6. maj 1998

UPA 1998/9

 

Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisissaannut siunnersuut

pillugu

Inatsisartut Akileraartarnermut Ataatsimiititaliaata

ISUMALIUTISSIISSUTAA

siunnersuutip aappassaaneerneqarneranut saqqummiunneqartoq.

Siunnersuutip suliarineqarnerani ataatsimiititaliap ilaasortarai

inatsisartunut ilaasortaq Knud Sørensen (A), siulittaasuugallartoq
inatsisartunut ilaasortaq Lãnnguak Lynge (S)
inatsisartunut ilaasortaq Siverth K. Heilmann (A)
inatsisartunut ilaasortaq Ruth Heilmann (S)
inatsisartunut ilaasortaq Manasse Berthelsen (IA)

Inatsisartut Akileraartarnermut Ataatsimiititaliaata Inatsisartut siullermeerinninnerisa kingorna inatsisissatut siunnersuut oqaaseqaatitaalu misissuataarpat.

Akileraartarnermut Ataatsimiititaliap umiarsualivimmiinnermut akileraarutip naatsorsorneqartarneranut tunngaviusup bruttoregistertonimiit bruttotonimut allanngortinneqarnissaa saqqummiunneqartoq ilalersinnaavaa, naatsorsuutigineqarmat siunissami umiarsuit amerlanersaasa taamaallaat bruttoton atorlugu nalunaarsorneqartalernissaat.

Inatsisartut siullermeerinninneranni inatsisartunut ilaasortaq Anthon Frederiksen Inatsisartut Akileraartarnermut Ataatsimiititaliaannut kaammattuuteqarpoq, umiarsuit takornariartitsisartut umiarsualivimmiinnermut akileraarummik akiliisarnerannik tamatumalu nakkutigineqarneranik apeqqut, ataatsimiititaliap siunnersuummik suliarinninnerani ilannguteqqullugu.

Aningaasaqarnermut Ineqarnermullu Naalakkersuisoqarfimmit tapiliussatut paasissutissatigut tiguneqartutigut erserpoq umiarsuit takornariartitsisartut nunatsinni umiarsualivinnut nunalinnerminni umiarsualivimminnermut akileraartartut, tamatuminngalu nakkutilliineq naammaginarluinnartumik ingerlasoq.

Naalakkersuisoqarfiup ilanngullugu ilisimatitsissutigaa ukiuni aggersuni umiarsuit takornariartitsisartut nunatsinni umiarsualivinnut nunalittartut amerliartornissaat naatsorsuutigineqartoq, taamaattumillu tamatumunnga atatillugu imarsiornermut avatangiisinullu tunngasutigut malittarisassatigut tunngavigisat piffissami qaninnermi misissuataarneqarumaartut.

Inatsisartut Akileraartarnermut Ataatsimiititaliaata tamanna tusaatissatut tiguaa.

Inatsisartut Akileraartarnermut Ataatsimiititaliaata taamaalilluni inassutigissavaa Umiarsualivimmiinnermut akileraarutit pillugit Inatsisartut inatsisaata allanngortinneqarneranik Inatsisartut inatsisissaannut siunnersuut taama isikkoqarluni aappassaaneerneqarnissaminut ingerlateqqinneqassasoq.

 

	Knud Sørensen (A) ataatsimiititaliami siulittaasuugallartoq
Lãnnguak Lynge (S)		Siverth K. Heilmann (A)
Ruth Heilmann (S)		Manasse Berthelsen (IA)