Aalisarnermut, piniarnermut nunalerinermullu tapersiisarneq pillugu Inatsisartut peqqussutaat nr. 13, 30. oktober 1998-meersoq.

Kalaallit Nunaanni inuutissarsiutinut tapersiisarnernut inatsimmi nr. 134, 28. marts 1984-imeersumi § 1 naapertorlugu aalajangersarneqarput:

 

Kapitali 1.
Inuussutissarsiutinut tapersiisarnikkut siunertat tunngaviillu.

§ 1. Aalisarnermik, piniarnermik nunalerinermillu inuussutissarsiutit pissarsiviulluartartut unammillersinnaasullu siuarsarneqarnissaat siunertaralugu kiisalu suliffeqarfiit siunissami suliffissaqartitsinerulernermut sunniuteqarsinnaasut nutaat pilersiortorneqarnissaat imaluunniit pigineqareersut isumannaarneqarnissaat siunertaralugu kapitali 3-mi aamma kapitali 4-mi allassimasutut annertutigisunik inunnut ingerlatseqatigiiffinnulluunniit inuussutissarsiutinik pineqartunik Kalaallit Nunaanni ingerlatsisinnaatitaasunut Kalaallit Nunaanni aalajangersimasumik najugaqartunut angerlarsimaffeqartunulluunniit Namminersornerullutik Oqartussat tapiissuteqarsinnaapput.
Imm. 2. Tapiissuteqarnermi inuussutissarsiummut naleqquttumik aammalu ineriartortitsinissanut allanut, pisortat namminneerlutik imaluunniit ingerlatseqatigiiffiit suliffeqarfiilluunniit pisortat pigisaat aqqutigalugit aallartissimasaannut aallartinniarlugilluunniit eqqarsaatigisaannut, naleqqussakkamik, inissiiniartoqassaaq.

§ 2. Tapersiissuteqartoqarnissaa, tapiissutit annertussusissaat atugassarititaasussallu pillugit apeqqutinik aalajangiiniarnermi makkua isiginiarneqassapput:
1) Inuussutissarsiutissatut siunertanut inuiaqatigiit aamma aningaasassaqarniarnerup tungaanit isigalugu siuarsassallugit kissaatigineqartunut pingaartumik tapiissuteqartoqartassaaq,
2) aatsaat tapiissuteqartoqarsinnaavoq ineriartortitsinermut kissaatigineqartumut, soorlu suliffissuarnut, angallatinut umiarsualivinnullu tunngatillugu aningaasaliinissanut pilersaarutinut aningaasaliissutissat naleqqutissappata,
3) aatsaat tapiissuteqartoqarsinnaavoq ingerlatassanut teknikkikkut illersorneqarsinnaasunut, aammalu piffissaq ungasinnerusoq eqqarsaatigalugu aningaasarsiornissanut tunngatillugu ingerlaannarsinnaasutut nalilerneqarsinnaasunut,
4) qinnuteqartup suliamut tunngatillugu piginnaasani uppernarsassavai taakkunuuna takuneqarsinnaanngorlugu sulliviup illersorneqarsinnaasumik ingerlanneqarnissaata isumannaarneqarnissaanut ingerlatsinikkut aqutsinikkullu piginnaassutsit pisariaqartinneqartut naammassineqarsimasut,
5) aatsaat tapiissuteqartoqarsinnaavoq taarsigassarsiniartoq nammineerluni aningaasaliissuteqassappat pilersinniakkap pisiarinerani akit taakkulu ilaasa kapitali 3-mi aamma kapitali 4-mi, aalajangersakkat malillugit taarsigassarsianit aningaasaliivigineqarsinnaasut akornanni assigiinngissutsip ikinnerpaamik amerlaqataannik,
6) nammineerluni aningaasaliissutissat minnerpaamik affaat pigineqariissapput tassaassallutik taarsigassarsiniartup nammineq aningaasanngorlugit pigisai, sinnerilu akuersissuteqarnikkut allanit inuussutissarsiutinut tapersiisarnermi ataatsimiititaliumiunngitsoq taarsigassarsinikkut pissarsiarineqarsinnaallutik aamma
7) suliffeqarfimmik nutaamik pilersitsinermut tapiissuteqartoqarsinnaanngilaq, § 8-mi aamma § 29-mi pissutsit taaneqartut eqqaassanngikkaanni, taarsigassarsiniartoq pisortanut akilereersimasassanik akiligassaqarpat,
8) missingersuutinik allanillu atorneqarsinnaasunik naleqquttunik pisariaqartinneqartunik naliliineq aallaavigalugu suliffeqarfiup aningaasaqarnikkut illersorneqarsinnaasumik ingerlanneqarneranit annerusumik tapiissuteqartoqarsinnaangilaq.

 

Kapitali 2.
Inuussutissarsiutinut Tapersiisarnermi Ataatsimiititaliap inuttalersugaanera, pisinnaatitaaffii suliassaalu.

§ 3. Peqqussummi aalajangersakkat naapertorlugit Inuussutissarsiutinut Tapersiisarnermi Ataatsimiititaliaq tapiissuteqarnissamik aalajangiisassaaq.
Imm. 2. Ataatsimiititaliaq Inatsisartunit toqqarneqartunik, qinersinerup atuuttuusup ataatsip ingerlanerani ilaasortaasussanik, tallimanik inuttaqassaaq. Tamannalu ilutigalugu Inatsisartut toqqarneqartut akornanni kina ataatsimiititaliami siulittaasuussanersoq kinalu siulittaasumut tulliussanersoq toqqassavaat.
Imm. 3. Inatsisartunit ilaasortassatut toqqarneqartunut tamanut sinniisussanik aamma Inatsisartut toqqaassapput.
Imm. 4. Ataatsimiititaliap suliassat inuiaqatigiinnut annertuumik kinguneqartussat, tassunga ilanngullugu immikkut ittumik aningaasanut tunngatillugu kinguneqarsinnaasut, Naalakkersuisunut saqqummiuteqqaarlugit aatsaat aalajangiiffigisinnaavai.

§ 4. Ataatsimiititaliap aalajangigaanut tunngatillugu maalaarutaasut suliarineqartarnissaannut Inuussutissarsiutinut Tapersiisarnermi Naammagittaalliuuteqartarfimmik taagorneqartumik pilersitsisoqassaaq.
Imm. 2. Naammagittaalliuuteqartarfik Inatsisartunit toqqarneqartunik, qinersinerup atuuttuusup ataatsip ingerlanerani ilaasortaasussanik, pingasunik inuttaqassaaq. Naammagittaalliuuteqartarfimmi ilaasortaasut Inuussutissarsiutinut Tapersiisarnermi Ataatsimiititaliamut ilaasortaajutigisinnaanngillat.
Imm. 3. Qinnuteqartut Ataatsimiititaliap aalajangersimasai Inuussutissarsiutinut Tapersiisarnermi Naammagittaalliuuteqartarfimmut, aalajangiisimanerup nalunaarutigineqartup tigunerata kingorna sapaatip akunneri sisamat qaangiutsinnagit, suliassiissutigisinnaavaat.
Imm. 4. Inuussutissarsiutinut Tapersiisarnermi Naammagittaalliuuteqartarfiup suliassiissutigineqartoq tamakkiisumik ilaannakuusumilluunniit patsisissaqarsoriguniuk, naammagittaalliuuteqartarfiup suliaq pineqartoq inuussutissarsiutinut tapersiisarnermi ataatsimiititaliamut suliareqqitassanngorlugu innersuussutigisinnaavaa, kisiannili naammagittaalliuuteqartarfik qinnuteqaatip akuerineqarnissaanik aalajangiisinnaanngilaq.
Imm. 5. Suliassiissutigineqartoq naammagittaalliuuteqartarfimmit inuussutissarsiutinut tapersiisarnermi ataatsimiititaliamut suliareqqitassanngorlugu innersuussutigineqartoq ataatsimiititaliamit suliarineqassaaq, naammagittaalliuuteqartarfimmit suliap suliarineqarneranik ilisimatitsissummik tigusaqarnerminiit sapaatit akunneri sisamat qaangiutsinnagit. Suliamik suliareqqinnereernerup kingorna ataatsimiititaliap aalajangiinera tamatuma kingorna naammagittaalliuuteqartarfimmut suliareqqitassanngortinneqarsinnaanngilaq.

§ 5. Naalakkersuisut nalunaarusiornikkut peqqussutip ingerlanneqarnissaa aalajangersassavaat, tassunga ilanngullugit ataatsimiititaliap suleriaasissaanut kommunillu peqataatinneqarnerannut tunngasut.
Imm. 2. Taamatuttaaq Naalakkersuisut nalunaarutikkut ilinniartitaanermut, aningaasaqarniarnermut aamma teknikimut tunngasutigut piumasaqaatit pillugit maleruagassanik aalajangersaasinnaapput, taarsigassarsisitsisoqartinnagu qinnuteqaateqartut suliassatullu pilersaarusiat naammassisimasassaannik.
Imm. 3. Naalakkersuisut aammattaaq nalunaarutikkut taarsigassarsianut, taarsigassarsianut qularnaveeqqusiissutinut tapiissutinullu allanut, peqqussut manna malillugu tunniunneqartunut piumasaqaatit allat pillugit maleruagassanik aalajangersaasinnaapput.

 

Kapitali 3.
Inuussutissarsiutinut ataasiakkaanut tapiissutit.

Aalisarneq piniarnerlu.

§ 6. Inuussutissarsiutigalugu aalisarnermut piniarnermullu atugassanik motoreqareersunik nutaanik angallatitaarniartunut, nunami tunisassiorfinnut imaluunniit umiarsuarmut tunitsivimmut, naalakkersuisut immikkut akuersissuteqarnerisigut tunitsivissanngortitaasumut, pisatik tamakkerlugit tulaassisartunut, ernialinnik aamma erniaqanngitsunik taarsersugassaanngitsunillu taarsigassarsisitsisoqarsinnaavoq kiisalu imm. 2-miit 7-mut aalajangersakkat malillugit taarsigassarsisitsisarfinni namminersortuni pisortanilluunniit ingerlanneqartuni taarsigassarsianut qularnaveeqqusiisoqarsinnaalluni.
Imm. 2. Angallatinik imm. 1-imi pineqartunik pisaarniarnernut raajarniarnerinnavimmut atorneqartussanut imatut tapersiisoqarsinnaavoq aningaasaliissutit imatut annertussusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 62,5 %
2) Taarsigassarsiat erniaqanngitsut akilersugassaanngitsullu : 30 %
3) Nammineq aningaasaliissutit : 7,5 %
Imm. 3. Angallatinik imm. 1-imi pineqartunik pisaarnermut aalisakkanik allanik raajaanngitsunik aalisarnermut taamaallaat atorneqartussanut, pisut imm. 4-mi taaneqartut eqqaassanngikkaanni, imatut tapersiissuteqartoqarsinnaavoq aningaasalersuutit imatut annertussusilerlugit:
1) Taarsigassarsiat erniallit : 55 %
2) Taarsigassarsiat erniaqanngitsut akilersugassaanngitsullu : 37,5 %
3) Nammineq aningaasaliissutit : 7,5 %
Imm. 4. Imm. 3 naapertorlugu angallatinik pisinermut tapersiissutit, pingaartumillu Qaanaami eqqaanilu aamma Tunumi taamaallaat atorneqartussanik imaluunniit 21 fod tikillugit imaluunniit 6,60 meterinik takissusilinnut, imatut aningaasalersorneqassapput:
1) Taarsigassarsiat erniallit : 50 %
2) Taarsigassarsiat erniaqanngitsut akilersugassaanngitsullu : 45 %
3) Nammineq aningaasaliissutit : 5 %
Imm. 5. Angallatinut Qaanaami eqqaanilu imaluunniit Tunumi atorneqartussanut, imm. 4 malillugu, piumasaqaataavoq taarsigassarsiniartup sumiiffimmi pineqartumi aalajangersimasumik najugaqarnissaa aamma angallatip sumiiffimmi pineqartumi angerlarsimaffeqarnissaa. Taarsigassarsisoq sumiiffimmut allamut nuussappat imaluunniit angallat sumiiffimmi pineqartumi atorneqarunnaassappat, tapersiissutit akuersissutigineqarsimasut imm. 3-mi allassimasutut procentinngorlugu annertussutsinut allanngortinneqarnissaat piumasaqaataasinnaavoq.
Imm. 6. Imm. 2-miit 4-mut taaneqartuni aningaasalersuineq § 9 naapertorlugu pisinermi aningaasartuutinit tamarmiusunit naatsorsorneqassaaq. Nammineq aningaasaliissutit minnerpaamik amerlassuseqassapput, aamma taarsigassarsiat erniaqanngitsut akilersugassaanngitsullu annerpaamik amerlassuseqarsinnaapput pisinermi akiusup aalajangersakkani procentinngorlugu avinnerisut taaneqartutut. Illuatungaani taarsigassarsiat erniallit imaluunniit taarsigassarsianut qularnaveeqqusiissutit annerpaamik amerlassuseqarsinnaapput pisinermi akiusup illuatungaanilu taarsigassarsiat erniaqanngitsut akilersugassaanngitsullu aamma nammineq aningaasaliissutit akornanni nikingassutaasutut.
Imm. 7. Imm. 2-miit 4-mut taaneqartuni taarsigassarsianut ernialinnut imaluunniit taarsigassarsianut qularnaveeqqusiissutinut kiisalu taarsigassarsianut erniaqanngitsunut akilersugassaanngitsunullu akilersuiffissap sivisussusissaa imatut aalajangersarneqarpoq:
1) Angallatinut qisummik sisammilluunniit sanaanut : ukiut 20
2) Angallatinut glasfiberimik sanaanut : ukiut 15

§ 7. Angallatinik atornikunik nunatsinni pissarsiarineqartunik pisaarniarnernut imm. 2-miit 7-imut aalajangersakkat malillugit tapiissuteqartoqarsinnaavoq.
Imm. 2. Imm. 1 malillugu taamaallaat tapiissuteqartoqarsinnaavoq ataatsimiititaliaq siusinnerusukkut angallammut taarsigassarsianik ernialersukkanik imaluunniit taarsigassarsianut qularnaveeqqusiissutinik.
Imm. 3. Imm. 1 malillugu angallatinik aningaasalersuinermut annertunerpaanik tapiissutissanik naatsorsuinermi naatsorsuinermut tunngaviusutut taarsigassarsisitsinermi naligititaasut aalajangersarneqassapput. Taarsigassarsisitsinermi naligititaasut imatut malittarisaqarluni aalajangersarneqassapput:
1) Angallatip pisiarineqarnerani siullermik akigititaasut tamarmiusut siullermik taarsigassarsisitsinermi angallammut naligititaasutut annertussuseqassapput,
2) piffissap nalikilliliiffiup naareernerani ukiuni qulini angallatip nalingata sinnera siullermik taarsigassarsisitsinermi naligititaasut 5%-iannik annertussusilerneqassaaq,
3) siullermik taarsigassarsisitsinermi naligititaasoq angallatinut qisummik sisammilluunniit sanaanut ukiut 30-it aamma angallatinut glasfiberimik sanaanut ukiut 20-it ingerlanerini assigiiaamik nalikillilerneqassapput aamma ukiumoortumik nalikilliliinerit siullermik taarsigassarsisitsinermi naligititaasunit naatsorsorneqassapput.
4) taarsigassarsisitsinermi naligititaasoq appartinneqartoq inuussutissarsiutinut tapersiisarnermi ataatsimiititaliap angallammut tunngatillugu akiligassanik isumakkeerinnissutigisinnaasaasa amerlaqataannik annikillisinneqassaaq, taamaattorli tunisisup angallammut tunngatillugu akiligassaasa sinnerinit ikinnerungitsunut.
5) taarsigassarsisitsinermi naligititaalersut taamaalillutik annertussuseqalissapput siullermik taarsigassarsisitsinermi naligititaasut piffissami ingerlareersumi nalikilliliissutinik ilanngarlugit aammaa akiligassanik isumakkeerinnissutaasinnaasut ilanngaatigalugit aamma
6) tunisisoq imaluunniit siusinnerusukkut piginnittuusimasut ukiuni kingullerni qaangiuttuni qulini angallammut tunngatillugu annertuumik allanngortiterisimappata imaluunniit iluarsaanernik suliaqarsimappata, taarsigassarsisitsinermi naligititaasoq allanngortiterinermi imaluunniit iluarsaanermi akiusup annertoqataanik ukiuni qulini assigiiaartumik nalikkillileereernerup kingorna qaffanneqassaaq.
Imm. 4. Imm. 1 naapertorlugu angallatitaarniarnermi tunisisup aningaasalersorneqarsimaneratut aningaasalersuinertalimmik tapiissuteqartoqarsinnaavoq taamaattorli imatut nammineq aningaasaliissutit taarsigassarsisitsinermi naligititaasup aamma angallatip pissarsiarinerani akiusup assigiinngissutaattut annertutigissallutik aamma pissarsiarinerani akiusup minnerpaamik 10%-iatut. Taamaattorli annertunerpaamik ernialersugaanatillu akilersuutitaqanngitsunik taarsigassarsisitsisoqarsinnaavoq tunisisup ernialersugaanatillu akilersuutitaqanngitsunik taarsigassarsiaasa sinnerisa amerlaqataannik.
Imm.5. Tunisisup angallat inuussutissarsiummut taperserneqarluni pissarsiarisimanngippagu imatut aningaasalersiusoqarluni tapersiisoqarsinnaavoq angallat annertunerusutigut raajarniarnermut atorneqartussaappat.
1) Taarsigassarsiat ernialersukkat imaluunniit taarsigassarsianut qularnaveeqqusiussat : 60%
2) Taarsigassarsiat ernialersugaanngitsut akilersigassaanngitsullu :30%
3) Nammineq aningaasaliissutit :10%
Imm. 6. Tunisisup angallat inuussutissarsiummut taperserneqarluni pissarsiarisimanngippagu imatut aningaasalersuisoqarluni tapersiisoqarsinnaavoq angallat annertunerusutigut raajarniarnerunngitsumut atorneqartussaappat:
1) Taarsigassarisiat ernialersukkat : 52,5%
2) Taarsigassarsiat ernialersugaanngitsut akilersugassaanngits. : 37,5%
3) Nammineq aningaasaliissutit : 10%
Imm. 7. Imm. 1 naapertorlugu tapiissuteqartoqarsinnaavoq piffissap tunisisumut tapiissutaasut sinnerisa akilersorneqarnissaasut sivisoqataatut sivisussusilimmik akilersuiffissalimmik. Taamaattorli piffissamik akilersuiffissamik aalajangiisoqarsinnaavoq angallatip piunissaata sinneruttutut naatsorsuutigisaasup sivisoqataanik taamaattorli ukiunik qulinik sivisunerpaaffissalerlugu.

§ 7a. Angallatinik atornikunik Kalaallit Nunaata avataani pissarsiarineqartunik pissarsinermut imm. 2-miit 11-mut aalajangersakkat malillugit tapiissuteqartoqarsinnaavoq.
Imm. 2. Imm. 1 malillugu taamaallaat tapiissuteqartoqarsinnaavoq, angallatip ataatsimoortumik piumasaasut uku eqqortissimappagit:
1) Angallat raajarniarnermut saattuarniarnermulluunniit atorneqassaaq.
2) Angallat raajarniarnissamut saattuarniernissamulluunniit piukkunnartutut isigineqassaaq atorsinnaassusia pillugu inuussutissarsiutinut tapersiisarnermi ataatsimiititaliap akuersinnaasaanik teknikikkut naliliisoqareerpat.
Imm. 3. Angallat ingerlatsinermut missingersuutit inuussutissarsiutinut tapersiisarnermi ataatsimiititaliamit akuerineqarut malillugit annerusumik raajarniutigineqassappat, imm. 1 malillugu taamaallaat tapiissuteqartoqarsinnaavoq, angallat amerlanerpaamik ukiunik tallimanik pisoqaassuseqarpat sisammillu sanaajulluni.
Imm. 4. Angallat ingerlatsinermut missingersuutit inuussutissarsiutinut tapersiisarnermi ataatsimiititaliamit akuerineqartut malillugit annerusumik saattuarniutigineqassappat, imm. 1 malillugu taamaallaat tapiissuteqartoqarsinnaavoq, angallat amerlanerpaamik ukiunik qulinik pisoqaassuseqarpat aammalu sisammit qisummilluunnit sanaajulluni.
Imm. 5. Taamaattoq imm. 3-mi aamma 4-mi pisoqaassutsinut killissatut taaneqartut saneqqunneqarsinnaapput, angallat sivisunerusumik piusinnaasutut isigineqarpat, taarsigassarsiffiup nalaani taarsigassarsiarititanut qularnaveeqqusiisoqarsinnaaneranut illersorneqarsinnaasumik atorneqarsinnaasutut nalilerneqarpat angallatillu aserfallatsaalisaanera tamatuma saniatigut ima ajunngitsigippat angallat siunertamut atorneqarsinnaasutut inassutigineqarsinnaalluni.
Imm. 6. Imm. 1 malillugu tapiissuteqartoqassappat ernialinnik taarsigassarsiatut, erniaqanngitsunik akilersugassaanngitsunillu taarsigassarsiatut imaluunniit taarsigassarsinermut qularnaveeqqussiissutitut taarsigassarsisitsisoqarsinnaavoq.
Imm. 7. Imm. 1. malillugu angallatinik aningaasalersuinermut annertunerpaanik tapiissutissanik naatsorsuinermi naatsorsuinermut tunngaviusutut taarsigassarsisitsinermi naligititaasut aalajangersarneqassapput, qanoq annertutigisumik tapiissuteqartoqarnissaa tunngavigalugu. Taarsigassarsisitsinermi naligititaasut imatut malittarisassaqarluni aalajangersarneqassapput:
1) Angallatip pisiarineqarnerani siullermik akigititaasut tamarmiusut siullermik taarsigassarsisitsinermi angallammut naligititaasutut annertussuseqassapput,
2) ukiut 20-it ingerlanerini taarsigassarsisitsinermi naligititaasut assigiiaamik nalikillilerneqassapput, aamma ukiumoortumik nalikilliliinerit siullermik taarsigassarsisitsinermi naligititaasunit naatsorsorneqassapput,
3) taarsigassarsisitsinermi naligititaalersut taamaalillutik annertussuseqalissapput siullermik taarsigassarsisitsinermi naligititaasut piffissamut ingerlareersumut nalikilliliissutinik ilanngarlugit, aamma
4) ukiuni kingullerni qaangiuttuni tallimani angallammik annertuumik iluarsaassillunilluunniit allanngortiterisoqarsimappat, aningaasaliinerit taamaattut ukiut tallimat ingerlanerini assigiiaamik nalikillilerneqassapput, aamma taarsigassarsisitsinermi naligititaasoq qaffanneqarsinnaavoq aningaasaliinerit nalikillineqartut amerlaqataannik.
Imm. 8. Angallat taarsigassarsisitsissutaanerata nalinganit annerusumik akilerlugu aatsaat pissarsiarineqarsinnaapput, tapiissuteqartoqarsinnaavoq pissarsiarinerata akianik isumaqatigiissut tunngavigalugu, ingerlatsinermut missingersuutini uppernarsarneqarpat erniat akilersuutillu akilerneqarnerisigut sinneqartoortoqarsinnaassasoq. Ingerlatsinermut missingersuutit inuussutissarsiutinut tapersiisarnermi ataatsimiititaliamit akuerineqassapput. Aammattaaq nalunaarnikkut uppernarsarneqassaaq angallatip pisoqaassusia eqqarsaatigalugu ilimagineqarsinnaasumik minnerpaamik ima paarilluagaatigisoq aammalu angallat atornikoq taamatut ittoq akikinnerungaanngitsumik pissarsiarineqarsinnaassalluni. Nalunaarut inuussutissarsiutinut tapersiisarnermi ataatsimiititaliamit akuerineqassaaq.
Imm. 9. Imm. 1 naapertorlugu taamaalilluni angallatit pingaarnerusumik raajarniutigineqartussat pissarsinissaannut aningaasalersuinermut tapiisoqarsinnaavoq aningaasalersuuti imatut annertussusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 60 %
2) Taarsigassarsiat erniaqanngitsut akilersugassaanngitsullu : 30 %
3) Nammineq aningaasaliissutit : 10 %
Imm. 10. Imm. 1 naapertorlugu taamaalilluni angallatit pingaarnerusumik saattuarniutigineqartussat pissarsiarinissaannut aningaasalersuinermut tapiisoqarsinnaavoq aningaalersuutit imatut annertussusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 52,5%
2) Taarsigassarsiat erniaqanngitsut akilersugassaanngitsullu : 37,5%
3) Nammineq aningaasaliissutit : 10 %
Imm. 11. Imm. 1 malillugu tapiissuteqartoqarsinnavoq angallatip piusinnaanerata sinneratut sivisussusissaanik ilimagineqartup sivisoqataanik. Taamaattorli taarsigassarsiat erniallit kingusinnerpaamik angallatip ukiunik 20-nik pisoqaassuseqalernerani akilerneqareersimassapput, angallat pingaarnerusumik raajarniutigineqassappat, aammalu kingusinnerpaamik angallatip ukiunik 25-nik pisoqaassuseqalernerani, angallat pingaarnerusumik saattuarniutigineqassappat. Piffissarli akilersorneqarfissaat ukiunut 20-nit amerlanerusunut aalajangerneqarsinnaanngilaq.

§ 7b. § 6, § 7, aamma § 7a-mi taarsigassarsianut ernialinnut imaluunniit taarsigassarsianut qularnaveeqqusiissutinut akilersuiffissap sivisussusissaa imaalillugu aalajangerneqassaaq, tassa akilersuut siulleq kingusinnerpaamik angallatip tunniunneqarneraniit ukiup ataatsip qaammatillu arfinillit qaangiunnerani akileqquneqassalluni.

§ 8. Umiatsiaaqqanik sanarlaanik 16 fodinik minnerpaamik takissusilinnik ikkuttakkanik motorilinnik inuussutissarsiutigalugu aalisarnermut piniarnermulluunniit imaluunniit inuussutissarsiutigalugu nunalerinermut atatillugu assartuinermut atorneqartussanik pisinermut imm. 2-miit 4-mut aalajangersakkat malillugit tapiissuteqartoqarsinnaavoq, umiatsiaaqqat inuussutissarsiutinut tapersiisarnermi ataatsimiititaliamit nunatsinni umiatsiaaqqanut inuussutissarsiutigalugit atorneqartunut teknikikkut minnerpaamik piumasaqaataasunik naammassinnissimappata. Qinnuteqaatit suliarineqarneranni pisuussutit uumassusillit, inuussutissarsiutigalugu umiatsiaaqqat amerlassusiisa tunitsiviusinnaasullu akornanni pitsaasumik oqimaaqatigiissitsiniartoqassaaq.
Imm. 2. Tapiissuteqartoqarsinnaavoq qinnuteqaateqartunut nunalerinermut siunertanut inuussutissarsiutinut tapersiivigineqarsimasunut imaluunniit inuussutissarsiutinut tapersiisarnermi ataatsimiititaliap erseqqinnerusumik aalajangersaaneratigut uppernarsaasunut:
1) Pineqartup isertitai tamarmiusut umiatsiaaqqamit qimussimilluunniit aalisarnikkut piniarnikkulluunniit imaluunniit snescooterit atorlugit aalisakkanik pisanilluunniit assartuinikkut, ukiumi inaarutaasumik akileraaruteqarfiusumi kingullermi akileraartarnermi ilanngaatinik tamanik ilanngaassisoqannginnerani pissarsiarineqarsimasut, pineqartup toqqakkatut suliaqartitaanermit isertitai ilanngaatigereerlugit, akissarsiaasa tamarmiusut ilanngaatitaqanngitsut ikinnerpaamik 50%-erissagaat, aamma
2) qinnuteqaateqartup ukiup inaarutaasumik akileraaruteqarfiusp kingulliup naaneraniit piffissamut qinnuteqaateqarfiusumut umiatsiaaqqamit qimussimilluunniit aalisarnikkut piniarnikkulluunniit imaluunnit snescooterit atorlugit aalisakkanik pisanilluunniit assartuinikkut aningaasarsiami tamarmiusut minnerpaamik 50%-ii suli pissarsiarisassagai.
Imm.3. AAningaasarsiat tamarmiusut umiatsiaaqqamit qimussimilluunniit aalisarnikkut piniarnikkulluunniit imaluunnit snescooterit atorlugit aalisakkanik pisanilluunniit assartuinikkut pissarsiarineqarsimasut"-ut paasineqassapput tunisinermi tuniniaanermilu isertitat tamarmiusut, akileraarusiisoqartinnagu aamma isertitanik pissarsinermut atatillugu aningaasartuutit ilanngaatigineqarsinnaasut tamaasa ilanngaatigineqartinnagit. Umiatsiaaqqamit allamit qinnuteqartumiunngitsoq pigineqartumit aalisarneq piniarnerluunniit pineqarpat, aningaasarsiatut tamarmiusutut aamma paasineqassapput akissarsiat, akileraarusiisoqartinnagu aamma ernianut aningaasartuutit, akileraartarnermi ilanngaatissat assigisaallu ilanngaatigineqartinnagit.
Imm. 4. AAningaasarsiatut ilanngaatitaqanngitsut tamarmiusut"-ut paasineqassapput aningaasarsiat A-t B-llu akileraaruteqaataasussat tamarmik, akileraarusiisoqartinnagu aamma ernianut aningaasartuutit, akileraartarnermi ilanngaatissat, aningaasartuutit ilanngaatigineqarsinnaasut assigisaallu ilanngatigineqartinnagit.
Imm. 5. Imm. 1 malillugu tapersiissuteqartoqassaaq umiatsiaaqqap pisiarinerani akit 75%-ii tikillugit tapiissuteqarnikkut. Umiatsiaaraq taamaallaat imaluunniit pingaarnerusumik Qaanaap eqqaani imaluunniit Tunumi atorneqassappat umiatsiaaqqap pissarsiarinerani akiata 84%-ianik tapiissuteqartoqassaaq. Umiatsiaaqqamut umiusimasumut aserorsimasumulluunniit qinnuteqaateqartup tamanna tikillugu pigisimasaanut sillimmasiissutitigut taartisisoqarsimappat umiatsiaaqqamut nutaamut pisiarinerani akit tapiissuteqarfigineqarsinnaasut sillimmasiissutitigut taarsiissutit amerlaqataannik ilanngarneqassapput.
Imm. 6. Imatut atugassaqartitsilluni tapiissuteqartoqassaaq tapiissutit utertinneqarnissaat piumasaqaatigineqarsinnaalluni umiatsiaaraq pisaarineqartoq inuussutissarsiutinut tapersiisarnermi ataatsimiititaliaq siumut isumaqatigiissuteqarfigeqqaarnagu pisaarineraniit ukiut tallimat qaangiutsinnagit allanut tunineqarpat imaluunniit tapiissuteqarfigineqartoq taaneqartutut piffissap ukiut tallimat ingerlanerini imm. 2, nr. 1-mi isertitatigut piumasaqaataasunik aalajangersakkanik naammassinnissinnaanngittuarsinnarpat.

§ 9. Angallatinut § 6, § 7, § 7a aamma § 8 malillugit aningaasalersorneqartunut pisinermi akigititaasunut ilaapput isumaqatigiissummi akigititassatut isumaqatigiissutit, aalisarnermut atortussanut pisariaqartinneqartunut pisinermi aningaasartuutit, kvartalimut sillimmasiissutinut akiliutit kiisalu angallatip tiguneqarnerani aningaasartuutit allat il.il. angallatip angerlarsimaffianiit aalisalersitsinissamut angallatip tamakkiisumik atortulersornissaanut pisariaqartinneqartutut naatsorsuutigineqartut.
Imm. 2. Angallatinut nutaanut pisaartoqarnerani aningaasartuutinik appartitsinissamut allaniit toqqaannartumik tapiissuteqartoqarpat pisiarinerani akit tapiissutit ilanngaatiginagit naatsorsorneqassapput, aamma taarsigassarsiat erniaqanngitsut akilersugassaanngitsullu aalajangersakkat siuliiniittut malillugit tapiissutit nalingannik annikillisinneqassapput.

§ 10. Inuussutissarsiutigalugu aalisarnermut piniarnermulluunniit angallatinik motoreqareersunik allanngortiterinermut iluarsaassinermulluunniit imaluunniit atortunik, motorinik, sillimaniarnermut atortunik aamma teknikikkut atortulersuutinik allanik angallatinut taamaattunut pisinernut imm. 2-miit 5-mut aalajangersakkat malillugit ernialinnik taarsigassarsisitsisoqarsinnaavoq aamma ernialersugaanngitsunik akilersugassaanngitsunillu taarsigassarsisitsisoqarsinnaalluni imaluunniit taarsigassarsiniartarfinnit namminersortut imaluunniit pisortat pigisaannit taarsigassarsianut qularnaveeqqusiisoqarsinnaalluni, piumasaqaatit uku naammassineqarsimappata:
1) angallammut maannakkut imaluunniit siusinnerusukkut piginnittunut peqqussut una imaluunniit inuussutissarsiutinut tapersiisarneq pillugu maleruagassat siusinnerusukkut atuuttut malillugit taarsigassarsianik ernialersukkanik imaluunniit taarsigassarsianut qularnaveeqqusiissutinik tapiissuteqartoqarsimassasoq
2) angallatinut qisunnut sisannulluunniit tunngatillugu angallat ukiut 30-it sinnerlugit pisoqaassuseqassanngitsoq aamma angallatinut glasfiberinut ukiut 20-it sinnersimassanagit, aammattaaq anngallammi inuussutissarsiutinut tapersiisarnermit taarsigassarsiaqartoqanngippat, aamma
3) angallat sillimmaserneqarsimassasoq aamma taarsigassarsiallip sillimmasiinermut akiliutissaq kingulleq akilereersimassagaa.
Imm. 2. Imm. 1 malillugu aalisarnermut atortunik pisinermut aamma annikinnerusumik iluarsaassinissanut aammalu teknikikkut atortulersuutinut annikinnerusunut imatut tapiissuteqartoqarsinnaavoq aningaasalersuinerit imatut amerlassusilerlugit:
1) Taarsigassarsiat erniallit : 90 %
2) Nammineq aningaasaliissutit : 10 %
Imm. 3. Imm. 1 malillugu allanngortiterinernut aamma annertuunik iluarsaanernut, motorinik aammalu teknikikkut atortulersuutinut annertunerusunik allanik pisinernut kiisalu isumannaallisaatinik pisiortornernut imatut tapiissuteqartoqarsinnaavoq aningaasaliissutit imatut amerlassusilerlugit:
1) Taarsigassarsiat erniallit imaluunniit taarsigassarsianut qularnaveeqqusiissutit : 60 %
2) Taarsigassarsiat erniaqanngitsut akilersugassaanngitsullu : 30 %
3) Nammineq aningaasaliissutit : 10 %
Imm. 4. Imm. 1-imiit 3-mut aalajangersakkat malillugit taarsigassarsiat erniallit imaluunniit taarsigassarsianut qularnaveeqqusiissutit annerpaamik amerlassuseqarsinnaapput sanaartornermi aningaasartuutit illuatungaanilu taarsigassarsiaasinnaasut erniaqanngitsut akilersugassaanngitsullu aamma nammineq aningaasaliissutit akornanni nikingassutaasut. Taarsigassarsiat erniaqanngitsut akilersugassaanngitsullu annerpaamik aamma nammineq aningaasaliissutit minnerpaamik amerlassuseqassapput sanaartornermi aningaasartuutit procentinngorlugu avinnerisut taaneqartutut. Taamaattoq imm. 3 malillugu tapersiissuteqarneq imaluunniit angallatip aalisarnermut allamut ikaarsaariarneranut atatillugu imm. 2 malillugu tapersiissuteqarneq pineqarpat nammineq aningaasaliissutit 5%-mut appartinneqarsinnaapput taamaaqataanik taarsigassarsiat erniallit imaluunniit taarsigassarsianut qularnaveeqqusiissutit qaffanneqarnerisigut.
Imm. 5. Imm. 1-imiit 3-mut aalajangersakkat malillugit taarsigassarsianut imaluunniit taarsigassarsianut qularnaveeqqusiissutinut piffissaq akilersuiffissaq imatut sivisunerpaaffilerneqarsinnaavoq:
1) aalisariutip tunniunneqareernerata kingorna pissarsiarineqartunut aalisarnermi atortunik pisinermut tapiissuteqartoqarpat,ukiunut tallimanut
2) Iluarsartuussinernut annikinnerusunut aammalu teknikikkut atortulersuutinut annikinnerusunut tapiissuteqartoqarpat, ukiunut tallimanut.
3) Isumannaallisaatinut tapiissuteqartoqarpat, ukiunut tallimanut.
4) Allanngortiterinernut, annertunerusunik iluarsartuussinernut, motorinik aamma teknikikkut atortulersuutinik annertunerusunik pisinermut tapiissuteqartoqarpat, ukiunut qulinut.

 

Nunalerineq.

§ 11. Nunalerinermut siunertanut inuussutissarsiummut atatillugu illuutit, nammineq illuliatut sanaartorneqartut allilerneqartulluunniit sanaartornerinut, pigisarilernerinut allilerneqarnerinulluunniit imatut aningaasalersuinertalerlugu tapiissuteqartoqarsinnaavoq:
1) Taarsigassarsiat erniallit : 15 %
2) Taasigassarsiat ernialersugaanngitsut akilersugassaanngitsullu : 75 %
3) Nammineq aningaasaliissutit : 10 %
Imm. 2. Piginnittumut, atuisumut, aqutsisumut ikiortimulluunniit inissianik sanaartornermut pigisarinnilersitsinermulluunniit imm. 1 malillugu tapiissuteqarnermut atatillugu ineqarnermut tapiissuteqartarfimmit nunap karsianit taarsigassarsianut atugassarititaasutut atugassaqartitsilluni tapiissuteqartoqarsinnaavoq.
Imm. 3. Imm. 1 malillugu taarsigassarsinermut atatillugu sanatunik assigisaannillu pisariaqartinneqartumik ikiorteqarnermut ernialersukkanik taarsigassarsisitsisoqarsinnaavoq.
Imm. 4. Imm. 1 malillugu taarsigassarsianut piffissaq akilersuiffissaq sivisunerpaamik ukiunut 25-nut aalajangersarneqarpoq. Imm. 3 malillugu taarsigassarsianut piffissaq akilersuiffissaq sivisunerpaamik ukiunut qulinut aalajangersarneqarpoq.

§ 12. Illut § 11-mi aalajangersakkanut ilaasut innaallagissiorfissaannik sanaartornermut pisinermulluunniit imatut aningaasalersuisoqarluni tapiissuteqartoqarsinnaavoq:
1) Taarsigassarsiat erniallit : 30 %
2) Taasigassarsiat ernialersugaanngitsut akilersugassaanngitsullu : 60 %
3) Nammineq aningaasaliissutit : 10 %
Imm. 2. Imm. 1 malillugu taarsigassarsianut piffissaq akilersuiffissaq sivisunerpaamik ukiunut qulinut aalajangersarneqarsinnaavoq.

§ 13. Nersutaatissarsinernut kiisalu snescooterisinernut imatut aningaasalersuisoqarluni tapiissuteqartoqarsinnaavoq:
1) Taarsigassarsiat erniallit : 90 %
2) Nammineq aningaasaliissutit : 10 %
Imm. 2. Maskiinarsinernut, atortussarsinernut assigisaannillu pisinernut imatut aningaasalersuisoqarluni tapiissuteqartoqarsinnaavoq:
1) Taarsigassarsiat erniallit : 57 %
2) Taasigassarsiat ernialersugaanngitsut akilersugassaanngitsullu : 33 %
3) Nammineq aningaasaliissutit : 10 %
Imm. 3. Imm. 1 aamma 2 malillugit taarsigassarsianut piffissaq akilersuiffissaq sivisunerpaamik ukiunut qulinut aalajangersarneqarsinnaavoq.

§ 14. Nunagissaanernut taamatuttaaq narsaasiornernut nutaamillu ujaraajaanernut, marraasarterinernut, paqqersaanernut, kalkilersuinernut naggorissaasersuinernut narsaatinullu aqqusinniornernut imatut tapiissuteqartoqassaaq aningaasalersuutit imatut amerlassusilerlugit:
1) Taasigassarsiat ernialersugaanngitsut akilersugassaanngitsullu : 70 %
2) Nammineq aningaasaliissutit : 10 %
Imm. 2. Imerterutinik, ungalunik assigisaannillu pisinernut imatut tapiissuteqartoqassaaq aningaasalersuutit imatut amerlassusilerlugit:
1) Taarsigassarsiat erniallit : 30 %
2) Taasigassarsiat ernialersugaanngitsut akilersugassaanngitsullu : 60 %
3) Nammineq aningaasaliissutit : 10 %
Imm. 3. Imm. 1 aamma 2 malillugit taarsigassarsianut piffissaq akilersuiffissaq sivisunerpaamik ukiunut qulinut aalajangersarneqarsinnaavoq.

§ 15. Pigisat nalillit, § 11-mi, § 12-imi aamma § 13-imi aalajangersakkanut ilaatinneqartut, iluarsarneqarnerinut ernialinnik taarsigassarsisitsisoqarsinnaavoq imaluunniit taarsigassarsianut qularnaveeqqusiisoqarsinnaalluni kiisalu erniaqanngitsunik taarsersugassaanngitsunillu taarsigassarsisitsisoqarsinnaalluni, pigisat nalillit pisaarinerini aalajangersakkanisut annertutigisunik, taamaattorli matumani taarsigassarsiat taarsersornissaat sivisunerpaamik ukiuni qulini ingerlassasoq aalajangerneqarsinnaalluni.

§ 16. Nunaatilittut aallarteqqaarnermut atatillugu §§ 11, 12, 13 aamma 14-imi aalajangersakkat malillugit imatut tapiissuteqartoqarsinnaavoq nammineq aningaasaliissutit 5 %-inut aalajangersarneqarlutik. § 11, imm. 1, aamma § 14, imm. 1 malillugit tapiissuteqartoqartillugu taamatut annertussusilimmik taarsigassarsiat ernialersugaanngitsut akilersugassaanngitsullu amerlisinneqassapput. §§ 12, 13, aamma 14, imm. 2 malillugit tapiissuteqartoqartillugu taamatut annertussusilimmik taarsigassarsiat erniallit amerlisinneqassapput.
Imm. 2. Nunaatilittut aallarteqqaarneq peqqussummi matumani paasineqassaaq taarsigassarsisoq sumiffimmi illutaqariinngitsumi aallaqqaataaniit nunaateqarfimmik pilersitsisoq pilersaarutigineqartutut nunaateqarnermik ingerlatsinermi atorneqartussamik imaluunniit nunaateqarfioreersumik taassumaluunnit ilaanik pissarsisoq. Nunaateqalerlaatut isigineqanngilaq taarsigassarsisoq nunaateqarfiusumut piginneqataaffigeriikkaminut piginneqataalissappat.
Imm. 3. Imm. 1 aamma 2 malillugit aningaasaliissutini annertusisamik tapiissuteqarneq taamaallaat aningaasaliissutinut, taarsigassarsisup nunaatilinngorneranik piviusunngortitsinermut ukiunut pingasunut siullernut inuussutissarsiutinut tapersiisarnermut ataatsimiititaliamit pilersaarutini akuersissutigineqartuni ilanngunneqartunut, atorneqarsinnaavoq.

§ 17. Taarsigassarsisup aningaasaqarniarnera eqqarsaatigalugu pisariaqartinneqartutut isumaqarfigineqarpat § 11-mi, § 12-imi, § 13-imi, § 14-imi § 15-imilu aalajangersakkat naapertorlugit taarsigassarsianut tunngatillugu erniat taarsersugassallu taarsersornerat kinguartinneqarsinnaavoq taarsigassarsiat pilersinneriniit ukiut pingasut angullugit. Erniat akilersornissaannut tunngatillugu akilersuinissaq kinguartikkallarneqarsimappat, kinguartitsigallarnerup nalaani erniat taarsigassarsiarineqarsimasunut ilanngunneqassapput.

§ 18. Nerukkaatissanik kingunissanillu pisinermut ernialinnik taarsigassarsisisitsisoqarsinnaavoq pisinermi aningaasartuutit 100%-ii tikillugit. Taarsigassarsisut arlallit ataatsimut pisinerannut atatillugu tuniniaasartunut assartuisartullu suliffiutaannut akiliinissamut qularnaveeqqusiigallartoqarsinnaavoq.
Imm. 2. Imm. 1 naapertorlugu taarsigassarsiat tunniunneqartassapput taarsigassarsisup nersutaatinit toqorakkanit kinguaassiortitassanillu tunisinermigut isertitassai qularnaveeqqusiullugit.
Imm. 3. Imm. 1 naapertorlugu taarsigassarsiat ukiup ataatsip ingerlanerani akilerneqarsimassapput.

 

Kapitali 4.
Ernianut tapiissutit qularnaveeqqusiinerlu.

§ 19. Taarsigassarsisitsisarfinnit namminersortunit pisortanillu pigineqartunit taarsigassarsiat erniaasa appartinnissaannut kapitali 3-mi aalajangersakkat naapertorlugit ernianut tapiissuteqartoqarsinnaavoq.
Imm. 2. Kiisalu aamma inuussutissarsiutinut tapersiisarnermi maleruagassat siusinnerusukkut atortuusut naapertorlugit taarsigassarsianut qularnaveeqqusiinernut atatillugu ernianut tapiissuteqartoqarsinnaavoq.

§ 20. § 18, imm. 2-mi akilersuinissamut qularnaveeqqusiissutit eqqaassanngikkaanni taamaallat qularnaveeqqusiisoqarsinnaavoq taarsigassarsianut imatut piumasaqaatitalinnik taarsigassarsiarineqartunut inuussutissarsiutinut tapersiisarnermi ataatsimiititaliap nalilerlugu aningaasaqarnikkut iluaqutaasumik qularnaveeqqusiissutitalimmut ernianut tapiissutinut. taarsiullugu landskarsimit taarsigassarsisitsisoqarsinnaasoq.

 

Kapitali 5.
Tapersiinermi atugassarititaasut.

§ 21. Taarsigassarsiat nalinginnaasut maleruagassiat naalakkersuisunit aalajangersarneqarsimasut naapertorlugit ernialersorneqarlutillu taarsersorneqassapput. Taarsigassarsiat naafferarlugit tunniunneqarsinnaapput.

§ 22. Taarsigassarsiat erniaqanngitsut taarsersugassaanngitsullu, taarsigassarsiat qanoq sivisutigisumik taarsersornissaannut tunngatillugu kapitali 3-mi ukiut aalajangerneqarsimasut malillugit, nalikilliivigineqassapput. Tamatuma saniatigut ernialinnik taarsigassarsisoqarsimappat imaluunniit pisaarniarnermut atatillugu taarsigassarsinermut qularnaveeqqusiisoqarsimappat, taava taarsigassarsiat erniaqanngitsut taarsersugassaanngitsullu taakkununnga taarsersuinissanut tunngatillugu aalajangersakkat assinginik nalikilliliivigineqassapput.
Imm. 2. Nalillit pissarsiarineqarsimasut nalikilliliinissamut piffissaritinneqartup aalajangerneqarsimasup ingerlanerani taarsigassarsisitsinermi sumut atornissaannut naatsorsuutigineqarsimasutut atorneqanngippata, imaluunniit taarsigassarsinermi, ernialinnik taarsigassarsinermi, taarsigassarsinermullu atatillugu qularnaveeqqusiunneqarsinnaasunut atugassarititaasut sumiginnarneqarsimappata, taava aningaasat nalikilliliissutigineqarsimanngitsut utertillugit akilerneqassapput. Aalajangerneqarsinnaavorli taarsigassarsiat uninngatiinnarneqarsinnaasut akiligassat sinnerisa siunissami ernialersorneqarnissaannik taarsigassarsiatullu ernialittut taarsersorneqarnissaannik periarfissaqartitsilluni piumasaqaatitalerlugit.

§ 23. Taamaallaat taarsigassarsisitsisoqarsinnaavoq aamma taarsigassarsianut ingerlatsinermullu sillimmatitut akiligassarsianut qularnaveeqqusiisoqarsinnaalluni isumannaallisaasoqarneratigut.

 

Kapitali 6.
Taarsigassarsiat taarsersorneri, pillaammik ernialiussat aamma akiliinngikkallarnissamik kiisalu isumakkeerinermik atortuujunnaarsitsinernillu aaqqissuussinerit.

§ 24. Taarsigassarsiat ima ikilisikkiartuaartinneqassapput ukiumi taarsersuiffiusumi ukiumut amerlaqatigiissunik akilersuuteqarnertigut nalikilliliivigineqartarnertigullu.
Imm. 2. Qularnaveeqqusiissutitut immaqalu taarsigassarsiat imaluunniit taarsigassarsisitsisarfimmit taarsigassarsiat erniaannut tapiissutitut tapersiisoqarsimassappat taarsigassarsiat taarsigassarsiniartarfimmilluunniit taarsigassarsiat taarsigassarsinermut isumaqatigiissummi pineqartumi aalajangersakkat malillugit ikilisinneqassapput.

§ 25. Inuussutissarsiutinut Tapersiisarnermi Ataatsimiititaliaq, pigisat nalillit sillimmasiunneqarsimappata, taarsigassarsianut atatillugu atugassarititaasut naapertorlugit ernianut akilersuinermik unitsitsigallarsinnaavoq qaammatit aqqaneq-marlukkuutaarlugit ukiullu tallimat angullugit sivisussusilimmi, tassa akilersuinerit erniallu siunissami akilersuinissami angeqqatigiiaarlugit agguarneqarsinnaassammata taamaalilluni taarsigassarsiat sinneri sivisunerpaamik ukiut tallimat ingerlanerini akilerneqartussanngorlugit.

§ 26. Qularnaveeqqusiissutitut tapersiisoqarsimassappat atukkiisarfiup Inuussutissarsiutinullu Tapersiisarnermi Ataatsimiititaliap akornanni isumaqatigiissuteqareernikkut atukkiisarfik pineqartoq akiliisitsinngikkallarsinnaavoq.

§ 27. Tapersiiffigineqarsimasoq akiliinngikkallarnissamik qinnuteqaateqareersimappat Inuussutissarsiutinut Tapersiisarnermi Ataatsimiititaliaq aalajangeereertinnagu pillaatitut erniat naatsorsorneqassanngillat.
Imm. 2. Akiliinngikkallarnissaq nalunaarutigineqareersimappat pillaatitut erniat naatsorsorneqassanngillat taamaallaalli akilersuutinit akilereerneqarsimasussanit taarsigassarsianilu nalinginnaasumik erniaritinneqartussatut aalajangerneqarsimasoq akilerneqartussaasorlu.
Imm. 3. Allatut pisoqartillugu, tassa ullup akiliiffissap kingulliup kingornatigut kingusinnerpaamik qaammat ataaseq qaangiuttoq akiligassat akilerneqarsimanngippata, pillaatitut erniat taarsigassarsiat nalinginnaasumik erniaasa saniatigut ukiumut 6%-iusut naatsorsorneqarsinnaapput.

§ 28. Inuussutissarsiutinut Tapersiisarnermi Ataatsimiititaliap taarsigassarsiaritinneqareersimasut erniallit taarsigassarsianullu qularnaveeqqusiinerit taarsigassarsianut nutaanut allanngortissinnaavai pigisap nalillip taarsigassarsiaritinneqartunut tunngassutillip pigineqarnissaata sinneranik naatsorsuutigineqartumik sivisunerunngitsumik akilersuiffissalerlugit.
Imm. 2. Immikkut ittumik pisoqartillugu Inuussutissarsiutinut Tapersiisarnermi Ataatsimiititaliap, Naalakkersuisut akuersinerisigut, inuussutissarsiutinut tapersiissutitut akiitsut taarsigassarsianut ukiut tallimat tikillugit ernialersuisoqartussaajunnaarlugu akilersuisoqartussaajunnaarlugulu allanngortissinnaavai kiisalu suliffeqarfiup aningaasaqarnikkut aaqqissuussivigineqarneranut ilanngullugu aningaasat akiitsut immikkullu tapiissutit isumakkeersinnaallugit, taakku peqqussut manna imaluunniit inuussutissarsiutinut tapersiisarneq pillugu siusinnerusukkut aalajangersakkat atuussimasut malillugit tapiissutaasimappata.
Imm. 3. Imm. 2 naapertorlugu aningaasanut tunngasunik aaqqissuusseqqinnermut atatillugu piumasarineqarsinnaavoq Namminersornerullutik Oqartussat sullivimmi pineqartumi, taanna ingerlatseqatigiiffimmit assigisaanilluuniit ingerlanneqarpat, siulersuisunut ataatsimik arlalinnilluunniit ilaasortaatitaqassasut.
Imm. 4. Imm. 1-imiit imm. 3-mut aalajangersakkat sulliviup taarsigassarsiami akilersornissaanut tunngatillugu pisussaaffini siunissami eqqortissinnaagai uppernarsineqarsinnaappat atorneqarsinnaapput.

§ 29. Inuussutissarsiutinut Tapersiisarnermi Ataatsimiititaliaq angallatip, manna tikillugu aalisarnermik piniarnermillu inuussutissarsiuteqarnermut atorneqarsimasup, unalu peqqussut aammalu siusinnerusukkut inuussutissarsiutinut tapersiisarnernut tunngatillugu aalajangersakkat atortuusimasut naapertorlugit tapersiissuteqarfiusimasup, atortuujunnaarsinneranut atatillugu inuussutissarsiutinut tapersiissutinut akiitsut utertinnissaannut atatillugu erniaqanngitsoortitsisinnaavoq akiliinngikkallartitsisinnaalluniluunniit. Kiisalu aamma Inuussutissarsiutinut Tapersiisarnermi Ataatsimiititaliaq Naalakkersuisut akuersinerisigut taamatut atortuujunnaarsitsinermut atatillugu immikkut ittumik pisoqartillugu akiitsunik isumakkeerisinnaavoq.
Imm. 2. Imm. 1 naapertorlugu aatsaat tapiissuteqartoqarsinnaavoq angallatinik atortussaajunnaarsitsinermut atatillugu taakku imatut pisoqaassuseqarpata angallammik taamaaqataanik nutaamik pisaarnermut taarsigassarsianut sivisunerpaamik piffissaq akilersuiffissaq sivisunerujumaartoq aamma tamatumunnga peqatigitillugu naatsorsuutigineqarpat angallat aningaasaqarnikkut illersorneqarsinnaasumik ingerlanneqarsinnaagunanngitsoq aamma angallatip iluarsaannissaa aningaasaqarnikkut illersorneqarsinnaanngitsutut nalilerneqarpat.
Imm. 3. Imm. 1 naapertorlugu tapiissutit aatsaat angallatip atortussaajunnaarsinneqartup taartissaanik pissarsiniarnermut atatillugu tapiissutigineqarsinnaapput.
Imm. 4. Imm. 1 naapertorlugu tapiissutit aatsaat tunniunneqarsinnaapput taarsigassarsissup maannamut angallammik ingerlatsisinera tunngavigalugu taarsigassarsiallu taarsersornissaannut atatillugu aamma angallatip teknikikkut aalisarnikkullu piukkunnassusianut tunngassumik taarsigassarsisup maanna angallatitaarnerminut atatillugu taamalu siunissami taarsersuinermini pisussaaffimminik eqqortitsisinnaasoq uppernarsineqarsinnaasutut isigineqarpat.
Imm. 5. Imm. 1 malillugu ukiut tallimat tikillugit ernianut akiliisussaatitaajunnaartitsisoqarsinnaavoq akiligassanillu akilersuisoqanngikkallartitsisoqarsinnaalluni, tamatuma kingorna taarsigassarsiat taarsigassarsinermi atugassarititaasut naapertorlugit ernialersorneqassapput taarsersorneqassallutillu, angallatip atortuujunnaarsinneqartup taartissaanik angallatitaarnermut atatillugu taarsigassarsiat taarsersornissaasa sivisussusissaannit sivisunerunngitsumik piffissalerlugit.
Imm. 6. Imm. 1 malillugu tapiissuteqarnermut atatillugu angallammut atortuujunnaarsinneqartumut tunngatillugu taarsigassarsianut angallat nutaaq qularnaveeqqusiunneqassaaq.
Imm. 7. Imm. 1 malillugu tapiissuteqarnermut atatillugu Inuussutissarsiutinut Tapersiisarnermi Ataatsimiititaliaq angallatit atortuujunnaarsinnissaannut atatillugu aningaasartuutissat aningaasalersornissaannut ernialinnik taarsigassarsisitsisinnaavoq. Aalajangersagaq tamanna malillugu angallammut nutaamut atatillugu taarsigassarsiat akiitsunut ilanngunneqassapput.
Imm. 8. Imm. 1 - 7 atuupputtaaq aalisariutinut raajarniarunnaarsimasunut.

§ 30. Angallatit aalisarnermut piniarnermullu atorneqartut siusinnerusukkut Inuussutissarsiutinut Tapersiisarnermi Ataatsimiititaliamit ernialersukkanik taarsigassarsisinneqanngisaannarsimasut taasigassarsianulluunniit qularnaveeqqusiiffigineqanngisaannarsimasut aningaasalersorneqarnerannut imm. 2 - 5-imi aalajangersakkat malillugit ernialersugaanngitsunik akilersugaanngitsunillu taarsigassarsisitsisoqarsinnaavoq, tassa angallat 1. oktober 1996 nallertinnagu pisaarineqarsimappat.
Imm. 2. Imm. 1 malillugu taarsigassarsiat, siusinnerusukkut inuussutissarsiutinut tapersiisarnermi ataatsimiititaliamit taarsigassarsiaritinneqarsimasut erniaqanngitsut akilersugassaanngitsullu angallatip ilaannakuusumik aningaasalersorneqarneranut, pisiarinerani akiata annerpaamik 25 %-iinik annertussuseqassapput § 9 malillugu naatsorsuusiorlugit allanngortiterinernut iluarsaassinernullu aningaasartuutinik, angallatip pisaarereerneratigut akiliutigineqarsimasunik, ilallugit, aamma 1. januar 1997 sioqqullugu. Taarsigassarsiat angallammut akiitsooreersut qularnaveeqqusiinikkut isumannaakkat 50 %-ii qaangissanngilaat.
Imm. 3. Imm. 1 malillugu taarsigassarsiat akiliutigineqarnerata kingornatigut ukiut qulit qaangiuppata tamakkiisumik nalikillilerneqassapput.
Imm. 4. Imm. 1 malillugu taarsigassarsiat angallat pineqartoq siullersut qularnaveeqqusiullugu isumannaarneqassapput.
Imm. 5. Imm. 1 malillugu tapiissutinik agguaassisarneq pillugu apeqqutit aalajangiivigineqarnerini § 2-mi pissutsit taaneqartut saniatigut uku sianiginiarneqassapput:
1) Taamaallaat tapiissuteqartoqarsinnaavoq angallat taanaatillugu teknikikkut nalilereerlugu sivikinnerpaamik ukiuni qulini suli pigineqartussatut naatsorsuutigineqarpat,
2) aalajangiisutut pingaartinneqassaaq qinnuteqaateqartut angallammik ingerlatsinerminni imminut akilersinnaasumik aalisarsinnaannertik uppernarsarsinnaappaassuk, aamma
3) taamaallaat tapiissuteqartoqarsinnaavoq aatsaat angallat aningaasarsiornikkut illersorneqarsinnaasumik ingerlanneqarsinnaappat, tamatumanissaaq eqqarsaatigalugit imm. 1 malillugu tapiissutit aamma taarsigassarsisitsisut allat aningaasaliissutigisimasaat.

§ 31. Taarsigassarsiallit malittarisassat tamatumunnga atuuttut malillugit, angallat 75 BRT/120 BT-nit mikinerusoq imaluunniit angallatit uku arlaat atorlugu GR 6-355 "Tobias Noahsen", naqinnernik ilisarnaatit OZJO, GR 7-216 "Anįse", naqinnernik ilisarnaatit OUHK, GR 8-288 "Qarsaaq", naqinnernik ilisarnaatit OUUC, raajarniarsinnaatitaasut pisassiissutinit pigisat tamakkerlugit Namminersornerullutik Oqartussanut tunniutissappatigik, pisariaqartitsineq naapertorlugu sinerissap qanittuani raajarniarnermi pisarisinnaasanut naleqqussakkamik aalisarnermik pisariaqartitsineq naapertorlugu, tamatumunnga imm. 2-miit 4-mut aalajangersakkat malillugit taarsiissutinik akiliuteqartoqarsinnaavoq. Pisassiissutinit pigisat tamarmiusut 1. januar 1997-imi pisassiissutinit pigisat atuutilerneranni taarsigassarsialimmut pineqartumik angallateqartumut tunniunneqartut minnerpaamik amerlaqatigissavaat.
Imm. 2. Angallat taarsigassarsisup manna tikillugu raajarniarnermut atorsimasaa ukiunit 20-nit pisoqaaneruppat, taarsigassarsiallip inuussutissarsiutinut tapersiisarfimmit taarsigassarsiai tamakkerlugit isumakkeerneqassapput.
Imm. 3. Angallat taarsigassarsiallip manna tikillugu aalisarnermut atorsimasaa ukiut 20-t inorlugit pisoqaassuseqarpat, taarsigassarsiallip inuussutissarsiutinut tapersiisarfimmit taarsigassarsiaasa ilaat angallatip tunineqarnerani iluanaarutitigut anguneqanngitsut (matussuserneqanngitsut) isumakkeerneqassapput.
Imm. 4. Imm.2 aamma 3-mi taaneqartutut taarsigassarsianik isumakkeerinerup saniatigut raajat tonsinngornerini tamani 1.000 kr.-inik akiliisoqassaaq, pisassiissutinit pigisat ukiumi aalisarfiusumi tunniunneqarneranni pisinnaatitsissutaasoq naapertorlugu. Akiliutigineqartut aningaasanngorlugit taarsigassarsiallip nammineq atugassaatut tunniunneqassapput.
Imm. 5. Taarsigassarsiallip imm. 4 naapertorlugu pissai akiliisitsiniutaallutilluunniit allatut pinngitsaaliiniutaasinnaanngillat.
Imm. 6. Pisassiissutinit pigisat imm. 1 naapertorlugu Namminersornerullutik Oqartussanit tiguneqartut naalakkersuisut aalajangiineratigut tuniniarneqarsinnaapput allatulluunniit atorneqarsinnaallutik tamanna pillugu malittarisassat qaqugukkulluunniit atuuttut malillugit. Pisassiissutinit pigisanik tunisinermi akigitinneqartoq aalajangerneqassaaq imm. 4 naapertorlugu pisassiissutinit pigisat pissarsiarineqarneranni akiliutigineqartumit minnerunngitsumik.

§ 32. Sinerissamut qanittumi raajarniarnermi aalisariutinik naleqqussaanissamut pisariaqartitsisoqarnera naapertorlugu aningaasanut inatsimmi konto pingaarnermut 50.06.11-mut Aalisariutikillisaanermut tapiissutinut oqaasertaliussani aalajangersakkat malillugit makku sianiginiarlugit tapiissuteqartoqarsinnaavoq:
1) angallatinik taarsersuinermut atatillugu pisaqarsinnaassutsip naleqqussarneqarnerata annertussusia,
2) siunertamut tamatumunnga ukiumut aningaasanut inatsisini immikkut aningaasaliissutit atugassanngortinneqartut imatut atorneqassasut, pisaqarsinnaassutsimik naleqqussaanermut pisariaqartitat sapinngisamik naammassineqarnissaannut sunniuteqaqataallutik,
3) angallatit aalisarunnaartut pisoqaassusiat aserfallatsaalineqarsimanerallu, tassa tamatumuunakkut anguniarneqassammat aalisariutit nutarteriffigineqarnerat,
4) akiitsut tamarmiusut, angallammik angallatinilluunniit aalisarunnaartunik pisaarnermut aserfallatsaaliinermullu atatillugu pilersimasutut uppernarsarneqarsinnaasut aamma

5) angallat angallatilluunniit sinneruttut akilersinnaasumik ingerlanneqalersinnaasutut naatsorsuutigineqarsinnaasut.

§ 33. Qularnaveeqqusiissutit inuussutissarsiutinut tapersiisarnermi ataatsimiititaliamit tiguneqarnerisa, umiunerup, imaluunniit qularnaveeqqusiissutit allanik pissuteqartumik taasigassarsialimmit pigineqarunnaarnerisa kingunerisaanik qularnaveeqqusiissutaareersutigut pissarsiassat isumannaarneqarsimanngippata, pissarsiassat erniaat naatsorsuusiorneqarunnaassapput.
Imm. 2. Imm. 1-imisut pisoqartillugu aammattaaq ukiumoortunik tapiissuteqartoqassaaq akiitsunik ikilisitsissutissanik aningaasatut taarsigassarsialimmit akilerneqarsimasutut amerlassusilinnik.
Imm. 3. Imm. 1-mi akiligassat pineqartillugit ukiut tallimat qaangiunneranni qaammatisiutit ukiuata naanerani, inuussutissarsiutinut tapersiisarnermi ataatsimiititaliap akiligassat ilaat isumakkeersinnaavai. Ilaannakortumik isumakkeerinninnermi akiligassanik 135.000,- kr.-init ikinnerusunut ikilisitsisoqarsinnaanngilaq.
Imm. 4. Isumakkeerinermi tunngavigineqassaaq, taarsigassarsisoq akiliinissamut ukiullu qaninnerpaat iluanni akiligassanik tamarmiusunik akiliinissamut periarfissaqassanngitsoq.
Imm. 5. Taarsigassarsisup akiliisinnaanermut periarfissai makku tunngavigalugit nalilerneqassapput:
1) Akiligassat amerlassusiat,
2) taarsigassarsisup inoqutaasalu nalilinnik pigisaqarnerat,
3) taarsigassarsisup inoqutaasalu maannakkut siunissamilu isertitaqarnissamut periarfissaat aamma
4) taarsigassarsisup ukioqqortussusia.
Imm. 6. Imm. 1-mi akiligassat pineqartillugit ukiut qulit qaanngiunneranni qaammatisiutit ukiuata naanerani, imm. 4-mi 5-milu pissutsit taaneqartut assigisaannik pisoqartillugu inuussutissarsiutinut tapersiisarnermi ataatsimiititaliap akiligassat tamakkiisumik isumakkeersinnaavai. Akiligassalli tamarmiusut isumakkeerneqarsinnaanerannut tunngaviussaaq, taarsigassarsisup ima akiliisimatiginissaa, akiliisinnaanermini periarfigisinnaasani naapertorlugit akiliisimassalluni.
Imm. 7. Imm. 3 aamma 6 naapertorlugit isumakkeerineq taamaallaat atorneqassaaq inunnut taarsigassarsialinnut pineqartorpianut.
Imm. 8. Imm. 1-itut pisuni inuussutissarsiutinut tapersiisarnermi ataatsimiitaliap akiligassat tamarmiusut isumakkeersinnaavai, taarsigassarsisoq 60-it sinnerlugit ukioqalersimappat imaluunniit pensionit utoqqarnullu angerlarsimaffiit il.il. pillugit Inatsisartut peqqussutaat naapertorlugu pensionisiaqarpat.

 

Kapitali 7.
Ikaarsaariarnermi atortuulersitsinermilu aalajangersakkat.

§ 34. Peqqussut manna 1. januar 1999 atortuulerpoq.
Imm. 2. Peqatigitillugu aalisarnermut, piniarnermut nunalerinermullu tapersiisarneq pillugu inatsisartut peqqussutaat nr. 8, 31. oktober 1996-imeersoq aammma aalisarnermut, piniarnermut nunalerinermullu tapersiisarneq pillugu inatsisartut peqqussutaata allanngortinneqarneranik inatsisartut peqqussutaat nr. 19, 6. november 1997-imeersoq atorunnaarput.
Imm. 3. Inuussutissarsiornermik tapersiisarneq pillugu Inatsisartut peqqussutaat nr. 4, 20. november 1984-imeersoq naapertorlugu nalunaarutaasimasoq inuussutissarsiutinullu tapersiisarneq pillugu kaajallaasitat atuuttut atuutiinnassapput, peqqussut manna naapertorlugu aalajangersakkanik taarserneqarnissamik tungaanut.

§ 35. Manna tikillugu inuussutissarsiutinut tapersiisarnernut maleruagassat naapertorlugit taarsigassarsiat allallu tapersiissutaasimasut Inuussutissarsiutinut Tapersiisarnermi Ataatsimiititaliamit, tapersiinermut atatillugu atugassaritinneqartutut aalajangikkat malillugit, ingerlanneqassapput.

§ 36. Inuussutissarsiornermik tapersiisarneq pillugu Inatsisartut peqqussutaata nr. 4-p, 20. november 1984-imeersup atortuulerneraniilli Namminersornerullutik Oqartussat inuussutissarsiutinut tapersiisarnernut tunngatillugu manna tikillugu maleruagassaasimasut naapertorlugit atukkiinernut qularnaveeqqusiinernullu tapiissuteqartarnernut atatillugu pisinnaatitaaffiit pisussaaffiillu, siornatigut Naalagaaffimmit isumagisassaasimagaluartut pisussaaffigineqarlutillu, tiguaat. Naalagaaffiulli 1. januar 1985 sioqqullugu pisussaaffiulersimasut suli akisussaaffigai. Taamatut akisussaaffeqarneq pissutigalugu aningaasartuutit Naalagaaffiup Namminersornerullutik Oqartussanit matutissallugit pisinnaatitaavoq.

Namminersornerullutik Oqartussat, ulloq 30. oktober 1998

Jonathan Motzfeldt

/

Pāviāraq Heilmann