13. maj 1998 UPA 1998/40
Nalinginnaasumik immikkullu nassuiaatit
iluarsisat
Inatsisissamik matuminnga siunnersuuteqarneq inatsisiliortut inatsisinillu atortitsisut inatsisitigut tunngaviusumik immikkoortinneqarnerannut Inatsisartut suleriaasiata Inatsisartunit apriilip tallimaani 1996-imi aalajangernertut iluseqarluni allanngortinneqarneranik kinguneqartumut atatillugu isigineqartariaqarpoq.Allanngortitsinermi tamatumani tunngavigineqarpoq apeqqutit juulip aallaqqaataani 1998-imi Inatsisartuni atorfillit, tjenestemandit ilanngullugit, akissarsiaannut sulinerminnilu atugassaannut tunngasut Inatsisartut siulittaasuata aalajangersaaffigisassagai.
Nunatsinni tjenestemandit pillugit inatsit massakkumut atuuttoq namminersornerulernerup atuutilerneraniit aamma Inatsisartut ataanni sulisunut pinngitsoqarfiunani atuuttutut ingerlanneqarpoq. Inatsisartunut naalakkersuisunullu ataatsikkut siulittaasutut sulineq immikkoortinneqareeraluartoq Inatsisartuni atorfillit pillugit naalakkersuisut aalajangersaasuujuaannarput. Inatsisissatut siunnersuutip matuma akuersissutigineqarneratigut tamanna atorunnaassaaq, tassami tamatuma kingornagut sulisut Inatsisartuni atorfeqalissammata aammalu Inatsisartut siulittaasuat Inatsisartuni sulisut taakku pillugit, tjenestemandit ilanngullugit, tunngaviusumik isumaqatigiissuteqarnissaminut periarfissaqalissalluni.
Inatsisissatut siunnersuutikkut erserpoq Inatsisartut tjenestemandiisa utoqqalinersiutissaasa tunniunneqartarnissaat isumannaarneqassasoq naalakkersuisut massakkut danskit naalagaaffiannut isumaqatigiissumminnut tapiliussamik isumaqatigiissuteqarnerisigut, taamaaliornikkut Inatsisartut tjenestemandiisa massakkut isumaqatigiissummi maannamutut ilaatinneqarsinnaalersillugit.
Atorfiit imminnut assingusut assigiiaartunik akissarsiassaqartitsiviginiarnerisigut aammalu tamakkunani atorfillit sulinerminni atugassaasa assigiiaarsinniarneqarnerisigut pisortat suliffeqarfiini sulisinnaasut pillugit akikinngitsumik unammilleqatigiilersinnaaneq namminersornerulernerup siornagut kingornagullu pinngitsoortinniarneqartarpoq. Taama periaaseqarnerup ingerlaannarnissaa kissaatigineqarpoq.
Taamaattumik inatsit atortuulersinneqassappat tamatumunnga peqatigitillugu Inatsisartut ataanni suliffeqarfinni tjenestemanditut atorfillit pillugit Inatsisartut inatsisissaata Inatsisartut siulittaasuannit suliarineqartup aamma atortuulersinneqaqqaarnissaa tunngaviussaaq - tamatumunnga peqatigitillugu naalakkersuisut Nunatsinnilu Atorfillit Kattuffissuata tunngaviusumik isumaqatigiissutaata maannamut atuuttup assinganik isumaqatigiissuteqarnerisigut atorfeqareersut maannamutut atugassaqartitaallutik sulinissaminnut neqeroorfigineqarnerisigut.
Tjenestemandit "Kalaallit Nunaanni Namminersornerullutik Oqartussani kommuninilu tjenestemandit pillugit Inatsisartut inatsisaat nr. 5 maajip 14-anni 1990-imeersoq" naapertorlugu atorfillit ikaarsaariarnermi atugassaat, atorfillit pisinnaatitaaffii pisussaaffiilu ilanngullugit, Inatsisartut siulittaasoqarfiata "Inatsisartut ataanni suliffeqarfinni tjenestemandit pillugit Inatsisartut inatsisaat"-nut siunnersuutissaatigut iluarsiivigineqassapput.
Siunnersuut akuerineqarpat Inatsisartut atorfillit pisinnaatitaaffiinik pisussaaffiinillu pilersitsisuussapput taamaaliliornikkut atorfillit akissarsiaat atorfeqarnerminnilu atugarisaat allanngortinneqaratik ingerlaannarsinnaaqqullugit, soorluttaaq pisinnaatitaaffitik pisussaaffitillu pigiinnassagaat.
Aningaasatigut allaffissornikkullu kingunissai:
Inatsisissatut siunnersuut aningaasatigut allaffissornikkullu kinguneqassanngilaq.