Naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaat nr. 12, 30. oktober 1998-imeersoq.
§ 1
Naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit Inatsisartut peqqussutaat nr. 12, 31. oktober 1996-imeerssoq imatut allanngortinneqassaaq:
1. § 9-mi imm. 1-p kingorna immikkoortutut nutaatut una ikkunneqassaaq:
"Imm. 2. Meeqqanik ataatsikkut inunngortunik marlunnik amerlanerusunilluunniit erninermi arnap sulinngiffeqartarnera sapaatit akunnerinit 14-iniit 18-inut erninerup kingornatigut sivitsorneqarpoq."Tamatuma kingorna imm. 2-4 allanngorput imm. 3-5-inngorlutik.
2. § 9, imm 3-mi, imm. 4-nngortumi, "imm. 1-2-mi" allanngortinneqassaaq imatut "imm. 1-3-mi".
3. § 11 imatut oqaasertalerneqassaaq:
"§ 11. Erninerup nalaani suliffinngiffeqarnerup § 9-mi taaneqartup saniatigut meeqqap angajoqqaavi, § 9, imm. 1-imi 3-milu taaneqartutut piumasaqaatitalerlugu, katilllugit sapaatip akunneri arfinillit tikillugit sulinngiffeqarsinnaapput anaanaasup erninerup nalaani sulinngiffeqarsinnaatitaaneranut toqqaannartumik atatillugu.
Imm. 2. Erninerup nalaani sulinngiffeqarnerup § 9-mi taaneqartup saniatigut, meeqqanut marlunnut amerlanerusunilluunniit ataatsikkut inunngortunut angajoqqaat, § 9, imm. 1-imi 3-milu taaneqartutut piumasaqaatitalerlugu, katillugit sapaatip akunneri qulit tikillugit sulinngiffeqarsinnaatitaapput anaanaasup erninerup nalaani sulinngiffeqarsinnaatitaaneranut toqqaannartumik atatillugu.
Imm. 3. Imm. 1 aamma 2 malillugit sulinngiffeqarsinnaatitaaneq angajoqqaat ataatsikkoorlutik atorsinnaanngilaat.
Imm. 4. Imm. 1 aamma 2 malillugit sulinngiffeqarsinnaatitaaneq meeqqap toquneratigut, paarisassanngortillugu allanut inissinneqarneratigut allanulluunniit qitornavissianngortitaaneratigut atorunnaassaaq."4. § 13, imm. 1-imi "§ 9, imm. 2" imatut allanngortinneqassaaq: "§ 9, imm. 3".
§ 2
Inatsisartut peqqussutaat manna ulloq 1. januar 1999 atuutilerpoq.
§ 3
Imm. 1. Inatsisartut peqqussutaat ulloq 1. januar 1999-imi kingusinnerusukkulluunniit meerartaartoqartillugu atuutissaaq. Inuit manna tikillugu malittarisassat atuuttut malillugit sulinngiffeqalereersimasut aamma ulloq 1. januar 1999-imi kingusinnerusukkulluunniit meerartaartoqarsimappat inatsisartut peqqussutaat manna malillugu sulinngiffeqarsinnaatitaapput ullormusiaqarsinnaatitaallutillu.
Imm. 2. Inuit ulloq 1. januar 1999-imi Inatsisartut peqqussutaat manna malillugu sulinngiffeqarsinnaatitaasut, § 11, imm. 1 naapertorlugu sulinngiffeqarsinnaatitaassapput, sulinngiffeqarneq ulloq 1. januar 1999 nallertinnagu aallartinneqarsimagaluarpalluunniit.
Namminersornerullutik Oqartussat, ulloq 30. oktober 1998
Jonathan Motzfeldt/
Mikael Petersen
Allannguutissatut siunnersuummut nalinginnaasumik oqaaseqaatit
Allannguutissatut siunnersuummut tunuliaqutaasut imarisaalu.
Naalakkersuisut allannguutissatut siunnersuut manna saqqummiuppaat erninerup nalaani sulinngiffeqartarnerup sivitsorneqarnissaa pillugu Inatsisartuni siusinnerusukkut siunnersuutaasartut oqallittarsimanerillu tunngavigalugit, taamatuttaaq marlulissanut angajoqqaat atugarisaasa pitsanngortinneqarnissaat pillugit.
Inatsisartut peqqussutissaattut siunnersuut taanna angajoqqaanut marlunnik amerlanerusunilluunniit ataatsikkut qitornartaartunut erninermi angajoqqaatullu sulinngiffeqartarnerup sivitsorneqarnissaanut periarfissiivoq. Tassa siunnersuummi pineqarput angajoqqaat marlulisut, pingasulisut, sisamalisut il.il..
Erninerup nalaani sulinngiffeqartarnerup sivitsorneqarnera marlunnut avitaavoq. Immikkoortuata siulliup imaraa anaanaasup erninerup kingornatigut sulinngiffeqartarnerata sapaatit akunneri 14-iniit 18-inut sapaatit akunnerinik sisamanik sivitsorneqarnera. Taamatut sivitsuinermut pissutaatinneqarpoq arnat marlunnik amerlanerusunilluunniit ataatsikkut qitornartaartut sivisunerusumik nukittorsarfeqartitaasarnissaat.
Annertusisitsinerup immikkoortuisa aappaanni pineqarpoq angajoqqaat sulinngiffeqartitaasarnerisa sapaatit akunnerini arfinilinniit qulinut sivitsorneqarnerat, taamaalilluni meeqqanut marlunnut amerlanerusunulluunniit ataatsikkut inunngortunut angajoqqaat ataatsimoorlutik sulinngiffeqartarnerup sivitsukkap ilaanik tassannga atuisarsinnaassammata. Taamatut aaqqissuussinerup ilaqutariit angajoqqaat arlaata sulinngiffeqarnermik atuerusuttumut tunngatillugu periarfissarissaarnerulersissavai.
Aningaasaqarnikkut allaffissornikkullu kingunerisassai.
Piffissami 1992-imiit 1997-imut agguaqatigiissillugu ukiumut aqqanileriarluni marlulisoqartarsimavoq. Piffissami tassani pingasulisoqaranilu amerlanerusunilluunniit ataatsikkut qitornartaartoqarsimanngilaq. Erninerup nalaani angajoqqaat sulinngiffeqartarnerannut aningaasartuutit amerlissutaat 100.000 kroniniit 200.000 kronillu akornanni amerlassuseqassapput. Aningaasartuutit amerleriaataat akuersissutit iluanni aningaasartuutigineqarsinnaanissaat naatsorsuutigineqarpoq.
Siunnersuut kommunini allaffissornikkut aningaasartuutit amerleriarnerannik kinguneqartussatut naatsorsuutigineqanngilaq.
Aalajangersakkanut ataasiakkaanut oqaaseqaatit.
§ 1Allannguutissatut siunnersuummi § 1-p imarai inatsisartut peqqussutaanni atuuttumi paragraffinut 9-mut, 11-mut, 13-imullu allannguutissat.
Inatsisartut peqqussutaata atuuttup § 9-ani allanngortitsineq tassaavoq imm. 2-mik nutaamik ilanngussineq, tassuuna arnat marlunnik amerlanerusunilluunniit ataatsikkut qitornartaartut erninerup nalaani sulinngiffeqartarnerat sapaatit akunnerinik sisamanik sivitsorneqarluni sapaatit akunneri 14-iniit 18-inut erninerup kingornatigut. Erninerup nalaani sulinngiffeqartarnerup sivitsorneqarneranut tunngavilersuutaasut nalinginnaasumik oqaaseqaatini taaneqarput.
Imm. 2-mik nutaamik ilassuteqartoqarnerata kingunerisaanik maannakkut imm. 2-4 allanngorlutik imm. 3-5-inngorput. Aammattaaq imm. 4-mi nutaami §-imut innersuussut nutaaq ilaavoq.
Peqqussutip atuuttup § 11-ani, allanngortitsineq tassaavoq imm. 2-mik nutaamik ilanngussineq aamma imm. 1-3-mi atuuttuni sunniutaasumik iluarsiinerit.
Siunnersuummi § 11 imm. 2-mi ilanngussaq periarfissiivoq angajoqqaat sulinngiffeqartarnerisa sivitsorneqarnissaannut tassa angajoqqaanut marlunnik amerlanerusunilluunniit ataatsikkut qitornartaartunut. Angajoqqaat sulinngiffeqartarnerat sapaatit akunnerinik sisamanik sivitsorneqarpoq sapaatit akunneri arfinilinniit sapaatit akunnerinut qulinut. Tamatumunnga tunngavilersuutaasut nalinginnaasumik oqaaseqaatini allaaserineqarput.
§ 13-imi allanngortitsineq tassaavoq allannguutissatut siunnersuummi § 9, imm. 2-mik ilanngussinerup kingunerisaanik allanngortitsineq.
§ 2
Naalakkersuisut siunnersuutigaat Inatsisartut peqqussutaat januaarip aallaqqaataani 1999 atuutilissasoq, taamaalilluni ulloq atuutilersitsiffik angajoqqaat sulinngiffeqartarnerata sapaatit akunnerinik tallimaniit arfinilinnut januaarip aallaqqaataa 1999 aallarnerfigalugu sivitsorneqarneranut naleqqussarneqassalluni, naartunermi, erninermi meeravissiartaarnermilu sulinngiffeqartarneq il.il. ullormusiaqartarnerlu pillugit inatsisartut peqqussutaanni atuuttumi § 11, imm. 1 aamma § 30, imm. 3 malillugit.
§ 3
Imm. 1 ikkunneqarpoq erseqqissarniarlugu piffissaq erniviusoq aalajangiisuummat qaqugukkut meeqqanut marlunnut amerlanerusunulluunniit angajoqqaat Inatsisartut peqqussutissaattut siunnersuut taanna malillugu sulinngiffeqarsinnaatitaanersut. Marlulissanut, pingasulissanut amerlanerusunulluunniit angajoqqaat meeqqat nal. 00.00 ulloq 1. januar 1999-imi kingusinnerusukkulluunniit inunngorsimappata erninerup nalaani angajoqqaat sulinngiffeqartarnerannut sivitsukkamut pisinnaatitaapput.
Imm. 2 ilanngunneqarpoq angajoqqaat 1998-ip naalernerani angajoqqaat sulinngiffeqarnerannik aallartitsisut eqqarsaatigalugit, tassa angajoqqaat sulinngiffeqarfissaat suli sapaatit akunnerinik tallimanik sivisussuseqarmat. Ulloq 1. januar 1999-imi suli angajoqqaatut sulinngiffeqartussaatitaasimagunik tamanna isumaqarpoq § 11, imm. 1 malillugu angajoqqaatut sulinngiffeqarsinnaasut katillugit sapaatit akunnerini arfinilinni.