Illuliortiternernut aningaasalersuineq pillugu Inatsisartut peqqussutaat nr. 4, 30. oktober 1998-imeersoq.
Inissaqartitsineq, inissaqarnermut ikiorsiissuteqartarneq, inigisanik attartortitsisarneq il. il. pillugit Kalaallit Nunaannut inatsimmi nr. 944-mi decembarip 23-anni 1986-imeersumi § 1 malillugu makku aalajangersarneqarput:
Kapitali 1
Peqqussutip atuuffia§ 1. Peqqussut manna inuit ataasiakkaat ilaqutariinnut ataasiakkaanut illuliortiternissamut taarsigassarsiniartarnerini atorneqartartussaavoq.
Imm. 2. Aamma peqqussut manna naapertorlugu ilaqutariinnut ataasiakkaanut illuutillit illu-mik iluarsartuunneqartarnissaannut pitsanngorsarneqarnissaannulluuniit taarsigassarsisinnaatitaapput.
Kapitali 2
Aalajangersakkat nalinginnaasut§ 2. Illuliortiternernut angissutsimikkut sananeqarnerminnilu akimikkut pitsaassutsimikkullu assigiiaarinernik naalakkersuisunit aalajangersarneqartartunik malinnittunut taarsigassarsititsisoqartarsinnaavoq.
Imm. 2. Sanaartornerni aningaasartuutinut tamarmiusunut naammassiniakkap pilersaarusiorneranut, assassorlutik sulisunut, sanaartornernut taarsigassarsiat erniaannut, nammineerluni sanaartorfissagissaanernut, sanaartornerni aqutsinernut kiisalu naqissusiinernut akiliutinut aningaasartuutit ilanngunneqartassapput.
Imm. 3. Taarsigassarsisoq illuliortitsiniarpat imm. 1-mi assigiiaarinernik naalakkersuisut aku-erisaanik sippuisunik amerlanerpaamik assigiiaarinerit naalakkersuisut akuerisaasa matussutissaasut amerlatigisunik taarsigassarsititsisoqarsinnaavoq.§ 3. Sanaartornernut taamaallaat taarsigassarsititsisoqarsinnaavoq sanaartornerni pilersaarusiornernilu inatsisinik atuuttunik aammalu sanaartornerni atortorissaarusersornerni ingerlatsisarnernilu assigiiaarinernik piffissap taamaalinerani atuuttunik eqqortitsisunut.
Kapitali 3
Nutaannik illuliortiternernut aningaasalersuinerit§ 4. Naalakkersuisut kommunalbestyrelsillu taamaallaat sanaartukkanut ataasiakkaanut ani-ngaasartuutit tamarmiusut 40 %-iinik taarsigassarsititsisinnaapput, tak. § 2.
Imm. 2. Imm. 1. naapertorlugu taarsigassarsititsisoqarsinnaavoq affaat naalakkersuisunit af-faallu kommunalbestyrelsinit ataasiakkaanit taarsigassarsiaritinneqarlutik. Taarsigassarsititsisussat arlaata taarsigassarsiassat affaat tunniussinnaanngippagit imm. 1 naapertorlugu taarsigassarsiassat tamaasa aappaanit tunniunneqarsinnaapput.
Imm. 3. Sanaartornissamut aningaasartuutissat tamarmiusut 10 %-ii taarsigassarsisup nammineq akilerpagit aatsaat imm. 1 naapertorlugu taarsigassarsititsisoqarsinnaavoq, tak. § 2, imm. 2.
Imm. 4. Sanaartornermut aningaasartuutissat sinneri taarsigassarsisumit namminermit ani-ngaasalersorneqartassapput, assersuutigalugu aningaaserivimmi, realkreditinstitutimi imaluunniit aningaasalersuisinnaasunit allanit taarsigassarsinikkut.§ 5. § 4-mi imm. 1 aamma 2 naapertorlugit taarsigassarsiat illup atorneqalernissaannut akuersissummik saqqummiussinikkut tunniunneqartassapput. Taarsigassarsianut illu qularnaveeqqusiunneqartassaaq taarsersorneqarnerilu § 4, imm. 4 naapertorlugu taarsigassarsisup taarsigassarsiai naapertorlugit tulleriinnilersorneqartassallutik.
Imm. 2. § 4, imm. 1 aamma 2 naapertorlugit taarsigassarsiat ulloq atorneqalerfissaannut aku-ersissummik tunniussivik aallarnerfigalugu ukiuni 15-ini erniaqartitaanatillu taarsersugassaanatik, tak. imm. 1, tamatumali kingornagut ukiuni qulini erniassaat, tassa Nationalbankip erniaritittagai procentinik pingasunik ilallugit, naatsorsuutigereerlugit amerlaqatigiiaartunik akiliisarluni taarsersugassaallutik.
Imm. 3. Taarsigassarsititsisoq allatut aalajangiinngippat piginnittut nikinnerini taarsigassat taarserneqartassapput. Taamaattorli imaattoqaraangat taarsigassarsiat akilersorneqartuartussaapput:
1) taarsigassarsianut erniat taarsiissutissallu akilerneqartarsimatinnagit aammalu taarsigassarsisup akileeqqusissummik allakkatigut piumasaqarfigineqarnerminik allagarsiaminik tigu-sereernermigut kingusinnerpaamik ullut arfineq-marluk qaangiunnerisigut akiligassarilersimasaminik akiliisimatinnagu, imaluunniit
2) taarsigassarsisup illu illulluunniit illersorneqarsinnaasumik aserfallatsaalisimanngippagit paarsinerlunnermigullu taarsigassarsititsisup qularnaveeqqusiissutaanik nalikinnerulersitsinera paasineqarpat, tak. § 8.
Imm. 4. § 4-mi imm. 1 aamma 2 naapertorlugit taarsigassarsiat tunniunneqartarneri pillugit malittarisassat erseqqinnerusut naalakkersuisunit aalajangersarneqartassapput.§ 6. Taarsigassarsiniartoq nutaamik illuliornissamut aningaasaliissutissanik naalakkersuisunut kommunalbestyrelsinullu taarsigassarsiniartinnani kommunalbestyrelsimit pineqartumit nunaminertamik akuersissuteqarfigineqareersimasariaqarpoq, tak. § 10, imm. 2, nr. 3).
§ 7. Aatsaat taarsigassarsititsinissamut inaarutaasumik neriorsuisoqarsinnaavoq sanaartugassatut naammassiniakkap aningaasartaqassusiatalu nalilerneqareernerisigut kiisalu naalakkersuisunit kommunalbestyrelsimillu pineqartumit akuersissutigineqareernerisigut, kiisalu taarsigassarsisup sanaartornermut aningaasaliissutissani tamarmiusuni nammineq aningaasaliissutissaminut akissaqarnini uppernarsareerpagu, tak. § 4, imm. 3 aamma 4.
Imm. 2. Aatsaat inaarutaasumik neriorsuisoqarsinnaavoq suliarinnittussanik pituttuisunik isu-maqatigiissuteqartoqareersimatinnagu kiisalu sanaartornermi suliassat aallartinneqareersimatinnagit.
Kapitali 4
Aserfallatsaaliinerit allanngortiterisarnerillu§ 8. Illut § 4-mi imm. 1 aamma 2 naapertorlugit taarsigassarsiaqartitsiviusut illersorneqarsinnaasumik aserfallatsaaliugaassapput. Aserfallatsaaliuinermut aningaasartuutit piginnittup akiligassarai.
Imm. 2. Piginnittoq illumi silataani iluanilu allanngortiterisinnaatitaavoq. Allanngortiterisarnerit assassorluni suliassanut illersorneqarsinnaasumik paasisimasalinnit aammalu sanaartornermut inatsimmi il. il. piumasarineqartut naapertorlugit taamalu taarsigassarsititsisup qularna-veeqqusiissutaanik nalikinnerulersitsiviunngitsumik suliarineqartassapput.
Kapitali 5
Ilaqutariinnut ataatsinut illulianik iluarsartuussisarnerit§ 9. Ilaqutariinnut ataatsinut peqqussutip atuutilernerani naammasseriikkanik illullit iluarsartuussisarnerinut aningaasartuutinik nammineq akiliisinnaanngikkaangata aningaasartuutit 40 %-ii naalakkersuisunit taarsigassarsiaritinneqarsinnaapput.
Imm. 2. Imm. 1 naapertorlugu taarsigassarsititsisoqarsinnaavoq aatsaat iluarsartuussinermut tamarmiusumut aningaasartuutit sinneri taarsigassarsisup akilissappagit.
Imm. 3. Imm. 1 naapertorlugu taarsigassarsiat immikkut erniaqaratillu immikkut akilersugassaanngillat illu qularnaveeqqusiullugu taarsigassarsiat allat akilersorneqarnerisa tulleriiaarnerannut pulatinneqartussaagamik. Taarsigassarsititsisoq allatut aalajangiitinnagu piginnittut nikinnerisigut taarsigassarsiat akilerneqartassapput.
Imm. 4. Ilaqutariit ataatsit illui sorliit iluarsartuussinerillu qanoq ittut taarsigassarsititsivigineqartarsinnaanerinut malittarisassat naalakkersuisunit aalajangersarneqartassapput.
Kapitali 6
Taarsigassarsiniutinik aqutsineq§ 10. Namminerisanik illuliornissanut taarsigassarsiniutit, tak. § 1, imm. 1, ukiup tullianut aningaasanut inatsimmi akuersissutissanut ilanngukkumaneqartut naalakkersuisunit kommunalbestyrelsimillu pineqartumit suliarineqartussanngorlugit kingusinnerpaamik martsip aallaqqaataani nassiunneqareersimassapput. Taarsigassarsiniutit makkuninnga ilaqartinneqartassapput:
1) tulleriiaarinissamik pilersaarusiaq illup tunngavissaata qanoq annertutiginissaanik paasissutissartalik,
2) sanaartornermi aningaasartuutissanut missingersuutit ukiukkaarlugit agguataarinertallit,
3) kommunalbestyrelsip pineqartup nunaminertamik tunniussiumanerminut neriorsuutigeqqaagaa, aamma
4) nammineerluni aningaasaliissutissat pissarsiarineqarsinnaanerannut uppernarsaat, tak. § 4-mi, imm. 3 aamma 4.
Imm. 3. Kommunalbestyrelsip pineqartup taarsigassarsiniutinik nassiunneqarsimasunik ataasiakkaanik sullissinera taakkununngalu isummernera tunngavigalugit, tak. § 4, imm. 2, qinnutigineqartut akuersissutinut inatsimmut qaqugu ilanngunneqartarnissaat aammalu ilanngunneqarsinnaaneri Namminersornerullutik Oqartussat isummerfigissassavaat.§ 11. Ilaqutariit ataatsit illuinik naammassineqareersunik iluarsartuussisarnernut taarsigassarsiniutit, tak. § 9, naalakkersuisunit suliarineqartussanngorlugit nassiunneqartassapput.
Imm. 2. Taarsigassarsiniutinut makku ilanngunneqartassapput:
1) iluarsaakkumasap allaaserineqarnera,
2) suliassamut aningaasartuutissatut naatsorsuutigineqartut ilisimatitsissutigineqarnerat,
3) qinnuteqartup aningaasaqassusianut paasissutissat, aamma
4) aningaasalersuinissami qinnuteqartup nammineq aningaasaliissutissaasa qanoq pissarsiarineqarnerannik paasissutissat, tak. § 9, imm. 2.
Imm. 3. Qinnuteqaatit nassiunneqartut tunngavigalugit qinnutigineqartut akuersissutigineqarsinnaanerat naalakkersuisunit isummerfigineqassaaq.
Kapitali 7
Atuutilerfia§ 12. Peqqussut 1999-imi januaarip aallaqqaataaniit atuutilerpoq.
Namminersornerullutik Oqartussat, ulloq 30. oktober 1998.
Jonathan Motzfeldt/
Daniel Skifte