8. maj 1998

UPA 1998/18

 

Naligiissitaanissamut Siunnersuisoqatigiit pillugit Inatsisartut inatsisissaannut siunnersuut

pillugu

Inatsisartut Isumaginninnermut Suliffeqarnermullu Ataatsimiititaliaata

ISUMALIUTISSIISSUTAA

siunnersuutip aappassaaneerneqarneranut saqqummiunneqartoq

Inatsisartut Isumaginninnermut Suliffeqarnermullu Ataatsimiititaliaata suliarinninnermini ilaasortarai

inatsisartut ilaasortaq Finn Karlsen (A)
inatsisartut ilaasortaq Ruth Heilmann (S)
inatsisartut ilaasortaq LãnguaK’ Lynge (S)
inatsisartut ilaasortaq Jakob Sivertsen (A)
inatsisartut ilaasortaq Lars Sørensen (IA)

Inatsisartut Isumaginninnermut Suliffeqarnermullu Ataatsimiititaliaata Inatsisartut siullermeerinninnerisa kingorna Naligiissitaanissamut Siunnersuisoqatigiit pillugit Inatsisartut inatsisissaattut siunnersuut oqaaseqaatitaalu misissuataarpai.

Ataatsimiititaliap isumaqatigiissup Naligiissitaanissamut Siunnersuisoqatigiinnik pilersitsisoqarnissaa taperserpaa.

Ataatsimiititaliap Siunnersuisoqatigiinni ilaasortaasussat katitigaanerat oqallisigaa, tamatumunngalu atatillugu makkuninnga allannguutissatut siunnersuuteqassalluni:

Kapitali 3, imm. 2, nr. 3-tut nutaatut ilanngunneqassaaq:

3) Sulinermik Inuussutissarsiuteqartut Kattuffiat

Kapitali 3, imm. 4, nr. 2-tut nutaatut ilanngunneqassaaq:

2) Kalaallit Nunaanni sulisitsisut peqatigiiffii aamma Nunatsinni Atorfillit Kattuffissuat.

Ataatsimiititaliap taamatuttaaq Naligiissitaanissamut Siunnersuisoqatigiit ukiumoortumik nalunaaruteqartarnissaat oqallisigaa, imalu allanngortitsisoqarnissaa siunnersuutigalugu:

Kapitali 2-mi imm. 3-tut nutaatut ilanngunneqassaaq:

Imm. 3. Naligiissitaanissamut Siunnersuisoqatigiit ukiut tamaasa ukiumi qaangiuttumi sulineq pillugu Inatsisartunut nalunaarusiortassapput.

Inatsisartut Isumaginninnermut Suliffeqarnermullu Ataatsimiititaliaata taamatuttaaq kissaatigaa inatsisissatut siunnersuummi § 11, Naligiissitaanissamut Siunnersuisoqatigiit ukiumoortumik naatsorsuutaannut tunngasoq, oqaaseqarfigilaassallugu. Ataatsimiititaliap inassutigissavaa Landskarsip naatsorsuutaasa suliarineqarnerinut atatillugu Naligiissitaanissamut Siunnersuisoqatigiit ukiumoortumik naatsorsuutaat immikkut takuneqarsinnaassasut.

Taamatut oqaaseqarluni allannguutissatullu siunnersuuteqarluni Inatsisartut Isumaginninnermut Suliffeqarnermullu Ataatsimiititaliaata inassutigissavaa Naligiissitaanissamut Siunnersuisoqatigiit pillugit Inatsisartut inatsisissaattut siunnersuut taama isikkoqarluni aappassaaneerneqassasoq.

 

	Finn Karlsen (A) siulittaasoq
Ruth Heilmann (S)		Jakob Siverrtsen (A)
LãnguaK’ Lynge (S)		Lars Sørensen (IA)