnarnillu sunniuteqassangatinneqarpoq, soorluttaaq allaffissornermut annikitsuinnarmik sunniuteqassasoq.