Radiukkut fjernsynikkullu aallakaatitsisarneq pillugu Inatsisartut peqqussutaata allanngortinneqarneranik Inatsisartut peqqussutaat nr. 1, 20. februar 1998-imeersoq.
§ 1.
Radiukkut fjernsynikkullu aallakaatitsisarneq pillugu Inatsisartut peqqussutaat nr. 3, 17. maj 1990-imeersumut, kingullermik Inatsisartut peqqussutaatigut nr. 17-ikkut, 6. november 1997-imeersukkut allanngortinneqartumi, § 10-mi imm. 5-ip kingorna immikkoortutut nutaatut ilanngunneqassaaq:
"Imm. 6. Siulersuisut aningaasarsiaqartinneqarnerat, aamma siulersuisunut ilaasortat KNR-imik sullissitillutik, taakkununnga ilanngullugit soorlu angalanermut, nerisaqarnermut ineqarnermullu, aningaasartuutaasa matussuserneqartarneri pillugit Naalakkersuisut malittarisassiussapput."
§ 2.
Inatsisartut peqqussutaat 1. marts 1998 atulerpoq.
Namminersornerullutik Oqartussat, ulloq 20. februar 1998.
Jonathan Motzfeldt/
Konrad Steenholdt
20. januar 1998 UKIU 1998/15
Radiukkut fjernsynikkullu aallakaatitsisarneq pillugu Inatsisartut peqqussutaata allanngortinneqarneranik Inatsisartut peqqussutissaattut siunnersuummut oqaaseqaatit.
Oqaaseqaatit nalinginnaasut:
Kalaallit Nunaata Radiuanut ileqqoreqqusat pillugit Namminersornerullutik Oqartussat nalunaarutaanni nr. 2-mi, 24. januar 1991-imeersumi § 5, imm. 1 naapertorlugu KNR-imi siulersuisut aningaasarsiaqartinneqarput. Aalajangersakkakkut aalajangerneqarpoq siulersuisunut ilaasortat Naalakkersuisunut, Inatsisartunut il.il. ilaasortat aningaasarsiaqartinneqarnerat pillugu Inatsisartut inatsisaanni (Aningaasarsiaqartitsineq pillugu inatsit) malittarisassat malillugit aningaasarsiaqartinneqassasut.
Siulersuisunut ilaasortat KNR-imik sullissitillutik aningaasartuutaasa akilerneqartarnerat nalunaarummi taaneqareersumi § 5, imm. 2 naapertorlugu pisarpoq. Aalajangersakkami aalajangerneqarpoq KNR-imut sullissitilluni aningaasartuutit, soorlu angalanermut, nerisaqarnermut ineqarnermullu aningaasartuutit, akilerneqartassasut Namminersornerullutik Oqartussani tjenestemandit pillugit maleruaqqusat qaqugukkulluuniit atuuttut malillugit.
Radiukkut fjernsynikkullu aallakaatitsisarneq pillugu Inatsisartut peqqussutaanni nr. 3-mi. 17. maj 1990-imeersumi § 11, imm. 4 naapertorlugu nalunaarut atuutilersinneqarpoq. Kisiannili Naalakkersuisut inatsisileriffiannit tamanna pillugu nalunaaruteqartoqarnera malillugu siulersuinut ilaasortat aningaasaqartinneqarneri aammalu KNR-imik sullissitillutik aningaasartuutaasa akilerneqartarnerat pillugit Naalakkersuisut malittarisassiorsinnaanerat § 11, imm. 4-imi naammattumik tunngavissaqarnersoq qularnarluinnartutut isigisariaqartoq.
Siulersuisut akissarsiaqartinneqarnerat eqqarsaatigalugu tunngavik qularnaateqartoq taanna pingaaruteqavissuunngilaq, nalunaarummimi § 5-imi aalajangersakkami taamaallaat aalajangersarneqarmat suna atuuttuusoq, - tassa akissarsiaqartitsineq pillugu inatsimmi malittarisassat malillugit akissarsiaqartitsisoqassasoq immikkut inatsisiliornikkut allatut aalajangersaasoqarsimanngippat. Akerlianik siulersuisunut ilaasortat KNR-mik sullissitillutik aningaasartuutaasa akilerneqartarnerat eqqarsaatigalugu (nalunaarummi § 5, imm. 2) taakku aalajangiivigineqartarnerat erseqqissumik tunngavissaqartariaqarpoq tjenestemandinummi malittarisassat atuuttut naammattumik malittarisassaqartitsinngimmata immikkut inatsisiliornikkut aalajangersaasoqarsimanngippat.
Siulersuisut aningaasarsiassaasa KNR-imillu sullissitillutik aningaasartuusaasa matussuserneqartarnerannut Naalakkersuisut aalajangersaasinnaanerannut erseqqissumik tunngavissiornerup saniatigut aningaasarsiaqartitsineq pillugu inatsimmi malittarisassat aalajangersarneqarsimasut saniatigut malittarissat allat malillugit Naalakkersuisut KNR-ip siulersuisuini siulittaasup ilaasortallu allat aningaasarsiaqartinneqarnerannut periarfissiortoqarnissaa siunnersuutikkut anguniarneqarpoq.
Aningaasarsiaqartitsineq pillugu inatsit naapertorlugu akissarsiaqartitsinermi siulersuisunut ilaasortat ullut ataatsimiiffiusut ataasiakkaarlugit aningaasarsiaqartinneqartussaapput, taamaattorli imaalillugu aningaasanut inatsisisip akuersissutiginerani Aningaasaqarnermut Ataatsimiititaliap akuersissutiginninnerani siulittaasumik ukiut ataasiakkaarlugit aningaasarsiassaanik aalajangersimasunik naalakkersuisut akissarsiaqartitsisinnaallutik. Siunnersuutip akuersissutigineqarneratigut KNR-imi siulersuisunut siulittaasup ilaasortallu allat aalajangersimasumik akissarsiaqartinneqarnissaanik aalajangersaasinnaalissapput.
Aalajangersakkanut ataasiakkaanut oqaaseqaatit:
§ 1-imut
Aalajangersakkakkut siulersuisut aningaasarsiaqartinneqarnerat aammalu siulersuisunut ilaasortat KNR-imik sullissitillutik aningaasartuutaasa akilerneqartarnerat pillugit Naalakkersuisut malittarisassiornissaannut tunngavissiortoqarpoq.
§ 2-imutSiulersuisut akissarsiaqartinneqarnerat KNR-imillu sullissitilluni aningaasartuutit akilerneqartarnerat pillugu Naalakkersuisut nutaamik aalajangersaapallannissat periarfissikkumallugu atuutilerfissaata ullua siunnersuutigineqarpoq.