Inuutissarsiutinut ilinniartitaanermi pikkorissartitsisarnerit sulisitsisut inuutissarsiutinut ilinniartitaanermut akiliutaannit (AEB) aningaasalersorneqartut pillugit Namminersornerullutik Oqartussat nalunaarutaat nr. 18, 20. maj 1998-imeersoq.
Sulisitsisut inuutissarsiutinut ilinniartitaanermut akiliutaat (AEB) pillugit Inatsisartut inatsisaanni nr. 16-imi, 23. november 1989-imeersumi § 8 naapertorlugu aalajangersarneqarput:
Kapitali 1.
Siunertaq nalinginnaasumillu aalajangersakkat.§ 1. Pikkorissartitsinernut tapiissuteqartarnerup siunertaraa sulisartut ilinniagallit ilinniagaqanngitsullu ilinniagaqaqqilluni ingerlaqqiffiusumillu pikkorissartitsinernut, suliffeqarnermi pisariaqartitat naapertorlugit inuussutissarsiorsinnaanermi piginnaassutsinik ataavartitsisuni, annertusaasuni pitsanngorsaasunilu peqataanissamut periarfissinneqarnissaat, taakkununnga ilaallutik suliffissaaleqisut pisariaqartinneqartumik ilinniarteqqitaanissaat kiisalu suliffeqarnermi allanngortitsinermi sungiussiniarnermilu ajornartorsiutinik ikiorsiinissaq.
§ 2. Pikkorissartitsinerit nalunaarut una malillugu tapiiffigineqarlutik ingerlanneqartut, inuussutissarsiutinut ilinniarfinnit isumagineqassapput, taamaalilluni ilinniarfiit ilinniartitsissutigisartakkamik iluanni pikkorissartitsineq aqullugulu ingerlanniassammassuk.
Imm. 2. Pikkorissarnissat, suliamut atatillugu immikkoortut immikkut ittut iluanniittut, inuutissarsiutinullu ilinniarfinnit isumagineqarsinnaanngitsut, inuutissarsiutinut ilinniarfiup inassuteqareerneratigut inuutissarsiutinut ilinniarfiit avataanni ingerlanneqarsinnaapput. Inuutissarsiutinut ilinniarfiup allaffissorneq pikkorissartussat pikkorissarneranni isumagissavaa.
Imm. 3. Imm. 1 aamma 2 naapertorlugu pikkorissarnerit tamanut ammasumik neqeroorutigineqassapput.§ 3. Inuit ataasiakkaat pikkorissarnissaannut tapiissuteqartoqarsinnaavoq, pikkorissarnernut Kalaallit Nunaanni inuutissarsiutinut ilinniarfinnit neqeroorutigineqanngitsunut. Inuutissarsiutinut ilinniarfiit imaluunniit Kultureqarnermut, Ilinniartitaanermut Ilageeqarnermullu Pisortaqarfiup tamatumunnga piginnaatitaata, pikkorissarnernut pikkorissartussat peqataaneranni allaffissorneq isumagissavaat.
§ 4. Pikkorissartitsinerit nalunaarut una malillugu tapiiffigineqarlutik ingerlanneqartut, sapinngisaq naapertorlugu inissinneqartariaqarput sumiiffimmi, § 11 naapertorlugu angalanermi ilinniarfimmiinnermilu aningaasartuutit sapinngisamik annikitsuunissaat siunertaralugu.
§ 5. Tapiissuteqartoqarsinnaanngilaq AEB-mit tapiissutit assinginik, aningaasartuutinik matussusiisinnaasunik, allamit tapiisoqarsinnaappat.
Kapitali 2.
Tapiiffigineqarnissamut piumasaqaatit.§ 6. Pikkorissartitsinernut Kultureqarnermut, Ilinniartitaanermut Ilageeqarnermullu Pisortaqarfimmit akuerineqartunut tapiissuteqartoqartarpoq.
Imm. 2. Tapiissutit AEB-mi aningaasat katersukkat sukkulluunniit uninngasuutinit tapiissuteqartoqartarpoq.§ 7. § 2 naapertorlugu pikkorissarnernut minnerpaamik ullunik tallimanik sivisussuseqarlutik ullukkut atuarnertut ingerlanneqartunut minnerpaamillu inunnit arfinilinnit peqataaffigineqartunut tapiissuteqartoqartarpoq. Taamaattoq pikkorissarnernut sivikinnerusumik ingerlanneqartunut sulinikkut isertitassanik annaasanut tapiissuteqartoqarsinnaavoq.
Imm. 2. § 3 naapertorlugu pikkorissarnernut minnerpaamik ullunik tallimanik sivisusseqarlutik ullukkut atuarnertut ingerlanneqartunut tapiissuteqartoqartarpoq.
Imm. 3. Kultureqarnermut, Ilinniartitaanermut Ilageeqarnermullu Pisortaqarfiup immikkut ittumik pissutissaqartillugu imm. 1-imi aalajangersakkat avaqqussinnaavai.§ 8. Pikkorissartut tapiissutisinissaannut piumasaqaataavoq pineqartoq tassaassasoq
1) sulisitsisoq imaluunniit sulisitsisumi, sulisitsisut inuutissarsiutinut ilinniartitaanermut akiliutaat pillugu inatsisartut inatsisaanni § 1 naapertorlugu akiliuteqarnissaminut pisussaatitaasumi suliffeqartoq, imaluunniit
2) suliffissaaleqisoq kommunillu najugaqarfiup uppernarsarsinnaappagu, suliffissaaleqisup suliffittaarnissamut periarfissai pikkorissartitsinerup naammassereerneratigut annertuumik pitsanngoriaateqassasut.
Imm. 2. Pikkorissarnissanut peqataaniarluni nalunaarneq sulisitsisumit suliffissaaleqisunullu atatillugu kommunimit isumagineqassaaq.
Imm. 3. Imm. 1, nr. 1 naapertorlugu pikkorissartunut tapiiffiginnittoqarsinnaanngilaq pineqartup sulisitsisua AEB-mut akiliutinik akilerneqartussanngorsimasunik akiliinngitsoorsimappat. Akileraartarnermi Pisortaqarfiup sulisitsisut AEB-mut akiligassaminnik kinguaattoorutaat pillugit paasissutissat ingerlateqqittassavai.§ 9. Pikkorissartut 18-inik ukioqalereersimassapput, Kalaallit Nunaanni najugaqartuullutik pikkorissarnissamilu ilinniagaqarnikkut piumasaqaatitut aalajangersagaasunik eqquutsitsisimasariaqarlutik.
Imm. 2. Kultureqarnermut, Ilinniartitaanermut Ilageeqarnermullu Pisortaqarfiup imm. 1-imi ukiorisassatut piumasaqaataasoq immikkut illuinnartunik pissutissaqartillugu avaqqussinnaavaa.§ 10. Pikkorissartup tapiissutisisinnaatitaanera atorunnaassaaq, pineqartup pikkorissarneq maanaannaq unitsippagu. Taamaattorli Kultureqarnermut, Ilinniartitaanermut Ilageeqarnermullu Pisortaqarfiup immikkut ittunik pisoqartillugu tamanna avaqqussinnaavaa, pikkorissarnermik unitsitsineq pikkorissartitsinermi pisortaq allakkatigut isumaqatigiissuteqarfigineqarsimappat.
Kapitali 3.
Tapiissutit annertussusaat tunniunneqartarnerallu.§ 11. Pikkorissartunut tapiissutit tunniunneqarsinnaapput
1) sulinikkut isertitassanit annaasatut,
2) pikkorissarfimmut pikkorissarfimmiillu angalanernut aningaasartuutinut akiliutitut, taakkununnga ilaallutik angalanerup nalaani akunnittariaqarnermi aningaasartuutit pisariaqartut, aamma
3) pikkorissarnerup nalaani ineqarnermut nerisaqarnermullu aningaasartuutinut akiliutitut.
Imm. 2. Imm. 1, nr. 1 naapertorlugu pikkorissartut sulinikkut isertitassanik annaasaat matussuserneqassapput, SIK-p aamma Kalaallit Nunaanni Naalakkersuisut ilinniagallit ilinniagaqarsimanngitsullu pillugit isumaqatigiissutaanni akissarsiat alloriarfianni 1-imi aningaasarsiap annertoqataanik. Taamaattorli pikkorissartunut 18-it inorlugit ukiulinnut § 9, imm. 2 naapertorlugu immikkut akuersissuteqarfigineqartunut tapiissuteqartoqassaaq SIK-p aamma Kalaallit Nunaanni Naalakkersuisut ilinniagaqanngitsunut 18-it inorlugit ukiulinnut tunngaviusunik aningaasarsiat pillugit isumaqatigiissutaasa assingannik.
Imm. 3. Taamaattorli imm. 1, nr. 1 atuutinngilaq pikkorissartunut, pisortani suliffeqartunut.§ 12. Ilitsersuisut angalanerinut, ineqarnerinut nerisaqarnerinullu aningaasartuutit tamakkiisumik matussuserneqassapput.
Imm. 2. Ilitsersuisut ullormusiaqartinneqassapput Kalaallit Nunaanni Danmarkimilu atorfimmut atatillugu angalanermi aningaasartuutinut allissutit matussuserneqartarnerat pillugu isumaqatigiissut sukkulluunniit atuuttoq naapertorlugu.§ 13. Immikkut illuinnartunik pisoqartillugu Kultureqarnermut, Ilinniartitaanermut Ilageeqarnermullu Pisortaqarfiup aningaasartuutinut §§ 11-12-mi eqqaaneqartunit allaanerusunut tapiisoqarnissaa akuersissutigisinnaavaa.
§ 14. Tapiissutit akiliutigineqartut feriarnersiutissarsiutigineqarsinnaanngillat.
§ 15. Tapiissutit tunniunneqassapput ullormit najukkamit aallarnermiit ullormut angerlamut apuunnermut. Tapiissutit sap. akunnerani annertunerpaamik ullunut arfinilinnut tunniunneqassapput.
Imm. 2. Pikkorissarfimmut pikkorissarfimmiillu angalaneq pikkorissarnermut atasumik pissaaq. Peqataasussap piffissami allami angalanissani kissaatigippagu tapiissutit piffissami pikkorissarfiusumiinnaq tunniunneqassapput.
Imm. 3. Angalanerit aaqqissuunneqassapput ataasiakkaanut tapiissutit tamarmiusut sapinngisamik ikinnerpaasussanngorlugit.§ 16. Tapiissutit aningaasartuutinik akiliisumut sap. akunnikkuutaartumik kingumoortumik tunniunneqartassapput.
Imm. 2. Sulinikkut isertitassanik annaasat sulisitsisup aningaasartuutigissavai. Suliffissaaleqisunut sulinikkut isertitassanik annaasanut aningaasartuutit kommunimit akilerneqassapput.
Kapitali 4.
Atortuulersitsinermik atorunnaarsitsinermillu aalajangersakkat.§ 17. Nalunaarut 1. juni 1998 atortuulersinneqarpoq.
Imm. 2. Ilutigalugu Inuutissarsiutinut ilinniartitaanermi pikkorissartitsisarnerit sulisitsisut inuutissarsiutinut ilinniartitaanermut akiliutaannit aningaasalersorneqartut pillugit Namminersornerullutik Oqartussat nalunaarutaat nr. 13, 26. maj 1995-imeersoq atorunnaarsinneqarpoq.
Namminersornerullutik Oqartussat, ulloq 29. maj 1998.
Konrad Steenholdt/
Karl Kristian Olsen