Oqaaseqaatit nalinginnaasut
Umiarsualivimmiinnermut akileraarutit pillugit Inatsisartut inatsisaanni bruttotonip bruttoregistertonillu immikkoortinneqannginnerannik siunnersuut manna tunngaveqarpoq.
Umiarsualivimmiinnermut akileraarutit pillugit inatsit malillugu umiarsuit BRT-ertik BT-ertilluunniit tunngavigalugu umiarsualivimmiinnermut akileraarutissaminnik naatsorsuinissaq namminneq aalajangersinnaavaat. Umiarsuit BRT-ertik tunngavigalugu akileraarutit naatsorsorpatigit akileraarut minnerussaaq, tassami bruttoregisterton tunngavigalugu naatsorsuisoqaraangat umiarsuit usitussusaat nalinginnaasumik minnerungaatsiartarmat.
Umiarsuit amerlanersaasa siunissami BT-ginnarminnik nalunaarsortittarnissaasa ilimagineqarsinnaanerat eqqarsaatigalugu, siunissami BT-p umiarsualivimmiinnermut akileraarutip naatsorsorneqarnerani uuttuutitut atorneqartarnissaa naleqquttuussammat, siunnersuutikkut matumuuna anguniarneqarpoq umiarsualivimmiinnermut akileraarutit naatsorsorneqartarnerinut tunngaviit allanngortinneqarnissaat. Sulili BRT-ginnarminnik uuttuisitsisimasunik umiarsuaqarmat inatsisissatut siunnersuummi anguniagaavoq § 3-mi immikkut aalajangersagaliortoqarnissaa, taamaalilluni umiarsuit taakku umiarsualivimminnermut akileraarutaasa BRT uuttuutigalugu naatsorsorneqartarnerat ingerlatiinnaqqullugu. - Taaneqartullumi aammattaaq tunngavigalugit BRT § 2, nr. 3-mi § 4-milu taaneqartoq allanngortinneqarnissaa siunnersuutigineqanngilaq.
Inatsisartut inatsisaat maanna atuuttoq malillugu umiarsuit BT-minnik BRT-minnilluunniit uuttuisitsisimanngitsut akileraarutinut akiligassaat Akileraartarnermi Pisortaqarfimmit missingersorlugit angissusilerneqartussaapput, tak. inatsimmi § 6, taamaattumillu aalajangersakkap taassuma siunnersuummi matumani allanngortinneqarnissaa pisariaqartutut isigineqanngilaq.
Naatsorsueriaatsip tunngavianik teknikkikkut allanngortitsinerummat, maleruagassat siunnersuutigineqartut kingunerisaannik akileraarutitigut isertitassat ukiumoortut allannguuteqarnissaat naatsorsuutigineqanngilaq. Paasisitsiniaanermut, naqitanut il.il. allaffissornikkut aningaasartuutissat annertunavianngillat, taamaattumillu allaffissornermut aningaasaleeqqinnissaq pisariaqassanani.
Aalajangersakkanut ataasiakkaanut oqaaseqaatit
§ 1-imi nr. 1-imutImm. 1-imi siunnersuutigineqarpoq akileraarutinut akiligassap siunissami naatsorsorneqartarnissaani usitussutsip BT uuttuutigalugu uuttorneqarsimasup nalinginnaasumik tunngavigineqartarnissaa. Imm. 2-mi aalajangersarneqarpoq umiarsuit, bruttoregisterton kisiat tunngavigalugu usitussutsiminnik uuttortissimasut akileraarutinut akiliutissaat akit imm. 1-imi taaneqartut naapertorlugit BRT-imut ataatsimut naatsorsorneqartassasut. Ilutigitillugu ton-imut ataatsimut akileraarut aalajangersakkamut atuuttumut naleqquttunngorlugu apparneqarpoq, tassami umiarsuit angissusaat BT uuttuutigalugu uuttorneqarnerminni, BRT uuttuutigalugu uuttorneqarnerannit anginerummat.
§ 2-mutSiunnersuutigineqarpoq Inatsisartut inatsisaata 1. juli 1998 aallarnerfigalugu atortuulernissaa.