21. oktober 1998

UKA 1998/92

 

Aningaasanik ikisilluni pinnguaatinut akitsuut pillugu Inatsisartut inatsisaata allanngortinneqarneranik

Inatsisartut inatsisissaannut siunnersuut

pillugu

Inatsisartut Akileraartarnermut ataatsimiititaanit

ISUMALIUTISSIISSUT

aappassaaneerlugu suliarineqarnissaanut tunniunneqartoq

Suliassamik suliarinninnermi Inatsisartut Akileraartarnermut ataatsimiititaanit peqataapput

inatsisartuni ilaasortaq Karl Lyberth, (S), siulittaasoq
inatsisartuni ilaasortaq Laannguaq Lynge (S)
inatsisartuni ilaasortaq Siverth K. Heilmann (A)
natsisartuni ilaasortaq Otto Storch (A) Knud Sørensenimut sinniisussatut
inatsisartuni ilaasortaq Manasse Berthelsen (IA)

Inatsisartut Akileraartarnermut ataatsimiititaat 21. oktober 1998 ataatsimiimmat Aningaasanik ikisilluni pinnguaatinut akitsuut pillugu Inatsisartut inatsisaata allanngortinneqarneranik Inatsisartut inatsisissaannut siunnersuut suliarineqarpoq.

Inatsisartut Akileraartarnermut ataatsimiititaannit aallaqaasiutigalugu oqaatigineqassaaq Naalakkersuisut ataatsimiititamit isumaqatigineqartut, 1999-imi aningaasanut inatsimmut atasumik landskarsip amerlanerusunik isertitaqartinneqarnissaa pisariaqartoq.

Aammattaaq Akileraartarnermut ataatsimiititattamit Naalakkersuisut isumaqatigineqarput, oqaatigineqarmat aningaasanik ikisilluni pinnguaatinut, aningaasanngorlugit pissarsiviusartunut ataasiakkaanut akitsuutit, aningaasanik ikisilluni pinnguaatit atorlugit isertitsinissamut periarfissaviusunut sanilliullugu appasippallaartut, ilaatigummi sulliviit toqqaannartumik isertittagaasa kingunerisaatut ikisilluni pinnguaatit aningaasanik allatigut kaajalukaartitaqarsinnaanerat annertusisittarmassuk.

Taamaammat Akileraartarnermut ataatsimiititap ikisilluni pinnguaatit, aningaasanngorlugit pissarsiviusartut, akitsuutaasa 200 %-imik qaffaavigineqarnissaat isumaqatigaa, Inatsisartut 1995-imi inatsiliorneratigut pinnguaatinit pissarsiat aningaasanngorlugit pineqarsinnaanngorsimammata, aamma isertitsissutaanerusinnaanerannut periarfissat pitsaanerulermata, 1995 aallarnerfigalugu nalinginnaasumik isertitat akileraaruserneqartarnerannut taarsiullugu taamaallaat 15 %-imik eqquiniaanermi akileraaruserneqarmata.

Aammattaaq Akileraartarnermut ataatsimiititap pingaartippaa qaffaaneq ikisilluni pinnguaatinik atuisunut kinguneqaateqassanngitsoq, qaffaammi ikisilluni pinnguaatinut akitsuummut, sulliviit akilertagaannut, taamaallaat atortuummat.

Ikisilluni pinnguaatinut, aningaasanngorlugit pissarsissutaasartunut, akitsuutit qaffanneqarnerat 1999-imi 9 mill. kr.-inik iluanaarutitigut annertusisitsissasoq naatsorsuutigineqarpoq.

Akileraartarnermut ataatsimiititaq isumaqatigittoq matumuuna inassuteqarpoq Aningaasanik ikisilluni pinnguaatinut akileraarut pillugu Inatsisartut inatsisaata allanngortinneqarneranik Inatsisartut inatsisissaannut siunnersuut Inatsisartunit akuersissutigineqassasoq.

 

	Karl Lyberth ataatsimiititami siulittaasoq
Laannguaq Lynge (S)		Siverth K. Heilmann (A)
Otto Storch (A)		Manasse Berthelsen (IA)