Tulleriissaarinermut ataatsimiititaliaq pillugu Namminersornerullutik Oqartussat nalunaarutaat nr. 9, 19. marts 1998-imeersoq.
Peqqinnissaqarfiup sullissineri il.il pillugit Inatsisartut peqqussutaanni nr. 15-imi 6. november 1997-imeersumi § 22, imm. 3 tunngavigalugu aalajangersarneqarput:
§ 1. Killiliussat Naalakkersuisunit aalajangersarneqarsimasut iluanni Tulleriissaarinermut ataatsimiititaliap makku suliassarai:
a) naalakkersuinikkut aalajangikkat innimigalugit napparsimasunik katsorsaanermi tulleriissaarinissaq.
b) Kalaallit Nunaanni aamma Kalaallit Nunaannit innersuussinerit pillugit tunaartarisassaliornissaq taakkuninngalu nakkutiginninnissaq.
c) Rigshospitalimi katsorsaasarfinnilu Kalaallit Nunaata avataaniittuni allani atuineq malinnaaffigissallugu, kiisalu atuinermi killiliussatut isumaqatigiissutaasut eqqortinneqarnissaannik qularnaarinissaq.
d) nakorsanit immikkut ilisimasalinnit sullinneqarnerup pingaarnerutillugu pilersaarusiorneqarneranik aammalu ingerlanneqarneranik nakkutilliinissaq.
e) suliassat Kalaallit Nunaata avataani katsorsarneqarnissamut innersuussinernut erseqqissunut tunngasut suliarissallugit.§ 2. Peqqinnissamut Pisortaqarfiup katsorsaasarfiit Kalaallit Nunaata avataaniittut napparsimasunik Kalaallit Nunaanneersunik tigusisarnissaat pillugu Naalakkersuisut sinnerlugit isumaqatigiissuteqarfigisinnaavai.
§ 3. Tulleriissaarinermut ataatsimiititaliami ilaasortaapput Dronning Ingridip Napparsimmavissuani nakorsat pisortaat nakorsaanerillu innersuussisartut, Peqqinnissamut Pisortaqarfimmit sinniisut pingasut kiisalu Nuup peqqinnissaqarfiani nakorsat qullersaat najukkani peqqinnissaqarfiit sinniisaattut. Nuup peqqinnissaqarfiani nakorsat qullersaat najukkani peqqinnissaqarfinnit allanit sulinikkut misilittagaqanngippat Peqqinnissamut Naalakkersuisoq Nuup peqqinnissaqarfiani pisortap saniatigut allamik najukkami nakorsamik toqqaassaaq.
Imm. 2. Peqqinnisamut Naalakkersuisoq aalajangiissaaq Tulleriissaarinermut ataatsimiititaliami ilaasortat arlaat kina siulittaasuussanersoq aamma siulittaasup tulliussanersoq. Siulittaasup peqannginnerani taassuma suliassai pisinnaatitaaffiilu siulittaasup tullianit suliarineqartassapput.§ 4. Tulleriissaarinermut ataatsimiititaliaq aalangiisarpoq nalinginnaasumik amerlanerussuteqarnikkut. Amerlaqatigiinnik taasisoqartillugu siulittaasup taasinera aalajangiisuusassaaq.
Imm. 2. Tulleriissaarinermut ataatsimiititaliaq aalajangiisinnaassuseqassaaq siulittaasoq aamma Tulleriissaarinermut ataatsimiititaliami ilaasortat ikinnerpaamik affaat najuuppata.§ 5. Tulleriissaarinermut ataatsimiititaliaq qaammatikkaartumik ataatsimiittassaaq. Siulittaasoq immikkut ittumik ataatsimiigiaqqusisinnaavoq.
Imm. 2. Tulleriissaarinermut ataatsimiititaliamut ataatsimiigiaqqusineq sivikinnerpaamik ullunik arfineq marlunnik piffissaqartitsilluni pisassaaq ilanngunneqartassallutillu ataatsimiinnermi oqaluuserisassat, minnerpaamillu makkuninnga imaqartassalluni:
1) ataatsimiinerup kingulliup imaqarniliorneqarnerata akuerineqarnera
2) oqaluuserisassat akuerineqarnerat
3) Kalaallit Nunaata avataani katsorsaasarfinnik atuineq pillugu paasissutissiineq
4) utaqqisut allattorsimaffiat pillugu paasissutissiineq
5) angallassigasuarsimanerit pillugit paasissutissiineq
6) Dronning Ingridip Napparsimmavissuaniit nunanut allanut innersuussinernut pingaaruteqartut pillugit paasissutissiineq
7) najukkani peqqinnissaqarfinni innersuussinernut pingaaruteqartut pillugit paasissutissiineq
8) suliassat aalajangersimasut suliarineqarneri
9) tamalaat
Imm. 3. Ataatsimiinnermi oqaluuserisassat Tulleriissaarinermut ataatsimiititaliami ilaasortanut kiisalu Peqqinnissakkut Nakkutilliisoqarfimmut nassiunneqartassapput.
Imm. 4. Dronning Ingridip Napparsimmavissua Tulleriissaarinermut ataatsimiititaliamut allattoqarfeqartitsisuussaaq.§ 6. Tulleriissaarinermut ataatsimiititaliap ataatsimiinneri matoqqasuupput. Pissutsit immikkut ittut atuuppata Tulleriissaarinermut ataatsimiititaliap siulittaasua suliamut ilisimasalimmik qaaqqusisinnaavoq, ataatsimiititaliap suliamik suliarinninnermini atugassaanik oqaaseqartussamik.
§ 7. Tulleriissaarinermut ataatsimiititaliaq ataatsimeereertillugu imaqarniliortoqartassaaq ataatsimiititaliap suliai immikkoortuni ataasiakkaarlugit oqaluuserineqartut issuarlugit. Suliassani aalajangersimasuni inunnut ataasiakkaanut tunngasuni, tunngaviusussatut isikkoqartut, ilisarineqarsinnaajunnaarsillugit imaqarniliami ilanngullugit allaaserineqartassapput. Tulleriissaarinermut ataatsimiititaliap ataatsimiinnerinit imaqarniliat ataatsimiititaliap ilaasortaanut, Dronning Ingridip Napparsimmavissuani aqutsisunut, Peqqinnissamut Pisortaqarfimmut, Peqqinnissamut Naalakkersuisumut, najukkani peqqinnissaqarfinni nakorsat qullersaannut, Peqqinnissakkut Nakkutilliisoqarfimmut kiisalu Kalaallit Illuannut nassiunneqartassapput.
§ 8. Suliassani aalajangersimasuni inunnut ataasiakkaanut tunngasuni Tulleriissaarinermut ataatsimiititaliap aalajangiineri aalajangiinerit pillugit allattaavinnut allattorneqartassapput. Ilaasortap isummaminut tunngavilersuutini allattaavinnut naatsumik allanneqassasut piumasarisinnaavaa.
Imm. 2. Tulleriissaarinermut ataatsimiititaliap suliassani aalajangersimasuni inunnut ataasiakkaanut tunngasuni aalajangiineri nakorsamut innersuussisimasumut napparsimasullu ilisimatinneqarnissaanik isumaginnittussamut allakkatigut nalunaarutigineqartassapput.
Imm. 3. Suliassami Tulleriissaarinermut ataatsimiititaliap aalajangiivigisimasaani paasissutissat aalajangiinermut annertuumik sunniuteqartussat pissarsiarineqarpata suliassaq ataatsimiititaliap tigoqqissavaa nutaamik suliarissallugu.
Imm. 4. Tulleriissaarinermut ataatsimiititaliap aalajangiineri aqutsinikkut/allaffissornikkut oqartussamut allamut suliassanngorteqqinneqarsinnaanngillat.§ 9. Tulleriissaarinermut ataatsimiititaliaq sulinini pillugu Peqqinnissamut Naalakkersuisumut ukiumoortumik nalunaarusiortassaaq. Nalunaarusiaq kingusinnerpaamik 1.april tunniunneqareertassaaq.
§ 10. Nalunaarut manna 1. april 1998 atuutilerpoq.
Namminersornerullutik Oqartussat, ulloq 19.marts 1998
Marianne Jensen/
Martha S. Abelsen