18. maj 1998 UPA 1998/18-3
Naligiissitaanissamut Siunnersuisoqatigiit pillugit Inatsisartut inatsisissaattut siunnersuut nr.____ ________ -imeersutip allannguutissaatut siunnersuut.
Kapitali 1.
Naligiissitaanissamut Siunnersuisoqatigiit pilersinneqarnerat.§ 1. Naalakkersuisut Naligiissitaanissamut Siunnersuisoqatigiinnik pilersitsissapput.
Kapitali 2.
Naligiissitaanissamut Siunnersuisoqatigiit suliassaat.§ 2. Naligiissitaanissamut Siunnersuisoqatigiit inuiaqatigiinni kalaallini angutit arnallu na- ligiissitaanerata siuarsarneqarnissaa sulissutigisassaraat. Naligiissitaanissamut Siunnersuisoqatigiit namminneerlutik, imaluunniit qinnuigineqarlutik, pissutsit naligiissitaanissamut tunngasut misissorsinnaavaat.
Imm. 2. Naligiissitaanissamut Siunnersuisoqatigiit aammattaaq:
1) inuiaqatigiit ineriartornerat malinnaaffigissavaat,
2) Namminersornerullutik Oqartussanut, kommuninut namminersortunullu naligiissitaanermut tunngasutigut siunnersuisassapput,
3) Nunani Avannarlerni naligiissitaanissamut siunnersuisoqatigiinnut siunnersuisuusunut attaveqaataassapput aamma
4) naligiissitaaneq pillugu innuttaasunut oqartussaasunullu paasisitsiniaaqqusillunilu paasisitsiniaanermi suleqataassapput.
Imm. 3. Naligiissitaanissamut Siunnersuisoqatigiit ukiut tamaasa ukiumi qaangiuttumi sulineq pillugu Naalakkersuisunut Inatsisartunullu nalunaarusiortassapput.
Kapitali 3.
Naligiissitaanissamut Siunnersuisoqatigiit aaqqissuussaanerat.§ 3. Naligiissitaanissamut Siunnersuisoqatigiit ilaasortarai siulittaasoq ilaasortallu qulit. Naalakkersuisut siulittaasussamik toqqaassapput. Suliniaqatigiiffiit partiillu imm. 2 aamma 3-imi taaneqartut inassuteqarnerat naapertorlugu Naalakkersuisut ilaasortanik qulinik toqqaassapput. Siulittaasoq ilaasortallu ukiunut sisamanoortumik toqqarneqassapput Naligiissitaanissamut Siunnersuisoqatigiit pilersinneqarfiat aallarnerfigalugu. Ilaasortat toqqarneqarnerani arnat angutillu amerlaqatigiinnissaat Naalakkersuisut anguniassavaat. Arnat angutillu tamarmik ikinnerpaamik sisamanik sinniisuutitaqassapput.
Imm. 2. Suliniaqatigiiffiit uku tamarmik ilaasortassamik sapinngisamik ajornanngippat angummik arnamillu inassuteqassapput:
1) Kommunit Kattuffiat,
2) Sulinermik Inuussutissarsiuteqartut Kattuffiat
3) Sulisitsisisut peqatigiiffii
4) Nunatsinni Atorfillit Kattuffissuat
5) KNAPK
6) Arnat Peqatigiit Kattuffiat
7) SORLAK
Imm. 3. Partiit pingasut Inatsisartuni sinniisuutitaqarnerpaat tamarmik immikkut ilaasortaatitassaminnik sapinngisamik angummik arnamillu inassuteqassapput.§ 4. Suliniaqatigiiffiit § 3 imm. 2-mi taaneqartut sapinngisamik angummik arnamillu inassuteqarsinnaapput Naligiissitaanissamut Siunnersuisoqatigiinni ilaasortaatitartik:
1) suliniaqatigiiffimmut ilaasortaajunnaarpat, imaluunniit
2) suliaminik ingerlatsisinnaajunnaarpat.
Imm. 2. Partiit § 3 imm. 3-mi taaneqartut Naligiissitaanissamut Siunnersuisoqatigiinni ilaasortaatitartik suliaminik ingerlatsisinnaajunnaarpat sapinngisamik angummik arnamillu inassuteqarsinnaapput.§ 5. Naligiissitaanissamut Siunnersuisoqatigiit suleriaasissartik namminneq aalajangersassavaat.
Naligiissitaanissamut Siunnersuisoqatigiit allattoqarfiat.§ 6. Naligiissitaanissamut Siunnersuisoqatigiit ulluinnarni suliassat ingerlanneqarfissaannik namminneq allattoqarfissaminnik pilersitsissapput.
Imm. 2. Naligiissitaanissamut Siunnersuisoqatigiit allattoqarfimmi sulisunik atorfinitsitsinissamut soraarsitsinissamullu oqartussaaffeqarput. Allattoqarfimmi sulisunik atorfinitsitsinermi soraarsitsinermilu il.il. atugassarititaasut eqqarsaatigalugit Namminersornerullutik Oqartussani sulisut pillugit aalajangersakkat sukkulluunniit atuuttut malissallugit Naligiissitaanissamut Siunnersuisoqatigiit pisussaatitaapput.
Kapitali 4.
Aningaasalersorneqarnera.§ 7. Naligiissitaanissamut Siunnersuisoqatigiit landskarsimit tapiissutitigut aningaasalersorneqarput.
Imm. 2. Tamatuma saniatigut Naligiissitaanissamut Siunnersuisoqatigiit suliniaqatigiiffinnit namminersortunit pisortanilluunniit oqartussaasunit suliaminnut atugassaminnik aningaasassarsiorsinnaapput.
Imm. 3. Naligiissitaanissamut Siunnersusisoqatigiit siunertamik iluanni, tak. § 2, isertitaaqarfiusartunik ingerlataqarsinnaapput.§ 8. Naligiissitaanissamut Siunnersuisoqatigiit ilaasortaat Inatsisartunut, Naalakkersuisunut il.il. ilaasortat akissarsiaqartinneqarnerat pillugu Inatsisartut inatsisaanni malittarisassat malillugit akissarsiaqartinneqassapput, ullormusiaqartinneqassallutik, angalanerminnilu a-ningaasartuutaat akilerneqartassallutik. Aningaasartuutit taakku landskarsimit ukiumut tapiissutit iluannit aningaasartuutigineqassapput.
Missingersuutit naatsorsuutillu§ 9. Naligiissitaanissamut Siunnersuisoqatigiit ukiut tamaasa Naalakkersuisunut ukiumi tullermi aningaanut inatsiseqarfiusumi missingersuutissatut siunnersuutinik saqqummiussaqartassapput. Siunnersuut isertitarissangasat aningaasartuutigissangasallu missingerneqarnerinik imaqartassaaq. Tamatumunnga peqatigitillugu Naligiissitaanissamut Siunnersuisoqatigiit ukiumi aningaasanut inatsiseqarfiusumi taaneqartumi landskarsimit tapiissutit amerlassusissaat pillugu siunnersuuteqassapput.
Imm. 2 Naalakkersuisut ukiumut aningaasanut inatsiseqarfiusumut tullermut missingersuutinut landskarsimillu tapiissutit amerlassusissaanut siunnersuutit tunniunneqarfissaannik killissaliissapput.§ 10. Naligiissitaanissamut Siunnersuisoqatigiit naatsorsuutaasa ukioq aningaasanut inatsisesaqarfiusoq malissavaat. Ukiumut naatsorsuutit kukkunersiuisumit kukkunersiuisutut sulinissaminut akuerineqarsimasumit kukkunersiorneqartassapput.
§ 11. Naligiissitaanissamut Siunnersuisoqatigiit Naalakkersuisut piffissaliussaata iluani ukiumut naatsorsuutit kukkunersiukkat kukkunersiuisup oqaaseqaataanik ilallugit Naalakkersuisunut akuerisassanngorlugit saqqummiutissavaat.
Kapitali 5.
Atortuulerfia.§ 12. Inatsit manna ulloq 1. juli 1998 atortuulerpoq.
Imm. 2. Tamatumunnga peqatigitillugu Kalaallit Nunaanni Arnat Angutillu Naligiissitaalernissaat Pillugu Ataatsimiititaliaqalernissaanik Inatsisartut inatsisaat nr. 17, 8. november 1985-imeersoq atorunnaarsinneqarpoq.
Namminersornerullutik Oqartussat, ulloq 1998
Jonathan Motzfeldt/
Mikael Petersen
Naligiissitaanissamut Siunnersuisoqatigiit pillugit Inatsisartut inatsisissaattut siunnersuutip allannguutissaatut siunnersuummut oqaaseqaatit.
Oqaaseqaatit nalinginnaasut.
Naligiissitaalernissamut maannakkut ataatsimiititaliaqarpoq. Ataatsimiititaliaq taanna Inatsisartunit pilersinneqarpoq Kalaallit Nunaanni Arnat Angutillu Naligiissitaalernissaat Pillugu Ataatsimiititaliaqalernissamik Inatsisartut Inatsisaat nr. 17, 8. november 1985-imeersoq, Inatsisartut inatsisaatigut nr. 19, 3. november 1994-imeersukkut allanngortinneqartoq tunngavigalugu.
Kalaallit Nunaanni Arnat Angutillu Naligiissitaalernissaat pillugu Ataatsimiititaliaq massakkut atuuttoq.Naligiissitaalernissamut ataatsimiititaliaq qulingiluanik ilaasortaqarpoq. Siulittaasoq ilaasortarlu ataaseq Inatsisartunit toqqagaapput. Taakkua saniatigut soqutigisaqaqatigiiffiit assigiinngitsut arfineq-marluk tamarmik immikkut inummik ataatsimik inassuteqartarput, Inatsisartunit toqqarneqartussanik. Taamaattumik Naligiissitaalernissamut Ataatsimiititaliaq Inatsisartut ataatsimiititaliarinngilaat, ataatsimiititaliaallunili siunnersuisutut inissisimasoq.
Ataatsimiititaliap aaqqissuussaanera ataatsimiititaliap sulineranut akornutaasoq paasinarsisimavoq. Pingaaruteqartut marluk tamatumunnga pissutaapput:
* Naligiissitaalernissamut Ataatsimiititaliaq namminerisassaminik aningaasaliiffigineqarneq ajorpoq. Aningaasalersorneqarpoq Inatsisartut sulinerannut atugassanit (konto pingaarneq 01.10.10). Naligiissitaanissamut ataatsimiititaliap ilaatigut suliassaraa angutit arnallu naligiissitaanissaat pillugu paasisitsiniaanissaq taassumali saniatigut atuagassianik saqqummersitsisarnissamut aningaasatigut tunngavissaqanngilaq. Massakkut aningaasa-leeriaatsip kinguneraa Ataatsimiititaliap naligiissitaaneq pillugu atuagassianik pisiarineqarsinnaasunik saqqummersitsisinnaannginnera. Taama ilusilimmik paasititsiniaasarneq nunani allani arlalinni naligiissitaanissamut siunnersuisoqatigiinnit atorneqarpoq. Tamatuma kinguneraa Ataatsimiititaliap paasissutissiuisinnaannginnera.
* Naligiissitaalernissamut Ataatsimiititaliaq Namminersornerullutik Oqartussat allaffeqarfissuanni allattoqartinneqarpoq. Naligiissitaalernissamut Ataatsimiititaliaq pillugu Inatsisartut inatsisaanni § 3, imm. 1 naapertorlugu Naalakkersuisut ataatsimiititaliamut allattoqarfeqartitsisussaapput. Inatsisartut ataatsimiititaliaasa allattoqarnikkut ikiorteqartitaanerisa ataatsimut Inatsisartut Allattoqarfiannut 1997 januarimi nuunneqarneranni Naligiissitaalernissamut Ataatsimiititaliap allattoqarfeqarnera Inatsisartut Allattoqarfiannut nuunneqarpoq - inatsisitigut allannguisoqarani.
Kisianni allattoqarfik Inatsisartuniippat Naalakkersuisuniikkaluarpalluunniit allattoqarfik su-liamut attuumassuteqarnikkut ajornartorsiuteqartussaavoq Naligiissitaanissamut Ataatsimiititaliap suliassai eqqarsaatigalugit.
Inatsimmi allassimavoq Naligiissitaalernissamut Ataatsimiititaliap ilaatigut inuiaqatigiinni ineriartorneq malinnaaffigissagaa - inatsisiliorneq ilanngullugu - kiisalu misissugarisassallugit naligiissitaanissamut akornutaasinnaasut, taamaattoqaraangallu allannguutissanik siunnersuuteqartassalluni. Naligiissitaanissamut Ataatsimiititaliaq siunnersuisuussaartaaq Namminersornerullutik Oqartussanut kommuninullu. Suliassat taakkua kingunerisinnaavaat allattoqarfiup Ataatsimiititaliamut ikiuuttarnissaa, nammineq aaqqissuussaanerminut tunngasunik isornartorsiuisarnikkut siunnersortaasarnikkullu.
Ajornartorsiutaavortaaq aningaasassaqaranilu sulisussaqannginnera allattoqarfiup inuiaqatigiinni naligiissitaanissamut tunngasunik misissuisarnissaanut.
Siunissami Naligiissitaanissamut Siunnersuisoqatigiit.Inatsisissatut siunnersuutikkut angutit arnallu naligiissitaanerannik siuarsaanissaq siunertarineqarpoq. Kalaallit Nunaanni naligiissitaanissaq pillugu sulininermi atugassarititaasut pitsaanerulerssinniarlugit Naligiissitaanissamut Ataatsimiititaliap aaqqissuussaasumik pimoorussisumillu naligiissitaanissamut siunnersuisoqatigiinngortinneqarnera siunnersuutip kingunerissavaa.
Naligiissitaanissamut Siunnersuisoqatigiinni ilaasortat Naalakkersuisunit toqqarneqartartussaapput, ullumikkullu Naligiissitaalernissamut Ataatsimiititaliamut ilaasortat Inatsisartunit toqqarneqartarlutik.
Naligiissitaanissamut Siunnersuisoqatigiit siulittaasussaannik Naalakkersuisut toqqaassapput. Aammattaaq Naalakkersuisut Siunnersuisoqatigiit ilaasortaanik inassuteqaatit naapertorlugit toqqaassapput. Tamanna Naalakkersuisut aamma Naligiissitaanissamut Siunnersuisoqatigiit qanimut suleqatigiinnissaannut tunngavissaqalersitsivoq. Apeqqutini naligiissitaanissamut tunngassuteqartuni Naalakkersuisut oqartussaaffiata Naalakkersuisunut ilaasortamut naalakkersuisoqarfimmullu naligiissitaanissamut apeqqutinik suliaqartartumut tunniunneqartarnissaa naatsorsuutigineqarpoq.
Naligiissitaanissamut Siunnersuisoqatigiit ukiuni sisamani ukiunut Inatsisartut qinigaaffiinut nikingasuni atuuttussatut toqqarneqartartussaapput. Taamaalillutik Naligiissitaanissamut Siunnersuisoqatigiit eqqissillutik sulisinnaalissapput, sulinerat assersuutigalugu maanaannaq qinersisoqarneratigut akornusersorneqartarunnaassammat.
Ilaasortat arfineq-marluk suliniaqatigiiffinit inassuteqartoqarneratigut toqqarneqartussanngorlugit, ilaasortallu pingasut partiinit annerpaanit pingasunit toqqarneqartussanngorlugit, siulittaasorlu Naalakkersuinit toqqarneqartussanngorlugu ilaasortat katitigaanerat allanngortinneqassaaq. Taamaalilluni naligiissitaanissamik apeqqut ulluinnarni naalakkersuinikkut oqallisaasunut ilaalissaaq. Aammattaaq angutit arnallu tamarmik ikinnerpaamik pingasunik ilaasortaatitaqarnissaannik piumasaqaat aqqutigalugu Naligiissitaanissamut Siunnersuisoqatigiinni arnat angutillu tamarmik ikinnerpaamik sisamanik ilaasortaatitaqalernissaat qulakkeerneqarpoq.
Naligiissitaanissamut Siunnersuisoqatigiit Aningaasanut Inatsimmi immikkut aningaasaliiffigineqartalissapput, ingerlatanillu isertaqaataasinnaasunik ingerlatsinissamut kiisalu aningaasaateqarfinnit, namminersortunit suliniaqatigiiffinnillu il.il. aningaasanik pissarsiarniartarnissaminnut periarfissaqalerlutik. Aningaasalersorneqarnermut periarfissat taakku atornerisigut Naligiissitaanissamut Siunnersuisoqatigiit ingerlataminnik annertusisitsinnaalerpoq.
Naligiissitaanissamut Siunnersuisoqatigiit nammineq allattoqarfimmik pilersitsissapput, allattoqarfiullu sulisuinik atorfinitsitsisinnaasapput soraarsitsisinnaallutillu. Taamaaliortoqarneratigut allattoqarfiup suliassat ilaanni suleqataasinnaasannginnissaat pinngitsoortinneqassaaq. Allattoqarfiup Naligiissitaanissamut Siunnersuisoqatigiit ulluinnarni suliassaat isumagissavai, kiisalu ataatsimiinnissat, ataatsimeersuarnissat, suliniutit paasisitsiniaanerillu aaqqissuuttarlugit , aammalu Naligiissitaanissamut Siunnersuisoqatigiit sulinerani ikiortassallugit.
Naligiissitaanissamut Siunnersuisoqatigiit ukiut tamaasa missingersuutissanut siunnersuusiortassapput ukiumoortumillu naatsorsuutinik saqqummiisassallutik. Ukiumoortumik naatsorsuutit Naalakkersuisunit akuereriikkat Inatsisartunut ilisimatitsissutitut tunniunneqartassapput.
Aningaasaqarnikkut aqutsinikkullu kingunerisassai:Inatsisissatut siunnersuutip saqqummiunneqarnerani Naalakkersuisut Ilassutitut Aningaasaliissutissatut Siunnersuut I-imut missingersuutinut ilanngussamik saqqummiussissapput, tassanilu Naligiissitaanissamut Siunnersuisoqatigiit Isumaginninnermut, Suliffeqarnermut Pisortallu Suliassaqarfiutaannut Naalakkersuisup ataani Naligiissitaanissamut Siunnersuisoqatigiit massakkut inissinneqarfianni kontomik pingaarnermik nammineq atugassaminnik peqalissallutik.
Naligiissitaanissamut Ataatsimiititaliap sulineranut atatillugu Namminersornerullutik Oqartussat allaffeqarfissuannit aningaasartuutigineqartarsimasut siunissami Naligiissitaanissamut Siunnersuisoqatigiit ukiumoortumik aningaasaliiffigineqartalernerisigut matusissutissinneqartalissapput. Taamaalillutik aningaasaliissutit taakku allaffinnik atartornermut, sulisunut, ingerlatanut assigiinngitsunut, angalanernut ataatsimiinnernullu kiisalu Naligiissitaanissamut Siunnersuisoqatigiit aningaasarsiaannut aningaasartuutit matusartussavaat.
Namminersornerullutik Oqartussani aqutsinikkut sulisut Naligiissitaanissamut Ataatsimiititaliamit sulisorineqartarunnaarnissaat siunnersuutip kingunerissavaa, tassami Naligiissitaanissamut Siunnersuisoqatigiinngortussat namminerisaminnik allattoqarfeqalerlutillu sulisoqalersussaammata.
Aalajangersakkanut ataasiakkaanut oqaaseqaatit.
§ 1-imutAalajangersakkakkut tassuuna Kalaallit Nunaata Naligiissitaanissamut Ataatsimiititaliaa allanngortinneqarpoq Kalaallit Nunaanni Naligiissitaanissamut Siunnersuisoqatigiinngorlugit. Naligiissitaanissamut Siunnersuisoqatigiinnik pilersitsisinnaatitaaneq Inatsisartuniit Naalakkersuisunut nuunneqarpoq. Tamatumuuna ilaasortassanik toqqaasarneq pisariinnerulersinneqarqarpoq, tassa ilaasortat taarserneqarsinnaalermata Inatsisartut ataatsimiinnerisa avataanni. Inatsisartunili partiit anginerpaat pingasut Naligiissitaanissamut Siunnersuisoqatigiit ilaasortalersorneqarnerannut sunniuteqaqataalerput. Tamatumunnga tunngatillugu § 3-mut oqaaseqaatit takukkit.
§ 2-mutAalajangersagaq taanna Naligiissitaanissamut Siunnersuisoqatigiit siunertarisaat pillugit aalajangersagaavoq. Aalajangersakkap taassuma Naligiissitaanissamut Siunnersuisoqatigiit Naligiissitaanissamut Ataatsimiititaliamit pisinnaatitaaffeqarnerulersippai, suliassaqarfiilu naatsumik ilanngullugit nalunaarsorlugit. Naligiissitaanissamut Siunnersuisoqatigiit taamaalillutik suliassaqalerput nunani avannarlerni, uatsinnut sanilliuttakkatsinni naligiissitaanissamut siunnersuisoqatigiit suliassarisartagaannut assingusunik.
Naligiissitaanissamut Siunnersuisoqatigiit ukiut tamaasa Naalakkersuisunut Inatsisartunullu ilisimatitsissutitut nalunaarusiortassapput. Ukiup ingerlanerani Naligiissitaanissamut Siunnersuisoqatigiit suliarisarsimasaannik ukiumoortumik nalunaarut imaqassaaq aammalu Naligiissitaanissamut Siunnersuisoqatigiit sunik salliutitserusunnerannik ersersitsissalluni.
Ukiumoortumik nalunaarutip Inatsisartunut saqqummiunneqartartussaanera pissutigalugu tamanit imaaliallaannaq pissarsiarineqarsinnaaleriissaaq taamalu nunatsinni inuiaqatigiit Naligiissitaanissamut Siunnersuisoqatigiit suliaannik malinnaasinnaassallutik.
§ 3-mutAalajangersagaq taanna Naligiissitaanissamut Siunnersuisoqatigiit ilaasortalersugaaneranut tunngasuuvoq. Siunnersuisoqatigiit inuiaqatigiinnit sinniisuuffigineqarluartumik ilaasortaqartitaanissaat pingaartuuvoq. Tamatuma angutinik arnanillu naligiissitsineq pillugu apeqqut inuiaqatigiit oqallinneranni pingaarutilimmik annerulersissavaa, Naligiissitaanissamullu Siunnersuisoqatigiit sulinerat sunniuteqarnerulersissallugu.
Isumaliutersuutit tamakku suliniaqatigiiffinnit partiinillu inassutigineqartunik ilaasortat katiterneqartarnissaannik toqqaanermi tunngaviusimapput. Massakkut angutit suliniaqatigiiffiinik soqanngilaq. Taamaattoqaraluarpat taakku Naligiissitaanissamut Siunnersuisoqatigiinni soorunami ilaasortaatitaqarsimassagaluarput.
Naligiissitaanissamut Siunnersuisoqatigiit pitsaanerpaamik sulisinnaassappata angutit arnallu sapinngisamik amerlaqatigiinnik ilaasortaatitaqarnissaat aammattaaq piumasaqaataavoq. Tamanna angutit arnallu tamarmik immikkut sisamanik ilaasortaatitaqarnissaannik aalajangersakkami tunngaviuvoq.
Taamaattumik suliniaqatigiiffiit partiillu inassuteqaateqartartut kajumissaarneqarput sapinngisamik angummik arnamillu toqqagassamik inassuteqaateqartaqqullugit. Taamaaliornissaq ajornarpat suleqatigiiffik/partii ataasiinnarmik inassuteqaateqassaaq.
Inassuteqaataasut tunngavigalugit ilaasortat Naalakkersuisunit toqqarneqartassapput, angutit arnallu amerlaqatigiinnik ilaasortaqarnissaannik piumasaqaat eqqortinneqarsinnaaqqullugu.
Tamakku saniatigut Naligiissitaanissamut Siunnersuisoqatigiit amerlavallaanik ilaasortaqalernermikkut suliamminnik ingerlatsisinnaajunnaarsinnaanerat eqqarsaatigineqarsimavoq. Tamatuma nunatsinni sulisitsisut peqatigiiffiisa inissamik ataatsimik avitsisarnissaat kingunerissavaa. Nunatsinni sulisitsisut peqatigiiffii ullumikkut tassaapput Sulisisitsisut Peqatigiiffiat; Niuernermi, Sullissinermi Angallannermilu Sulisitsisut Peqatigiiffiat kiisalu Inuit Nunaanni Sulisitsisut Peqatigiiffiat.
Ilaasortassatut inassutigineqartut suliniaqatigiiffimmi inassuteqartuusumi ilaasortaassapput.
Inatsisartuni partiit annerpaat pingasut periarfissaqalerput ilaasortaatitassaminnik tamarmik immikkut ataatsimik toqqaanissaminnut. Partiit namminneq aalajangertassavaat partiimi ilaasortamik imaluunniit inummik partiimi ilaasortaanngitsumik toqqaassanerlutik. Taamaalillutik partiit inunnik partiimi ilaasortaanngitsunik, tatigineqartumilli naligissiitaanissarlu pillugu apeqqutini soqutiginnillutik suleqataasartunik inassuteqaateqarnissaminnut periarfissaqarput.
Partiit amerlaqatigiinnik ilaasortaatitaqarpata partiit pingasut qinersisoqarnerpaasimasut Naligiissitaanissamut Siunnersuisoqatigiit ilaasortassaannik inassuteqassapput.
Naligiissitaanissamut Siunnersuisoqatigiit toqqarneqarunik atuutissapput ukiuni sisamani. Tassalu Inatsisartunut ilaasortat allannguuteqarnerat Naligiissitaanissamut Siunnersuisoqatigiit ilaasortaatitaqarneranut sunniuteqartalissaaq aatsaat ukiut taakku sisamat qaangiunneranni. Taamaalillutik Naligiissitaanissamut Siunnersuisoqatigiit pisariaqartitaminnik eqqissillutik sulisinnaalissapput.
§ 4-imutSuliniaqatigiiffiup partiilluunniit ilaasortaatitami taarserneqarnissaa kissaatigippagu tamanna Naalakkersuisunit akuerineqarnissamik piumasaqaatitaqarpoq. Tamatumani Naalakkersuisut Naligiissitaanissamut Siunnersuisoqatigiinni ilaasortanik toqqaanissamut oqartussaaffeqarnerannik pissuteqarpoq.
Suliniaqatigiiffiit partiillu ilasortaatitaat taamaallaat § 4-mi taaneqarsimasut kisiisa malillugit taarserneqarsinnaapput. Ilaasortap suliaminik ingerlatsisinnaajunnaarneranut assersuutitut taaneqarsinnaapput Kalaallit Nunaannit allamut nuunneq, sivisuumik napparsimaneq, toqukkut qimagunneq.
§ 5-imutNaligiissitaanissamut Siunnersuisoqatigiit sulinerminnik aallartitsinnginnerminni sulariaasissartik suliarissavaat. Tamatumuunakkut assersuutigalugu Naligiissitaanissamut Siunnersuisoqatigiit siulittaasup tullissaanik qinersinissamut periarfissaqalerput.
§ 6-imutAalajangersagaq taanna tunngavigalugu Naligiissitaanissamut Siunnersuisoqatigiit namminerisaminnik allattoqarfiliussapput, allattoqarfimmilu tassani sulisut atorfinitsinnissaat sorarsittarnissaallu oqartussaaffigalugu. Taakku marluk Naligiissitaanissamut Siunnersuisoqatigiit nammineertuunerat arlaannaannulluunniillu atasuunnginnerat erseqqissarpaat. Tamatuma saniatigut Naligiissitaanissamut Siunnersuisoqatigiit allattoqarfianni sulisut atorfinitsitaasarneranni soraarsitaasarnerannilu atugassarititaasut pillugit malittarisassat tassani aalajangersarneqarput. Takku Namminersornerullutik Oqartussani pisortani atorfeqartut atugassarisaasa assinginik atugasaqartitaanissaa siunertaavoq.
§ 7-imutAalajangersakkami erseqqissarneqarpoq Naligiissitaanissamut Ataatsimiititaliamiit Naligiissitaanissamut Siunnersuisoqatigiinnut allanngortitsineq immikkut aningaasaliiffigineqartalernissamik kinguneqassasoq. Tamatuma saniatigut Naligiissitaanissamut Siunnersuisoqatigiit suliamik ilaanik avataanit suliniaqatigiiffinnit namminersortunit pisortallu oqartussaannit aningaasanik pissarsianik aningaasalersuinissaminnut periarfissaqarput.
Ingerlataq isertitaqarfiusoq Naligiissitaanissamut Siunnersuisoqatigiit siunertaata iluaniissaaq. Assersuutigalugu Naligiissitaanermut Siunnersuisoqatigiit naqitanngorlugit saqqummersittakkatik tuniniartarsinnaavaat.
§ 8-imutNaligiissitaalernissamut Ataatsimiititaliap ilaasortai ullumikkut Akissarsiaqartitsineq il.il. pillugit inatsit naapertorlugu akissarsiaqartinneqarput. Aningasartuutit Inatsisartut pingaarnertut kontuannit 01.10.10-imit matussuserneqartarput. Naligiissitaanissamut Siunnersuisoqatigit ilaasortaat siunissami aamma Akissarsiaqartitsineq il.il. pillugit inatsit naapertorlugu akissarsiaqartinneqassapput. Tamatumunnga aningaasartuutit siunnersuisoqatigiinnut ukiumut aningaasaliissutaasartut iluanni aningaasartuutigineqartassapput.
§ 9-mutAalajangersagaq taanna ilanngunneqarsimavoq naligiissitaanermut Siunnersuisoqatigiit ukiumut aggersumut missingersuutinut tapissutinullu siunnersuutaat tunngavigalugit missingersuutit Aningaasaqarnermut Inatsimmi saqqummiunneqartussat pillugit Naalakkersuisut aalajangiisinnaaqqullugit.
§ 10-mutAalajangersakkakkut erseqqissarneqarpoq Naligiissitaanissamut Siunnersuisoqatigiit ukiu-moortumik naatsorsuutaasa ukioq aningaasaliiffik malikkaat, kiisalu naatsorsuusiornissamut kukkunersiuisoqarnissamullu pisussaaffeqartoq. Ukiumoortumik naatsorsuutitigut Naalakkersuisut Inatsisartullu Naligiissitaanissamut Siunnersuisoqatigiit sulinerannut aningaasaliissutit qanoq atorneqarnersut takusinnaavaat.
Naligiissitaanissamut Siunnersuisoqatigiit kukkunersiuisoq kina atorneqassanersoq nammineq aalajangersinnaavaat, tassanili kukkunersiuisut kukkunersuinermik suliaqarnissaminut akuerineqarsimasuunissa piumasaqaataavoq. Kukkunersiuinermut atatillugu aningaasartuutit Naligiissitaanissamut Siunnersuisoqatigiinnut ukiumoortumik aningaasaliissutit iluanni aningaasartuutigineqassapput.
§ 11-mutAalajangersakkami tassani Naligiissitaanissamut Siunnersuisoqatigiit ukiumoortumik naatsorsuutinik saqqummiussineranni periaaserineqartussaq taaneqarpoq.
§ 12-imutInatsisip atuutilerfissaa ullulerneqarpoq Naligiissitaanissamut Siunnersuisoqatigiit ilaasortassaannik piaarnerpaamik toqqaasoqarsinnaaqqullugu. Naligiissitaalernissamut Ataatsimiititaliaq atuuttoq Naligiissitaanissamut Siunnersuisoqatigiit pilersinneqarnissaasa tungaanut atuutissaaq.