Kapisilinniarneq pillugu Namminersornerullutik Oqartussat nalunaarutaat nr. 23, 10. august 1998-imeersoq.

Aalisarneq pillugu Inatsisartut inatsisaanni nr. 18-mi 31. oktober 1996-meersumi § 5, § 8, imm. 5, § 10, § 22, imm. 2, § 23, § 24, imm 1, § 25, § 26, § 33, imm. 2 aamma § 34, imm. 3 kiisalu pinngortitamik allanngutsaaliuineq pillugu inatsisartut inatsisaanni nr. 11-mi 12. november 1980-imeersumi § 2, imm. 3 aamma § 19 naapertorlugit aalajangersarneqarpoq:

 

Atuuffii

§ 1. Nalunaarut kapisilinniarnermut tamarmut imartani Kalaallit Nunaata aalisarnikkut oqartussaaffigisaani Nunap Isuata kitaani NAFO-p sumiiffilersuiffiani 1-mi ingerlanneqartumut atuuppoq. Tunngaviusumik killigititamiit 40 sømilit avataanni aalisarneq inerteqqutaavoq.
Imm. 2. Kalaallit Nunaata Kangiata aalisarfittaani kapisilinniarnermi malittarisassat nalu- naarummi §§ 5, 8, 9, 11 aamma § 12-mi taaneqartut taamatuttaaq atuupput. Tunngaviusumik killigitamiit 12 sømilit avataanni aalisarneq inerteqqutaavoq.

 

Kapisilittassat aalajangersarneqarnerat

§ 2. Ukiut tamaasa Kitaani kapisilittassat amerlassusissaat Naalakkersuisut aalajangertassavaat. Aalajangiineq pisassaaq ilaatigut tamalaat akornanni isumaqatigiissutit tunngavigalugit.

 

Inuussutissarsiutigalugu kapisilittassat tamatumunngalu piumasaqaatit

§ 3. KNAPK-p aamma KANUKOKA-p isumasioqatigereernerisigut Naalakkersuisut aalajangertassavaat Kitaani pisassat qanoq aalisarneqassanersut agguaanneqassanersulluunniit kiisalu inuussutissarsiutigalugu kapisilinniarnerup ulloq aallartiffissaa. Tamanna pillugu kommuninut ataasiakkaanut, KNAPK-mut aamma KANUKOKA-mut kiisalu nuna tamakkerlugu tusagassiorfiit aqqutigalugit nalunaaruteqartoqartassaaq.

§ 4. Akuersissummik tunineqarsimasut kisimik inuutissarsiutigalugu kapisilinniarsinnaatitaapput. Inuussutissarsiutigalugu aalisarsinnaanermut akuersissutit Aalisarnermut, Piniarnermut, Inuussutissarsionermut Nunalerinermullu Naalakkersuisumit tunniunneqartarput. Taamaattorli akuersissutinik tunniussisarnermut akisussaaffik kommunimut tunniunneqarsinnaavoq Aalisarnermut, Piniarnermut, Inuussutissarsiornermut Nunalerinermullu Naalakkersuisoq isumaqatigiissuteqarfigalugu.
Imm. 2. Qinnuteqartunut piumasaqaatinik makkuninnga naammassinnissimasunut akuersissutinik tunniussisoqarsinnaavoq:
1) Qinnuteqartoq nammineq kapisilinnut qassutaateqassaaq kapisilinniarnermullu angallateqarluni;
2) Qinnuteqartup qinnuteqarnermut atatillugu kapisilinnut qassutit pigisami qassiuneri qanorlu ittuuneri imaluunnit ilisarnaataat nalunaarutigissavai.
Imm. 3. Akuersissut tunniunneqassaaq qinnuteqartunut angallammik 42 fod tikillugu taamatullu angissusilimmik pigisaqartunut. Angallatit raajarniarnissamut akuersissummik pigisaqartut inuussutissarsiutigalugu kapisilinniarnissamut akuersissummik tunineqaqqusaanngillat.
Imm. 4. Aalisartut akornanni naapertuuttumik agguaanissaq anguniarlugu Naalakkersuisut kapisilinniarnissamut sukumiinerusumik piumasaqaateqarsinnaapput. Aalajangiineq pisassaaq KNAPK aamma KANUKOKA isumaqatiginiareerlugit. Tamanna kommuninut ataasiakkaanut, KNAPK-mut KANUKOKA-mullu aammalu nuna tamakkerlugu tusagassiorfiit aqqutigalugit nalunaarutigineqassaaq.
Imm. 5. Illuatungeriit imm. 4-mi taaneqartut ukiumut pisassat kommuninut ataasiakkaanut qanoq agguaanneqarnissaat aalajangereerpassuk, pisassat aalisartunut ataasiakkaanut agguaanneqassapput kommunalbestyrelsip, nunaqarfinni aqutsisut najukkanilu aalisartut piniartullu peqatigiiffiata suleqatigiinnerisigut.

§ 5. Inuussutissarsiutigalugu kapisilinniarnissamut qinnuteqaammut itigartitaaneq tunngavilersorlugu naammagittaalliuutigineqarsinnaavoq Aalisarnermut, Piniarnermut, Inuussutissarsiornermut Nunalerinermullu Naalakkersuisoqarfimmut, Box 269, 3900 Nuuk, imaluunniit fax 32 47 04-kkut. Kommunip allaffianiit qinnuteqaammut akissutip tiguneqarneraniit ullut 14-it naammagittaalliuuteqarnissamut killiliunneqarput.
Imm. 2. Kommunit ataasiakkaat sapinngisamik piaarnerpaamik - kingusinnerpaamilli pisassat agguaanneqarnerisa kingornatigut ullut 14-it qaangiunneranni - Aalisarnermut, Piniarnermut, Inuussutissarsiornermut Nunalerinermullu Pisortaqarfimmut akuersissummik pigisaqartut ataasiakkaat aqqi, inuttut normui, angallataasa angissusii, kapisilinnut qassutinik qassinik pigisaqarneri aammalu qassutit suuneri ilisarnaataalluunniit nalunaarutigissavaat.

 

Inuussutissarsiutigalugu kapisilinniarnermi piniutit

§ 6. Kapisilinniarneq taamaallaat qarsorsat qassutilluunniit tasillugit 140 mm-inik nigartallit atorlugit ingerlanneqassaaq. Qassutit tissukartittakkat killilimmik atorneqassapput, taamaattorli atuinermi ataatsimi amerlanerpaamik uiguleriit 20-it.
Imm. 2. Qassutit nigartaat uuttorneqassaaq aalisarnermik nakkutilliisut uuttuutaata ½ kiilumik oqimaalutserlugu nigartamut ikkunneratigut nakkartillugulu. Nigartat 20-it qimiaanut ungaseqatigiit uuttorneqassapput. Nigartat tamarmik imm. 1-imi piumasaqaat eqqortissavaat.
Imm. 3. Kapisilinnut qassutit atorneqartut tamarmik piginnittup aqqanik imaluunniit taassuma angallataata normuanik nalunaaqutserneqarsimassapput.

 

Pisat aamma pisassat aqunneqarnerat tunisinerlu

§ 7. Inuussutissarsiutigalugu kapisilinniarneq aallartinneqassanngilaq ulloq aalajangerneqarsimasoq nallertinnagu, tak. § 3, imm. 1, aammalu pisassiissutit nungunneqaraangata unittassalluni.
Imm. 2. Inuussutissarsiutigalugu kapisilinniarneq pisassat tamarmiusut iluanni taamaallaat ingerlanneqarsinnaavoq, takuuk § 2.
Imm. 3. Inuussutissarsiutigalugu aalisarnermi pisat najukkami kalaalimineerninarfimmi imaluunniit hotelinut, neriniartarfinnut, neqaarniarfinnut kiisalu kikkunnilluunniit neriffigineqarsinnaasunut taamaallaat tunineqarsinnaapput. Kapisillit pisarineqartut tuniniarneqarnerat pisiarineqarnerallu Kapisilinnik pisineq tunisinerlu kiisalu kapisilittanik nalunaaruteqartarneq pillugit Namminersornerullutik Oqartussat nalunaarutaat malillugu pisassaaq. Inuussutissarsiutigalugu kapisilinniarnermit pisat Kalaallit Nunaata avataani tuniniaqqusaanngillat.

§ 8. Kitaani inuussutissarsiutigalugu aalisarnermi pisassat nungungajalerpata Aalisarnermut, Piniarnermut, Inuussutissarsiornermut Nunalerinermullu Naalakkersuisup qaqugu inuussutissarsiutigalugu aalisarneq, pisanik tunisineq, pisanik pisineq inuussutissarsiutigalugulu aalisartut akuersissummik peqartut tunisisarnerat unissanersoq nalunaarutigissavaa.
Imm. 2. Pisassanut aalajangerneqarsimasunut sanilliullugu qanoq pisaqartigisoqarsimanera pisassanit aalajangerneqarsimasunit anneruppat minneruppalluunniit KNAPK aamma KANOKUKA isumasioqatigereerlugit Aalisarnermut, Piniarnermut, Inuussutissarsiornermut Nunalerinermullu Naalakkersuisup kommunini pisassat iluarsiissuteqarfigissavai pisassanit tamarmiusunit kommuninut agguaassisoqarsimappat.
Imm. 3. Kapisilinniarneq aamma inuussutissarsiutigalugu aalisartunit kapisilinnik pisineq tunisinerlu inerteqqutaapput ullut imm. 2-mi iluarsiissuteqarniarluni suliaqarfiusut nalaanni.
Imm. 4. Imm. 1-imi aamma imm. 2-mi iliuuseriniakkat tusagassiorfitsigut nalunaarutigineqartassapput.
Imm. 5. Piffissap kapisilinniarnerup uniffissaata kingornatigut inuussutissarsiutigalugu kapisilinniarneq sunaluunniit inerteqqutaavoq, nunatta pilersorneqarnissaa siunertaralugu aalisarneq ilanngullugu.

 

Nammineq atugassanik kapisilinniarneq

§ 9. Kalaallit Nunaanni najugaqavissut tamarmik namminneq atugassaminnik kapisilinniarsinnaatitaapput.
Imm. 2. Nammineq atugassanik kapisilinniarneq taamaallaat ingerlanneqarsinnaavoq angallatit 42 fod angullugu angissusillit atorlugit. Nammineq atugassanik taamaallaat kapisilinniartoqarsinnaavoq inuussutissarsiutigalugu kapisilinniarnerup aallartinneraniit (tak. § 3, imm. 1 aamma § 8, imm. 1) piffissami taassuma ingerlanneqarnerani.
Imm.3. Nammineq atugassanik kapisilinniarnermi qarsorsat qissattaallu kiisalu angallammut ataatsimut qassutit nunamut pitutat 2000-inik putullit ataatsit (1), § 6-imi allaaserineqartutut, atorneqarsinnaapput. Nammineq atugassanik kapisilinniarnermi angallammut ataatsimut qassutinut nunamut pitutanut taarsiullugit qassutit tissukartittakkat nalinginnaasumik takissusillit ataatsit (1), § 6-imi allaaserineqartutut, atorneqarsinnaapput.
Imm. 4. Kapisilinnut qassutit piginnittup aqqanik imaluunniit angallatip normuanik ilisarnaaserneqarsimassapput. Kapisilinnut qassutit nalunaaquttap akunneri 24-it qaangiutsinnagit pisaajarneqartassapput. Imm. 1 malillugu kapisilittat Kalaallit Nunaanni nunaniluunniit allani tuniniaqqusaanngillat.

 

Akiliilluni kapisilinniarneq

§ 10. Takornariat taamaallaat kapisilinniarsinnaapput akiliilluni aallaaniarneq aalisarnerlu pillugit nalunaarut naapertorlugu.
Imm. 2. Akiliilluni kapisilinniarnermi qarsorsat qissattaatillu kisimik atorneqarsinnaapput.
Imm. 3. Kapisillit imm. 1 naapertorlugu pisarineqartut Kalaallit Nunaanni nunaniluunniit allani tuniniarneqarsinnaanatillu pisiareqqusaanngillat.

 

Kommunini kapisilinniarneq pillugu ileqqoreqqusat

§ 11. Kommunalbestyrelsi aalisarneq pillugu inatsimmi tamanna pillugu aalajangersakkat iluanni najukkami aalisartut piniartullu peqatigiiffiat tusarniaavigereerlugu pissutsit immikkut ittut tamanna pisariaqartippassuk kommunip ileqqoreqqusaatigut kapisilinniarneq eqqarsaatigalugu § 6, imm. 1 aamma § 9, imm. 2 - 4-mi aalajangersakkanit sukanganerusunik aalajangersaasinnaavoq.

 

Kapisilittanik nalunaaruteqartarnerit

§ 12. Kapisilittat tamarmik aalisarneq pillugu inatsit naapertorlugu nalunaarutigineqassapput.

 

Pineqaatissiissutit

§ 13. § 4, imm. 1-imik, § 6-imik, § 7-imik, § 8, imm. 3-mik 5-imillu, § 9-mik aamma § 10-imik unioqqutitsineq akiliisitsinermik aamma pisanik arsaarinninnermik kinguneqarsinnaapput. §§ 9 aamma 10-mik unioqqutitsineq taamatuttaaq piniutinik atorneqarsimasunik arsaarinninnermik kinguneqarsinnaavoq.

§ 14. Nalunaarut atortuulerpoq 15. august 1998. Tamatuma peqatigisaanik kapisilinniarneq pillugu namminersornerullutik oqartussat nalunaarutaat nr. 14, 5. august 1998-imeersoq atorunnaarsinneqarpoq.

Namminersornerullutik Oqartussat, ulloq 12. august 1998.

Pâviâraq Heilmann

/

Peder Munk Pedersen