Kapisilinnik pisineq tunisinerlu kiisalu kapisilittanik nalunaaruteqartarneq pillugit Namminersornerullutik Oqartussat nalunaarutaat nr. 24, 10. august 1998-imeersoq.

Aalisarneq pillugu Inatsisartut inatsisaanni nr. 18-mi 31. oktober 1996-meersumi §§ 25 aamma 26 kiisalu § 33 naapertorlugit aalajangersarneqarpoq:

 

Atuuffii

§ 1. Nalunaarut atuuppoq kapisilinnik pisinernut (tunisinernut) tamanut kiisalu kalaalimi-neerniarfikkut kapisilinnik tuniniaanermut. Tamatuma saniatigut nammineq atugassanik aalisarnikkut kapisilittat nalunaarutigineqartarnerannut atatillugu nalunaarut atuuppoq.
Imm. 2. Inuit inuussutissarsiutigalugu kapisilinniarnissamut akuersissummik pillit kisimik kapisilinnik tuniniaasinnaatitaapput.

§ 2. Kapisilinnik pisinertut paasineqassaaq nunami imaanilu aalisarnikkut Kalaallit Nunaata oqartussaaffigisaani inuussutissarsiutigalugu kapisilinniarsinnaanermut akuersissummik pigisalinnit toqqaannartumik inuussutissarsiutigalugu kapisilinnik pisineq tigooraanerlu.
Imm. 2. Ukiumut kapisilittassat, kapisilinniarneq pillugu Namminersornerullutik Oqartussat nalunaarutaat naapertorlugu nalunaarutigineqartut tamarmik pisarineqaraangata kapisilinnik pisisoqaranilu tunisisoqartassanngilaq.
Imm. 3. Pisassat tamarmik pisarineqarnerat Aalisarnermut, Piniarnermut, Inuussutissarsiornermut Nunalerinermullu Pisortaqarfimmiit radiukkut tusagassiorfitsigullu nalunaarutigineqassaaq.

 

Kapisileerutit pisallu nalunaarutigineqartarnerat

§ 3. Hotelit, neriniartarfiit, neqaarniarfiit, kikkunnilluunniit neriffigineqarsinnaasut, kapisilinnik pisisimasut Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaaruteqartassapput. Aalisartut akuersissummik pigisaqartut kalaalimineerniarfikkut kapisilinnik tunisisimasut imaluunniit namminersortunut toqqaannartumik tunisisimasut ullormut kapisillit tunisat pisialluunniit pillugit Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA-mut) nalunaaruteqartassaaq. Tamanna pisassaaq pisianik tunisanillu nalunaarsuiffitsigut, tak. imm. 2, imaluunniit oqarasuaatikkut nalunaarutitigut, tak. imm. 3.
Imm. 2. Tunisanik nalunaarsuiffiit (tak. nalunaarummut ilanngussaq) ullut tamaasa allakkatigut KANUAANA, Box 501, 3900 Nuuk-mut imaluunniit fax 32 32 35-ikkut nassiunneqartassapput.
Imm. 3. Telefonikkut nalunaaruteqartoqartassaaq KANUAANA-mut telefon 32 32 99-ikkut, ullut tamaasa, taamaallaat pinnagit arfininngorneq sapaallu nal. 8.00 aamma 11.00 akornanni (taamaattorli tallimanngornermut, arfininngornermut sapaammullu nalunaarutissat ataasinngornermi siullermi nalunaarutigineqartassapput). Telefonikkut nalunaarutit allakkatigut nalunaarutit assigissavaat.

§ 4. Nammineq atugassanik aalisarneq pillugu nalunaaruteqartoqartassaaq tunisanik/pisanik nalunaarsuiffiit atorlugit, tak. nalunaarummut ilanngussaq. Nalunaarutit sapinngisamik sukkanerpaamik nassiunneqartassapput uunga, KANUAANA, Box 501, 3900 Nuuk imaluunniit fax 32 32 35.

 

Pineqaatissiinerit

§ 5. §§ 1 aamma 2-mik unioqqutitsineq imaluunniit § 3 aamma § 4 malillugit nalunaaruteqanngitsoorneq akiliisitsinermik kinguneqarsinnaapput.

 

Atuutilerfia

§ 6. Nalunaarut atuutilissaaq ulloq 15. august 1998. Tamatuma peqatigisaanik kapisilinnik pisiortorneq tunisisarnerlu kiisalu kapisilittanik nalunaaruteqartarneq pillugit Namminersornerullutik Oqartussat nalunaarutaat nr. 15, 5. august 1998-meersoq atorunnaarsinneqarpoq.

Namminersornerullutik Oqartussat, ulloq 12. august 1998.

Pāviāraq Heilmann

/

Peder Munk Pedersen

---

Kapisilinnik pisineq tunisinerlu kiisalu kapisilittanik nalunaaruteqartarneq pillugu nalunaarummut ilanngussaq.

 

Tunisanik/pisanik nalunaarsuiffik uunga nassiunneqassaaq: Aalisarsinnaanermut Akuersissutinik Nakkutilliisoqarfik (KANUAANA), Box 501, 3900 Nuuk, tlf. 32 32 99, fax 32 32 35.

Immersugassaq maskinamik naqitaasiorluniluunniit allaqqunaqaaq.

A. KAPISILINNIK PISIANIK NALUNAARNEQ
Pisisup atia:	Kiilut qassit:
Kommuni:
Illoqarfik/nunaqarfik:
A katillugit	__________________kg. kapisillit ilivitsut

 

B. KAPISILINNIK TUNISANIK NALUNAARNEQ
Tunisisup atia:	Kiilut qassit
Cpr. normu:
Kommuni:
Illoqarfik/nunaqarfik:
Angallatip normua/atia:
Angallatip angissusia fodinngorlugu:
B katillugit	__________________kg. kapisillit ilivitsut

 

C. KAPISILINNIK NAMMINEQ ATUGASSATUT PISANIK NALUNAARNEQ
Ateq:
Kommuni:
C katillugit	__________________kg. kapisillit ilivitsut

 

Ulloq:_______________________________________________________________

Atsiorneq:____________________________________________________________