Ilagiinni atorfinitsitsisarnerit pillugit Inatsisartut peqqussutaat nr. 8, 30. oktober 1998-imeersoq.

Kalaallit Nunaanni Ilageeqarneq pillugu inatsimmi nr. 264-imi 6. maj 1993-imeersumi § 5 tunngavigalugu makku aalajangersarneqarput:

 

Kapitali 1.
Atorfinitsitsinermi piumasaqaataasut

Palasitut provtitullu atorfiit

§ 1. Ilagiinni kalaallini palasitut atorfinni atorfinitsinneqarsinnaapput:
1) inuit Ilisimatusarfimmi upperisarsiornermi bachelorgradimik angusisimasut imaluunniit danskit universitetianni upperisarsiornermik kandidatitut soraarummeersimasut aamma pastoralseminariumimi ilinniartitaanermik naammassinnissimasut,
2) inuit imatut ilinniagaqarsimasut piginnaassutsinut tunngatillugu Ilinniarfissuarmi ilinniartitsisutut ilinniartitaanermut naleqqiunneqarsinnaasumik ilinniagallit, tamatumalu saniatigut kristumiutut upperisarsiornermik annertunerusumik ilinniagaqarsimasut malittarisassat Naalakkersuisut aalajangersagaat malillugit aamma
3) inuit palasiusimasut imaluunniit ilagiinni danskini palasiunissamut piumasaqaatinik naammassinnissimasut.
Imm. 2. Palasit ilagiinnut danskinut ilaasortaassapput.
Imm. 3. Aammattaaq kalaallit oqaasiinik ilisimasaqarnissaq piumasaqaataavoq, malittarisassat Naalakkersuisunit ilusilersorneqartut naapertorlugit.
Imm. 4. Naalakkersuisut aalajangersaasinnaapput ilagiit kalaallit ilinniarfiini palasinik ilinniartitsinermut ilinniartitseqqittarnermullu ilinniartitaanermut peqataasimanissaq palasitut atorfinissagaanni piumasaqaataasoq. Tamanna pillugu malittarisassanik erseqqinnerusunik Naalakkersuisut aalajangersaasinnaapput.

§ 2. § 1, imm. 1-imi piumasaqaataasunik naammassinnissimanngitsup palasitut atorfimmut qinnuteqaateqarnissaanut Naalakkersuisut immikkut ittumik akuersissuteqarsinnaapput.

§ 3. Ilinniartitaanermut tunngatillugu piumasaqaatit allat inunnik piumasaqaatinik taakkuninnga naammassinnissimasunik amigaateqartoqartillugu § 1, imm. 1, nr. 1 aamma nr. 2-mut taarsiullugit atorneqarsinnaanerannut aalajangersakkanik Naalakkersuisut aalajangersaasinnaapput.

§ 4. Kinaluunniit ilagiinni kalaallini palasitut atorfinitsinneqartoq biskoppimit soraarummeersinneqarsimassaaq, palasinngortitaasimassalluni, palasitut neriorsuummik atsiorsimassalluni aamma biskopip uppernarsaasigaanik palasitut sulisinnaangortitaasimassalluni.

 

Atorfiit allat

§ 5. Ajoqit pattattullu ilinniartitaanerannut malittarisassanik Naalakkersuisut aalajangersaasinnaapput.

 

Kapitali 2
Atorfinitsitsinerni periaasissat

Palasitut atorfinitsitsineq

§ 6. § 7 malillugu inassuteqartoqartinnagu ajornanngippat biskoppip, imaluunniit provtip biskoppimit piginnaatitaasup, aamma ilagiit sinnersaannut ilaasortassatut qinigaasimasut akornanni ataatsimeeqatigiittoqassaaq, tassani qinnuteqaateqartut pillugit ilisimatitsissuteqartoqassalluni. Qinnuteqarnissamut killiliussap naanerata kingornatigut sapinngisamik piaartumik ataatsimiinnissaq biskoppimit ullussalerneqassaaq, biskoppimillu provtimilluunniit aqunneqassalluni. Ilagiit sinnersaasa kissaateqarnerisigut imaluunniit biskopip kissaatiginartippagu biskopip ilagiillu sinnersaannut ilaasortat akornanni ilisimatitsissuteqarniarluni ataatsimeeqqittoqassaaq.
Imm. 2. Imm. 1-imi ilisimatitsissuteqarniarluni ataatsimiinnissamut piffissaliussatigut killiliussanut periaasissanullu malittarisassat Naalakkersuisut aalajangersassavaat.

§ 7. Palaseqarfimmi ilagiit sinnersaannut ilaasortatut qinigaasimasut palasitut atorfinni inuttaqanngitsuni atorfinitsitsinissat pillugit inassuteqaateqassapput. Inassuteqaateqarneq ataatsimeeqatigiinnermi ajornanngippat pissaaq.
Imm. 2. Inassuteqaateqarniarluni ataatsimiinnermi imm. 1-imi taaneqartumut piffissaliussatigut killiliussat suleriaasissallu pillugit malittarisassanik Naalakkersuisut aalajangersaassapput.

§ 8. Qinnuteqaateqartoq ilagiit sinniisaannut ilaasortat inassuteqaataanni ilaanngitsoq Naalakkersuisut atorfinitsissinnaanngilaat. Qinnuteqaateqartoq inassuteqaateqarniarluni ataatsimiinnermi taasinermi siullermi taasisunit tamanit toqqarneqartoq atorfimmut ivertinneqassaaq. Immikkut ittunik pissutissaqarsimappat atorfik inuttassarsiuuteqqinneqassasoq nutaamillu inassuteqaateqartoqaqqissasoq Naalakkersuisut aalajangiisinnaapput.

§ 9. Suliffeqarfiit inuilluunniit aalajangersimasukkuutaat ilagiit sinniisaannik pilersitsiviusimanngitsut tamakkiisumik ilaannakortumilluunniit sullinneqarnissaat siunertaralugu palasitut atorfiit pilersinneqarsimasut inuttalerneqartarneranni periusissat pillugit malittarisassanik immikkut ittunik Naalakkersuisut aalajangersaasinnaapput.

 

Domprovstitut provstitulluunniit atorfinitsitsineq

§ 10. Palaseqarfimmi domprovstip provstilluunniit palasiuffigisassaani ilagiit sinniisaannut ilaasortassatut qinigaasimasut §§ 6-imi aamma 7-imi periaasissat malillugit qinnuteqaateqartut pingasut pingaarnersiorlugit tulleriiaarlugit inissinneqartut pillugit sapinngisamik oqaaseqaateqartinniarneqassapput.
Imm. 2. Biskoppi qinnuteqaateqartut pingasut pingaarnersiorlugit tulleriiaarlugit inissin-neqartut pillugit sapinngisamik oqaaseqaateqartinniarneqassaaq. Biskoppip qinnuteqaatit ilagiit sinniisaannut ilaasortat namminerlu oqaaseqaatiminnik ilanngussivigalugit Naalakkersuisunut nassiutissavai.
Imm. 3. Atorfimmut kina ivertinneqassanersoq Naalakkersuisut aalajangissavaat. Qinnuteqaateqartumik biskoppip oqaaseqaataanut ilaanngitsumik biskoppi oqaaseqaateqarteqqaarnagu atorfinitsitsisoqassanngilaq.
Imm. 4. Imm. 1-imi aamma 2-mi oqaaseqaataasussanut taaneqartunut piffissatigut killiliussanut suleriaasissanullu malittarisassanik aalajangersaassapput.

 

Atorfinni allani atorfinitsitsineq

§ 11. Provtip ilagiit sinniisaannut ilaasortanik tusarniaareerneratigut ajoqinik pattattunillu atorfinitsitsisoqartarlunilu soraarsitsisoqartassaaq.
Imm. 2. Provsteqarfimmi ataatsimiititaliaq malittarisassat Naalakkersuisunit suliarineqartut malillugit oqaluffinni pisariaqartinneqartumik ikiortissaqartitsisoqarnissaanut akisussaavoq.

§ 12. Provstit allaffiini atorfiit pilersinneqartarnerat atorunnaarsinneqartarnerallu pillugit Naalakkersuisut aalajangiisassapput. Provsti atorfinnut taakkununnga atorfinitsitsisassaaq soraarsitsisassallunilu.

 

Kapitali 3
Atuutilersitsineq, atuukkunnaarsitsineq ikaarsaariarfillu pillugit aalajangersakkat

§ 13. Inatsisartut peqqussutaat 1. december 1998 aaallarnerfigalugu atortuulersinneqarpoq.
Imm. 2. Tamatumunnga peqatigitillugu makku atorunnaarsinneqarput:
1) Kalaallit Nunaanni ilageeqarneq pillugu Inatsisartut peqqussutaanni nr. 2-mi 30. marts 1982-imeersumi §§ 4, 38 aamma 40.
2) Ilageeqarneq pillugu Inatsisartut peqqussutaanni nr. 15-imi 28. oktober 1993-imeersumi §§ 20 aamma 30.
3) Palasissaaleqineq aaqqiiviginiarlugu Inatsisartut peqqussutaanni nr. 2-mi 6. juni 1997-imeersumi § 1.
Imm. 3. Kalaallit Nunaanni Ilageeqarneq pillugu Inatsisartut peqqussutaanni nr. 2-mi 30. marts 1982-imeersumi §§ 4, 38 kiisalu 40 aamma Palasissaaleqineq aaqqiiviginiarlugu Inatsisartut peqqussutaanni nr. 2-mi 6. juni 1997-imeersumi malittarisassat malillugit aalajangersarneqartut Inatsisartut peqqussutaat manna tunngavigalugu malittarisassani aalajangersarneqartutigut atorunnaarsinneqarnissamik taarserneqarnissamilluunniit tungaanut atuutiinnassapput.

Namminersornerullutik Oqartussat, ulloq 30. oktober 1998

Jonathan Motzfeldt

/

Konrad Steenholdt