Arfininngorneq 16. maj 1998

UPA 1998/18-3

 

Naligiisitaanissamut Siunnersuisoqatigiit pillugit Inatsisartut inatsisissaannut siunnersuut

pillugu

Inatsisartut Isumaginninnermut Suliffeqarnermullu Ataatsimiititaliaata

ISUMALIUTISSIISSUTAA


siunnersuutip pingajussaanneerneqarneranut saqqummiunneqartoq


Inatsisartut Isumaginninnermut Suliffeqarnermullu Ataatsimiititaliaata suliarinninnermini ilaasortarai:


inatsisartunut ilaasortaq Finn Karlsen (A), formand
inatsisartunut ilaasortaq Ruth Heilmann (S)
inatsisartunut ilaasortaq Lânguaq Lynge (S)
inatsisartunut ilaasortaq Jakob Sivertsen (A)
inatsisartunut ilaasortaq Lars Sørensen (IA)


Inatsisartut Isumaginninnermut Suliffeqarnermullu Ataatsimiititaliaa Naligiisitaanisamut Siunnersuisoqatigiit Inatsisartut inatsisissaannut siunnersuutip Inatsisartuni aappassaanneerneqareermat ataatsimiissimavoq tallimanngorneq 15. april 1998.

Ataatsimiititaliap ataatsimiinnermini Inatsisartuni inatsisissamut siunnersuut pillugu aappassaanneerneqarneranut allannguutissatut Anthon Frederiksen-imit siunnersuutigineqartoq inatsisissamut siunnersuummi 3§-mut immikkoortoq 3-mut tunngatillugu partiit inatsisartuni sinniisuutitaqarnerpaat kisimik pinnatik partiit tamarmik sinniisuutitaqalersussanngorlugit allannguutissatut siunnersuut.

Ataatsimiititaliaq isumaqatigiissoq Anthon Frederiksen-ip siunnersuutaanut atatillugu imatut erseqqissaateqarniarpoq. Ataatsimiititaliani pingaartumillu Siunnersuisoqatigiinni inuttalersuisarneq eqqarsaatigalugu ileqquummat partiit inatsisartuni sinniiissutitaqarnerpaat pisarneq malillugu tamarmik siunnersuisoqatigiinnut suugaluartunut sinniisutitaqartarnerat. Taamaattumik Anthon Frederiksen-ip siunnersuutaa Ataatsimiititaliap isumaqatigiissup akuersaarsinnaanngilaa.

Kiisalu Ataatsimiititaliap oqaluuserisimvai Siumumiit Naligiisitaanissamut Siunnersuisoqatigiit inuttalersugaanerannut tunngasumik inatsissatut siunnersuummi kapitel 3, § 3, immikkoortoq 2-mut tunngatillugu kiisalu immikkoortoq 3-mut politikikkut partiit sinniisoqarnerannut tunngatillugu allannguutissatut siunnersuutigineqartut.

Inatsisartut Isumaginninnermut Suliffeqarnermullu Ataatsimiititaliami ilaasortat amerlanerussuteqartut, Atassutip Inuit Ataqatigiillu sinniisuutitaat inatsissisatut siunnersuutit aappassaanneerneqarneranut atatillugu Ataatsimiititaliap isumaliutissiissutaani ilaasortanillu tamanit atsiorneqarsimasumi allannguutissatut siunnersuutaasut Naalakkersuisullu akissuteqarnerminni tapersersugaat aalajangiusimaneqarnissaa aalajangiusimavaat:


Kapitali 3, imm. 2, nr. 3-tut nutaatut ilanngunneqassaaq:

3) Sulinermik Inuussutissarsiuteqartut Kattuffiat


Kapitali 3, imm. 4, nr. 2-tut nutaatut ilanngunneqassaaq:

2) Kalaallit Nunaanni sulisitsisut peqatigiiffii aamma Nunatsinni Atorfillit Kattuffissuat.


Ataatsimiititaliap taamatuttaaq Naligiissitaanissamut Siunnersuisoqatigiit ukiumoortumik nalunaaruteqartarnissaat oqallisigaa, imalu allanngortitsisoqarnissaa siunnersuutigalugu:


Kapitali 2-mi imm. 3-tut nutaatut ilanngunneqassaaq:

Imm. 3. Naligiissitaanissamut Siunnersuisoqatigiit ukiut tamaasa ukiumi qaangiuttumi sulineq pillugu Inatsisartunut nalunaarusiortassapput.


Taamatut oqaaseqarluni allannguutissatullu siunnersuuteqarluni Inatsisartut Isumaginninnermut Suliffeqarnermullu Ataatsimiititaliaata inassutigissavaa Naligiissitaanissamut Siunnersuisoqatigiit pillugit Inatsisartut inatsisissaattut siunnersuut taama isikkoqarluni pingajussaanneernerneqassasoq.


Ataatsimiititaliami ilaasortat Siumut sinnerlugu aallartitaasut ikinnerussuteqarlutik imatut oqaaseqaateqarput:

Inatsisartuni oqaluuserisassat immikkoortuisa 18-at pillugu.

Naligiissitaanissamut Siunnersuisoqatigiit pillugit Inatsisartut inatsisissaata inuttalersugaanissaanut atatillugu Siumumiit ikinnerussuteqarluni oqaaseqaatissat:

§ 3, imm. 2-mut Siumup allannguutissamik siunnersuutaa ukuninnga inuttaqarnissaanik siunnersuutitaqartoq:

1) Kommunit Kattuffiat
2) Saaffiginnittarfiit Qimarnguiillu Kattuffiat
3) Kalaallit Nunaanni sulisitsisut suliffiutillillu kattuffii
4) Arnat Peqatigiit Kattuffiat
5) Sulinermik Inuussutissarsiuteqartut Kattuffiat
6) Nunatsinni Atorfillit Kattuffiat
7) Sorlak
8) Kalaallit Nunaanni Aalisartut Piniartullu Kattuffiat
9) Aalisartut piniartullu nuliaasa aappaasalu Peqatigiiffiat

Inatsisartuni partiit annerit pingasut toqqagaat kiisalu siulittaasoq Naalakkersuisunit toqqagaasoq ilanngullugu katillugit 13-nik ilasortaqartussaq Ataatsimiititaliami amerlanerussuteqartunit itigartinneqartoq Siumumi aalajangiusimavarput.

Taamaattumillu ikinnerussuteqarluta oqaaseqaatigalugu matumuuna nalunaarutigissallugu.

 

Finn Karlsen (A)
ataatsimiititaliami siulittaasoq
 

Ruth Heilmann (S)

 

Jakob Sivertsen (A)
 

Lânguaq Lynge (S)

 

Lars Sørensen (IA)