Arfernik angisuunik piniarneq pillugu Namminersornerullutik Oqartussat nalunaarutaat nr. 12, 3. april 1998-imeersoq.

Piniarneq aallaaniarnerlu pillugit Inatsisartut inatsisaanni nr. 15-imi 6. november 1997-imeersumi § 5 aamma § 8, Kalaallit Nunaanni pinngortitamik allanngutsaaliuineq pillugu Inatsisartut inatsisaanni nr. 11-mi 12. november 1980-imeersumi § 2, imm. 1 aamma § 19 malillugit aalajangersarneqarpoq:

 

§ 1. Nalunaarummi matumani "arferit angisuut" tassaapput tikaagulliit arferillu tikaagullinnit anginerusut.

§ 2. Imartani Kalaallit Nunaata aalisarnikkut oqartussaaffigisaani arferit angisuut aallaarsarineqarnissaat pisarineqarnissaallu inerteqqutaavoq.
Imm. 2. Tikaagulliusaat aamma tikaagulliit nalunaarummi matumani maleruagassat malillugit imm. 1-imi inerteqqummut ilaatinneqanngillat.
Imm. 3. Arfernik annertuumik ikilikkanik, qassutini ilagussimasunik, toqulersunik aamma sassani arfernik toqutsineq siumut Naalakkersuisunit akuersissuteqarfigineqareerluni pisinnaavoq. Tikaagulliilli sassaniittut pillugit § 7, imm. 1 takuuk.
Imm. 4. Maleruaqqusanik unioqqutitsinani tikaagulliusaamik tikaagullimmilluunniit pisaqarnermi, pisaqarnerup kingornatigut pisaq inunnit nerissallugu piukkunnanngitsoq paasinarsissagaluarpat, pisap nappaateqarnera imaluunniit allamik pissuteqartumik, imm. 3 malillugu, Naalakkersuisut akuersissuteqarsinnaapput, pisaq toqutsinertut isigineqarsinnaasoq. Pisaqarnermi tikaagullinnissamut akuersissut atorneqarsimappat suli taanna atuutiinnassaaq.
Imm. 5. Imm. 3 aamma imm. 4 malillugit arferit toqunneqartut atorneqarnissaannut piumasaqaatit, arfernillu pisassiissutinut tamarmiusunut kingunerisassaat Naalakkersuisunit aalajangersarneqassapput.

 

Tikaagulliusaat

§ 3. Ukiut tamaasa Naalakkersuisut KNAPK aamma KANUKOKA isumasioqatigereerlugit nalunaarutigisassavaat qaammatisiutit malillugit ukiumi tassani Kalaallit Nunaata Kitaani kommunini ataasiakkaani tikaagulliusaat qassit pisarineqarsinnaanersut.
Imm. 2. Ukiumi pineqartumi Naalakkersuisut akuersissummut atatillugu arfanniarnermut piumasaqaatinik erseqqinnerusunik aalajangersaasinnaapput, ilaatigut siunertaralugu piniariaatsit sunniutaasa naliliivigineqarnissaat.

§ 4. Tikaagulliusaat 15,2 meterinit takinerusut kisimik inunnit tamatumunnga KIS-imit tikaagulliusaarniarnissamut atortumikkut akuerineqarsimasunit kiisalu kommunimit akuersissummik peqartunit pisarineqarsinnaapput. Tikaagulliusaat piaqqisartillugit arnavissat piaqqalluunniit aallaarsareqqusaanatilluunniit pisarineqaqqusaanngillat.

 

Tikaagulliusaanik piniarnermut atortut

§ 5. Angallatit tikaagulliusaarniarsinnaanermut akuerineqartut makkuupput
1) angallat minnerpaamik 36 fodsinik angissusik imaluunniit
2) angallatit marluk minnerpaamik 30 fodsinik angissusillit tikaagulliusaamut ataatsimut.
Imm. 2. Tikaagulliusaarniarnermut taamaallaat atorneqarsinnaapput qamutillit tuukkartallit 50 mm-inik kaliberillit tuukkallu nuaatigut ikkuttakkanik qaartartortallit, Naalakkersuisunit akuersissutigineqarsimasut.
Imm. 3. Imm. 1-imi angallatit taaneqartut qamutilinnik tuukkartalinnik aamma ningittakkanut qalorsuarnulluunniit amoorutinik atortoqassapput. Angallatit tamarmik aleqassapput sioqarlutillu minnerpaamik 20 mm-inik silissusilinnik avataqassallutillu pisarineqartup kivisinnginnissaanut naammattunik.
Imm. 4. Tikaagulliusaarniarnerit tamaasa qaartartup tuukkap nuuanut ikkuttakkap saniatigut allamik piareersimatitsisoqassaaq.
Imm. 5. Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit taamaattunik pisisinnaapput atuisinnaallutillu.
Imm. 6. Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 5 naapertorlugu atuuttumik uppernarsaammik, kiisalu § 13, imm. 2 naapertorlugu ukiumut pineqartumut akuersissummik atuuttumik takutitsisoqarneratigut.

 

Tikaagulliit

§ 6. Naalakkersuisut ukiut tamaasa nalunaarutigisassavaat tikaagulliit qassit qaammatisiutit malillugit ukiumi tassani amerlanerpaamik Kalaallit Nunaata Kitaani aamma Kalaallit Nunaata Tunuani pisarineqarsinnaanersut.
Imm. 2. Taamatuttaaq ukiut tamaasa Naalakkersuisut KNAPK aamma KANUKOKA isumasioqatigereerlugit nalunaarutigisassavaat qaammatisiutit malillugit ukiumi Kalaallit Nunaata Kitaani aamma Kalaallit Nunaata Tunuani kommunini ataasiakkaani tamani tikaagulliit qassit amerlanerpaamik pisarineqarsinnaanersut.
Imm. 3. Naalakkersuisut ukiumi pineqartumi akuersissummi arfanniarnermut piumasaqaataasut erseqqinnerusumik aalajangersarsinnaavaat, ilaatigut piniariaatsit sunniutigisartagaasa naliliivigineqarnissaat siunertaralugu.

§ 7. Tikaagulliit taamaallaat imartani Kalaallit Nunaata aalisarnikkut oqartussaaffigisaani piffissami 1. aprilimiit 31. decemberimut ullut taaneqartut ilanngullugit pisarineqarsinnaapput. Tikaagulliit piaqqisartillugit arnavissat piaraalluunniit aallaarsareqqusaanatilluunniit pisarineqaqqusaanngillat. Taamaattorli tikaagulliit sassaasut ukioq naallugu pisarineqarsinnaapput.
Imm. 2. Inuit akuersissummik pigisaqartut kiisalu arfanniarnissamut atortumikkut akuerineqarsimasut kisimik tikaagullinniarsinnaapput.

 

Tikaagullinnik piniarnermut atortut

§ 8. Angallatit tuukkartalimmik qamutilillit, tikaagullinniarnermut peqataasut, 70 fods-init mikinerussapput aamma ningittakkanut qalorsuarnulluunniit amoorutinik atortulerneqarsimassallutik.
Imm. 2. Tikaagullinniarnermut taamaallaat atorneqarsinnaapput qamutillit tuukkartallit 50 mm-imik kaliberillit qaartartorlu tuukkap nuuanut ikkuttagaq Naalakkersuisunit akuersissutigineqarsimasoq.
Imm. 3. Taamaallaat inuit qaartartumik tuukkap nuuanut ikkuttakkamik atuinissamut pikkorissartitsinernut peqataasimanerminnut atuuttumik uppernarsaatillit taamaattunik pisisinnaapput atuisinnaallutillu.
Imm. 4. Qaartartunik tuukkap nuuanut ikkuttakkanik taamaallaat tunisisoqarsinnaavoq imm. 3 naapertorlugu atuuttumik uppernarsaammik, kiisalu § 13, imm. 1 naapertorlugu ukiumut pineqartumut akuersissummik atuuttumik takutitsisoqarneratigut.
Imm. 5. Arfeq aallaaneqartoq, toqunneqanngitsorli sapinngisamik piaartumik toqunneqassaaq. Toqutsisoqassaaq niaquatigut aallaallugu, qaartartumik tuukkap nuuanut ikkuttakkamik imaluunniit qoorortuunik minnerpaamik 7,62 mm-imik (30.06) kaliberilinnik inngigissunik aqerlulinnik (helmantel).

 

Qamutillit tuukkartallit ataatsimut isigalugit

§ 9. Qamutillit tuukkartallit tikaagulliusaarniarnermut tikaagullinniarnermullu atorneqartut teknikkikkut atorsinnaassutsimikkullu akornuteqassanngillat, taamaalilluni inuit ajoquseriataarnissaannut ulorianartorsiortitsissanatik. Taamatuttaaq piniarnermut atortut imatut siunertarineqartunut naleqqutsigissapput arfermik toqusaaneq sapinngisamik sukkanerpaamik pisinnaassalluni.
Imm. 2. Qamutilimmik tuukkartalimmik angallammut ikkussineq tamatigut KIS-imit (angallatinut siunnersuisoqarfik) imaluunniit suliffeqarfimmit allamit Naalakkersuisunit akuerineqarsimasumit akuersissutigineqarsimassaaq.

§ 10. Qamutillit tuukkartallit tamarmik KIS-imit (angallatinut siunnersuisoqarfik) imaluunniit suliffeqarfimmit allamit Naalakkersuisunit akuersissuteqarfigineqartumit 31. marts 1994-imi siullermik nalunaarsorneqarfianniit misissorneqarneranniillu atuutilersumik ukiut marlunngorneri tamaasa misissorneqassapput akuersissutigineqarlutillu.
Imm. 2. Qamutilinnik tuukkartalinnik imm. 1 naapertorlugu siullermeertumik misissuineq tunngavigalugu siunertarineqartunut naleqqussaaneq aamma isumannaallisaanikkut nutarterineq kingusinnerpaamik 31. december 1999 misissortikkiartoqqusinikkut pissaaq.
Imm. 3. Qamutilinnik tuukkartalinnik nutaanik pisaaqqammersut naatsorsuutigissanngilaat arfanniarnissamut akuerineqarnissartik qamutilik tuukkartalik KIS-imit suliffeqarfimmilluunniit Naalakkersuisunit akuerineqartumit misissorneqarsimananilu akuerineqarsimanngippat.

 

Ataatsimoorluni tikaagullinniarneq

§ 11. Naalakkersuisut immikkut akuersillutik ataatsimoorluni piniarnermi amerlanngitsunik qamutilimmik tuukkartalimmik sakkoqanngikkaluarluni tikaagullittassiisinnaapput. Akuersissuteqartoqarsinnaavoq nunaqqatigiinnut piniarnissaq annertuumik pingaaruteqarpat, aamma nunaqqatigiit kutteriinit tukkartalinnik qamutililinnit neqinik nutaanik naammattumik pilersuisoqanngippat.
Imm. 2. Naalakkersuisut ukiumi pineqartumi akuersissummi ataatsimoorluni piniarnermut erseqqinnerusumik piumasaqaataasut aalajangersarsinnaavaat, taamatuttaaq piniariaatsit sunniutigisartagaasa naliliivigineqarnissaat siunertaralugu.
Imm. 3. Naalakkersuisut ataatsimoorluni tikaagullinniarnermut immikkut akuersissutit aalajangersarneqarsimasut kommuninut agguaatissavaat KNAPK aamma KANUKOKA isumasioqatigereerlugit, nunamut tamarmut pisassat tamarmiusut agguaannerannut peqatigitillugu.
Imm. 4. Kommunip ataatsip iluani ataatsimut piniarnermut akuersissutit agguaanneqarneranni nunaqarfiit tulliullugillu illoqarfiit tuukkartalinnik qamutililinnik angallateqanngitsut sallerpaatinneqassapput.
Imm. 5. Naalakkersuisut akuersissuteqarnerat piumasaqaatitaqarpoq
1) piniarneq aaqqissuunneqassasoq ataatsimoorluni piniarnertut ikinnerpaamik umiatsiaaqqat tallimat piniarnerni ataasiakkaani peqataatillugit. Kutterit tuukkartalinnik qamutileqanngitsut 30 fodsit tikillugit angissusillit ataatsimoorluni piniarnermut peqataasinnaapput, kisiannili angallatitut siuttuutinneqassanatik.
2) piniartoqassaaq qoorortoorsorluni minnerpaamik 7,62 mm-imik (30.06) kaliberilinnik inngigissunik aqerlulinnik (helmantel). Qoorortuut eqqarasuartaatit eqittaannartakkallu umiatsiaaqqamiit piniarnermut atorneqaqqusaanngillat,
3) umiatsiaaqqat tamarmik unaaqassapput alertalinnik aminnerpaamik 12 mm-inik avataqassallutillu pisap kivisinnginnissaanut naammattunik. Kutterit ataatsimoorluni piniarnermut peqataasut taamatuttaaq ningittakkanut qalorsuarnulluunniit amoortaateqassapput,
4) piniarneq ingerlanneqassasoq naalakkamit, agguaanermut atatillugu najukkami aalisartut piniartullu peqatigiiffiannit kommunimillu umiatsiaaqqanik piginnittut akornannit toqqarneqartumit umiatsiaaqqanillu piginnittunit tamanit ilisimaneqartumit, aqunneqarluni,
5) piniarneq aallartinneqassanngilaq ataatsimoorluni piniarnermut peqataasussat/akuersissummik piginneqataasut tamarmik piniarnerup aallartinnissaanik kalerrinneqareertinnagit,
6) tikaagullik sapinngisamik pilertortumik toqusarneqassaaq, aamma
7) akuersissummik piginneqataasut tamarmik pisap agguarneqarnerani peqataassapput.

 

Pisamik iluaqutiginninneq

§ 12. Kikkulluunniit tikaagullimmik tikaagulliusaamilluunniit pisaqartut pisarineqartup nerineqarsinnaasortai tamaasa iluaqutigissallugit pisussaapput. Pisarineqartoq tamakkerlugu atorneqarsinnaanngippat tunineqarsinnaananiluunniit pisaqartoq pisussaavoq sinneruttut pisaqarfiusumi najugaqartunut tunniutissallugit.
Imm. 2. Arfermik pilanneq kiisalu arferup sinneruttuinik eqqaaneq inuussutissalerinermi nakkutilliinermik inatsisit tunngavigalugit uumasut nakorsaannit nakkutigineqartumik aammalu avatangiisit illersorneqarnissaat pillugu inatsisit malillugit pisaaq.

 

Akuersissutit nakkutilliinerlu

§ 13. Kommunalbestyrelsi § 6 naapertorlugu Naalakkersuisut pisassatut aalajangersimasaasa iluanni normulersukkanik akuersissutinik agguaassissaaq, akuersissummik piginnittumut angallammik aqqatigut taasamik imaluunniit erseqqinnerusumik suussusilikkamik angallateqarluni akuersissutip normuanut ataatsimut, tikaagullimmik ataatsimik pisaqarnissamut.
Imm. 2. Kommunalbestyrelsi Naalakkersuisut pisassatut aalajangersimasaasa iluanni akuersissuteqassaaq, piginnittumut angallat aqqatigut taasaq erseqqinnerusumilluunniit suussusiligaq atorlugu, § 3 naapertorlugu tikaagulliusaanik pisaqarsinnaanermut.
Imm. 3. Akuersissutit qinnuteqaateqartoqarneratigut kommunalbestyrelsimit agguaanneqassapput nunaqarfinni aqutsisut najukkamilu aalisartut piniartullu peqatigiiffiat isumasioqatigereerlugit. Akuersissutit agguaanneqassapput allattuiffissat normulersukkat Aalisarnermut, Piniarnermut, Inuussutissarsiornermut Nunalerinermullu Pisortaqarfiup kommunimut nassiussugai atorlugit.
Imm. 4. Kommunimi akuersissutit agguaanneqartut qinnuteqaatinit tiguneqarsimasunit ikinnerussagaluarpata tikaagullinniarnissamut agguaassisoqassaaq tulleriiaarilluni, ukiumi siuliani pisarineqarsimasut kiisalu akuersissutit atorneqanngitsut eqqarsaatigalugit.

§ 14. Kommunimut pisassiissutit tamarmiusut ataatsikkut agguaanneqassapput.
Imm. 2. Kommunalbestyrelsi tikaagullinniarnissamut akuersissuteqarsinnaavoq inunnut inuussutissarsiutigalugu piniarnermut atuuttumik allagartalinnut, aammalunniit
1) akuerisaasumik tuukkartalimmik qamutililimmik angallatilinnut, aammalu piginnittoq nammineerluni imaluunniit inuttaasoq qaartartumik tuukkap nuuanut ikkuttakkamik atuinissamut pikkorissartitsinermut peqataasimanermut atuuttumik uppernarsaateqassaaq imaluunniit
2) § 11 naapertorlugu ataatsimoorluni piniarnissamut immikkut akuersissuteqarfigineqarsimassalluni.
Imm. 3. Kommunalbestyrelsi tikaagulliusaarnissamut akuersissuteqarsinnaavoq inunnut inuussutissarsiutigalugu piniarnermut atuuttumik allagartalinnut, aamma akuerisaasumik tuukkartalimmik qamutililimmik angallatilinnut, piginnittoq nammineerluni imaluunniit inuttaasoq qaartartumik tuukkap nuuanut ikkuttakkamik atuinissamut pikkorissartitsinermut peqataasimanermut atuuttumik uppernarsaateqassaaq. Akuersissut tassaavoq allagaq kommunip qinnuteqartumut tikaagulliusaarnissamut piumasaqaatinik naammassinnissimasumut tunniussaa.
Imm. 4. Kinaluunniit angallammut tuukkartalimmik qamutililimmut imaluunniit ataatsimoorluni piniarnissamut ataatsikkut akuersissummik tunineqarsinnaangilaq
Imm. 5. Ataatsimoorluni piniartoqassatillugu piniarnermut naalakkatut toqqarneqartumut akuersissuteqartoqassaaq. Ataatsimoorluni piniarnermut peqataasussat allat aqqi akuersissutip tunuani allanneqassapput.
Imm. 6. Akuersissutit qaammatisiutit malillugit ukiumut ataatsimut atuupput, taamaattorli tak. § 15, imm. 4.

§ 15. Kommunalbestyrelsi nunaqarfimmi aqutsisut aamma najukkami aalisartut piniartullu peqatigiiffiat isumasioqatigereerlugit kommunip ileqqoreqqusaatigut piumasaqaatinik aalajangersaasinnaavoq, § 14, imm. 2 aamma imm. 3-imit sukanganerusunik.
Imm. 2. Kommunip ileqqoreqqusai Aalisarnermut, Piniarnermut, Inuussutissarsiornermut Nunalerinermullu Pisortaqarfimmit atortussangortinneqassapput.

§ 16. Kommunalbestyrelsi tikaagullinniarnissami pisassanut naapertuuttunik akuersissuteqareeriarpat kommunalbestyrelsip Aalisarnermut, Piniarnermut, Inuussutissarsiornermut Nunalerinermullu Pisortaqarfimmut nassiutissavai akuersissuteqarfigineqartut aqqi, inuttut normui, akuersissutit normui aamma GR-normut pillugit paasissutissat kingusinnerpaamik kommunip akuersissutinut immersuiffissanik pisortaqarfimmiit tigusaqarnerata kingornatigut qaammat ataaseq qaangiutsinnagu.
Imm. 2. Tikaagullimmik pisaqarnissamut akuersissut Kalaallit Nunaata Kitaani atorneqariissaaq arfeq pisarineqarpat pissanneqarpalluunniit.
Imm. 3. Kalaallit Nunaata Tunuani tikaagullimmik pisaqarnissamut akuersissut atorneqassaaq arfeq pisarineqarpat.
Imm. 4. Akuersissut ukiakkut pisassanik sinneruttunik agguaasseqqittoqartinnagu atorneqarsimanngitsoq pisassanut agguaateqqitassanut ingerlaannartumik ilanngunneqassaaq, tamatumalu kingornatigut akuersissummik piginnittuusimasumit atorneqarsinnaassanani.
Imm. 5. Naalakkersuisut ukiumi pineqartumi imaluunniit tulliuttumi kommunimi pisassat ikilisissinnaavaat paasineqassagaluarpat kommunimi akuersissuteqartoqartinnagu tikaagulliusaartoqarsimasoq, akuersissuteqartoqartinnagu tikaagullittoqarsimasoq imaluunniit pissaasoqarsimasoq, qaammatisiutit malillugit ukiumut akuersissutigineqartunit amerlanerusunik tikaagullittoqarsimasoq imaluunniit pissaasoqarsimasoq imaluunniit tikaagulliusaartoqarsimasoq. Tikaagullinnik taamatullu tikaagulliusaanik pisassat ikilisinneqarsinnaapput apeqqutaatinnagu sorliit sipporneqarsimanersut.
Imm. 6. Arfernik eqqissisimatitaasunik pisaqarneq aallaarsarinninnerluunniit ukiumi pineqartumi ukiumiluunniit tulliuttumi kommunimi inatsisinik unioqqutitsiviusumi pisassat ikilisinneqarnerannik kinguneqarsinnaavoq.

 

Akuersissutinik agguaasseqqinneq

§ 17. Kommunalbestyrelsi najukkami aalisartut piniartullu peqatigiiffiat isumasioqatigereerlugu aalajangiisinnaavoq akuersissut tunniunneqarsimasoq imaluunniit akuersissutit tunniunneqarsimasut kommunip iluani nuunneqassasut imaluunniit atorunnaassasut tamanna pillugu allakkatigut telefaxikkulluunnit, radiukkut, aviisitigut, atuagassiatigut assigisaasigulluunniit piffissamit nalunaaruteqarfiusumiit atuutilersumik. Naalakkersuisut tamatuminnga immikkut nalunaarfigineqassapput.
Imm. 2. Nalunaaruteqartoqareerpat akuersissummik piginnittup imaluunniit akuersissutinik piginnittut akuersissut, imaluunniit akuersissutit kommunalbestyrelsimut tunniutissavaat.
Imm. 3. Naalakkersuisut kommunalbestyrelsi piumaffigisinnaavaat imm. 1 naapertorlugu akuersissutit tunniunneqarsimasut atorunnaarseqqullugit, tassa kommunalbestyrelsi piffissaq eqqorlugu arfernik pisanik pissatanillu nalunaarutiginnittarneq pillugu Namminersornerullutik Oqartussat nalunaarutaanni maleruagassat malillugit arferit pisat pissatallu pillugit Naalakkersuisunut nalunaaruteqarsimanngippat.
Imm. 4. Naalakkersuisut KNAPK-mut aamma KANUKOKA-mut siumut tusarniaareerlutik radio tusagassiorfiillu allat aqqutigalugit nalunaaruteqarsinnaapput, akuersissutit atortussanngortinneqarsimasut kommunimut allamut nuunneqartut imaluunniit atorunnaarsinneqartut piffissaq nalunaaruteqarfiusoq aallarnerfigalugu. Akuersissutit taamaalippat utertinneqassapput, tak. imm. 2.

 

Pisassanik agguaasseqqinneq

§ 18. Aalisarnermut, Piniarnermut, Inuussutissarsionermut Nunalerinermullu Pisortaqarfiup KNAPK aamma KANUKOKA suleqatigalugit tikaagulliusaat tikaagulliillu pisassat sinneruttut agguaateqqissavai. Kingusinnerpaamik taamatut agguaasseqqittoqassaaq 15. oktoberimi. Arfanniarneq inerteqqutaavoq agguaasseqqinnissaq ullormik ataatsimik sioqqullugu aatsaallu aallarteqqinneqarsinnaalluni kommuni najukkami aalisartut peqatigiiffiat isumasioqatigereerlugu nutaamik agguaasseqqereerpat tamanullu nalunaaruteqareerpaat. Pisassat sinneruttut agguaateqqinneqassapput taamaallaat kommuninut Kangaatsiamiit Nanortalik ilanngullugu.
Imm. 2. Agguaasseqqinneq tamatumanilu piumasaqaatit pillugit nalunaarut tamanut tusarliunneqassaaq sapinngisamik radio tusagassiorfiillu allat aqqutigalugit.
Imm. 3. Piffissami 1. septemberimiit agguaasseqqinnissap tungaanut arfanniartoqarnissaa eqqarsaatigalugu kommunit Aasiaat, Qasigiannguit, Ilulissat aamma Qeqertarsuaq pisassaminnik sinneruttunik iluminni agguaasseqqissinnaapput. Agguaasseqqinneq pissaaq kommunini pineqartuni najukkani aalisartut piniartullu peqatigiiffii isumasioqatigereerlugit.
Imm. 4. Ammassaliup aamma Ittoqqortoormiit kommunii augustip 15-iata kinguninnguatigut Tunumi tikaagullittassat agguaateqqinnissaannut iliuuseqariissapput.
Imm. 5. Imm. 3-mi imm. 4-miluunniit kommunini taaneqartuni agguaasseqqinneq pillugu aalajangiinerit allakkatigut kingusinnerpaamik agguaasseqqinnissaq sapaatip akunneranik ataatsimik sioqqullugu Aalisarnermut, Piniarnermut, Inuussutissarsiornermut Nunalerinermullu Pisortaqarfimmut nalunaarutigineqassapput. Taamatuttaaq pisassanik sinneruttumik agguaasseqqinnerup inernera nalunaarutigineqassaaq.
Imm. 6. Naalakkersuisut KNAPK aamma KANUKOKA siumoortumik tusarniaaffigereerlugit radio tusagassiorfiilluunnit allat aqqutigalugit nalunaaruteqarsinnaavoq akuersissutitut tunniunneqarsimasut kommunimut allamut nuunneqartut imaluunniit ullormi nalunaarutip naalunaarutigineqarneraniit atorunnaartut. Tamatuma kingorna akuersissutit utertinneqassapput imm. 2. naapertorlugu.

 

Pisanik tuniniaaneq

§ 19. Tikaagulliusaat imaluunniit tikaagulliit pisarineqartut tuniniarneqalissanngillat kommunip allaffia taassumaluunniit immikkoortortaqarfia akuersissummi naqitsimmik naqissusiilluni pisarineqartunik nalunaarsuereertinnagu.
Imm. 2. Qamutilimmik tuukkartalimmik piniarnissamut akuersissummik piginnittoq naqitsimmik naqissusiisoqartinnagu pisussaavoq tuukkarmik qaartartortalimmik pisiami allagartaa kommunip allaffianut takutissallugu kiisalu qaartartut atoriikkani takutissallugit normuisa misissorneqarnissaat siunertaralugu.
Imm. 3. Pisamik imaluunniit ilaanik tuniniaallunilu pisisoqassanngilaq akuersissummik piginnittoq akuersissutip assilineranut uppernarsaatitut atsiortinnagu. Assilinerani takuneqarsinnaassaaq, pisaq kommunimi oqartussaasunit nalunaarsorneqarsimasoq.
Imm. 4. Taamaattorli allaffiup ammanerata avataatigut tuniniaasoqalersinnaavoq, allaffiup ammarnerata kingornatigut piaartumik nalunaarsuisoqassappat.

 

Misissugassat

§ 20. Kinaluunniit arfermik pisaqarsimasoq pisussaavoq pisap mattaanik aamma neqaanik anginngitsunik misissugassanik kommunimut tunniussissalluni pilannerup kingornatigut piaartumik pisap suunera, ulloq sumilu pisarineqarsimanera nalunaarutigalugit. Misissugassat Pinngortitaleriffiup plastikkimik puussarititaanut tunniunneqarsimasumut asiunaveersaammik imerpalasortalimmut ikineqassapput.
Imm. 2. Misissugassat paasissutissallu tunniunneqartut kommunip Pinngortitaleriffimmut, Box 570, 3900 Nuuk, tigunerisa kingornatigut erniinnaq ingerlateqqillugit nassiutissavai.

 

Immikkut akuersissuteqartarneq

§ 21. Naalakkersuisut ilisimatusarnermut atugassanik nalunaarummi matumani aalajangersakkanik immikkut saneqqutsisoqarnissaanut akuersissuteqarsinnaapput.

 

Nunanut allanut tuniniaaneq pineqaatissiissutillu

§ 22. Arferup neqaa niuernikkut iluanaarniuteqarnermik siunertaqartumik nunanut allanut anniseqqusaanngilaq. Taamaattorli arferit pisarineqartut ilamerngi § 21 naapertorlugu nunanut allanut anninneqarsinnaapput.

§ 23. Pillaammik akiliisitsisoqarsinnaavoq § 2-mik, §§ 4-imik aamma 5-imik, §§ 7, 8, 9 aamma 10-mik, § 11-mi imm. 5-imik, § 12, §15-imik, § 16-imi imm. 2,3-mik, §§ 19 aamma 20-imik kiisalu § 22-mik unioqqutitsisumut.
Imm. 2. Nalunaarummi aalajangersakkanik unioqqutitsisoqartillugu arsaarinnittarneq pillugu Pinerluttulerinermut inatsimmi aalajangersakkat atorneqassapput.
Imm. 3. Akiliisitsinernik suliat aamma arsaarinninnernik suliat piniarneq aallaaniarnerlu pillugit Inatsisartut inatsisaat tunngavigalugu suliarineqartassapput.

§ 24. Nalunaarut atuutilerpoq 3. april 1998.
Imm. 2. Tamatumunnga peqatigitillugu arfernik angisuunik piniarneq pillugu nalunaarut nr. 9, 6. april 1995-imeersoq atorunnaarsinneqarpoq.

Namminersornerullutik Oqartussat, 3. april 1998.

Pâviâraq Heilmann

/

Jørn Birk Olsen