Peqqissaasut nunani allaneersut peqqinnissaqarfimmi atorfinitsitaasarnerat pillugu Namminersornerullutik Oqartussat nalunaarutaat nr. 15, 22. april 1998-imeersoq.
Peqqissaasut sulisinnaatitaanerat sulinerallu pillugit Inatsisartut peqqussutaanni nr. 7-imi, 30. oktober 1995-imeersumi § 3, imm. 4 naapertorlugu aalajangersarneqarpoq:
Sulisinnaatitaanermut akuersissut.
§ 1. Nunatsinni peqqissaasutut taamaallaat suliaqarsinnaatitaavoq Peqqissaasut sulisinnaatitaanerat sulinerallu pillugit Inatsisartut peqqussutaat nr. 7, 30. oktober 1995-imeersoq naapertorlugu sulisinnaanermut akuersissummik tunineqarsimasoq.
Imm. 2. Naalakkersuisunut qinnuteqarnikkut peqqissaasunut nunani allaneersunut sulisinnaatitaanermut akuersissut tunniunneqartarpoq peqqinnissaqarfiup iluani sulisorisat ilaannut nunani avannarlerni ataatsimut sulisussarsiortarneq pillugu isumaqatigiissutit malillugit piumasaqaatinik peqqissaasumit nunami allaneersumit naammassinnissimasumut.
Imm. 3. Peqqissaasut nunani allaneersut isumaqatigiissummi qulaani taaneqartumi ilaanngitsut sulisinnaatitaanermut akuersissummik tunineqartarput peqqissaasut nunani allaneersut qallunaat nunaanni sulisinnaatitaanermut akuersissummik qinnuteqartanerannut atatillugu Sundhedsstyrelsimit piumasaqaataasut aallaavigalugit qinnuteqartoq naliliiffigineqareeraangat.
Kalaallit Nunaanni peqqissaasunik nunanit allaneersunik atorfinitsitsisarnermi najoqqutassatut malittarisassat.
§ 2. Peqqissaasut nunani allaneersut nunatsinni sulisinnaanermut akuersissummik tunineqareerlutik nunatsinni peqqinnissaqarfinni atorfininnissamik kissaateqartut oqartussaasumit atorfinitsitsisuusumit naliliiffigineqassapput. Tassani ilaatinneqassapput inuttut, ilinniakkatigut piginnaassutsikkullu naliliinerit aamma piginnaaneqarfiit allat.
Najoqqutassatut minnerpaamik piumasaqaataasariaqarpoq peqqissaasoq nunami allameersoq:
1) Nunat Avannarliit arlaannit ukioq ataaseq peqqissaasutut sulisimanermik misilittagaqassaaq aammalu oqaatsinik atorneqartunik atuisinnaassalluni.
2) nunani allaneersunut danskit oqaasiinik misilitsinnissamut piumasaqaataasunut, Danskit oqaasiinik misilitsinnermut 2-mut oqalussinnaanermut, naleqquttumik danskit oqaasiinik piginnaaneqartuussaaq.
3) imaluunniit kalaallit oqaasiinut naleqquttumik piginnaaneqassalluni imaluunniit tamakkiisumik (inuit) oqaasiinut assingusunik oqalussinnaassuseqassalluni.
Atortuulersitsineq.
§ 3. Nalunaarut atuutilissaaq 1. maj 1998.
Namminersornerullutik Oqartussat, ulloq 22. april 1998
Marianne Jensen/
Martha S. Abelsen
Peqqissaasut nunani allaneersut peqqinnissaqarfimmi atorfinitsitaasarnerat pillugu Namminersornerullutik Oqartussat nalunaarutaannut oqaaseqaatit.
§ 1 pillugu:Imm. 1-imi aalajangersarneqarpoq, Peqqissaasut sulisinnaatitaanerat sulinerallu pillugit Inatsisartut peqqussutaanni nr. 7-imi, 30. oktober 1995-imeersumi allassimareersutut, nunatsinni peqqissaasutut sullissinissamut nunatsinni sulisinnaatitaanermut akuersissummik peqarnissaq piumasaqaataassasoq (taamaallaat peqqissaasut pillugit Inatsisartut peqqussutaanni § 19-imi aalajangersakkami peqqissaasut pineqartut 1. januar 1996-imiit nunatsinni nunani allani sulisinnaatitaanermik akuersissummik tunngaveqarlutik sulisut pinnagit).
Imm. 2-mi aalajangersakkap nassatarissavaa peqqissaasut nunani avannarlerneersut nunatsinni sulisinnaatitaanermut akuersissummik peqartussaatitaanerat, pisussaaffigeqatigiinneq pillugu nunat avannarliit isumaqatigiissutaat naaperttorlugu, nunatsinnili peqqinnissaqarfimmi ingerlaannaq piumasaqaatitaqarani. Tamanna atorfinitsitsisutut oqartussaasumit peqqissaasut atorfinitsitaasarnerat pillugu najoqqutassatut malittarisassani §§-it malillugit naliliiffigineqartassaaq.
Imm. 3-mi aalajangersarneqarpoq peqqissaasut ataasiakkaat nunani allaneersut naliliiffigineqartassasut peqqissaasut nunat avannarliit naalagaaffiini innuttaasut aamma nunat avannarliit sulisinnaatitaanermut akuersissutaannik pillit peqqissaasut nunat avannarliit isumaqatigiissutaanni ilaatinneqartut pineqartinnagit. Ilinniagaqarsimanermut il.il. piumasaqaataasut pillugit apeqqutinik naliliiniarnermi Sundhedsstyrelsi siunnersuisuussaaq.
§ 2 pillugu:Nunatsinni sulisinnaatitaanermut akuersissummik qinnuteqarnermi qinnuteqartarnermi periusaasartoq ingerlanneqartarpoq atorfinitsitsinermi periusaasartumut attuumassuteqanngitsumik. Siunertaavoq peqqissaasunik sulisinnaatitaanermut akuersissummik tunniussineq pillugu periaatsimut attuumassuteqanngitsumik atorfinitsitsisutut oqartussaasut atorfinitsitsisarnerannut atatillugu naliliisarnissaannut peqqissaasunik atorfinitsitsisarneq pillugu malittarisassat iluaqutaanissaat.
Peqqissaasunut sinerissami sulilerusuttunut piumasaqaatit Nuummi atorfinittussanut piumasaqaatinut sanilliullugit sukannernerupput sinerissami napparsimmavinni atorfininnissamut (aallaavittut) ukioq ataaseq marlulluunniit inuussutissarsiornikkut misilittagaqarsimanissaq piumasaqaataammat. Tamanna pissuteqarpoq sinerissami pissutsit immikkut atuuttut peqqissaasup annertuumik namminersorsinnaaneranik suliassat piumasaqaatitaqarnerannik.
Aammattaaq peqqissaasunut peqqinnissaqarfimmi atorfinittussanut tamanut piumasaqaataavoq peqqissaasup nunani allaneersunut Danskisut misilitsissutaasartumut 2-mut naleqquttumik qallunaatut piginnaaneqarnissaa imaluunniit kalaallisut taamatuttaaq piginnaaneqarnissaa. Kiisalu Amerikami Avannarlermi oqaatsitsigut sumiorpaluutsinut qanittut eqqarsaatigineqarsinnaapput. Peqqissaasup piginnaaneranik naliliinermi aalajangiisuussaaq inuiaqatigiinnut kalaallinut, soorlu napparsimasunut qanigisanut il.il. attaveqarsinnaanera.
Sulisinnaatitaanermut akuersissummik Peqqinnissamut Pisortaqarfimmut qinnuteqarnermi suleriaaseq.
Sulisinnaatitaanermut akuersissut qinnuteqartumit Peqqinnissamut Pisortaqarfimmut qinnutigineqassaaq sulisinnaatitaanermullu/ilinniagaqarsimanermut taamatullu naalagaaffimmi innuttaanermut uppernarsaatit ilanngullugit nassiutissallugit.
Peqqissaasutut sullissinermi siunnersortip qinnuteqartoq naliliiffigissavaa sulisinnaatitaanermullu akuersissummik tunineqarnissaanik imaluunniit itigartinneqarnissaanik inassutesassalluni.
Akuersisutut naliliinermi sulisinnaatitaanermut akuersissut suliarineqassaaq taannalu Naalakkersuisumit pisortamillu atsiorneqassalluni.