9. maj 1998

UPA 1998/25

 

Aalisarneq pillugu inatsisartut inatsisaata allanngortinneqarneranik

inatsisartut inatsisissaannut siunnersuut

pillugu

Inatsisartut Aalisarnermut, Piniarnermut Nunalerinermullu Ataatsimiititaliaata

ISUMALIUTISSIISSUTAA

Suliarineqarnerani Inatsisartut Aalisarnermut, Piniarnermut Nunalerinermullu Ataatsimiititaliap ilaasortarai

inatsisartunut ilaasortaq Siverth K. Heilmann (A), siulittaasoq
inatsisartunut ilaasortaq Lars Karl Jensen (S)
inatsisartunut ilaasortaq Niels MátâK (S)
inatsisartunut ilaasortaq Otto Steenholdt (A)
inatsisartunut ilaasortaq Johan Lund Olsen (IA)

Inatsisartut Aalisarnermut, Piniarnermut Nunalerinermullu Ataatsimiititaliaata Aalisarneq pillugu inatsisartut inatsisaata allanngortinneqarneranik inatsisartut inatsisissaattut siunnersuutip Inatsisartunit siullermeerneqareerneratigut inatsisissatut siunnersuut oqaaseqaatitalik misissorpaa.

Aallaqqaasiullugu erseqqissaatigineqassaaq Naalakkersuisut inatsisip siunertaanik allaaserisap aalajangiusimaneqarnissaanik kissaatigisaat ataatsimiititaliamit isumaqataaffigineqarmat, tassami nunami aalisakkerivinni suliassaqartitsineq inuiaqatigiinnut pingaaruteqarluinnartutut isumaqarfigineqarmat. Peqatigitilluguli erseqqissaatigineqassaaq isumalluutit killeqarallartillugit pingaaruteqarmat eqaatsunik tunisinissamut periarfissaqarnissaq; minnerunngitsumik pisat sapinngisamik eqqarneqartannginnissaat eqqarsaatigalugu. Taamaammat erseqqissarneqassaaq ataatsimiititaliamit pingaartinneqarmat nunami tunisinissamut periarfissat killeqalersillugit umiarsuarnik tunitsiviliisarnissamut periarfissaqartitsisoqarnissaa. Taamaammat ataatsimiititaliami naammagisimaarlugu maluginiarparput Naalakkersuisut inatsisissatut siunnersuutip saqqummiunneqarnerani taamaattunik eqqarsaatersuuteqarlutik saqqummiussaqartut.

Ataatsimiititaliami paasivarput Naalakkersuisut allannguutissatut siunnersuutaasa ilarpassui nunatta nunanut tamalaanut tunngatillugu pisussaaffiisa sunniutigigaat. Ataatsimiititaliap tama

tumunnga atatillugu pingaartippaa nunani allamiut angallataasa nunatsinni usingiartarnerat angallatinulluunniit allanut usingiartarnerat nakkutigineqartariaqartut, taamatullu ataatsimiititaliamit tamakkiisumik isumaqatigineqarluni nunani allamiut angallataasa nunatta erfalasuanik iluaquteqarniarlutik erfalasulisarsinnaanerisa peerneqarnera.

Tamatumunnga atatillugu ataatsimiititaliap pingaartippaattaaq angallatit nunatsinneersut nunatsinni allanilu aalisarnissamut periarfissaasa qulakkeerneqarnissaat. Taamaammat Naalakkersuisut kaammattorneqarput angallatit nunatsinni nalunaarsorneqarsimasut nunat allat imartaanni nunallu tamalaat imartaanni annertunerusumik aalisarsinnaatitaalernissaat sulissutigiuartuaqqullugu.

Aalisariutit nunatsinneersut inuttalersugaanerannut atatillugu attuumassuteqarnissamik piumasaqaat pillugu § 22, imm, 1, nr. 2-p oqaasertaasigut erseqqissaasoqarnissaanik siunnersuut ataatsimiititaliamit tamakkiisumik isumaqataaffigineqarpoq. Taamaalippat inatsimmi pitsaanerusumik ataqatigiittoqalissaaq, minnerunngitsumillu pingaaruteqarluinnarluni uagut nammineq aalisartortatta avataasiorluni aalisarnermut peqataanerulernissaannut periarfissiisoqarnissaa. Taamaammat inuttalersuisarneq pillugu malittarisassanik sukaterisoqarnissaa pissusissamisoorpoq.

Ataatsimiititaliami soqutiginartillugu § 6, imm. 5-p allanngortinneqarnissaanik siunnersuut oqallisigaarput, tassani Naalakkersuisut inuussutissarsiutigalugu aalisarnermik ingerlatsisinnaanermut piumasaqaatit pillugit inatsimmi aalajangersakkanik saneqqutsisinnaanermut periarfissaasa annertusisinneqartussaammata.

Ataatsimiititaliap siunnersuutikkut siunertarineqartut tunngavigalugit tamanna isumaqataaffigisinnaavaa minnerunngitsumillu taperserusullugu inuusuttut ajornannginnerusumik aalisarnermik inuussutissarsiuteqalersinnaanerata kisaatigineqarnera. Ataatsimiititaliaq isumaqarpoq inuusuttunut taamatut periarfissarissaarnerulersitsineq aalisarnermik inuussutissarsiortunut pingaaruteqarluinnartuusoq. Ataatsimiititaliaq isumaqarpoq pingaaruteqarluinnartoq nunatsinni inuusuttut periarfissanut taamaattunut ilisimaarinnilernissaat. Taamaammat ajornartorsiutaasinnaavoq immikkut akuersissuteqartarnermik annertusisitsinerup aqunneqarnissaanut Naalakkersuisut eqqarsaatersuutaat inatsisip oqaasertaani namminerni allassimanngimmata.

Taamaattumik ataatsimiititaliap Inatsisartunut inassutigaa, § 6, imm. 5, nr. 2-p 3-llu allanngortinneqarnerisa malitsigisaannik, § 6, imm. 3, nr. 4-mi piumasaqaatit atortinngitsoorneqarsinnaanerinut immikkut akuerineqarsinnaanermut periarfissat annertusineqarneri pillugit Naalakkersuisut inuiaqatigiinni innuttaasunut paasisitsiniaassasut, inuusuttut inuussutissarsiutigalugu aalisalersinnaanermut periarfissaat immikkut pingaartillugit.

Siunnersuutip siullermeerneqarnerani Naalakkersuisut kaammattorneqarput suliani inuusuttut inuussutissarsiutigalugu aalisarsinnaalernissamut piumasaqaataasunit saneqqutsisinneqarnissaat pineqartillugu KNAPK-p najukkani immikkoortortaqarfii suleqatigineqartassasut. Taamatut kajumissaarineq matumuuna ataatsimiititaliamit Naalakkersuisunut kaammattuutigineqassaaq.

§ 15, imm. 4 allanngortinneqarnissaanik Naalakkersuisut siunnersuutaat, tassa sinerissamut qanittumi pisassiissutit pigineqarsinnaasut 10 %-iniit 6 %-inut appartinneqarnissaannik, ataatsimiititaliamit nalilersuiffigeqqissaarniarneqarsimavoq. Siunnersuutigineqartoq ataatsimiititaliamit isumaqatigineqarsinnaavoq, tassa ataatsimiititaliap taperserusukkamiuk sinerissamut qanittumi aalisarnermi pisassiissutinit pigisanik piginnittut amerlanerulersinnaanissaat. Pingaaruteqarporli Naalakkersuisut maleruagassanik pisassiissutinit pigisat qanoq annertutigisut pissutsit sukkulluunniit atuuttut aallaavigalugit pigineqarsinnaanerannut tunngasunik nalilersuiuarsinnaanissaat.

Naggasiullugu ataatsimiititaliap Inatsisartunut ilaasortap Hans Enoksenip Royal Greenland A/S-p sinerissamut qanittumi raajarniutitaartornissaanik pilersaarutit unitsinneqarnissaannik siunnersuutaa oqallisigaa. Siunnersuutip suliarineqarnera Inatsisartut 1998-imi Ukiuunerani ataatsimiinneranni kinguartinneqarpoq. Ataatsimiititaliaq isumaqarpoq siunnersuummi siunertarineqartut tassa inuusuttut aalisartunngornissaannut pitsaanerusunik periarfissiisoqarnissaanik aamma aalisartut annertunerusunik pisassinneqartarnissaannik Naalakkersuisut inatsisissatut siunnersuutaatigut saqqummiunneqartukkut annertunerusutigut naammassineqartut.

Aalisarnermut, Piniarnermut Nunalerinermullu Ataatsimiititaliap taamatut oqaaseqarluni isumaqatigiilluni inassutigissavaa Aalisarneq pillugu inatsisartut inatsisaata allanngortinneqarneranik inatsisartut inatsisissaattut siunnersuut saqqummiunneqarneratut iluseqartillugu pingajussaanniigassanngortinneqassasoq.

 

	Siverth K. Heilmann (A) siulittaasoq
Lars Karl Jensen (S)		Niels MátâK (S
Otto Steenholdt (A)		Johan Lund Olsen (IA)