Umimmaat eqqissisimatitaanerat piniagaanerallu pillugit nalunaarutip allanngortinneqarnera pillugu Namminersornerullutik Oqartussat nalunaarutaat nr. 10, 26. marts 1998-imeersoq.

Umimmaat eqqissisimatitaanerat piniagaanerallu pillugit Namminersornerullutik Oqartussat nalunaarutaanni nr.1-imi 22. januar 1998-imeersumi § 7 imatut allanngortinneqarpoq:

 

§ 7. Kommunini § 5 malillugu pisassiissutigineqartunit kommunalbestyrelsit qinnuteqartunut kommuniminni inuit allattorsimaffiannut najugaqartutut allassimasunut aammalu atuuttumik inuussutissarsiutigalugu piniarnermut imaluunniit suliffiup avataatigut aallaaniarsinnaanermut allagartalinnut, umimmannik pisaqarsinnaanermut akuersissutinik tunniussissapput, taamaattoq takuuk imm. 7.
Imm. 2. § 5 malillugu kommunit aggornerisa avataanniittunut Naalakkersuisut qinnuteqartunut sumiiffimmi inuit allattorsimaffiannut najugaqartutut allassimasunut aammalu atuuttumik inuussutissarsiutigalugu piniarnermut imaluunniit suliffiup avataatigut aallaaniarsinnaanermut allagartalinnut umimmannik pisaqarsinnaanermut akuersissutinik tunniussissapput, taamaattoq takuuk imm. 7. Taamaattoq Naalakkersuisut sumiiffimmi pineqartumi borgerrådit akuersissutinik imm. 4 aamma imm. 5 malillugit tunniussinissaannut piginnaatissinnaavaat.
Imm. 3. Ivittuut Kommuniannut pisassiissutit, tak. § 6, Ivittuut Kommu-nalbestyrelsiat qinnuteqartunut kommunimi inuit allattorsimaffiannut najugaqartutut allassimasunut aammalu atuuttumik inuussutissarsiutigalugu piniarnermut imaluunniit suliffiup avataatigut aallaaniarsinnaanermut allagartalinnut umimmannik pisaqarsinnaanermut akuersissutinik tunniussissaaq, tamaattoq takuuk imm. 7. Kommunit allat, Ivittuut Kommuniata saniatigut pisassanik pissarsisimappata, Ivittuut Kommunalbestyrelsiata, inuussutissarsiutigalugu piniarnermut aammalu suliffiup avataatigut piniarnermut atuuttumik allagartalinnut qinnuteqarsimasunut agguaassineq ingerlatissavaa, qinnuteqarsimasut kommunerisaata isumasioreerneratigut.
Imm. 4. Qinnuteqartunut inuussutissarsiutigalugu piniarnermut allagartalinnut akuersissutinik tunniussineq najukkami aalisartut piniartullu peqatigiiffiata siunersioqatigereerneratigut pissaaq. Inuussutissarsiutigalugu piniarnermut aallaaniarnermullu allagartamik pigisaqarnissamik piumasaqarnerup saniatigut pisortat akuersissutinik tunniussuisut, aalisartut piniartullu peqatigiiffiata siunersioqatigereerneratigut immikkut ittunik kinaassusersiunngitsumillu piumasaqarsinnaapput qinnuteqartup akuersissummik tunineqannginnerani. Piumasaqaatinik taamaattunik pisoqassagaluarpat tamakku qinnuteqartunut takuneqarsinnaatinneqassapput takussutissatullu Aalisarnermut, Piniarnermut, Inuussutissarsiornermut Nunalerinermullu Pisortaqarfimmut nassiunneqassallutik, kommuni akuersissutinik tunniussuinermut isumaginnittuuppat.
Imm. 5. Qinnuteqartunut suliffiup avataatigut aallaaniarsinnaanermut allagartalinnut agguaassineq makitsinikkut pissaaq. Makitsineq tamanit najuuffigineqarsinnaasumik pissaaq.
Imm. 6. Naalakkersuisut § 3, imm. 3 aamma 5 aamma § 4, imm. 2 malillugit pisassiissutaasut iluanni inunnut akiliilluni umimmanniarnermut peqataasunut akuersissutinik tunniussisinnaapput.
Imm. 7. Imm. 1, 2 aamma 3 naapertorlugit inuussutissarsiutigalugu imaluunniit suliffiup avataatigut piniarnermut allagartamik pigisaqartunut akuersissutinik agguaassinermi, kiisalu imm. 5 naapertorlugu makitsinermi peqataanissamut piumasaqaataavoq, qinnuteqartut inuussutissarsiutigalugu aammalu suliffiup avataatigut piniarnermut allagartaat akilerneqarsimassasut taamalu ukiumi piniarnermut allagartaqarfiusumi 1. majimiit atuullutik.

Nalunaarut taanna atortussanngortinneqarpoq 26. marts 1998.

Namminersornerullutik Oqartussat, ulloq 26. marts 1998

Pāviāraq Heilmann

/

Peder Munk Pedersen