Oqaaseqaatit nalinginnaasut
Siunnersuutikkut anguniarneqarpoq aktie- aamma anpartsselskabit, kattunniarnertik akileraaruteqaataanngitsumik pinissaa anguniarlugu Skatterådimut qinnuteqarsimasut aammalu akuerineqarsimasut, pappiaqqanik nalilinnik naqissusiinermi akitsuummik akiliisinneqartannginnissaat. Nalinginnaavoq kattunneq kingornussinertut ingerlanneqaraangat tamatuma akileraaruteqaataannginnissaata Skatterådimit akuerineqartarnera, tassa imaappoq selskabip peqataalersup pigisaasa nalikillilerneqarsinnaasut sinneri, piffissat pigineqalerfii il.il. selskabip ingerlaannartup nangissagai, kiisalu selskabimi peqataalersumi piginneqataasut selskabip ingerlaannartup aktiaataanik akiliiffigineqassasut, aammalu nikingassutaannik aningaasanngorlugit tunniussisoqassatillugu aningaasat, taakku aktiaataasa nalingisa annerpaamik 10%-iisut annertussuseqassasut.
Siunnersuutikkuttaaq anguniagaavoq pantebrev-it il.il., takornariat unnuisarfissaannik pilersitsiortornissanut aningaasaliisarnissanut aningaasaateqarfimmut aammalu takornariaqarnermik inuussutissarsiuteqarniarlutik aallartisartut aningaasaliiffigineqartarnissaannut ataatsimiititaliamut sananeqartut naqissusiinermi akitsuummik akitsuuserneqartannginnissaat.
Siunnersuutip allaffissornikkut aningaasatigullu sunniuteqarnissaa naatsorsuutigineqanngilaq.
Aalajangersakkanut ataasiakkaanut oqaaseqaatit
§ 1-imi nr. 1-imut, 2-mut aamma 3-mutSiunnersuutigineqarpoq pantebrev-it aamma akiligassaqarnermut uppernarsaatit, takornariat unnuisarfissaannik pilersitsiortornissanut aningaasaliisarnissanut aningaasaateqarfimmut (Unnuisa), imaluunniit takornariaqarnermik inuussutissarsiuteqarniarlutik aallartisartut aningaasaliiffigineqartarnissaannut ataatsimiititaliamut sananeqartut naqissusiinermi akitsuummik akitsuuserneqartannginnissaat.
Naqissusiinermi akitsuummik akitsuusigaannginnissami piumasaavoq pantebrev-ip, takornariat unnuisarfissaannik pilersitsiortornissanut aningaasaliisarnissanut aningaasaateqarfiunngitsumut (Unnuisa) aammalu takornariaqarnermik inuussutissarsiuteqalerniarlutik aallartisartut aningaasaliiffigineqartarnissaannut ataatsimiititaliamuunngitsoq (TAT) qularnaveeqqutitut tunniunneqannginnissaa. Taamaaliortoqassagaluarpat § 5 malillugu pantebrev-i naqissusiinermi akitsuummik akitsuuserneqartussanngussaaq.
Qularnaveeqqutitut uppernarsaatip allamut tunniunneqarneranut uppernarsaat piffissami pilersinneqarfimmini akitsuuserneqartussanngussaaq. Assersuutigalugu inuup nammineq pantebrev-iliani Unnuisa-mut qularnaveeqqusiussimasani aningaaserivimmi akiitsuminut pingaannginnerusutut qularnaveeqqusiuppagu inuup nammineq pantebrev-iliaa piffissami pingaannginnerusutut qularnaveeqqusiussinermik uppernarsaasiorfimmi akitsuuserneqartussanngussaaq. § 5 malillugu inuup nammineq pantebrev-iliaa, nalinga malillugu akitsuuserneqassaaq, tassa aningaaseriviup atukkiussaasa amerlassusii apeqqutaatinnagit. Akitsuutip akilernissaa aningaaseriviup attartortullu akisussaaffigaat.
§ 1-imi nr. 4-mutSelskabit marluk kattunneranni selskabip peqataalersup pigisai selskabimut ingerlaannartumut tunniunneqassapput, soorluttaaq selskabip peqataalersup pisussaaffii, matumani ilaallutik akiitsui selskabimit ingerlaannartumit akisussaaffigineqalissasut.
Siunnersuutigineqarpoq selskabip peqataalersup pigisai naqissusiinermi akitsuusigassaatitaasut selskabimut ingerlaannartumut tunniunneqarnerminni naqissusiinermi akitsuummik akitsuuserneqartannginnissaat. Tamanna aamma atuutissaaq akiitsoqarnermut uppernarsaatinut imaluunniit pantebrev-inut selskabimit peqataalersumit pilersinneqarsimasunut, tassalu selskabimit ingerlaannartumit pisussaaffigineqalersunut.
Assersuutigalugu selskabip ingerlaannartup aningaaserivimmi kassekreditimi annertussusaa qaffanniarpagu, taava assersuutigalugu pantebrevi aningaaserivimmi kassekreditimut qularnaveeqqusiunneqarsimasoq naqissusiinermi akitsuummik akitsuuserneqassanngilaq, qaffaaneq selskabip peqataalersup aningaaserivimmi kassekreditiani, ullormi kattuffiusumi killiffiusimasup angeqqataanik taarserneqarpat.
Naqissusiinermi akitsuummik akitsuuserneqartussaannginnermi piumasaavoq selskabit kattunniartut kattunniarnermik akileraaruteqaataanngitsumik pinissaa Skatterådimut qinnutigisimassagaat aammalu akuerineqarsimassasut.
Nalinginnaavoq kattunneq kingornussinertut ingerlanneqaraangat tamatuma akileraaruteqaataannginnissaata Skatterådimit akuerineqartarnera, tassa imaappoq selskabip peqataalersup pigisaasa nalikillilerneqarsinnaasut sinneri, piffissat pigineqalerfii il.il. selskabip ingerlaannartup nangissagai, kiisalu selskabimi peqataalersumi piginneqataasut selskabip ingerlaannartup aktiaataanik akiliiffigineqassasut, aammalu nikingassutaannik aningaasanngorlugit tunniussisoqassatillugu aningaasat, taakku aktiaataasa nalingisa annerpaamik 10%-iisut annertussuseqassasut.
§ 1-imi nr. 5-mutAllannguutit kinguneriinnarpaat.
§ 2-mutSiunnersuutaavoq Inatsisartut inatsisaata 1. juni 1998 aallarnerfigalugu atortuulernissaa.