19. oktober 1998 UKA 1998/92
Oqaaseqaatit nalinginnaasut
Naalakkersuisut 1999-imut aningaasanut inatsisissatut siunnersuutaannut ilanngullugu siunnersuutigineqarpoq aningaasanik ikisilluni pinnguaatit pissarsissutaasinnaasut akileraarutaasa 200 pct.-inik qaffanneqarnissaat.
Aningaasanik ikisilluni pinnguaatinik piginnittut aningaasanik ikisilluni pinnguaatitigut sinneqartoorutigisartagaasa annertuut ilaannik annertunerusumik pissarsinissaq siunertaralugu siunnersuut aningaasaqarniarnermi politikkikkut kissaataavoq.
Aningaasanik ikisilluni pinnguaatinut akileraarutip qaffanneratigut ukiumi 1999-imi aammalu ukiuni missingersuusiorfiusuni isertitassat 9 mio. koruuninik ilanissaat naatsorsuutigineqarpoq, taamaalillutillu aningaasanik ikisilluni pinnguatinut akileraarutikkut isertitassat katillutik ukiumut 13,5 mio. koruuniulissapput. Januar kvartalimut tunngatillugu aningaasanik ikisilluni pinnguaatinut akileraarutissaq 10. december-imi akilerneqartussaammat ukiumi 1998-imi isertitassat 2,25 mio. koruuninik ilanissaat naatsorsuutaavoq.
Aningaasanik ikisilluni pinnguaatinut akileraarutip qaffanneqarneratigut akileraarutitigut isertitassat sunnerneqassapput, tassami aningaasanik ikisilluni pinnguaatinik piginnittut aningaasarsiamik akileraaruteqaataasussat naatsorsorneranni, aningaasanik ikisilluni pinnguaatinut akileraarutitik ilanngaatigisinnaammatigit. Akileraarutitigut nalikilliliisinnaaneq ilaatigut pissutigalugu isertitassatigut annaasaqarumaarnissaq, annerpaamik ukiumut 3,5 mio. koruuniusussatut naatsorsuutigineqartoq ukiuni marlunni siullerni tamakkiisumik malunnaateqarnavianngilaq.
Kommunit ataatsimut isigalugit isertitassamikkut annaasassaat annerpaamik 2,5 mio. koruunit missaanniissapput, taakkunannga Nuup Kommunianut 1 mio. koruunit missingi aammalu 1 mio. koruunit missingi kommuninut anginerit tulliinut sisamanut. Landskarsip isertitassamigut annaasassai annerpaamik 1 mio. koruunit missaanniissapput, taakkuli nuna tamakkerlugu akileraarutitigut isertitassanut 492 mio. koruuninut missingersorneqarallarsimasunut ilaaginnartutut isigineqarput.
Akileraarummik qaffaaneq allaffissornermut sunniuteqassanngilaq.
Aalajangersakkanut ataasiakkaanut oqaaseqaatit
§ 1-imutSiunnersuutigineqarpoq aningaasanik ikisilluni pinnguaatit pissarsissutaasinnaasut akileraarutaasa, pinnguaammut siullermut 18.000 koruuniniit 54.000 koruuninut, aappaannut 20.000 koruuniniit 60.000 koruuninut aammalu tulliinut tamanut 22.000 koruuniniit 66.000 koruuninut qaffanneqarnissaat.
§ 2-mutInatsisartut inatsisissaata ullormi 30. november 1998-imi atortuulernissaa siunnersuutigineqarpoq, taamaalillutik akileraarutit angissusaat allanngortut siullerpaamik atuutissallutik 1999-imi januar kvartalimut akileraarummut.