Utoqqarnik paaqqinniffiit il.il. pillugit Inatsisartut peqqussutaat nr. 11 ulloq 30. oktober 1998-imeersoq.
Suliassaqartitsiniarnermik inunnillu isumaginninnermik Kalaallit Nunaannut inatsimmi nr. 580-imi 29. november 1978-imeersumi § 2 tunngavigalugu makku aalajangersarneqarput:
Kapitali 1.
Utoqqarnik paaqqinniffinnut il.il. nuunnissami piumassaqaataasut nalinginnaasut.§ 1. Pensionisiallit namminneq angerlarsimaffimminniiginnarsinnaanngitsut kommunimi utoqqarnik paaqqinniffimmut nuunniarlutik qinnuteqarsinnaapput.
Imm. 2. Pensionisiallit paaqqutarineqarnissamik sullinneqarnissamillu kommunip utoqqarnik paaqqinniffiani naammassineqarsinnaanngitsunik pisariaqartitsisut peqqinnissaqarfiup ataani paaqqinniffimmut nuukkumallutik qinnuteqarsinnaapput.
Imm. 3. Pensionisiallit kommunimi utoqqarnik paaqqinniffimmut peqqinnissaqarfiulluunniit ataani paaqqinniffimmut nuukkallarnissaminnik qinnuteqarsinnaapput.§ 2. Kommunip utoqqarnik paaqqinniffiutaanut peqqinnissaqarfiulluunniit ataani paaqqinniffimmut nuunnissamik qinnuteqaat kommunimi najugarivitami kommunalbestyrelse-mut isumaginninnermi suliassanik ingerlatsisuusumut tunniunneqassaaq.
Imm. 2. Inuit kommunit aggornerisa avataani najugaqartut qinnuteqaataat Isumaginninnermi Pisortaqarfimmut ingerlatinneqartassapput, qinnuteqaallu kommunimut pensionisiallip nuuffigerusutaanut Pisortaqarfiup ingerlateqqittassallugu.
Imm. 3. Kommunip utoqqarnik paaqqinniffiutaani peqqinnissaqarfiulluunniit ataani paaqqinniffimmi najugaqarallarnissamik qinnuteqaatit imm. 1-mi aamma imm. 2-mi aalajangersarneqartutut ingerlatinneqartassapput.§ 3. Kommunip utoqqarnik paaqqinniffiutaanut peqqinnissaqarfiulluunniit ataani paaqqinniffimmut nuunnissamik qinnuteqaatit nuuttussanik inissiiniartarneq pillugu ataatsimiititaliamit oqartussanit assigiinngitsunit ilaasortaaffigineqartumit suliarineqartassapput.
Imm. 2. Kommunip utoqqarnik paaqqinniffiutaani peqqinnissaqarfiulluunniit ataani paaqqinniffimmi najugaqarallarnissamik qinnuteqaatit imm. 1-imi aalajangersarneqartutut suliarineqartassapput.
Imm. 3. Naalakkersuisut nuuttussat pillugit ataatsimiititaliap ilaasortalersorneqarnissaanut sunillu oqartussaaffeqarnissaanut malittarisassat aalajangersassavaat. Malittarisassat taakku Kalaallit Nunaanni Kommuneqarfiit Kattuffiat suleqatigalugu suliarineqassapput.§ 4. Oqartussaaffeqarfiup qinnuteqaammik Inatsisartut peqqussutaat manna tunngavigalugu suliarinnittuusup qinnuteqartoq suliassamik paasissutisseeqataanermut peqataaqqusinnaavaa.
Imm. 2. Oqartussaaffeqarfiup qinnuteqaammik Inatsisartut peqqussutaat manna tunngavigalugu suliarinnittuusup oqartussaaffeqarfiit allat suliassap suliarineqarnerani pisariaqartinneqartutut isigineqartunik paasissutissanik tunniusseqqusinnaavai.
Kapitali 2.
Utoqqarnik paaqqinniffinnik il.il. pilersitsineq paaqqinniffinnilu najugaqarneq.§ 5. Kommunini utoqqarnik paaqqinniffinni inissat pisariaqartinneqartutut amerlassusillit pigineqarnissaat kommunalbestyrelsip qulakkiissavaa.
Imm. 2. Pensionisialinnut sammisassaqartitsinermik neqeroorutini inissat pisariaqartinneqartutut amerlassusillit pigineqarnissaat kommunalbestyrelsip qulakkiissavaa.
Imm. 3. Utoqqarnik paaqqinniffiit sammisassaqartitsinermillu neqeroorutit kommunimit pilersinneqarlutillu ingerlanneqassapput.
Imm. 4. Naalakkersuisut utoqqarnik paaqqinniffiit pilersinneqarnissaannut, pisatsersorneqarnissaannut, siulersorneqarnissaannut ingerlanneqarnissaannullu malittarisassanik aalajangersaassapput, matumani utoqqarnut paaqqinniffinnut aammalu sammisassaqartitsinermik neqe-roorutinut akiliuteqartarnissamut malittarisassat ilanngullugit eqqarsaatigalugit.§ 6. Peqqinnissaqarfiup ataani pensionisialinnut paaqqutarineqarnissamik immikkut pisariaqartitsisunut inissanik amerlassusilikkanik inissaqartitseqqullugu kommunalbestyrelsi peqqinnissaqarfimmut isumaqatigiissuteqarsinnaavoq.
Imm. 2. Peqqinnissaqarfik ulloq unnuarlu najugaqarnermi akiliutissamik imm.1 tunngavigalugu akileeqqusisassaaq. Akiliutissaq, utoqqarnik paaqqinniffiup ingerlatsinermut ukiumoortumik aningaasartuutai tunngavigalugit naatsorsorneqartartussaq, ukioq ataaseq atuuttussanngorlugu aalajangersarneqartassaaq. Akiliutissaq Naalakkersuisut aamma Kalaallit Nunaanni Kommuneqarfiit Kattuffiata akornanni isumaqatigiissuteqarnikkut aalajangersarneqartassaaq.
Kapitali 3.
Naammagittaalliuuteqarsinnaaneq.§ 7. Kommunalbestyrelsip aamma Isumaginninnermut Pisortaqarfiup aalajangigaat isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaanni aalajangersakkat malillugit naammagittaalliuutigineqarsinnaapput.
Kapitali 4.
Aningaasalersuineq.§ 8. Kommunini utoqqarnik paaqqinniffiit il.il. sanaartorneqarnerannut ingerlanneqarnerannullu aningaasartuutit kommuninit ataasiakkaanit akilerneqartassapput. Naatsorsuutini saqqummiussisarnermut kukkunersiuinermullu malittarisassat Naalakkersuisut aalajangersartassavaat.
§ 9. Kommunini utoqqarnik paaqqinniffinnik il.il. sanaartornermut Landskarsi tapiissuteqarsinnaavoq.
Kapitali 5.
Misileraaneq pillugu aalajangersakkat.§ 10. Kommunini utoqqarnik paaqqinniffiit il.il. pillugit misileraammik aaqqissuussinernut malittarisassanik Naalakkersuisut peqqussut manna tunngavigalugu aalajangersaasinnaapput.
Imm. 2. Kommunikkaartumik misileraalluni aaqqissuussineq sivisunerpaamik ukiuni pingasuni atuussinnaavoq.
Imm. 3. Kommunikkaartumik misileraalluni aaqqissuussinermi angusarineqartut nassuiaasiornikkut tamanut saqqummiunneqartassapput.§ 11. Misileraalluni aaqqissuussinerit kommunit aggornerisa avataanniittunut atuuttut § 10-mi aalajangersarneqartutut ittut pillugit malittarisassat Naalakkersuisut aalajangersarsinnaavaat.
Kapitali 6.
Atortuulersitsineq.§ 12. Inatsisartut peqqussutaat manna 1. marts 1999 aallarnerfigalugu atortuulersinneqarpoq.
Imm. 2. Tamatumunnga peqatigitillugu isumaginninnikkut pensionit utoqqarnillu paaqqinniffiit il.il. pillugit Inatsisartut peqqussutaanni nr. 8-mi 22. oktober 1990-imeersumi kommunini utoqqarnik paaqqinniffiit il.il. pillugit aalajangersakkat atorunnaarsinneqarput.
Imm. 3. Utoqqarnik paaqqinniffiit il.il. pillugit aalajangersakkat pensionit utoqqarnillu paaqqinniffiit il.il. pillugit Inatsisartut peqqussutaat nr. 8, 22. oktober 1990-imeersoq tunngavigalugu aalajangersarneqarsimasut atuutiinnassapput inatsisartut peqqussutaat manna allalluunniit tunngavigalugit taarserneqarnissamik atorunnaarsinneqarnissamilluunniit tungaanut.
Namminersornerullutik Oqartussat, ulloq 30. oktober 1998
Jonathan Motzfeldt/
Mikael Petersen
Utoqqarnik paaqqinniffiit il.il. pillugit Inatsisartut peqqussutissaattut siunnersuummut oqaaseqaatit nalinginnaasut
Aallaqqaasiut:
Inatsisartut peqqussutaat manna utoqqarnik paaqqinniffiit il.il.pillugit aalajangersakkanik imaqarpoq, maanna Inatsisartut utoqqarnut paaqqinniffiit il.il. peqqussutaanit atuussimasumit avissaartinneqarlutik peqqussutitut immikkuulersunik.
Utoqqarnik paaqqinniffiit il.il. pillugit aalajangersakkat Inatsisartut peqqussutaanni immikkoortumi inissinneqarneranni malittarisassat paasiuminarnerulersinneqarnissaat siunertarineqarpoq. Taamaalilluni suliassaqarfiup ataasiinnaap Inatsisartut peqqussutaatigut ataasiinnakkut aalajangersaavigineqarnissaa naleqquttutut isigineqarpoq. Pensionisiaqartitsinermi aningaasatigut sinaakkutassaritinneqartut pisortat pensionisiaqartitsinerap pillugu Inatsisartut peqqussutaatigut siunissami aalajangersaavigineqartalissapput, pensionisiaqartullu ineqartinneqarnermikkut sinaakkutassaat utoqqarnik paaqqinniffiit il.il. pillugit Inatsisartut peqqussutaatigut aalajangersaavigineqartalissallutik.
Qulequtsiunneqartumi takuneqarsinnaavoq siunnersuut aalajangersakkanik utoqqarnik paaqqinniffinnuinnaanngitsoq tunngasunik imaqartoq, tak. "il.il." ilanngunneqartoq. Siunnersuutip assersuutigalugu pensionisiaqartut peqqinnissaqarfiup ataani paaqqinniffinnut nuuttarnerat kiisalu pensionisiaqartunut sammisassaqartitsinissamik kommunit neqeroorutaat aamma aalajangersaavigai.
Naalakkersuinikkut tunngaviit:
Naalakkersuisut utoqqarnik sullissinermi anguniagaat tassaavoq, utoqqarnut utoqqaliartornerminni sammisaqarlutik toqqissisimallutillu timimikkut isumagineqarnerullu tunngaatigut atugassarititaasut qulakkeerneqarnissaat, kiisalu utoqqarnut inissianik neqerooruteqartarnerit utoqqaat pisariaqartitsinerannut naleqquttunngorsarneqarnissaat. Tamatumunnga ilanngullugu utoqqaat sapinngisamik sivisuumik namminneq angerlarsimaffimminniiginnartarnissaat anguniagaavoq.
Isumaginninnermik Iluarsaaqqinnermut Ataatsimiititaliarsuup isumaliutissiissummini 1997-inngaanneersumi utoqqaat amerliartuinnarnerat pissutigalugu utoqqarnut paaqqinniffiliortiternissap tulleriiaarinermi pingaartinneqarnissaa kiisalu nalunaarutitut aalajangersagassami utoqqarnut paaqqinniffiit pillugit malittarisassani aaqqissuussineq/pisatsersuineq pillugu aalajangersakkanik ilanngussisoqarnissaa kaammattuutigaa.
Isumaginninnermik Iluarsaaqqinnermut Ataatsimiititaliarsuup utoqqaat amerliartuinnartut tarnimikkut napparsimalersarnerat utilersarneralluunniit malugeqquaa, ilaatigullu immikkoortortaqaarfiit utoqqaaat paaqqinnittarfiannut attuumassutillit immikkoortumilluunniit inissisimasut taloqartinneqartarnissaat inassutigalugu, pineqartut taakkua ineqarnerminni toqqissisimallutik aalajaatsumillu atugaqarnissaannik neqeroorfigineqassammata, tamatumani nakkutigineqarnerminni isumagineqarnerminnilu immikkut pisariaqartitsisarnerat naammassineqarluni.
Aaqqiissutit tamanut atuuttut:
Aalajangersakkat oqaasiliornerat iluarsiissuteqarfigineqarlunilu allannguuteqartinneqarpoq ersarissarlugu, atuaruminarsarlugu paasineqarsinnaasunngorlugulu. Arlallinnittaaq allannguuteqartitsinissaq pisariaqarsimavoq, tassami siullermik aalajangersagaasimasut ataatsimut malittarisassiuunneqarsimasunut tamanut ilagitinneqarsimagaluarmata. Assersuutigiinnarlugu aalajangersakkani kapitalit qulequtaat paragrafillu normui inissarinngisaminnut inissinneqartarsimasut erserpoq, taamatullu aalajangersakkani ataasiakkaani immikkoortut tulleriinnerat arlalinni allanngortinneqartarsimalluni.
Taaguut "isumaginninnermut ataatsimiititaliaq" uannga taarserneqassaaq "kommunalbestyrelsi".
Kommunalbestyrelsit nunaqarfinnilu siulersuisut il.il. pillugit Inatsisartut inatsisaat nr. 20, 3. november 1994-imeersumi § 7 aamma § 18, imm. 1 naapertorlugit kommunalbestyrelsi pisussaatitaavoq ataatsimiititaliamik ataasiinnarmik pilersitsissalluni; Aningaasaqarnermut Ataatsimiititaliaq. Inatsimmi siuliani taaneqartumi § 18, imm. 5 malillugu kommunalbestyrelsi isumaginninnermut ataatsimiititaliamik pilersitsinngitsoorsinnaavoq, immikkullu ittut pillugit inatsisit naapertorlugit isumaginninnermut ataatsimiititaliamut piginnaatitaaffiit nammineerluni ingerlassinnaallugit.
Taaguummi "kommunalbestyrelsi"-mi aammattaaq suliassaqarfiit kommunalbestyrelsip piginnaatitaaffilersinnaasai pineqarput, assersuutigalugu isumaginninnermut ataatsimiititaliaq imaluunniit nunaqarfimmi siulersuisut.
Siunnersuut allaffissornermi atorfeqartut pineqaatissinneqarsinnaanerannut qanoq ittumulluunniit aalajangersagartaqanngilaq, assersuutigiinnarlugu pisortani atorfeqartut nipangiussisussaatitaanerisa allanilluunniit pisussaaffeqartitaanerisa unioqqutinneqarsinnaanerat pillugu aalajangersagartaqarani. Tamatumunnga pissutaavoq tamanut atuuttumik pineqaatissiisinnaanerup Kalaallit Nunaanni isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaannut allannguutissatut siunnersuutinut (§ 11-p) ilanngunneqarneratigut isumaginninnermi malittarisassani ataatsimoortuni pineqaatissiisinnaanermut aalajangersakkat pisariaqartinneqarunnaarmata.
Allannguutit:
Maannamut malittarisassiarineqarsimasuni tunngaviusunut sanilliulluni siunnersuut manna allannguutissanik makkuninnga imaqarpoq:
1. Pensionisiallit kommunit utoqqarnik paaqqinniffiutaanni peqqinnissaqarfiulluunniit ataani paaqqinniffinni najugaqalerallarsinnaasut siunnersuummi matumani erseqqissarneqarpoq. Tassani najugaqarallarneq pineqarmat taamaalillunilu siunertarineqarmat pensionisiaqartoq nammineq najukkaminut/iniminut uteqqissasoq, pensionisiaqartup paaqqinniffimmut nuukkallarnissami tungaanut najugaata/inigisaata qaammatit pingasut tikillugit tassunga pigitiinnarneqarsinnaaneranik aalajangersagaq ilanngunneqarsimanngilaq.
2. Siunnersuummi § 2, imm. 2-mi aalajangersarneqarpoq inuit kommunit aggornerisa avataanni najugaqartut kommunimi utoqqarnik paaqqinniffimmi peqqinnissaqarfiulluunniit ataani paaqqinniffimmi pensionisiallip kommuni nuuffigerusutaaniittumi najugaqalernissamut pensionisiallip qinnuteqaataa Isumaginninnermi Pisortaqarfiup ingerlateqqissagaa. Nuunnerup kingorna Isumaginninnermut Pisortaqarfik kommunitut inissiisutut suli tassaassaaq kommuni najugarivitaq, taama aamma kommuni akiliisussaq, tak. kommunit akunnerminni akiliiffigeqatigiittarnissamut pisussaaffii pillugit Inatsisartut peqqussutaanni nr. 2-mi 12. juni 1995-imeersumi § 7 imm. 1 aamma § 14 imm. 1.
3. Kommunit misileraallutik aaqqissuussisinnaanerat pillugu malittarisassat kapitali 5-imi ilanngunneqarput. Isumaginninneq pillugu malittarisassani ataasiakkaani aalajangersakkanik taamaattunik aalajangersaasoqarnissaa naleqquttutut isumaqarfigineqarpoq, tassami misileraalluni aaqqissuussinerit aallartinneqarnerannut atatillugu sukkasuumik eqaatsumillu periuseqarnissamut tamanna periarfissiimmat.
Peqqussutissatut siunnersuutip matuma malitseqartinneqarnissaanik suliniutit:
Utoqqarnik paaqqinniffiit pillugit nalunaarutissatut siunnersuut suliarineqarsimavoq, taannalu ilaatigut utoqqarnik paaqqinniffiit il.il. pilersinneqartarnerat, aaqqissuussinermut/pequsersui-nermut piumasaqaatit, pissutsit sulisoqarnermut tunngasut kiisalu najugaqartut sunniuteqaqataanerat pillugit aalajangersakkanik itisilerinerusunik imaqarpoq. Soorlu assersuutitut siunnersuutigineqarsimavoq nuuttussanik inissiiniarnermi ataatsimiititaliap katitigaanera aalajangiisinnaanralu. Utoqqarnik paaqqinniffiit il.il. pillugit nalunaarut utoqqarnik paaqqinniffiit il.il. Inatsisartut peqqussutaata akuerineqareerneratigut piaakannersumik inaarsarneqarsinnaavoq.
Aningaasaqarnikkut sunniutaasussat:
Siunnersuutip aningaasaqarnikkut sunniuteqarnissaa naatsorsuutigineqanngilaq.
Allaffissornikkut sunniutaasussat:
Siunnersuutip allaffissornikkut sunniuteqarnissaa naatsorsuutigineqanngilaq.
Aalajangersakkanut ataasiakkaanut oqaaseqaatit
Kapitali 1.
Utoqqarnik paaqqinniffinnut il.il. nuunnissamut piumasaqaatit nalinginnaasut.
§ 1.
Imm. 1.
Inatsisartut peqqussutaanni atuuttumi § 23, imm. 1. Aalajangersagaq allanngortinneqanngilaq. Aalajangersakkap pensionisiallit namminneq angerlarsimaffimminniissinnaanngitsut kommunip utoqqarnik paaqqinniffiinut nuunnissaminnut qinnuteqarnissaannut periarfissaqalersippai.
Suliassaq inissiiniarnermi ataatsimiititaliamit oqartussat assigiinngitsut ilaasortaaffigisaannit inassuteqaateqarfigineqareerpat kommunalbestyrelsip aalajangiiffigissavaa, tak. § 2.
Kommunimi utoqqarnik paaqqinniffimmut nuuttoqarnissaanik inassuteqaateqannginnermini inissiiniarnermi ataatsimiititaliap pensionisiaqartoq nammineq angerlarsimaffimminiiginnarsinnaanersoq imaluunniit assersuutigalugu inissiami naleqqussarlugu suliarineqarsimasumiissinnaanersoq, soorlu utoqqarnut inissiamiissinnaanersoq, nakkutigineqarluni najugaqarfimmiissinnaanersoq, najugaqaqatigiiffimmiissinnaanersoq taakkuluunniit assigisaanni najugaqarsinnaanersoq sukumiisumik nalilersuiffigissavaa. Naliliiniarnermi pensionisiaqartup nammineq angerlarsimaffimmini najugaqaannaruni imaluunniit inissiami naleqqussakkami najugaqaruni ikiorserneqarnissaminut periarfissai, soorlu inigisap allanngortiterneranut, iluaqusersuutinut, angerlarsimqaffimmi ikiorteqartinneqarnermut kommunillu sammisassaqartitsiniarnerani ingerlatanut peqataanissaminut periarfissai ilanngullugit naliliiffigineqassapput.
Pensionisialik tassaavoq inuk pensionisiaqartitaasoq imaluunniit utoqqalineq pissutigalugu pensionisiaqalernissamut ukiussarititaasunik nalliisimasoq.
Aalajangersagaq pingaarnerusumik utoqqalinersiutilinnut sammisitaavoq, kisiannili utoqqalinersiutillit siusinaartumillu pensionillit ilaatinneqarlutik.
Oqaatsip "pensionisiallit" siusinaartumik pensionillit kommunip utoqqarnut paaqqinniffiinut nuuttussanngortitaanissaminni akornuteqartinneqannginnissaat siunertaraa. Ullumikkut siusinaartumik pensionillit utoqqarnut paaqqinniffinni arlalinni najugaqarput, siunissamilu taamatut periarfissaqartitsineq ingerlaannarumaarpoq.
Pensionillit annertuumik innarluutillit, annertuumik innarluutillit ikiorserneqartarnerat pillugu Inatsisartut peqqussutaat nr. 7 3. november 1994-imeersoq naapertorlugu ulloq unnuarlu paaqqinniffimmut nuunnissaminnut allatsinnissartik qinnuteqaatigisinnaavaat.
Pensionisiallip kommunimi najugarivitarinngisamini kommunimili allami utoqqarnik paaqqinniffimmut nuunnissani kissaatigippagu, assersuutigalugu ilaqutariinnikkut pissutsit taunngavigalugit, kommunit pineqartut akornanni isumaqatigiissuteqartoqarsimanissaa piumasaqaataavoq. Kommuni inissiisoq suli tassaassaaq mpensionisiaqartup kommunitut najugarivitaa, taamaalillunilu aamma tassaassalluni kommuni akilersuisussaq, tak. kommunit akunnerminni akiliiffigeqatigiittarnissamut pisussaaffii pillugit Inatsisartut peqqussutaanni nr. 2-mi 12. juni 1995-imeersumi § 7 imm. 1 aamma § 14 imm. 1.
Kommuni najugarivitaq kommunit akunnerminni akiliiffigeqatigiittarnissamut pisussaaffii pillugit Inatsisartut peqqussutaanni nr. 2-mi 12. juni 1995-imeersumi § 3-mi erseqqinnerusumik nassuiarneqarsimavoq.
Imm. 2.
Inatsisartut peqqussutaanni atuuttumi § 23, imm. 2. Aalajangersakkap pensionillit paaqqutarisariallit peqqinnissamik isumaginnittoqarfiup ataani paaqqinniffimmut nuunniarnissamut qinnuteqarsinnaanerannut periarfissaqalersippai.
Oqaaseq "paaqqutarisarialinnut immikkoortortaq" siornatigut atorneqarsimasoq oqaatsimik isumaqarnerusumik imaqarnerusumillu "paaqqinniffik"mik taarserneqarpoq, tamatumani napparsimmavinni paaqqutarisarialinnut immikkoortortat peqqissaaviillu pineqarput.
Pensionisialik annertuumik paaqqutarisarialik najukkami allami peqqinnissaqarfiup ataani paaqqinniffimmut nuunnissamik qinnuteqaateqarsinnaavoq, soorlu pensionisiaqartup ilaqutaasa najugaqarfigisaanut qanittumiittumut. Kommunimi allami kommunitut najugarivitamit allaasumi utoqqarnik paaqqinniffmmut nuunnertulli tassani tunngavissaatitaavoq nuunnissaq pillugu kommunit akunnerminni isumaqatigiissuteqarsimanissaat. Kommuni nuutsitsisoq pensionisiallip najugaatut suli kommuniussaaq, taamaatumillu akiliisussatut kommuniussalluni, tak. Kommunit akunnerminni akiliiffigeqatigiittarnissamut pisussaaffii pillugit Inatsisartut peqqussutaanni nr. 2-mi 12. juni 1995-imeersumi § 7 imm. 1 aamma § 14 imm. 1.
Imm. 3
§ 24-imi attuuttumi aaqqissuussinerup ilaa aalajangersakkakkut tassuuna ingerlateqqinneqarpoq. Kommunip utoqqarnik paaqqinniffiutaaniinneq peqqinnissaqarfiulluunniit ataani paaqqinniffimmiinneq utaqqiisaagallartumik pisinnaasoq siunnersuutikkut tassuuna erseqqissarneqarpoq.
Pisuni pensionisiaqartup piffissami sivikinnerusumi paaqqinniffimmiinnissaminik pisariaqartitsilerfiini, assersuutigalugu ajoquserneq, sivikitsumik napparsimaneq, aapparisap toqunera imaluunniit inuttut atukkat allat pissutigalugit nuukkallarnissamik pisariaqartitsiffiani aalajangersagaq atorneqarsinnaasussaavoq, pensionisiaqartorlu tamatuma kingorna nammineq angerlarsimaffimminut/inigisaminut uteqqissinnaalluni.
Angerlarsimaffigisap avataani najugaqarallarnerup ataatsimut isigalugu qanoq sivisussuseqarnissaata ilanngunneqannginnissaa pissusissamisoortutut isigineqarpoq, tassami inuit ataasiakkaat pisariaqartitsinerat tassani pineqarmat. Inissiiniartarnermi ataatsimiititaliap kommunalbestyrelsimut inassuteqaateqarnermini qanoq sivisutigisumik najugaqarallarnissaq ilanngutissavaa, piffissarlu qinnuteqaateqartoqarneratigut pisuni ataasiakkaani erseqqissumik naliliineq tunngavigalugu sivitsorneqarsinnaassaaq.
Pensionisiaqartitsineq pillugu Inatsisartut peqqussutissaattut siunnersuummi inummut tapit pillugit aalajangersakkani inigisamut akiliutit inissinneqarallarnerup nalaani inummut tapitut ilusilerlugit akilerneqartarnissaat ilanngunneqassasoq siunnersuutigineqarpoq.
§ 2.
Inatsisartut peqqussutaanni atuuttumi § 26. Aalajangersakkap atuaruminarnerusunngornissaa eqqarsaatigalugu marlunnik immikkoortortalerneqarpoq aammalu atuisussanut pitsaanerusunngortinniarlugu kapitalimut siullermut nuunneqarluni.
Imm. 1.
Aalajangersakkami oqaatigineqarpoq kommunip utoqqarnut paaqqinniffiinut imaluunniit peqqinnissamik isumaginnittoqarfiup ataani paaqqinniffimmut nuunnissamik qinnuteqaat kommunimi najugarivisami kommunalbestyrelsimut tunniunneqassasoq. Qinnuteqaatip isumaginninnermut ingerlatsivimmut imaluunniit oqartussaaffimmut siulersorneqarnermigut pisinnaatitaanermigullu kommunalbestyrelsimit inuttaaffigineqartumut, soorlu assersuutigalugu nunaqarfimmi aqutsisunut, tunniunneqartarnera periaaserineqarpoq.
Imm. 2.
Aalajangersakkami oqaatigineqarpoq inuit kommunit aggornerisa avataani najugaqartut qinnuteqaatiminnik Isumaginninnermut Pisortaqarfimmut tunniussisassasut. Isumaginninnermut Pisortaqarfiup qinnuteqaat kommunimut pensionisiallip nuuffigerusutaanut ingerlateqqillugu isumaqatigiinniutigissavaa. Tamatumani suliamik ingerlatsineq pensionisialimmit kommunimi najugaqareersumit qinnuteqaatitulli pineqassaaq.
Isumaginninnermut Pisortaqarfik tamatuma kingornatigut pensionisialimmut kommuniulissaaq najugarivitaq aammalu kommuniulerluni akiliisussaq, tak. kommunit akunnerminni akiliiffigeqatigiittarnissamut pisussaaffii pillugit Inatsisartut peqqussutaanni nr. 2-mi 12. juni 1995-imeersumi § 7 imm. 1 aamma § 14 imm. 1.
Imm. 3.
Aalajangersagaq nutaajusoq paaqqinniffimmiikkallarnissamik qinnuteqaateqarnermi tunaartarisassanik aalajangersaasuuvoq, tak. § 1 imm. 3.
Najugaqarallarnissamik qinnuteqaat imm. 1-imi aamma imm. 2-mi aalajangersakkani allaaserineqartutut ingerlanneqassaaq.
§ 3.
Imm. 1.
Inatsisartut peqqussutaanni atuuttumi § 23, imm. 3-mi aalajangersarneqarpoq suliassaq isumaginninnermut ataatsimiititaliamit isummerfigineqartinnagu inissiiniartarnermi ataatsimiititaliamit oqartussanit assigiinngitsunik sulialinnit ilaasortaaffigineqartumit oqaluuserineqarsimassasoq, matumani kommunip isumaginninnermi ataatsimiititaliaata ataavartup aalajangiinnginnerani inassuteqaateqarnissaq ilanngullugu eqqarsaatigalugu. Aalajangersagaq oqaasertaliorneqarnermigut allanngortinneqarpoq.
Imm. 2.
Paaqqinniffimmiikkallarnissamik qinnuteqaatit suliarineqartarneranni tunaartarisassat aalaja-ngersakkami tassani pineqarput, tak. § 1 imm. 3.
Paaqqinniffimmiikkallarnissamik qinnuteqaatit imm. 1-imi aalajangersakkani taaneqartutut su-liarineqartassapput.
Imm. 3.
Aalajangersagaq annertuumik allanngortinneqarsimavoq, taassumali ilaa Inatsisartut peqqussutaanni atuuttumi § 25-imi ilaareerluni.
Periaasiuvoq nuuttussanut ataatsimiititaliaq tassaalluni aalajangiisussaasoq, tassami ataatsi-miititaliap taassuma kommunalbestyrelsimut inassuteqaatai qaqutiguinnaq saneqqunneqartarmata, saneqqunneqanngisaannarlutilluunniit. Tamanna pitsaaqutilittut isigineqassaaq, tassami assersuutigalugu pensionisiallip nammineq angerlarsimaffimmini qaqugukkut nammineersinnaalissangatinneqarneranik ataatsimiititami ilaasortat (assersuutigalugu nakorsat, napparsimasunik paarsisut, angerlarsimaffimmi ikiortit il.il.) annertuumik ilisimasaqartutut isigineqartariaqarmata.
Tamanna pillugu naleqqunnerpaasorineqarpoq oqartussaaffiup kommunalbestyrelsimiit nuuttussanut ataatsimiititamut nuunneqarnissaa, taamaattumillu nuuttussanut ataatsimiititap kikkunnit inuttalersorneqarnissaa oqartussaaffeqarnissaalu pillugit aalajangersakkap Kalaallit Nunaanni Kommuneqarfiit Kattuffiat suleqatigalugu suliarineqarnissaanik aalajangersagaq ilanngunneqarluni.
§ 4.
Inatsisartut peqqussutaanni atuuttumi § 2. Aalajangersagaq oqartussaaffiit ataasiakkaat namminneerlutik immaqalu oqartussaaffiit allat ikiortigalugit pisariaqarpallu qinnuteqartup peqataaqquneqarneratigut suliaq pillugu paasissutissiisarnissamik aallaaveqarpoq.
Aalajangersagaq paasiuminarnerusunngorlugu oqaasertaliorneqarmigut allanngortinneqarpoq, ilaatigut aalajangersagaq marlunnut immikkoortinneqarpoq, taamaalilluni qinnuteqartup aammalu oqartussaassut allat akornanni pissutsit erseqqissumik immikkoortinneqarlutik.
Aalajangersakkami atuuttumi akileraaruserisoqarfik immikkukajaaq taaneqarpoq, siunnersuummili tamanna ilaatinneqanngilaq, pissutigalugu pisortani oqartussaasut tamarmik pineqarmata. Aalajangersakkami assersuutigalugu aammattaaq peqqinnissamut isumaginnittoqarfik, inunnik nalunaarsuiffik aammalu pisortani oqartussaasut allat paasissutissanik erseqqinnerusunik pissarsiniarnermut atatillugu suliamut attuumassuteqarsinnaasut ilaatinneqarput.
Paasissutissat pisortani oqartussaasunit allanit pissarsiarineqarnissaat pillugu aalajangersagaq (imm. 2) pisortat ingerlatsinerat pillugu Inatsisartut inatsisaanni nr. 8-mi 13. juni 1994-imeersumi § 30-mut naapertuuppoq.
Kapitali 2.
Utoqqarnik paaqqinniffinnik il.il. pilersitsineq paaqqinniffinnilu najugaqarneq.
§ 5.
Imm. 1.
Inatsisartut peqqussutaanni atuuttumi § 21 imm. 1, naggat siulleq. Aalajangersagaq oqaasertaliorneqarmigut allanngortinneqarpoq. Sammisassaqartitsinermut neqeroorutit pillugit aalajangersagaq imm. 2-mi immikkoortillugu inissinneqarpoq, taamatullu pilersitsineq ingerlatsinerlu pillugit aalajangersagaq imm. 3-mi takoriataarneqarsinnaasunngorlugu immikkoortillugu inissinneqarluni. Imm. 2 atuuttoq tamanna tunngavigalugu siunnersuummi imm. 4-nngorpoq.
Kommunalbestyrelsip kommunit utoqqarnut paaqqinniffiini inissat pisariaqartinneqartut naammattut pigineqarnersut akisussaaffigai.
Imm. 2.
Kommunalbestyrelsip kommunip pensionisialinnut sammisassaqartitsineranut neqeroorutini inissat pisariaqartinneqartut pigineqarnissaat akisussaaffigaa.
Pensionisiallit immikkoortinneqannginnissaat, sammisassaqartitsinermullu neqeroorutit qassinilluunniit ukiulinnit peqataaffigineqarsinnaanissaat pingaartuuvoq.
Imm. 4 naapertorlugu pensionisiallit sammisassaqartitsinermut neqeroorutini peqataasarnissaat akiliuteqartitsisanissarlu pillugit Naalakkersuisut malittarisassanik aalajangersaasinnaapput.
Imm. 3.
Aalajangersagaq nutaartaqanngilaq. Tamatumani kommuni suli tassaavoq utoqqarnut paaqqinniffinnik sammisassaqartitsinermullu neqeroorutinik pilersitsisuullunilu ingerlatsisussaq.
Imm. 4.
Inatsisartut peqqussutaanni atuuttumi § 21-mi imm. 2. Aalajangersagaq nutaartaqanngilaq, erseqqissaatigineqarlunili aalajangersakkami suna pineqarnersoq.
Naalakkersuisut tunaartarisassanik erseqqinnerusunik aalajangersaassapput, tamatumani immikkut ittumik pisatsersuisinnaanermut aammalu siulersuinermut ingerlatsinermullu isumaginninnikkut anguniagassatut piumasaqaatit ilanngunneqassallutik.
Isumaginninnermik Iluarsaaqqinnermut Ataatsimiititaliarsuup utoqqaat eqqarsartaatsimikkut napparsimasut imaluunniit utertartut amerliartuinnartut eqqissillutik aalajaatsumillu ineqarnissaannut neqeroorfiginiarlugit immikkoortortat talulersorneqarnissaat inassutigaa, tamatumani utoqqaat immikkut paarineqartariallit isumagisariallillu pisariaqartitaat naammassineqarsinnaaniassammata.
§ 6.
Imm. 1.
Inatsisartut peqqussutaanni atuuttumi § 22, imm. 1. Oqaasertaq "nakorsaninngaanniit ikiorneqartuarnissaminnik pisariaqartitsinngitsut" ilanngunneqanngilaq, pissutigalugu pensionisialik nakorsaninngaanniit ikiorneqartuarnissaminik pisariaqartitsiguni, peqqinnissamut isumaginnittoqarfiup ataani paaqqinniffimmut nuunnissaminik qinnuteqarnissaminut taarsiullugu napparsimmavimmut unittussaammat.
§ 1 imm. 2-mut oqaaseqaatini qulaani allaaserineqartutut pensionisialik paaqqutarisarialik najukkamini napparsimmavimmi napparsimmavimmiluunniit qaninnerpaami najugaqarnissaminut "qilersugaanngilaq". Taamaalilluni najukkami allami paaqqinniffimmut peqqinnissaqarfiulluunniit ataani paaqqinniffimmut nuunnissaq qinnuteqaatigineqarsinnaavoq, taamaattumillu "najukkami napparsimmavik" ilanngunneqarani.
Aalajangersagaq malillugu kommunalbestyrelsip peqqinnissaqarfimmik isumaqatigiissutigisinnaavaa peqqinnissaqarfiup ataani paaqqinniffinni paarisariallit inissaqartinneqarnissaat, paaqinniffinnik immikkoortortaqarpat imaluunniit siniffissaqartitsisoqarpat imaluunniit sulisussaqartitsisoqarpat, taamaalilluni kommunip pensionisiallit immikkut paarisariallit sulissunneqarnissaat isumagisinnaammagu.
Imm. 2.
Peqqinnissamut isumaginnittoqarfiup ataani paarisarialinnut immikkoortortaqarfimmi inissanik atuinermi akiliutissaq Peqqinnissamut Naalakkersuisoqarfiup, Isumaginninnermut Naalakkersuisoqarfiup aammalu Kalaallit Nunaanni Kommuneqarfiit Kattuffiata akornanni isumaqatiginninniarnikkut manna tikillugu pisarnertut aalajangersarneqartassasoq siunnersuutigineqarpoq.
Kapitali 3.
Naammagittaalliuuteqartarneq.
§ 7.
Inatsisartut peqqussutaanni atuuttumi § 29. Oqaasertaliorneratigut annikitsunnguamik iluarsiivigineqarpoq. Isumaginninnermi suliassanut nalinginnaasumik naammagittaalliuuteqarsinnaaneq aalajangersakkami tassani erseqqissumik oqaatigineqarpoq.
Kapitali 4.
Aningaasalersuineq.
§ 8.
Aalajangersagaq Inatsisartut peqqussutaanni atuuttumi § 27-mi ilaatinneqarpoq. Akiliutigisimasat utertinneqartarnissaat pillugu aalajangersagaq utoqqarnut paaqqinniffinnut tunngassuteqanngilaq, taamaattumillu siunnersuummi ilanngunneqarani. Naatsorsuusiortarnermut kukkunersiuisitsisarnermullu malittarisassat ukiumut naatsorsuusiorfiusumut kommunit naatsorsuutaasa Namminersornerullutik Oqartussanit nalimmassarneqarnissaat pillugu kontolersuinermut najoqqutassiami takuneqarsinnaapput.
§ 9.
Inatsisartut peqqussutaanni atuuttumi § 28. Aalajangersakkami kommunit utoqqarnut paaqqinniffinnik sanaartornissaanni Landskarsimit tapiiffigineqarsinnaanerat periarfissinneqarpoq.
Sanaartornermut tapiissutit Isumaginninnermut Pisortaqarfiup kaajallaasitaa nr. 213 naapertorlugu tunniunneqartassapput, amerlassusissaallu Inatsisartut aningaasanut inatsisaanni ukiumoortumi inaarutaasumik aalajangersarneqartassallutik, tamatumalu kingornagut 50%-it nalinginnaasumik tapiissutigineqartassallutik.
Kapitali 5.
Misileraaneq pillugu aalajangersakkat.
Aalajangersakkat nutaajupput.
§ 10.
Imm. 1.
Aalajangersagaq kommunimi kommuniniluunniit arlalinni assersuutigalugu utoqqarnut paaqqinnifinni, sammisassaqartitsinermut neqeroorutini assigisaannilu misiligummik aaqqissuussinissanut pisinnaatitsivoq.
Nutaamik aaqqissuussinissap, assersuutigalugu nuuttussanut ataatsimiititap kikkunnit ilaasortaaffigineqarnissaa oqartussaaffeqarnissaalu kommunimi ataatsimi arlalinniluunniit piffissami killilikkami misiligarneqarnissaa eqqarsaatigineqarsinnaavoq, malittarisassat tamanut tunngassuteqartut nunamut tamarmut atuuttut aalajangersaavigineqannginneranni.
Misileraaneq pillugu aalajangersakkat pensionisiaqartut najugarisaat pillugit allanngortitsinerni nutaanillu pilersitsinerni misileraanissamut misilittakkanillu katersinissamut aamma periarfissiipput, assersuutigalugu utoqqarnut utilersimasunut nakkutigineqarluni najugaqarfinnut atatillugu. Kommunip sammisassaqartitsinermi neqeroorutai misileraalluni aaqqissuussinermi aamma ilaatinneqarsinnaapput.
Imm. 2.
Misiligummik aaqqissuussinerup eqikkaaviusumik isummerfiginissaanut ukiunik pingasunik sivisussuseqartussamik killiliinissaq naammassasoq ilimagineqarpoq.
Imm. 3.
Misiliinermi angusat pillugit nassuiaasiaq tamanut saqqummiunneqassaaq.
Nassuiaasiaq imaqassaaq misiliinermi anguniakkat, suleriaatsit aammalu angusat naatsumik aallaaserineqarnerannik, tamatumani ilanngullugu aningaasaqarnikkut allaffissornikkullu sunniutigisassaasa nalunaarsorneqarnerat. Nassuiaasiami misiliinerup aaqqissuussinertut ingerlaannalernissaa eqqarsaatigalugu inassutigineqarsinnaanersoq naggataarutaasumik eqikkaavigineqassaaq.
§ 11.
Kommunit misileraallutik aaqqissuussisarnissaannut oqaaseqaatit qulaani § 10-miittut takukkit.
Kapitali 6.
Atortuulersitsineq.
§ 12.
Imm. 1.
Inatsisartut peqqussutaanni atuuttumi § 31. Atortuulersitsinissap ullussaa 1. marts 1999-iussasoq siunnersuutigineqarpoq. Tamanna kommuninut najoqqutassiornissamut pisariaqarpallu innuttaasunut paasissutissiornissamut piffissaliissaaq.
Imm. 2.
Aalajangersagaq nutaajuvoq. Tamatuma utoqqarnut paaqqinniffiit il.il. pillugit Inatsisartut peqqussutissaattut siunnersuummi aalajangersakkat atuuttuunerat isumannaarpaa, naak Inatsisartut peqqussutaat atuuttoq Inatsisartut peqqussutissaa nutaaq akuersissutigineqarpat pensionillit pillugit suliassap iluarsaassivigineqarnissaannut atatillugu aatsaat atorunnaartussaagaluartoq.
Imm. 3.
Aalajangersagaq nutaajuvoq. Tassani oqaatigineqarpoq malittarisassat Inatsisartut peqqussutaat atuuttoq tunngavigalugu suliarineqarsimasut Inatsisartut peqqussutissaattut nutaatut siunnersuutip matuma atuutilernerata kingorna suli atuutissasut. Tassa inatsisitigut tunngavigisaq Inatsisartut peqqussutaannit atuuttumit peqqussutissatut siunnersuummut nuunneqarpoq, taamaalilluni Inatsisartut peqqussutaata atuuttup atorunnaarsinneqarnerata kingorna suliassaqarfimmi tassani aalajangersakkanik inatsisitigut tunngavissaqartinneqanngitsunik peqalernissaa pinngitsoortinneqarsinnaaqqullugu.
Ullup atortuulersitsiviup kingorna aalajangersakkat pineqartut taakku nalinginnaasumik periuseqarluni allanngortinneqartassallutilluunniit atorunnaarsinneqartassapput, tassa imaappoq nalunaarutinik peqqussutinilluunniit aalajangersaaneq aqqutigalugu, aalajangersakkap allanngortinneqartup atorunnaarsinneqartulluunniit sumi inissisismanera aalajangiisuutillugu.