Tunisassianik ineriartortitsinermut aningaasalersuinikkut tapersiisarneq pillugu Namminersornerullutik Oqartussat nalunaarutaat nr. 36, 29. december 1998-imeersoq.
Nunami inuussutissarsiutinut aningaasalersuinikkut tapersiisarneq pillugu Inatsisartut inatsisaat nr. 20, 30. oktober 1998-imeersumi § 15 malillugu aalajangersarneqarpoq:
Suliassat tapersiisarnermik aaqqissuussinermut ilaatinneqarsinnaasut.
§ 1. Tunisassianik ineriartortitsinermut tapersiisoqarsinnaavoq siunertanut makkununnga:
1) Tunisassiassanik tunisassiornissaq tuniniaanissarlu siunertaralugit ineriartortitsineq ineriartortitseqqinnerlu
2) sullissinernik ingerlaatsinillu ineriartortitsineq ineriartortitseqqinnerlu,
3) tunisassiorfinnik, tunisassiorfinni atortunik tunisassiorfinnilu ingerlatseriaatsinik ineriartortitsineq ineriartortitseqqinnerlu,
4) tunisassianik, sullissinernik, ingerlaatsinik, tunisassiorfinnik, tunisassiorfinni atortunik aamma tunisassiorfinni ingerlatseriaatsinik 1-imiit 3-mut taaneqartunik tunitsivissarsiorneq kiisalu
5) Suliniutip ineriartortitsinivimmik ilaqartussap aalajangiiviginissaanut aalajangersimasumik tunngavissiorniarluni siunertaqarluartumik misissueqqaarnerit, tassunga ilanngullugit pilersaarusiornerit missingersuusiornerillu.
Imm. 2. Tapersiivigineqarsinnaassagaanni pisariaqarpoq suliassat suliassatut aalajangersimasutut ilusilerneqarsimanissaat, ukiut amerlanngitsut ingerlaneranni suliffeqarfiup unammillersinnaassuseqarneranik siuarsaanissamik siunertaqartut. Piffissap sivisussusissaanut suliassap aalajangersimasup qanoq issusaa apeqqutaavoq.
Imm. 3. Suliamut tunngatilluinnarlugu allaaserineqarsinnaassaaq qinnuteqaateqartoq suliassatut isumassarsiaminik sumut killissimanersoq aamma naammassippat angusassaq sunaanersoq. Taamatuttaaq inaarutaasumik anguniakkap angunissaanut suliassatut naatsorsuutigineqartut pilersaarusiorneqarsimassapput.
Suliffeqarfiit inuillu tapersiivigineqarsinnaatitaasut.
§ 2. Kalaallit Nunaanni nunami inuussutissarsiornermi suliffeqarfiit tapersiisarnermik aaqqissuussinermut ilaapput. Suliffeqarfiit ataasiakkaat taamatullu suliffeqarfiit arlallit tapersiivigineqarsinnaapput.
Imm. 2. Inuit ataasiakkaat § 1-imi allassimasutut suliaqartut tapersiivigineqarsinnaapput, angusarineqartut nunami inuussutissarsiutini atorneqarsinnaappata.
Imm. 3. Nalunaarut manna malillugu siunertanut aalisarnermut, piniarnermut nunalerinermullu tapersiisarneq pillugu Inatsisartut peqqussutaannut imaluunniit takornariaqarnermik inuussutissarsiuteqarnermut aningaasalersuinikkut tapersiisarneq pillugu Inatsisartut inatsisaannut ilaatinneqarsinnaasunut tapersiisoqarsinnaanngilaq.
Imm. 4. Tunisassiamik sanaartornerup sullissinerluunniit Kalaallit Nunaanni ingerlanneqarnissaa piumasaqaataavoq.
Suliniummut suliniutillu allaaserineqarneranut piumasaqaatit.
§ 3. Qinnuteqaateqartup ineriartortitsinermik sulinerup naammassisinnaanissaanut pisariaqartinneqartumik suliamut tunngatillugu tunuliaqutaqarnini qularnarunnaarsissinnaassavaa. Piumasaqaat taanna naammassisinnaajumallugu qinnuteqaateqartoq ineriartortitsinermik sulinerup imaluunniit taassuma ilaata naammassinissaa pillugu suliffeqarfinnik suliaqarfinnilluunniit allanik isumaqatigiissuteqarfiginnissinnaavoq.
Imm. 2. Iluanaarniutigalugu iluaqutiginissaa aningaasaqarnermut tunngatillugu immikkut piumasaqaatitaqassappat, qinnuteqaateqartut piumasaqaatit taamaattut naammassineqarsinnaanerat qularnarunnaarsissinnaasariaqarpaat . Piumasaqaat taamaattoq naammassisinnaajumallugu qinnuteqaateqartup inuit allat suliffeqarfiilluunniit suleqatiginiarlugit isumaqatigiissuteqarfigisinnaavai.
Aaqqissuussinerup allaffissornikkut aqunneqarnera aamma qinnuteqaatit aalajangiivigineqartarnerat.
§ 4. Tapersiisarnermik aaqqissuussineq Inuussutissarsiornermut Naalakkersuisoqarfimmit imaluunniit ingerlatseqatigiiffimmit Naalakkersuisut piginnaatitsissuteqarnerisigut tamatuma allaffissornikkut aqunneqarnissaa pillugu sullissinissamik isumaqatigiissuteqarfigineqarsimasumit allaffissornikkut aqunneqassaaq.
Imm. 2. Suliniutit ataasiakkaat immikkoortillugit naliliivigineqareernerisigut tapiissuteqartoqartassaaq.
Imm. 3. Qinnuteqaatit naliliivigineqarnissaannut allaffissornikkut aqutsisuusoq suliamut tun-ngatillugu pisariaqartinneqartumik naliliisitsinissaminut pisinnaatitaavoq. Allaffissornikkut aqutsisuusup sulisui taamatullu siunnersorti allameersoq allallu qinnuteqaatit suliarineqarnerinut peqataatitaasut suliat aalajangersimasut pillugit nipangiussisussaatitaapput.
Imm. 4. Qinnuteqaatip suliarineqarneranut atugassatut immersuiffissaq allaffissornikkut aqut-sisup aamma Inuussutissarsiornermut Naalakkersuisoqarfiup suleqatigiinnerisigut suliarineqarsimasoq immersorneqarsimasorlu piumasaqaatigineqarpoq. Immersuiffissat imaluunniit allattuiffissat ilusileriikkat atorneqalersinnagit Inuussutissarsiornermut Naalakkersuisoqarfimmit akuersissutigineqassapput.
Tapersiissutit annertussusiat aamma nammineq aningaasalersuinissamut piumasaqaatit.
§ 5. Tapersiissutigineqartut allaffissornikkut aqutsisup aningaasanik aalajangigaasa iluanni ineriartortitsinermik sulinikkut aningaasartuutaanerussutaasut 50 %-ii tikillugit amerlassuseqarsinnaapput. Aningaasat amerlanerpaaffissaat qinnuteqaateqarnermut missingersuusiarineqartut tunngavigalugit aalajangersarneqassapput.
Imm. 2. Ukiut ataasiakkaarlugit tapersiissuteqartoqartassaaq. Qinnuteqaateqartoqaqqissinnaavoq.
Imm. 3. Ukiumut aningaasaliiviusumut aningaasat tapersiissutaasinnaatitaasut tamarmiusut amerlanerpaaffissaat aningaasanut inatsimmi allassimassapput.
Imm. 4. Nalunaarummi matumani aningaasartuutaanerussutaasut imatut paasineqassapput toqqaannartumik akissarsianut, siunnersortinik ikiorteqarnermut, angalanermut aningaasartuutinut pisariaqartitaasunut, atortussanut, immikkut atortulersuutinut suliniummullu aalajangersimasumut misilittaanermut aningaasartuutitut. Taakkununnga ilanngullugit naatsorsuutigineqarsinnaanngillat sanaartukkanut aningaasaliissutinut, nalikilliliinernut peqataassutinut, ininut aningaasartuutinut kiisalu nalinginnaasumik ingerlatsinermut sullinneqarnermullu aningaasartuutinut aningaasartuutit. Taamatuttaaq sulianut ullup akuersissuteqarfiusup siornaniittunut aningaasartuutit ilanngunneqarsinnaanngillat.
Tapersiissutit tunniunneqartarneri kiisalu piumasaqaatit.
§ 6. Tapersiissutit ineriartortitsinermik sulinerup naammassineqarnerani ataatsimoortillugit imaluunniit aningaasartuutigineqarsimasunik naatsorsuutit piffissani aalajangersimasuni nassiunneqartut tunngavigalugit siumoorutitut akiliutigineqarsinnaapput.
Imm. 2. Naatsorsuutit tamarmik eqqortumik uppernarsaaserneqarsimassapput. Allaffissornikkut aqutsisup uppernarsaasiinissamut piumasaqaatit aalajangersarsinnaavai aamma naalagaaffiup akuerisaanit imaluunniit kukkunersiuisutut nalunaarsorneqarsimasumit atsiorneqarsimanissaat piumasaqaatigisinnaallugu.
Imm. 3. Piffissaq atuiffiusoq ingerlaavartumik nalunaarsorneqassaaq. Missingersuusiornermi taamatullu akiliiffigeqatigiinnermi akissarsiat nalunaaquttap akunnerinik amerlassusii nalunaaquttap akunneranut akissarsiat annertussusiannik amerlisarlugit naatsorsuusiorneqassapput. Suliniummut aningaasartuutit allat nalinginnaasumik tassaassapput pisiniarfigisartakkat alla-neersut akiligassanut akileqqusaannik akiliinerit.
Imm. 4. Tapersiivigineqassagaanni suliniut piffissaliussat aalajangersimasut qinnuteqaateqartup allaffissornikkullu aqutsiup isumaqatigiissutigisaasa iluanni aallartinneqassaaq naammassiniarneqarlunilu.
Imm. 5. Tapersiissutit isertitanut akileraaruteqaataasussanut ilanngullugit naatsorsuusiorneqassapput, isertitatigut akileraarutit pillugit inatsisartut inatsisaanni tamakku pillugit malerugassat takukkit.
Nalunaarusiaqartussaatitaanermik piumasaqaat.
§ 7. Piffissap naammassinniffissatut isumaqatigiissutigineqartup kingornatigut kingusinnerpaamik qaammatit pingasut qaangiunneranni allaffissornikkut aqutsisoq suliniummut naatsorsuutinik aamma suliniummut suliamut tunngatillugu nalunaarusiamik tigusaqassaaq. Allaffissornikkut aqutsisoq piffissaliussamik sivikilliliisinnaavoq. Suliamut tunngatillugu nalunaarusiaq tassaasinnaavoq apeqqutinik allaffissornikkut aqutsisup aamma Inuussutissarsiornermut Naalakkersuisoqarfiup suleqatigiillutik suliarisimasaannik akisineq. Apeqqutinik akisiffissat imaluunniit allattuiffissat ilusileriikkat atorneqalersinnagit Inuussutissarsiornermut Naalakkersuisoqarfimmit akuersissutigineqassapput.
Imm. 2. Aallaqqaammut ineriartortitsinissamut pilersaarummut tunngatillugu annertuunik allannguuteqartoqarpat allaffissornikkut aqutsisumut nalunaaruteqartoqassaaq, taamatuttaaq suliniut naammassineqarsinnaajunnaartutut naliliivigineqarpat. Nalunaaruteqartoqannginnera tapersiissutit unitsinneqarnerannik kinguneqarsinnaavoq.
Tapersiissutinik akuersissutigineqareersunik unitsitsisinnaaneq.
§ 8. Tapersiissutinik akuersissutigineqareersunik tunniussinissaq allaffissornikkut aqutsisumit unitsinneqarsinnaavoq,
1) suliniut naammassineqarsinnaajunnaartutut naliliivigineqarpat,
2) tapersiissutinik tigusisoq eqqunngitsunik paatsoorneqarsinnaasunilluunniit paasissutissiisimappat,
3) tapersiissutinik tigusisoq tapiissutit agguaanneqarnissaannut pingaarutilinnik paasissutissanik nipangiussisimappat imaluunniit
4) tapersiissutinik tigusisoq nalunaarut manna naapertorlugu piumasaqaatinik imaluunniit piffissanut killiliussanik isumaqatigiissutigineqartunik allaffissornikkut aqutsisumit aalajangersarneqartunik malinninngippat.
Aalajangersakkanik sanioqqutsisinnaatitaaneq.
§ 9. Allaffissornikkut aqutsisoq pissutsini immikkut ittuni § 5, imm. 1-imi procentit annertussusissaannik taaneqartumik sanioqqutsisinnaavoq.
Atuutilerfia il.il.
§ 10. Nalunaarut manna 1. januar 1999-imi atulerpoq.
Namminersornerullutik Oqartussat, ulloq 29. december 1998.
Pāviāraq Heilmann/
Peder Munk Pedersen