Isumaginnittoqarfiup aqunneqarnera aaqqissuussaaneralu pillugit Inatsisartut peqqussutaat nr. 9, 30. oktober 1998-imeersoq
Suliassaqartitsiniarnermik inunnillu isumaginninnermik Kalaallit Nunaannut inatsit nr. 580, 29. november 1978-imeersoq naapertorlugu isumaginnittoqarfiup aqunneqarnera aaqqissuussaaneralu pillugit malittarisassat makku aalajangersarneqarput:
Kapitali 1
Qitiusumit siulersorneqarnera§ 1. Naalakkersuisut Kalaallit Nunaanni isumaginnittoqarfiup allaffissornikkut aqunneqarnera siulersorlugulu aaqqissuutissavaat, isumaginninnermilu malittarisassanik kommunit ingerlatsinerat nakkutigisaralugu.
§ 2. Naalakkersuisut Kalaallit Nunaanni isumaginninnermi sanaartugassatigut piorsaanerup pilersaarusiorneqarnera isumagisaraat ataqatigiissaarlugulu, tamatumanilu kommuninit ataasiakkaanit siunnersuutinik pissarsiniartassallutik.
Imm. 2. Piorsaanissamik pilersaarutit sivikinnerpaamik ukiunut sisamanoortuupput. Minnerpaamik ukiumut ataasiarluni nalilersoqqinneqartassapput.§ 3. Naalakkersuisut §§ 1 aamma 2 naapertorlugit suliassat isumagisassanngortinneqartut suliariniarnerini paasissutissat pisariaqartut kommunalbestyrelsinit piumasarisinnaavaat.
§ 4. Naalakkersuisut isumaginninnermi sanaartukkat pillugit erseqqinnerusunik malittarisassiussapput.
Kapitali 2
Najukkani aqutsineq§ 5. Kommunalbestyrelsi kommunip isumaginninnikkut suliaani pissutsinut tamanut tunngasutigut inatsisitigut allatigut kommunilluuniit ileqqoreqqusaatigut oqartussanut allanut tunniunneqarsimanngitsunut aalajangiisartuuvoq.
Imm. 2. Kommunit aggornerisa avataanni suliassat, kommunini ataatsimiititalianit ataavartunit kommunip ulluinnarni isumaginninnikkut suliaanik ingerlatsisartunit suliarineqartartut kommunalbestyrelsip isumagissavai.§ 6. Kommunalbestyrelsi kommunip isumaginninnikkut sanaartugassaasa piorsarneqarnerinik pilersaarutinut siunnersuusiortassaaq Naalakkersuisunullu nassiuttassallugit. Tamatuma kingorna Naalakkersuisut:
1) kommunit siunnersuutaat tulleriiaarlugit ataqatigiissaarlugillu pingaarnersiussavaat,
2) kommunit isumaginninnikkut sullissinissamik aqqutissiuisussaanerat naammassineqarsimanersoq nakkutigissavaat, aamma
3) inuiaqatigiit eqqarsaatigalugit nukissanik naammaginartumik atuisoqarnersoq nakkutigissavaat.
Imm. 2. Naalakkersuisut piorsaanissamik pilersaarutinut siunnersuusiornermi periusaasartut, tamakkua annertussusiat, aammalu pilersaarutinut piffissatut killiliussat pillugit erseqqinnerusunik malittarisassiussapput.
Kapitali 3
Naammagittaalliuuteqartarneq§ 7. Kommunalbestyrelsi, kommunip ataatsimiititaliaa nunaqarfimmiluuniit aqutsisut isumaginninnermi malittarisassat naapertorlugit aalajangiigaangata, suliamut attuumassuteqartoq aalajangiineq pillugu Isumaginninnermi Naammagittaalliuuteqartarfimmut naammagittaalliuuteqarsinnaavoq aalajangiinermik tigusinermiit sapaatip akunneri sisamat qaangiutsinnagit. Isumaginninnermi Naammagittaalliuuteqartarfiup immikkut ittunik patsisissaqartoqartillugu piffissaliussap malinneqarsimannginnera isiginianngissinnaavaa.
Imm. 2. Isumaginninnermut Pisortaqarfik isumaginninnikkut malittarisassat naapertorlugit aalajangiigaangat, suliamut attuumassuteqartoq aalajangiineq pillugu Isumaginninnermi Naammagittaalliuuteqartarfimmut naammagittaalliuuteqarsinnaavoq aalajangiinerup tiguneqarneranit sapaatip akunneri sisamat qaangiutsinnagit. Tamannali atuutissanngilaq inatsisini aalajangiinerup naammagittaalliuutigineqarsinnaannginneranik immikkut malittarisassaqartillugu. Isumaginninnermi Naammagittaalliuuteqartarfiup immikkut ittunik patsisissaqartoqartillugu piffissaliussap malinneqarsimannginnera isiginianngissinnaavaa.
Imm. 3. Isumaginninnermi Naammagittaalliuuteqartarfiup piffissaliussamik isiginnginnian-nginnera allaffissornikkut oqartussanut allanut ingerlateqqinneqarsinnaanngilaq.
Imm. 4. Inuk 18-inik ukioqalersimanngitsoq angajoqqaatut oqartussaassuseqartoq akuersitinnagu angerlarsimaffiup avataanut inissinneqartillugu tamatuminnga aalajangiineq Nunatta Eqqartuussivianut tunniunneqarsinnaavoq Isumaginninnermi Naammagittaalliuuteqartarfiup aalajangiineraniit sapaatit akunnerinik sisamanik piffissaliussap iluani. Landsdommerip piffissaliussap malinneqannginnera isiginnginniarsinnaavaa pineqartoq qaangiinermut akisussaatinneqarsinnaanngippat.
Isumaginninnermi Naammagittaalliuuteqartarfik
§ 8. Isumaginninnermi Naammagittaalliuuteqartarfik siulittaasoqassaaq allanillu sisamanik ilaasortaqassalluni. Naalakkersuisut siulittaasumik, taassuma sinniisussaanik, ilaasortanik sisamanik taakkulu sinniisusaannik ukiunut marlunnoortumik toqqaassapput. Siulittaasoq inatsisilerituutut soraarummeersimassaaq aamma/imaluunniit allatigut Kalaallit Nunaanni inatsisinik isumaginninnermut tunngasunik sukumiisumik paasisimasaqassalluni. Ilaasortat marluk isumaginninnermi inatsisinik ilisimasaqassapput, ilaasortallu marluk isumaginninnermi ingerlatsinermik ilisimasaqassallutik. Naalakkersuisut inunnik isumaginninnermi suliat suliarineqarnerini aalajangiivigineqarneriniluunniit peqataasartunik toqqaasinnaanngillat. Naalakkersuisut Isumaginninnermi Naammagittaalliuteqartarfiup ilaasortai ukiunut marlunnoortumik toqqartassavaat.
Imm. 2. Isumaginninnermi Naammagittaalliuuteqartarfik pisuni aalajangersimasuni inunnik suliamik sammineqartumik immikkut ilisimasaqartunik aggersaasinnaavoq. Inuit taakku Isumaginninnermi Naammagittaalliuuteqartarfimmi taaseqataasinnaatitaanngillat.
Imm. 3. Naalakkersuisut Isumaginninnermi Naammagittaalliuuteqartarfiup suleriaasissaa aalajangersassavaat.
Imm. 4. Naalakkersuisut Isumaginninnermi Naammagittaalliuuteqartarfimmut allattoqarfeqarnikkut ikiuutissapput.§ 9. Isumaginninnermi Naammagittaalliuuteqartarfik aalajangiisinnaassuseqartarpoq ilaasortat ikinnerpaamik pingasut najuukkaangata. Isumaginninnermi Naammagittaalliuuteqartarfik amerlanerussuteqarnikkut aalajangiisassaaq. Taasinermi amerlaqatigiittoqartillugu siulittaasup taasinera aalajangiisuussaaq.
Imm. 2. Isumaginninnermi Naammagittaalliuuteqartarfiup aalajangiineri allaganngorlugit, tunngavilersorlugit nalunaarutigineqartassapput. Ataatsimeereernerit tamaasa siulittaasup tun-ngaviusumik aalajangernerit tamanut saqqummiuttassavai.
Imm. 3. Siulittaasoq Isumaginninnermi Naammagittaalliuuteqartarfik ataatsimiinngikkaluartoq pisuni ukunani aalajangiisinnaavoq:
1) suliani ingerlateqqitani ikittuinnarnik aningaasartaqartuni. Naalakkersuisut aningaasat taakkua amerlassusissaannut malittarisassanik aalajangersaassapput.
2) suliani ingerlateqqitani aalajangiinissamut missingiiffiusariaqanngitsuni imaluunniit tunngavissatut pingaaruteqanngitsuni.
Imm. 4. Siulittaasup imm. 3 naapertorlugu aalajangiinerit pillugit Isumaginninnermi Naammagittaalliuuteqartarfiup ilaasortaasa sinneri ilisimatittassavai suliamut attuumassuteqartunut nassiunneqartinnagit. Ilaasortat ikinnerpaamik marluk sapaatip akunnerinik marlunnik piffissaliussap naannginnerani piumasarippassuk aalajangiineq Isumaginninnermi Naammagittaalliuuteqartarfimmut taasissutigisassanngorlugu saqqummiunneqassaaq.
Imm. 5. Isumaginninnermi Naammagittaalliuuteqartarfik suliani pillugit ukiut tamaasa nalunaaruteqartassaaq.
Kapitali 4
Aningaasalersuineq§ 10. Isumaginninnikkut suliat kommuninit Landskarsimillu aningaasalersorneqassapput.
Imm. 2. Aningaasanut inatsimmi isumaginninnikkut sulianut tapiissutit utertitsillunilu akiliutit pillugit malittarisassat erseqqinnerusut aalajangerneqassapput.§ 11. Isumaginninnermi Naammagittaalliuuteqartarfiup aningaasartuutai Inatsisartunit akilerneqartassapput.
Kapitali 5
Pineqaatissiisarnerit pillugit aalajangersakkat§ 12. Kinaluuniit isumaginninnermi suliat aqunneqarnerini peqataasoq pinerluttulerinermi inatsimmi pisortanik sullissitilluni suliffeqartilluniluuniit pinerluutit pillugit malittarisassat malillugit akisussaaffeqarpoq suliffik pisortanit qinerneqarnikkut pigaluartoq.
Kapitali 6
Atortuulerfia§ 13. Peqqussut manna 1. januar 1999 atortuulerpoq. Peqatigisaanik Kalaallit Nunaanni isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaat nr. 8, 10. oktober 1979-imeersoq atorunnaarsinneqarpoq. Taanna naapertorlugu aqutsinermut maleruaqqusat atortuulersinneqartut matumunnga akerliunngitsut maleruaqqusanik peqqussut manna naapertorlugu atuutilersinneqartunik atorunnaarsinneqarnissamik tungaanut atuutiinnassapput.
Imm. 2. Isumaginninnermi Naammagittaalliuuteqartarfik isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaat nr. 8, 10. oktober 1979-imeersoq tunngavigalugu atulersinneqartoq ataannassaaq, Naalakkersuisut Isumaginninnermi Naammagittaalliuuteqartarfiup ilaasortassaanik nutaanik peqqussut una naapertorlugu toqqaareernissaasa tungaanut.
Namminersornerullutik Oqartussat, ulloq 30. oktober 1998.
Jonathan Motzfeldt/
Mikael Petersen
Siunnersuummut nalinginnaasumik oqaaseqaatit
1. Aallaqqaasiut.
Peqqussutissatut siunnersuut manna isumaginninnermi sulianik ingerlatitseqqittarnermik pisariillisitsivoq, kiisalu Isumaginninnermi Naammagittaalliuuteqartarfiup ilaasortaasa katitigaanerinik allannguilluni. Tamanna 1995-imi Inatsisartut upernaakkut ataatsimiinneranni "Inatsisartut ataatsimiititaliaqarnerat pillugu suleqatigiissitap atorfilinnik inuttallip isumaliutissiissutaanik" (imm. 5). Tamatumunnga atatillugu Naalakkersuisut Kalaallit Nunaanni isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaanik nr. 8, 10. oktober 1979-imeersumik kingusinnerusukkut allannguutitalimmi aalajangersakkat sinnerinik atuuttunik allanngortitsipput. Taamaammat Naalakkersuisut inatsisip taassuma siunnersuummi matumani ilanngunneqarnissaa qinerpaat paasinarsaaniarluni.Suleqatigiissitap atorfilittanik inuttaqartup kaammattuutigaa:
Isumaginninnermi Naammagittaalliuuteqartarfik atorfilittanik inuttaqassaaq immikkut ilisimasalinnik naammagittaalliuuteqartarfittut.
Isumaginninnermik Iluarsaaqqinnissamut Ataatsimiititaliarsuup ilaatigut kaammattuutigaa:
1. Isumaginninnermi Naammagittaalliuuteqartarfik isumaginninnikkut kommunit aalajangigaannik allaffissornikkut ingerlatitseqqittarfituaassaaq.
2. Isumaginninnermi Naammagittaalliuuteqartarfik pillugu aalajangersakkat allanngortinneqassasut suliaq pillugu ingerlatitseqqittarfiliortoqarluni aalajangiinerup unioqqutit-sisuunnginneranik naliliiffiunissaanik aallaaveqartussamik. Isumaginninnermi Naammagit-taalliuuteqartarfiup atorfilittanik naalakkersuinermillu suliaqartunik ilaasortaqarnissaa siunnersuutigineqarpoq taamalu suliat inatsisinut suliamullu, aamma naalakkersuinermut tunngasortai isiginiarneqarniassammata.
3. Isumaginninnermi Naammagittaalliuuteqartarfik ulluinnarni aqutsisuliorsinnaavoq sulianik pisariitsunik missingiiviusariaqanngitsunik suliaqarsinnaasumik.
2. Isumaginninnikkut sulianik ingerlatitseqqittarneq.Malittarisassat atuuttut.
Isumaginninnermi sulianik ingerlatitseqqittarneq pillugu malittarisassat Kalaallit Nunaanni isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaanni nr. 8, 10. oktober 1979-imeersumi kingusinnerusukkut allannguuteqartinneqartumi allaaserineqarput. Malittarisassat taakku malillugit innuttaasoq kinaluuniit suliamik imminut tunngasumik suliaqarfinnut arlalinnut ingerlatitseqqinnissaminik pisinnaatitaaffeqarpoq.
Inatsisartut peqqussutaanni § 7, imm.1-imi aalajangersarneqarpoq kommunit ataatsimiititaliaasa nunaqarfiilluuniit aqutsisuisa aalajangigaat sapaatit akunnerisa sisamat ingerlanerini kommunalbestyrelsimut tunniunneqarsinnaasut. Tamatuma qaavatigut kommunalbestyrelsip aalajangigai sapaatit akunnerisa sisamat ingerlanerini Isumaginninnermi Naammagittaalliuuteqartarfimmut ingerlateqqinneqarsinnaapput. Isumaginninnermut Pisortaqarfiup aalajangigai aamma Isumaginninnermi Naammagittaalliuuteqartarfimmut sapaatit akunnerisa sisamat ingerlanerini ingerlateqqinneqarsinnaapput. Ingerlatitseqqittarfiit taakku atuupput inatsisitigut allatut aalajangersimasumik aalajangiisoqarsimanngippat.
Innuttaasup kommunimut qinnuteqarneraniit ajornartorsiummilluuniit saqqummiussineraniit Isumaginninnermi Naammagittaalliuuteqartarfiup aalajangiinissaata tungaanut piffissaq sivisooq ingerlasinnaasarpoq. Innuttaasut misigisinnaasarput inatsisitigut isumannaassusertik, arlalinnik ingerlatitseqqittarfeqarnikkut qularnaarniagassaq, tamatumuunakkut annikillisarneqartoq. Suliap suliarineqarnerata sivisunera pissutigalugu inaarutaasumik aalajangiisoqarnerani immaqa aalajangiineq innuttaasumut pingaaruteqarpiarunnaarsimasarpoq. Kiisalu Isumaginninnermi Naammagittaalliuuteqartarfiup allattoqarfiani misilittagarineqarpoq ataatsimiititaliap aalajangigai qaqutigorsuaq kommunalbestyrelsip allanngortittarai. Aatsaat allanngortitsisoqartarpoq suliami paasissutissat nutaat saqqummersimagaanngata.
Malittarisassat siunnersuutigineqartut.
Inatsisartut peqqussutissaattut siunnersuutikkut matumuuna kommunip aalajangigaata toqqaannartumik - kommunalbestyrelsi ingerlatitseqqaartarfittut atoqqaarnagu - Isumaginninnermi Naammagittaalliuuteqartarfimmut ingerlatinneqartalernissaanik kinguneqassaaq. Taamaalior-nikkut suliassap suliarineqarnera sivikinnerulissaaq.
3. Isumaginninnermi Naammagittaalliuuteqartarfik.Malittarisassat atuuttut.
Naammagittaalliuuteqartarfik tallimanik ilaasortaqarpoq, taakkunannga pingasut Inatsisartunit toqqagaallutik marlullu Inatsisartuni ilaasortaasussaallutik, marlullu KANUKOKA-mit toqqagaassallutik.
Isumaginninnermik Iluarsaaqqinnissamut Ataatsimiititaliarsuup oqaatigaa Isumaginninnermi Naammagittaalliuuteqartarfiup ilaasortaasa isumaginninnermi inatsisitigut ajornartorsiutaasunik Naammagittaalliuuteqartarfimmut tunniunneqartunik inatsisit tungaasigut ilisimasaqannginneri ajornartorsiutaasorigini. Tamanna Ataatsimiititaliarsuaq malillugu suliat ataasiakkaat isumaginninnermi ingerlatsinermit isigalugit aalajangiiffigineqartarneranik kinguneqarsinnaavoq, malit-tarisassat oqaasertai malinnagit.
Kommunalbestyrelsimut ilaasortat amerlanerussuteqarnerat Ataatsimiititaliarsuup iluanngissoraa, tassa Naammagittaalliuuteqartarfik suliniutip kommunimit Namminersornerullutilluuniit Oqartussanit akilerneqassanersoq pillugu kisimiilluni aalajangiisussaatillugu, aamma innuttaasut inatsiseqarnikkut inissisimanerannut tunngatillugu, ilaasortammi kommunip tungaanit isiginneqqajaasinnaammata innuttaasup isaannit isiginninnatik.
Malittarisassat siunnersuutigineqartut.
Isumaginninnermi Naammagittaalliuuteqartarfiup ilaasortaasa katitigaanerisa allanngortinneqarnissaanik siunnersuutikkut matumuuna suliamut attuumassuteqarneq pissutigalugu peqataasinnaassuseqartannginneq siullertut pinngitsoorneqassaaq. Tamanna pissaaq Naalakkersuisut inunnik isumaginninnermi suliat suliarineqarnerini aalajangiivigineqarneriniluunniit peqataasartunik toqqaasinnaannginnerisigut. Aappassaattut, inatsisitigut, isumaginninnermi suliatigut kiisalu isumaginninnermi ingerlatsinikkut ilisimallit agguataarnissaat isumagineqassaaq, suliamilli immikkut ilisimasallit pingaarnerutinneqassallutik.
4. Isumaginninnermi Naammagittaalliuuteqartarfiup suleriaasia.Malittarisassat atuuttut.
Malittarisassat atuuttut malillugit Isumaginninnermi Naammagittaalliuuteqartarfik siulittaasup aalajangerneratut akulikitsigisumik ataatsimiittarpoq. Pissutsit immikkut ittut atuutsillugit siulittaasoq aalajangersinnaavoq naammagittaalliuut aalajangiivigineqassasoq ataatsimiittoqanngikkaluartoq ilaasortalli tamarmik isumaminnik tunngavilersukkamik saqqummeereerneratigut.
Isumaginninnermi Ataatsimiititaliarsuaq siunnersuuteqarpoq Isumaginninnermi Naammagittaalliuuteqartarfiup suleriaasia allanngortinneqassasoq Naammagittaalliuuteqartarfik ulluinnarni aqutsisuliorsinnaanngorlugu sulianik pisariitsunik, aalajangiinermi missingiiviusariaqanngitsunik suliaqarsinnaasumik.
Malittarisassat siunnersuutigineqartut.
Isumaginnittoqarfiup aqunneqarnerata aaqqissuusaaneratalu allanngortinneqarnissaanik siunnersuut manna siulittaasup suliani pisariitsuni, aamma suliani aalajangiinermi missingiiviusariaqanngitsuni tamanulluuniit tunngassuteqanngitsuni Isumaginninnermi Naammagittaalliuuteqartarfik sinnerlugu aalajangiisinnaalernissaanik nassataqassaaq. Taamaattorli Naammagittaalliuuteqartarfiup ilaasortai sinneri allat aalajaangiinermut isumaqataanngikkunik sapaatit akunneri marluk ingerlanerini siunnersuutip ataatsimiinnermi taasissutigineqarnissaanik piumasaqarsinnaassapput.
5. Allannguutit allat.Inatsisartut ataatsimiititaliaasa sulinerat Inatsisartut Naalakkersuisullu pillugit Inatsisartut inatsisaanni, Inatsisartut suleriaasianni ataatsimiititaliallu ataasiakkaat suleriaasianni malittari-sassaqartinneqarput. Taamaammat Inatsisartut peqqussutaanni atuuttumi Inatsisartut isumaginninnermi ataatsimiititaliaat pillugu aalajangersakkat atorunnaarnissaat siunnersuutigineqarpoq.
Isumaginnittoqarfiup aqunneqarnerata aaqqissuussaaneratalu allanngortinneqarnissaanik siun-nersuut manna aamma naammagittaalliuuteqarnissamut sapaatit akunnerinik sisamanik tamanut piffissarititaasup saniatigut isumaginninnermi maleruassani ataasiakkaani naammagittaalliuuteqarnissamut allanik piffissarititaasunit aalajangiisoqarsinnaaneranik aalajangersakkap atorunnaarsinneqarnissaanik siunnersuummik imaqarpoq. Allannguineq tamanna malittarisassanik atuuttunik pisariillisitsissaaq, aamma isumaginninnermi malittarisassat paasiuminarnerulernerinik nassataqassalluni.
Peqqussummi atuuttumi "isumaginninnermut naalakkersuisoq" allassimatillugu peqqussutissatut siunnersuummi "naalakkersuisut" tamatumunnga taarsiunneqassaaq aalajangersakkat Namminersornerulerneq pillugu inatsimmut aamma Inatsisartut naalakkersuisullu pillugit inatsimmut naapertuutileqqullugit, inatsit taanna malillugu Naalakkersuisut siulittaasuata naalakkersuisuni suliassat agguataarnerat aalajangigassaraa. Tassani pineqarput peqqussutissatut siunnersuummi § 1-3.
Kalaallit Nunaanni isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaata nr. 8, 10. oktober 1979-imeersup, kingusinnerusukkut allannguutitaqartup, allannguutissaatut siunnersuutit Naammagittaalliuteqartarfiup immikkut ilisimasalinnik ikiortissarsiornissaminik periarfissinneqarneranik ilassummut, oqaatsitigut iluarsaanneqarnissaannut, kiisalu aalajangersakkat kingusinnerusukkut inatsisinut atuutsinneqalersunut naapertuutinngitsut iluarsineqarnerannut tunngasuupput. Kiisalu siunnersuutigineqarpoq paragraffit kisitsisitalersorneri tulleriilluartuutinneqassasut Inatsisartut peqqussutaata ataatsimoortitap matuma paasiuminartuunissaa siunertaralugu.
Siunnersuutip aningaasatigut kinguneqarnissaa naatsorsuutigineqanngilaq.
Aalajangersakkanut ataasiakkaanut oqaaseqaatit.
§ 1.
Aalajangersagaq Naalakkersuisut isumaginnittoqarfimmik siulersuinissaannik aaqqissuussinissaannillu piginnaatitaaffiliivoq, kiisalu kommunit isumaginninnermi malittarisassanik malin-ninneranik nakkutilliisinnaatitaanerannillu imaqarpoq. Isumaginninnermi malittarisassat paasineqassapput ilaatigut tassaasutut eqqartuussiveqarfimmi najoqqutat assigiinngitsut. Taamaalillunilu tassa periusaasartut, eqqartuussiveqarnermi ileqquusartut pisullu qanoq issusaa isumaginninnermi malittarisassanut ilaapput. Pissusiviusuni Naalakkersuisunut ilaasortaq qaqugukkulluuniit isumaginninnermut tunngasunik isumaginnittuusoq nakkutilliinermut akisussaavoq.
Nakkutilliinerup malitsigisaanik Naalakkersuisunut ilaasortaq isumaginninnermut tunngasunik isumaginnittuusoq kommunit suliassanik ingerlatsinerata pitsaassusaanik naliliisinnaavoq. Assersuutigalugu kommunit nipangiussisussaatitaanerminnik, naammagittaalliornissamut ilitsersuisussaatitaanerminnik il.il. malinninnerannik naliliinerit pineqarput, imaluuniit kommunit missingiinerminni inatsisitigut eqqarsaatigisariaqartut tamaasa ilanngussimaneraat.
Assersuutigalugu Naalakkersuisunut ilaasortaq isumaqarpat kommuni soorlu isumaginninnermut tunngasunik isumaginninnerminni suliassanik ingerlatsisarneq pillugu inatsisinik unioqutitsisimasoq, pisut uparuarneqarsinnaapput, kingornaluuniit Kommunit Nakkutilliisoqarfianut tunniunneqarsinnaallutik. Uparuaaneq taamaallaat innersuussutinik imaqarsinnaavoq, peqqussutaanngitsunik pineqaatissiissutaanngitsunillu. Nakkutilliineq aamma kommuninut killimmik ilitsersuisussaatitaanermik malitseqarpoq. Taamaaliornikkut suliassanik ingerlatsinerup pitsaassusaa qaffatsinneqassaaq, aammalu kommunit malittarisassamik aalajangiinermik tunngavissamik paasinerluinissaat pinngitsoorneqassalluni.
§ 1 Inatsisartut peqqussutaanni atuuttumi oqaaseqatigiit siulliit ilanngunneqannginnissaa siunnersuutigineqarpoq pisariaqanngimmat. Aalajangersakkap immikkoortua siulleq Naalakkersuisunut ilaasortap akisussaaneranut tunngavoq, tamannalu maanna Naalakkersuisunut ilaasortat akisussaanerat pillugu Inatsisartut inatsisaat nr. 6, 13. maj 1993-imeersup malitsigaa.
§ 2.Imm. 1.
§ 1a, imm. 1 Inatsisartut peqqussutaanni atuuttumi. Naalakkersuisut kommunit sanaartornermut tunngasunik pilersaarusiaat pillugit paasissutissanik pissarsiniartassapput. Tamanna pissassaaq sanaartornikkut suliat Aningaasanut Inatsisikkut tapiiffigineqarnissaannik qinnutigineqartut tulleriiaarneqarnissaat siunertaralugu. Aalajangersakkakkut Naalakkersuisut tulleriiaarisussaatinneqarput.Imm. 2.
§ 1a, imm. 2 Inatsisartut peqqussutaanni atuuttumi. Aalajangersakkakkut aalajangiunneqarpoq annertusaanissamik pilersaarutit ukiunut sisamanoortuussasut. Ukiut sisamat ukiumut ani-ngaasanut inatsiseqarfiusumut ukiunullu missingersuusiorfiusunut tunngasuupput. Annertusaanissamik pilersaarutit suliarineqartussat tassaapput isumaginninnermut naalakkersuisoqarfiup Namminersornerullutik Oqartussat ukiunut sisamanut pingaarnerusutigut sanaartugassanut pilersaarutinut ilanngussai. Sanaartornissamik pilersaarutit taakku sanaartornermut aningaasaliissutit pillugit siunnersuutinut tamarmiusunut tunngaviusarput, siunnersuutit taakku aningaasaliinissamik ukiumoortumik inatsisinut ilanngunneqartarput. Paasinarsaasoqaqqullugu aalajangersakkap oqaasertai allanngortinneqarput.
§ 3§ 1b Inatsisartut peqqussutaanni atuuttumi. Aalajangersagaq Naalakkersuisut §§ 1 aamma 2-imi suliassarititaasut isumagineranni kommuninit paasissutissanik naleqquttunik pissarsiniarsinnaatitaanerannik imaqarpoq.
§ 1b-imi § 1a-mut innersuussisoqarpoq. Maanna § 2-mut innersuussisoqarpoq taamalu innersuussineq normulersuinermut nutaamut naapertuutilerluni. Kiisalu aalajangersakkap oqaasertai paasinarsaaniarluni allanngortinneqarput.
§ 4.Aalajangersagaq taanna nutaajuvoq. Peqqussummi atuuttumi isumaginninnikkut sanaartukkanut malittarisassiornissamut ataatsimut tunngavissaqanngilaq. Peqqussut atuuttoq naapertorlugu isumaginninnermi annertusaaneq pillugu kaajallaasitamik atulersitsisoqarsimammat naleqqqussorineqarpoq peqqussumi aalajangersagaqassasoq tunngavissaasumik.
§ 5.§ 5 Inatsisartut peqqussutaanni atuuttumi. Aalajangersagaq kommunit isumaginninnikkut nammineq aqutsinissaannut tunngavissiivoq. Inatsisartut peqqussutaannut atuuttumut sanilliullugu oqaasertai allanngortitigaapput, aammalu kommunalbestyrelsit nunaqarfinnilu aqutsisut pillugit inatsimmut atuuttumut naleqqussagaalluni. Kommunalbestyrelsip kommunit ileqqoreqqusaasigut isumaginninnermi malittarisassat malillugit aalajangiisinnaatitaaneq nunaqarfimmi aqutsisunut tunniussinnaavaa. Aammattaaq aalajangersagaq aalajangigassat ilaasa kommunit avataani oqartussaqarfimmut inatsisiliornikkut tunniunneqarnissaannut periarfissiivoq. Assersuutigalugu tassaasinnaavoq nuna tamakkerlugu iliuuserineqartussaq qitiusumik oqartussaasumit aalajangerneqartussaq.
Imm. 2.
§ 6, imm. 3 peqqussummi atuuttumi. Aalajangersagaq Kommunalbestyrelsit nunaqarfinnilu aqutsisut il.il. pillugit Inatsisartut inatsisaanut naapertuuteqqullugu allatut oqaasertaliorneqarpoq.
§ 6.Imm. 1.
§ 5a, imm. 1 Inatsisartut peqqussutaanni atuuttumi. Isumaginninikkut annertusaanissamik pilersaarusiornermi kommunit suliassaat aalajangersakkakkut aalajangiunneqarput. Pilersaarutit ilassaattut kommunit siunnersuusiaat tamatuma kingorna nuna tamakkerlugu pilersaarusiornermi tunngavigineqassapput.Aalajangersakkap oqaasertai paasinarsaaniarluni allanngortinneqarneri kisimik pineqarput. Kiisalu "Naalakkersuisoqarfik "Naalakkersuisunngorlugu" allanngortinneqarpoq.
Imm. 2.
§ 5a, imm. 2 Inatsisartut peqqussutaanni atuuttumi. Naalakkersuisut kommunit annertusaanissamut siunnersuusiornerini suleriaasissat pillugit malittarisassiornissamut pisinnaatinneqarput. Allaffissornikkut malittareqqusat taakku kommunit sulinerannik oqilisaassapput, aammalu Naalakkersuisut suliamik ingerlatitseqqinnerannut assigiiaanik tunngavissiissallutik.Aalajangersakkap oqaasertai paasinarsaaniarluni allanngortinneqarneri kisimik pineqarput. Kiisalu "Naalakkersuisoqarfik "Naalakkersuisunngorlugu" allanngortinneqarpoq.
Kalaallit Nunaanni isumaginninnermut tunngasut siulersorneqarnerat aaqqissuunneqarnerallu pillugit Inatsisartut peqqussutaanni atuuttumi § 6 malillugu kommunalbestyrelsit isumagin-ninnermut ataatsimiititalianik ataavartussanik qinersissapput. Taamaattorli tamatuma kingorna kommunalbestyrelsit, bygderådit il.il. pillugit Inatsisartut inatsisaata allanngortinneqarnera (inatsisikkut nr. 20-ikkut, 3. november 1994-imeersukkut) Inatsisartut akuersissutigaat, tamannalu malillugu aningaasaqarnermut ataatsimiititaliaq tassatuaalerluni kommunit ataatsimiititaliaat inatsisitugit piumasarineqartoq. Inatsisitigut piumasarisaasumik kommunit isumaginninnermut ataatsimiititaliaqartussaanerata atorunnaarsinneqarnissaa siunnersuutigineqarpoq malittarisassat imminnut assortuunnissaat pinngitsoorumallugu.
Isumaginninnermi malittarisassani isumaginninnermi ataatsimiititaliat isumaginninnermiluuniit ataatsimiititaliap siulittaasuata aalajangertussaaneranik aalajangersagaqartillugu tamatuma kingorna kommunalbestyrelsi, ataatsimiititaliaq nunaqarfiulluuniit aqutsisui inunnik isumagin-ninnikkut suliassanik suliarinnittartutut oqartussaalerput.
§ 7.Imm. 1.
§ 7, imm. 1 Inatsisartut peqqussutaanni atuuttumi. Siullertut, aalajangersakkami aalaja-ngerneqarpoq kommunalbestyrelsi, kommunip ataatsimiititaliaa imaluuniit nunaqarfimmi aqutsisut aalajangiisimassasut Isumaginninnermi Naammagittaalliuuteqartarfik naammagittaalliuummut isummertinnagu. Aappassaattut, aalajangiineq isumaginninnermi malittarisassat malillugit pissaaq; pingajussaattullu suliamut attuumassuteqartoq Isumaginninnermi Naammagittaalliuuteqartarfimmut naammagittaalliornissaminut sapaatit akunnerinik sisamanik piffissaqarpoq.Isumaginninnermi malittarisassani isumaginninnermut ataatsimiititaliap taassumalluuniit siulittaasuata aalajangiinissaanik aalajangersagaqartillugu aalajangiisinnaatitaaneq kommunalbestyrelsimi, ataatsimiititaliami imaluuniit nunaqarfimmi aqutsisuni isumaginninnermi sulianik isumaginnittartumi ippoq. Taaamaalillunilu tassa kommunip iluani isumaginninnermi suliami ataasiinnarmik aalajangiisoqartassaaq. Taamaammat nunaqarfiup aqutsisuisa aalajangigai Isumaginninnermi Naammagittaalliuuteqartarfimmut naammagittaalliuutigineqassapput.
Isumaginninnermi Naammagittaalliuteqartarfiup naammagittaalliuuteqarnissamut piffissarititaasoq atortinngissinnaavaa immikkut patsisissaqartoqarpat. Annermik tassani pineqarput aalajangiinerit naammagittaaliornissamut naleqquttumik ilitsersuutitaqanngitsut.
Peqqussummi atuuttumi aalajangerneqarpoq isumaginninnermi malittarisassani naammagittaalliuuteqarnissamut immikkut piffissaliussat atorneqartillugit taakku Inatsisartut peqqussutaanni matumani piffissaliussanut nalinginnaasunut sanilliullugit salliusassasut.
Isumaginninnermi malitttarisassani taamaallat Meeqqanut inuusuttunullu ikiorsiisarneq pillugu Inatsisartut peqqussutaanni § 18-imi Isumaginninnermi Naammagittaalliuuteqartarfimmut naammagittaalliuuteqarnissamut immikkut piffissaliisoqarsimavoq. Naammagittaalliuuteqarnissamut sapaatit akunneranik ataatsimik piffissaritaasoq atuuttarpoq inuk 18-inik ukioqalersimanngitsoq pinngitsaaliissummik angerlarsimaffimminiit utaqqiisaasumik iliuutsitut peersinneqarallarsimagaangat. Tamatuma kingorna suliaq isumaginninnermi ataatsimiititaliamut ullut 14-it ingerlanerini aalajangiivigisassanngorlugu saqqummiunneqartarpoq. Pisuni taamaattuni naammagittaalliortup aalajangiineq pillugu nalunaarfigineqarneraniit sapaatip akunnera qaangiutsinnagu Isumaginninnermi Naammagittaalliuuteqartarfimmut tunniunneqarsinnaavoq.
Isumaginninnermi malittarisassat ersarinnerulissapput naammagittaalliuuteqarnissamut piffissaliussat suni tamani assigiippata. Taamaammat naammagittaalliuuteqarnissamut immikkut piffis-saliussat salliutinneqartarnerata atorunnaarsinneqarnissaat siunnersuutigineqarpoq. Matumalu kingorna isumaginninnermi malittarisassani tamanut atuuttuni sapaatit akunnerisa sisamaasut saniatigut naammagittaalliuuteqarnissamut allanik piffissaliussaqartoqarsinnaajunnaasaaq.
Tamatuma nassatarisaanik pinngitsaaliilluni angerlarsimaffimmit peersitsinermik suliani sapaatip akunneranik ataatsimik piffissaliussaq atorunnaarsinneqassaaq. Atorunnaarsitsineq meeqqap ajunngitsunik atugaqarnissaanut akornutaassorineqanngilaq.
Tamatuma saniatigut imm. 1-imi allannguinerit taamaallaat oqaasertaanut tunngassuteqarput. Paasinarsaasoqaqqullugu allanngortitsisoqarpoq.
Imm. 2.
§ 6, imm. 2 tassaavoq § 7a Inatsisartut peqqussutaanni atuuttumi. Aalajangersagaq Isumagin-ninnermut Pisortaqarfiup aalajangigaanik naammagittaalliuuteqartarneq pillugu malittarisassanik imaqarpoq. Siullermik aalajangersarneqarpoq Isumaginninnermut Naammagittaalliuuteqartarfik naammagittaalliuummut isummertinnagu Isumaginninnermut Pisortaqarfik aalajangiisimassasoq. Aappassaattut aalajangiineq isumaginninnermi malittarisassat malillugit pisimassaaq; pingajussaattullu suliamut attuumassuteqartoq Isumaginninnermi Naammagittaalliuuteqartarfimmut naammagittaaliornissaminik sapaatit akunnerinik sisamanik piffissaqarpoq.Isumaginninnermi Naammagittaalliuuteqartarfik immikkut patsisissaqartoqartillugu sapaatit akunnerinik naammagittaalliuuteqarnissamut piffissaliussaasoq atortinngissinnaavaa. Tassani annermik pineqarput aalajangiinerit naammagittaalliuuteqarnissamut naleqquttumik ilitsersuutitaqanngitsut.
Peqqussummi atuuttumi aalajangerneqarpoq isumaginninnermi malittarisassani naammagittaalliuuteqarnissamut immikkut piffissaliussat atorneqartillugit taakku Inatsisartut peqqussutaanni matumani piffissaliussanut nalinginnaasunut sanilliullugit salliusassasut. Salliutitsisarnissamik aalajangersakkap taassuma atorunnaarsinneqarnissaa siunnersuutigineqarpoq, tak. qulaani § 7, imm. 1-imi.
Inatsisartut peqqussutaanni atuuttumi § 7a-mi aamma erserpoq Isumaginninnermut Pisortaqarfiup aalajangigai Isumaginninnermi Naammagittaalliuuteqartarfimmut naammagittaalliutigineqarsinnaasut allatut aalajangersaasoqarsimanngippat. Aalajangersagaq taanna ima paasineqarpoq Isumaginninnermi Pisortaqarfiup allaffissornikkut inaarutaasumik aalajangiisussaanera pillugu isumaginninnermi malittarisassani aalajangersakkat nassaarineqarsinnaasut. Aalajangiinerit tamakku tassaasinnaapput: meeqqanik inuusuttunillu ikiorsiisarneq pillugu Inatsisartut peqqussutaat malillugu meeqqanik inuusuttunillu Kalaallit Nunaata avataanut inissiineq, kiisalu annertuumik innarluutillit ikiorserneqartarnerat pillugu Inatsisartut peqqussutaat malillugu tulleriiaarisarnermut ataatsimiititaliap aalajangigaanik naammagittaalliutiginninnerit.
Peqqussutissatut siunnersuutip kinguneraa isumaginninnermi malittarisassani Isumaginninnermut Pisortaqarfiup allaffissornikkut inaarutaasumik aalajangiisussaanera pillugu aalajangersakkat nassaassaajuassasut.
Tamakku saniatigut imm. 1-imi allannguinerit oqaasertaanut tunngasuinnaapput. Paasinarsaaniarluni allanngortitsisoqarpoq. Aammattaaq pisortaqarfiup aqqa nutaanngorneqarpoq.
Imm. 3.
Aalajangersagaq taanna nutaajuvoq. Aalajangiinerit taamaattut naammagittaalliuutigineqarsinnaannginnerat innuttaasunut erseqqissarniarlugu aalajangersagaq taanna ilanngunneqarpoq.Imm. 4.
§ 6, imm. 3 tassaavoq § 7, imm. 2 aalajangersakkami atuuttumi. Allaffissornikkut aqutsinermi aalajangikkat nalinginnaasumik illoqarfiit eqqartuussiviinut tunniunneqartarput. Aalajangersakkami tassani pineqarpoq Nunatta eqqartuussiviata eqqartuussivittut suliassangortitsivittut siulliunerata tikkuarneqarnera, taamaammallu Østre Landsrettimik eqqartuussiviit suliassanngortitsiviusussat aapparigaat.Aalajangersagaq pinngitsaaliilluni angerlarsimaffimmit peersitsisoqarnissaanik ingerlatsiviup aalajangiineranik suliamut attuumassutillit eqqartuussivimmut tunniussisinnaanerannik killiliinermik imaqarpoq. Killiliineq marlunngorlugu avitaavoq. Ilaatigut suliap Nunatta Eqqartuussivianut tunniunneqarnissaanut sapaatit akunnerinik sisamanik piffissaliussaqarpoq, ilaatigullu allaffissornikkut ingerlatitseqqiffissat atorneqaqqaassapput, tassa imaappoq aatsaat ingerlatsitseqqittoqarsinnaavoq Isumaginninnermi Naammagittaalliuuteqartarfik aalajangeereersimappat. Killiliineq Inatsisini tunngaviusuni § 63-imi eqqartuussivimmi aalajangiivigititsinissamut periarfissaqarluarneranut sanilliullugu isigineqassaaq.
Peqqussutissatut siunnersuummi erseqqissarneqarpoq allaffissornikkut ingerlatitseqqiffissat atorneqareersimassasut. Tamanna ullumikkut taamaallaat Pisortaqarfiup meeqqanut inuusuttunullu ikiorsiisarneq pillugu ilitsersuutaani ersippoq. Taakku saniatigut oqaasertaat kisimik allanngortitaapput.
§ 7b Inatsisartut peqqussutaanni atuuttumiittup atorunnaarsinneqarnissaa siunnersuutigineqarpoq naammagittaalliornissamimmi pinngitsoorani ilitsersuinissaq Suliassanik suliarinnittarneq pillugu inatsisip malitsigimmagu, aamma marloqiusamik malittarisassaqartitsineq pinngitsoorneqartariaqarmat.
§ 8.§ 8, imm. 1 Inatsisartut peqqussutaanni atuuttumi. Isumaginninnermik Iluarsaaqqinnissamut Ataatsimiititaliarsuup inassuteqarneratigut Isumaginninnermi Naammagittaalliuuteqartarfiup ilaasortaasa katitigaanerat suleriaasialu annertuumik allanngortinneqarput. Isumaginninnermi Naammagittaalliuuteqartarfiup ilaasortaasa katitigaanerata allanngortinneqarnissaanik siunnersuut manna siullertut suliassamut attuumassuteqartilluni peqataasinnaasannginnermik pinngitsoortitsisussaavoq ilaasortat isumaginninnermi suliani peqataasannginneratigut aalajangeeqataasannginneratigulluuniit. Aappassaattut, inatsisitigut, isumaginninnermi suliatigut kiisalu isumaginninnermi ingerlatsinikkut ilisimallit agguataarnissaat isumagineqassaaq, suliamilli immikkut ilisimasallit pingaarnerutinneqassallutik.
Imm. 1.
Aalajangersagaq Isumaginninnermi Naammagittaalliuuteqartarfiup ilaasortassaanik toqqaasar-nermi malittarisassanik imaqarpoq. Siunnersuutigineqarpoq Naalakkersuisut Isumaginninnermi Naammagittaalliuuteqartarfiup ilaasortassaanik toqqaasassasut. Inatsisartut ataatsimiititaliaqarnerat pillugu atorfilittat isumaliutissiissutaata 1995-imi ataatsimiinnermini imm. 5-itut tusaatissatut tigusaata tamanna malitsigaa. Isumaliutissiissummi atorfilittat inassutigaat ataatsimiititalianut, aningaasaateqarfinnut il.il. toqqaasarneq Naalakkersuisunut nuunneqassasoq Inatsisartut inatsisiliornivimmik aallutaqarsinnaaqqullugit. Tamatuma malitsigisaanik Inatsisartunut ilaasortat ataatsimiititalianut siunnersuisoqatigiinnullu Inatsisartut suliaannut toqqaannartumik attuu-massuteqanngitsunut peqataasarnissaat sapinngisamik pinngitsoorniarneqassaaq.Isumaginninnermi Naammagittaalliuuteqartarfiup siulittaasua inatsisilerituutut soraarummeersimasuusussaavoq aamma/imaluunnit allatigullu Kalaallit Nunaanni inatsisinik isumaginninnermut tunngasunik sukumiisumik paasisimasaqassalluni. Siulittaasup atorfimmigut sumut attuumassuteqarnissaanik piumasaqaateqartoqanngilaq, inuulli illuinnaasiortuunngitsutut pituttorsimanngitsutullu isigineqarnissaa pingaarsorineqarpoq.
Tamatuma saniatigut Naalakkersuisut ilaasortat sinnerinik sisamanik toqqaassapput, taakkunannga marluk isumaginninnermi inatsisinik ilisimasaqassapput, marlullu isumaginninnermi ingerlatsinermik ilisimasaqassallutik. Naalakkersuisut inunnik isumaginninnermi suliat suliarineqarnerini aalajangiivigineqarneriniluuniit peqataasartunik ilaasortassanik toqqaasinnaanngillat. Ilaasortat assersuutigalugu tassaasinnaapput kommunini naalakkersuinermik suliaqarsimasut, inuit isumaginninnermi ingerlatsinermik annertuumik suliaqartut, isumaginninnermi inatsisit pillugit ilinniartitsisut, inuit kommunit pisortaqarfiillu avataanni isumaginninnermi inatsisinik suliaqartut, inuilluuniit isumaginninnermi suliat suliarineqarnerini aalajangiivigineqarneriniluuniit peqataasarsimasut.
Taamaaliornikkut suliamik ilisimasaqartut naalakkersuinermik sulialinnut sanilliullugit amerlanerussuteqalissapput, soorlu Isumaginninnermi Ataatsimiititaliarsuarmit siunnersuutigineqartoq.
Naalakkersuisut Isumaginninnermi Naammagittaalliuuteqartarfiup ilaasortaasa tallimaasut tamarmik sinniisussaannik toqqaassapput.
Siunnersuutigineqarpoq Isumaginninnermi Naammagittaalliuteqartarfiup ilaasortassai ukiunut marlunnut atuuttumik toqqarneqartassasut. Naammagittaalliuuteqartarfiup qinigaaffiata Inatsisartut qinigaaffiannik malinnitsinnissaat pisariaarupppoq ilaasortammi Naalakkersuisunit toqqarneqartarnissaat siunnersuutigineqarmat. Inuiaqatigiit nooqattaartorujussuusarput. Taamaammat qinigaaffik sivikinnerusoq naleqqunneruvoq. Aamma ilimanarpoq ilaasortat tunniusimanerussasut soqutiginninnerussasullu.
Ilaasortat arlaleriarlutik toqqarneqartarnissaannut aporfissaqanngilaq. Suliap ingerlaavartuunissaanit isigalugu tamanna naleqquttuusinnaavoq.
Ukiuni marlunni qinigaasarnissaat toqqarneqaqqinnissamullu periarfissaq Isumaginninnermi Naammagittaalliuuteqartarfiup katitigaaneranik siuarsaassaaq, tassa Naammagittaalliuuteqartarfik ilaasortaqartassaaq sivikitsumik ilaasortaasimasunik aammalu ilaasortanik misilittagaqarluartunik.
Imm. 2.
§ 7, imm. 2 aalajangersagaq nutaajuvoq, taanna Isumaginninnermi Naammagittaalliuteqartarfiup assersuutigalugu nakorsatut suliatigut siunnersortissarsiornissaannik periarfissiivoq. Tamanna pisariaqarsinnaavoq suliani nakorsat suliarisartagaannut paasiuminaatsunut tunngasunik imaqartuni .Imm. 3.
§ 8, imm. 3 Inatsisartut peqqussutaanni atuuttumi Naammagittaalliuuteqartarfiup suleriaasianut tunngasumi. Aalajangersakkap Naalakkersuisut Isumaginninnermi Naammagittaalliuuteqartarfiup suleriaasissaanik sananissaannik pisussaaffilerpai.Inatsisartut peqqussutaanni atuuttumi Isumaginninnermi Naammagittaalliuuteqartarfik suleriaasissamik aalajangiisussaavoq. Naalakkersuisut Isumaginninnermi Naammagittaalliuuteqartarfiup ilaasortaanik toqqaasuuppata naleqqunnerussaaq Naalakkersuisut aamma Naammagittaalliuuteqartarfiup sulineranut killisarititaasunik aalajangiippata.
§ 8, imm. 3 Inatsisartut peqqussutaanni atuuttumi siulittaasup siulittaasullu tulliata toqqarneqartarneranik aalajangersakkat allanngortinneqarput. Peqqussutissatut siunnersuummi matumani Naalakkersuisut siulittaasumik taassumallu sinniisussaanik toqqaassapput. Taamaalilluni siulittaasup tulliata toqqarneqarnissaa pisariaqassanngilaq.
Inatsisartut peqqussutaanni atuuttumi ataatsimiittarnernut ataatsimiigiaqqusisarnernernullu aalajangersagaq ilanngunneqanngilaq tamakku Naammagittaalliuuteqartarfiup suleriaasiani aalajangerneqarsinnaammata.
Imm. 4.
§ 8, imm. 6. Inatsisartut peqqussutaanni atuuttumi. Aalajangersakkami aalajangerneqarpoq Naalakkersuisut Allattoqarfiat Isumaginninnermi Naammagittaalliuuteqartarfimmut allattoqarfeqarnikkut ikiuutissasoq. Aalajangiivissunngitsunik oqaasertalersuineq qinerneqarsimavoq Naalakkersuisut naleqqussorigunikku allattoqarfimmik allamik nuussinissaanut periarfissaqaqqullugit. Allattoqarfiup nuunneqarnerani suliamut attuumassuteqarluni suliami peqataasinnaasannginnermik ajornartorsiuteqartoqalernissaa mianersuutigineqassaaq.
§ 9Imm. 1.
Aalajangersagaq nutaajuvoq. Isumaginninnermi Naammagittaalliuuteqartarfiup qaqugukkut aalajangiisinnaatitaaneranik imaqarpoq, aammalu qanoq aalajangeeriaaseqarnissaanik. Peqqussut atuuttoq suleriaasissap imassaanut sinaakkutsiussaqanngilaq. Tunngaviatigut tamanna Naammagittaalliuuteqartarfiup aalajangigaanut suleriaasianullu tunngatillugu Naalakkersuisunik pisinnaatitaaffiliisorujussuussaaq aalajangiisinnaatitaanermut aalajangeeriaatsimut piumasaqaatinik aalajangersaasoqanngippat.Siunnersuutigineqarpoq Naammagittaalliuuteqartarfik aalajangiisinnaatitaasassasoq ilaasortat minnerpaamik pingasut najuukkaangata. Aamma siunnersuutigineqarpoq Naammagittaalliuuteqartarfik amerlanerussuteqarnikkut aalajangiisassasoq, aammalu taasinerit amerlaqatigiitsillugit siulittaasup taasinera aalajangiisuusassasoq.
Imm. 2.
§ 8, imm. 2 peqqussummi atuuttumi. Aalajangersakkakkut aalajangerneqarpoq Naammagittaalliuuteqartarfiup aalajangikkani allaganngortassagai tunngavilersortassagaalu. Paasinarsaaniarluni aalajangersakkap oqaasertai allanngortitigaapput.Aamma aalajangersarneqarpoq ataatsimeereernerit tamaasa aalajangiinerit tamanut tunngassuteqartut siulittaasup tamanut saqqummiuttassagai. Tamanna Inatsisartut peqqussutaanni atuuttumi § 8a-imi erserpoq. Suliassanik ingerlatsisarneq pillugu malittarisassat nalinginnaasut malillugit ingerlatsiviit nipangiussisussaatitaapput. Tamatuma malitsigisaanik tamanut saqqummiussinnginnermini siulittaasup aqqit sumiiffiillu aqqi peertassavai aalajangiinerit kikkunnut tunngasuuneri ersigunnaarsillugit, isertuuttarialinnillu paasissutissaqarpat tamakku aamma ersissanngillat. Aalajangiineq tamanut tunngassuteqartarpoq suliassaqarfimmi aalajangersimasumi maleruagassaliortoqarneranik kinguneqaruni, Isumaginninnermut Pisortaqarfiup periusaanut ilitsersuutaanulluuniit akerliuguni, periusaasartumik nalinginnaasumik qulaajaasuuguni imaaluuniit inuiaqatigiit allanngoriartornerat pissutigalugu Isumaginninnermi Naammagittaalliuuteqartarfiup siusinnerusukkut periuserisartagaanik allanngortitsiguni.
Aalajangiinerit minnerpaamik kommuninut, Kommunit Nakkutilliisoqarfiannut, Kommunit Kattuffiannut, Isumaginninnermut Pisortaqarfimmut, Naalagaaffiup Sinniisaanut, Inatsisartut Ombudsmandianut, Isumaginninnermi Siunnersortinngorniat Ilinniarfiannut Isumaginninnermilu Pisortat Peqatigiiffiannut nassiunneqassapput. Tamatuma saniatigut Isumaginninnermi Naammagittaalliuuteqartarfiup Allattoqarfiata qinnuteqartoqarneratigut aalajangikkat tunniuttassavai.
Imm. 3.
§ 8, imm. 3-imi aalajangersagaq nutaajuvoq siulittaasup Isumaginninnermi Naammagit-taalliuuteqartarfik sinnerlugu aalajangiisinnaanerata ilanngunneqarnissaanik nassataqartoq. Taamaattorli tamanna pisassaaq naammagittaalliuutini aningaasanut ikittuinnarnut tunngassuteqartuni, imaluuniit naammagittaalliuutini missingiiffiusariaqanngitsuni imaluuniit tunngaviusunut pingaaruteqanngitsuni.Aningaasani amerlanngitsut paasineqassapput 500 koruunit missaattut. Naalakkersuisut aningaasat taakku allaffissornikkut aalajangissavaat, iluarsisassallugillu aningaasatigut ineriartornerup tamatumunnga pissutissaqartikkaangagu.
Aalajangiinerit missingiiffiusariaqanngitsut assersuutigalugu tassaapput ineqarnermut sillimmasiissutit, ulluunerani paaqqinnittarfinnut akiliutissat aalajangerneqarneri aammalu pensionisiallit nammineq isertitaanut sanilliullugit pensionisiassat aalajangerneqarneri pillugit naatsorsuinerit taamaallaat pineqaraangata.
Aalajangikkat tamanut tunngassuteqartuusarput suliaqarfimmi aalajangersimasumi maleruagassiornermik nassataqaraangamik, Isumaginninnermi Pisortaqarfiup periusigisartagaanut ilitsersuugaanulluuniit akerliugaangamik, periusaasartumik nalinginnaasumik qulaajaagaangamik imaluuniit inuiaqatigiit ineriartornerat pissutigalugu Isumaginninnermi Naammagittaalliuuteqartarfiup periuserisarsimasaanik allanngortitsigaangamik.
Imm. 4.
§ 8 imm. 4 aalajangersagaq nutaajuvoq. Innuttaasut inatsisitigut isumannaatsuunissaat eqqarsaatigalugu Isumaginninnermi Naammagittaalliuuteqartarfimmi ilaasortaasut marluk siulittaasup aalajangiinissatut siunnersuutaanik ataatsimiinnermi taasissutigisassanngortitsisinnaanerannik periarfissaliisoqarpoq. Tamannali pisassaaq aalajangiinissatut siunnersuutip nassiunneqarneraniit sapaatit akunnerini marlunni piffissaliussap iluani. Tassa imaappoq siulittaasup aalajangiinissatut siunnersuutaanut akerliusoqanngippat tamanna inaarutaasumik aalajangiininngussasoq suliamut attuumassuteqartunut nassiunneqartussaq.Imm. 5.
§ 8, imm.4 Isumaginninnermi Naammagittaalliuuteqartarfiup ukiumoortumik nalunaarutaanik siusinnerusukkut § 8a-miissimasut pillugit aalajangersakkanik imaqarpoq. Naammagittaalliuuteqartarfik ukiumoortumik nalunaaruteqartassaaq aalajangersagaq taanna naapertorlugu. Nalunaarut minnerpaamik aalajangiinernik tamanut tunngassuteqartunik imm. 2-imi malitsi-gineqartunik imaqassaaq. Nalunaaruteqartarnerup qaammatisiutit ukiuat malippaat.
§ 10.Imm. 1.
Aalajangersagaq nutaajuvoq. Tassuuna erseqqissarneqarpoq kommuni Landskarsilu tassaasut isumaginninnermi sulianut aningaasalersuisut.Imm. 2.
§ 9, imm. 1 Inatsisartut peqqussutaanni atuuttumi. Aalajangersakkami siunnersuutigineqartumi erseqqissarneqarpoq isumaginninnermi sulianut tapiissutit utertitsillunilu akiliinerillu malittarisassat erseqqinnerusut Aningaasanut Inatsimmi aalajangerneqartassasut. Aalajangiinnginnermi ileqquusarpoq Naalakkersuisut Kommunillu Kattuffiat suliassat nammagassallu agguataarneqarnissaa kiisalu akiliinermi il.il. malittarisassat pillugit isumaqatigiinniartarlutik.
§ 11.§ 9, imm. 2 Inatsisartut peqqussutaanni atuuttumi. Isumaginninnermi Naammagittaalliuuteqartarfiup qanoq aningaasalersorneqarnissaa aalajangersakkami aalajangerneqarpoq. Inatsisartuni Naalakkersuisunilu ilaasortat akissarsiaqartinneqarnerat il.il. pillugu Inatsisartut inatsisaat naapertorlugu Isumaginninnermi Naammagittaalliuuteqartarfiup ilaasortai akissarsiaqartinneqassapput, ullormusiaqartinneqassallutik aammalu angalanermut ineqarnermullu aningaasartuutaat matussuserneqassallutik. Isumaginninnermi Naammagittaalliuuteqartarfiup ilaasortaasa akissarsiaannut aningaasartuutit Naalakkersuisunut nuunneqarnissaat naatsorsuutigineqarpoq.
§ 12.§ 9a peqqussummi atuuttumi. Aalajangersakkami aalajangerneqarpoq kinaluuniit isumaginninnermi suliat allaffissornikkut suliarineqarneranni aalajangiivigineqarneraniluuniit peqataasoq pisortanik sullissitilluni atorfeqartilluniluuniit pinerluuteqarneq pillugu pinerluttulerinermik inatsimmi malittarisassat malillugit akisussaaffeqartoq. Tamanna atuuppoq atorfik tamanit qinerneqarnikkut atorfigineqaraluarpalluuniit. Tassa imaappoq aalajangersakkami aamma pineqarput nunaqarfinni aqutsisunut, kommunalbestyrelsinut, ataatsimiititalianut ataatsimiittartuutitanut il.il. ilaasortat.
§ 13.Imm. 1.
Aalajangersakkami aalajangerneqarput peqqussutip ulloq atuutilerfissaa aamma ikaarsaariarnermi aalajangersakkat.Ulloq atuutilerfissaatut 1. januar 1999 siunnersuutigineqarpoq. Tamanna allaffissornikkut ingerlatsivimmut kommuninut ilitsersuusiornissamik innuttaasunullu paasititsiniusiornissamik piffissaliivoq, pingaartumik naammagittaalliorsinnaatitaaneq siunertaralugu.
Allaffissornikkut malittarisassaq peqqussutikkut matumuuna atuutiinnartussaq tassaavoq isumaginninnikkut annertusaaneq pillugu kaajallaasitaq nr. 213.
Isumaginnnikkut suliani naammagittaalliuuteqartarneq pillugu ilitsersuut piusoq atorunnaassaaq peqqussullu manna malillugu naammagittaalliorsinnaanermut ilitsersuutinik nutaanik taarserneqassalluni.
Imm. 2.
Peqqussut manna malillugu Naalakkersuisut Isumaginninnermi Naammagittaalliuuteqartarfiup ilaasortassaanik nutaanik toqqaanissaata tungaanut Isumaginninnermi Naammagittaalliuuteqartarfimmi ilaasortaasut suliaminnik ingerlatsiinnassapput. Ikaarsaariarfiup ingerlanerani innuttaasut kommunillu isumaginninnermi ingerlatsiviit aalajangigaannik naammagittaalliuutiginninnissaminnut periarfissaqarnissaat pisariaqarpoq.