Sunngiffimmi aallaaniarsinnaanermut allagartat pillugit Namminersornerullutik Oqartussat nalunaarutaat nr. 35, 29. december 1998-imeersoq.

Piniarneq aallaaniarnerlu pillugit Inatsisartut inatsisaanni nr. 15-imi, 6. november 1997-imeersumi § 3, imm. 5 aamma 6, § 5, imm. 1, nr. 8, § 7, § 8, imm. 1 aamma § 12 aamma aalisarneq pillugu Inatsisartut inatsisaanni nr. 18-imi, 31. oktober 1996-imeersumi § 8, imm. 2, naapertorlugit makku aalajangersarneqarput:

 

Atuuffii

§ 1. Nalunaarut una Kalaallit Nunaata nunataani aalisarnikkullu oqartussaaffigisaani inuussutissarsiutiginagu piniarnermut, aallaaniarnermut aalisarnermullu atuuppoq.
Imm. 2. Nalunaarummi uumasut miluumasut timmissallu tamarmik aammalu kapisillit pineqarput.

 

Inuussutissarsiutiginagu piniarsinnaanermut, aallaaniarsinnaanermut aalisarsinnaanermullu akuersissuteqartarneq

§ 2. Inuussutissarsiutiginagu piniarneq, aallaaniarneq aalisarnerlu taamaallaat ingerlanneqarsinnaapput inunnit naalakkersuisunit taamaaliornissamut akuerineqarsimasunit.

§ 3. Inuussutissarsiutiginagu piniarsinnaanermut aallaaniarsinnaanermullu akuersissut taamaallaat tunniunneqarsinnaavoq danskisut innuttaassuseqartunut Kalaallit Nunaanni aalajangersimasumik najugaqartunut. Nunani allani innuttaassuseqartut Kalaallit Nunaanni aalajangersimasumik najugaqartut atasumillu ukiuni marlunni najugaqarsimasut danskisut innuttaassuseqartutut pineqassappput. Akuersissut sunngiffimmi aallaaniarsinnaanermut allagartatut tunniunneqassaaq.
Imm. 2. Imm.1-imi, naggat siulleq, Naalakkersuisunit saneqqunneqarsinnaavoq, tamanna qinnuteqartup Kalaallit Nunaannut attuumassuteqarnera tunngavigalugu naleqquttutut isigineqarpat, aammalu qinnuteqartoq Kalaallit Nunaanniit ilinniagaqarluni pissuseqataanilluunniit peqquteqarluni qimagussimasimappat.
Imm. 3. Inuit aqqaneq-marluk inorlugit ukiullit sunngiffimmi allaaniarsinnaanermut allagartartaarsinnaanngillat.

§ 4. Sunngiffimmi aallaaniarsinnaanermut allagartaq killissarititaasut, inatsisini allani aalajangersarneqartut, iluanni piniarnissamut aallaaniarnissamullu pisinnaatitsivoq.

 

Sunngiffimmi aallaaniarsinnaanermut allagartartaarniarluni qinnuteqaat

§ 5. Sunngiffimmi aallaaniarsinnaanermut allagartamik qinnuteqaat qinnuteqarnermi immersuiffissaq, kommunip allaffiani pissarsiarineqarsinnaasoq, naalakkersuisunit ilusililersugaq atorlugu naalakkersuisunut nassiunneqassaaq.
Imm. 2. Paasissutissat qinnuteqaatip nassiutinnginnerani kommunimi najukkami inuit nalunaarsorsimaffiannit § 3-mi piumasaasut naammassineqarsimanerat uppernarsarlugu atsiorneqassapput.
Imm. 3. Kommune najugarisaq isumaqarpat qinnuteqaateqartup § 3-mi piumasaqaatit naammassisimanngikkai, taamaattumillu qinnuteqaat uppernarsarlugu atsiornagu naalakkersuisunullu ingerlateqqillugu nassiunnagu, tamanna kommunip qinnuteqartumut allakkatigut nalunaarutigissavaa aalajangeereernerup kinguninnguatigut. Nalunaarut tunngavilersuutinik aamma naammagittaalliorsinnaanermut ilitsersuummik imaqassaaq. Tamakku tunngavigalugit qinnuteqaateqartup kommunip aalajangiinissamik innassuteqaataa itigartitsinerup tiguneraniit sapaatip akunneri sisamat qaangiutsinnagit naalakkersuisunut naammagittaalliuutigisinnaavaa.

 

Sunngiffimmi aallaaniarsinnaanermut allagartap atorsinnaassusia

§ 6. Sunngiffimmi aallaaniarsinnaanermut allagartaq tassaavoq naalakkersuisut giro atorlugu akiliiffissiaata akiliisimanermut uppernarsaatitaa.
Imm. 2. Sunngiffiimmi avataatigut aallaaniarsinnaanermut allagartap tunniunneqarnerani 30 kr.-inik akiliuteqartitsisoqassaaq.
Imm. 3. Sunngiffimmi aallaaniarsinnaanermut allagartaq taamaallaat atuuppoq akiliisimaneq uppernarsarsimagaangat atuuttarlunilu qaammatisiutit ukiuat allagartap atuuffissaa naallugu. Akiliisimanermut uppernarsaat tassaavoq giro atorlugu akiliiffissami aningaaseriviup allakkerisarfiulluunniit naqitsisaa imaluunniit allatut iliorluni erseqqissumik qularnaatsumillu nalunaarsuineq, giro atorlugu akiliiffissami akileqquneqartup 30 kr.-inik aningaasartaqartup akilersimaneranut uppernarsaatitut.
Imm. 4. Naalakkersuisut sunngiffimmi aallaaniarsinnaanermut allagartat tunniunneqarsimasut atorunnaarsissinnaavaat sunngiffimmi aallaaniarsinnaanermut allagartamik tunniussinermi piumasaqaataasut naammassineqarsinnaanngippata naammassineqarsinnaajunnaarsimappataluunniit.

§ 7. Sunngiffimmi aallaaniarsinnaanermut allagartaq inummut piginnittumuinnaq tunngavoq allamullu tunniuteqqusaanani, tuneqqusaanani atukkiuteqqusaananiluunniit.
Imm. 2. Sunngiffimmi aallaaniarsinnaanermut allagartaq piniarnermi aallaaniarnermilu kinaassutsimut allagartamut atuuttumut ilanngullugu nassarneqartassaaq nakkutilliinermullu atatillugu politiit, piniarnermik nakkutilliisut, taakku ikiortaasa imaluunniit inuit tamatumunnga piginnaatitaasut piumasaqarnerisigut takutinneqartassalluni.

 

Pisanik nalunaaruteqartarneq

§ 8. Sunngiffimmi aallaaniarsinnaanermut allagartalik kinaluunniit pisussaavoq pisaminik nalunaarsuissalluni. Qaammatit naaneri tamaasa pisat naatsorsorneqartassapput. Ukiumut pisarisimasat kisitsisitaat imm. 2 naapertorlugu piffissap pisanik nalunaarsuiffiusussap naanerani pisanik nalunaarsuiffissamut Naalakkersuisunit suliarineqarsimasumut nuunneqassapput oktoberillu 15-iat tikitsinnagu allakkerivikkut akeqanngitsumik utertinneqassallutik.
Imm. 2. Piffissaq pisanik nalunaarsuiffiusussaq tassaavoq oktoberip aallaqqaataaniit septemberip 30-iannut.
Imm. 3. Sunngiffimmi aallaaniarsinnaanermut allagartap ingerlaannartumik nutaamik taarsernissaanut piumasaqaatigineqarpoq pisanik nalunaarsuiffiup immersugaalluni piffissaq eqqorlugu nassiunneqarsimanissaa.

 

Immikkut akuersissuteqartarneq

§ 9. Naalakkersuisut nalunaarummi matumani maleruagassat atorneqannginnissaannik immikkut akuersissuteqarsinnaapput tamanna ilisimatuutut misissuinerit pisariaqartippassuk.

 

Pineqaatissiissutit

§ 10. Kialuunniit maleruagassat nalunaarummi uaniittut imaluunniit piniarnermi, aallaaniarnermi aalisarnermilu maleruagassat arlaleriartumik imaluunniit annertuumik unioqqutippagit, naalakkersuisut taamaaliortoq piffissami erseqqinnerusumik killissaa aalajangikkami sunngiffimmi aallaaniarsinnaanermut allagartartaarsinnaajunnaarsissinnaavaat. Taamaattoqassappat sunngiffimmi aallaaniarsinnaanermut allagartaq tunniunneqareersimasoq atorunnaarsinneqassaaq.

§ 11. § 2-mik, aamma § 7-imi, imm. 1-imik 2-millu unioqqutitsisut akiliisinneqarsinnaapput.
Imm. 2. § 2-mik, aamma § 7-imi, imm. 1-imik 2-millu unioqqutitsisoqartillugu pisat taakkuluunniit nalingat naalagaaffiup karsianut iluaqutissanngorlugit arsaarinnissutigineqarsinnaapput.

 

Atuutilerfia

§ 12. Nalunaarut atulerpoq ulloq 1. januar 1999.
Imm. 2. Tamatumunnga peqatigitillugu Suliffiup avataatigut aallaaniarsinnaanermut allagartat pillugit Namminersornerullutik Oqartussat nalunaarutaat nr. 31, 18. december 1997-imeersoq atorunnaarsinneqarpoq.

Namminersornerullutik Oqartussat, ulloq 29. december 1998.

Pāviāraq Heilmann

/

Peder Munk Pedersen