Immiaaqqat imeruersaatillu kulsyrimik akullit puui pillugit Namminersornerullutik Oqartussat nalunaarutaat nr. 8, 11. marts 1998-imeersoq.

Avatangiisit innarlitsaaliorneqarnissaannik Inatsisartut peqqussutaanni nr. 12-imi 22. december 1988-imeersumi, Inatsisartut peqqussutaatigut nr. 7-ikkut 13. maj 1993-imeersukkut allanngortinneqartumi, § 7, imm. 1, nr. 15 naapertorlugu aalajangersarneqarpoq:

 

§ 1. Immiaaqqat imeruersaatillu kulsyrimik akullit taamaallaat tuniniarneqarlutillu sassaalliutigineqaqqusaapput utertittakkanik, nalunaarummut ilanngussami immikkut nalunaarsukkanik eqqortitsisunik, pooqartillugit.
Imm. 2. Puut utertittakkat nalunaarummi uani pineqartut tassaapput puut utertitsisarnermi atorneqartut, atuisumit imaarneqareernermikkut poorineqartut annersaat immeqqitassanngorlugit utertinneqartartut.

§ 2. Kinaluunniit immiaaqqanik imeruersaatinillu kulsyrimik akulinnik sunilluunniit tuniniaallunilu sassaalliuteqartartoq pisussaavoq, suut poorineqarnersut, puukunik utertitsisarnerup qanoq ingerlaneranik, tassunga ilanngullugu puukut utertinneqartartut procentii qassiunersut aamma puukut utertinneqartut qanoq akilerneqartarnersut naalakkersuisut piumasaqarneratigut paasissutissiissalluni, aamma poorineqartunut misiligutinik tunniussissalluni.
Imm. 2. Imm. 1 naapertorlugu paasissutissiissutigineqartut il.il. takutippassuk, avatangiisit mingutsinneqannginnissaat aamma eqqaavilerisut persaqusersorneqannginnissaat suusupagineqarsimasut, taava naalakkersuisut piumasaqaatissanut immikkut maleruagassiorsinnaapput, soorlu puukut utertinneqartut qanoq akilerneqartarnissaat aamma puukunik utertitsisarnermi periaaseq pillugit.

§ 3. Teknikkikkut aningaasatigullu naleqquttumik periarfissaqanngippat Tunup Avannaatalu ilaat imaluunniit Tunu Avannaalu tamakkerlugit puukunik utertitsisarnermut peqataalersissallugit, taava naalakkersuisut akuersissutigisinnaavaat immiaaqqat aamma imeruersaatit kulsyrimik akullit ataasiaannarluni atorneqarsinnaasunik pooqartillugit Tunup Avannaatalu ilaanni imaluunniit Tunu Avannaalu tamakkerlugit tuniniarneqarlutillu sassaalliutigineqarsinnaanissaat.
Imm. 2. Imm. 1 naapertorlugu akuersissut annerpaamik ukioq ataasikkaarlugu tunniunneqarsinnaavoq.

§ 4. Pilersuinikkut ajornartorsiortoqalerpat pissutsilluunniit immikkut ittut allat naatsorsuutigisariaqalerpata, naalakkersuisut akuersissutigisinnaavaat immiaaqqat aamma imeruersaatit kulsyrimik akullit ataasiaannarluni atorneqarsinnaasunik pooqartillugit tuniniarneqarlutillu sassaalliutigineqarsinnaanissaat.

§ 5. Nalunaarut una atuutinngilaq Kalaallit Nunaata illersornissaa pillugu isumaqatigiissut 27. april 1951-imeersoq naapertorlugu danskit amerikkamiullu illersorfissatut pilersitaanni.

§ 6. § 1, imm. 1-imi aamma § 2, imm. 1-imi aalajangersakkanik kiisalu § 2, imm. 2 naapertorlugu piumasaqaatitut aalajangersakkanik unioqqutitsinerit akiliisitaanermik kinguneqarsinnaapput.

§ 7. Nalunaarut atortuulissaaq 15. marts 1998, tassungalu peqatigitillugu atorunnaarsinneqarpoq immiaaqqat imeruersaatillu kulsyrimik akullit puui pillugit nalunaarut nr. 12, 4. juni 1993-imeersoq.

Namminersornerullutik Oqartussat, ulloq 11. marts 1998.

Jonathan Motzfeldt

/

Søren Hald Møller

---

Ilanngussaq

 

Immiaaqqat imeruersaatillu kulsyrimik akullit utertittakkanik puuisa immikkut nalunaarsorneqarneri

 

Immiaaqqat imeruersaatillu kulsyrimik akullit tuniniarneqarlutillu sassaalliutigineqarsinnaapput ataani immikkut nalunaarsukkanik eqqortitsisunik, pooqartillugit.

	Silataata uuttuutaa		Aamma takuuk puiaasap titartarneqarnera #
	sillia (diameter)	portussusaa
Puiaasaq utertittagaq 1	64 " 1,3	190 " 1,4	1
Puiaasaq utertittagaq 2	64 " 1,3	148 " 1,2	2
Puiaasaq utertittagaq 3	64,4 " 0,5	230 " 1	3
Puiaasaq utertittagaq 4	64 " 0,05	230 " 1	4

 

Tabel 1. Puiaasat utertittakkat immikkut nalunaarsorneqarfiat. Angissutsit tamarmik mm-iupput.

	Silataata uuttuutaa
	takissuseq	silissuseq	portussuseq
Karsi utertittagaq 1	397,5 " 5	265 " 5	221 " 5
Karsi utertittagaq 2	397,5 " 5	265 " 5	178,4 " 5
Karsi utertittagaq 3	400	300	256

 

Tabel 2. Karsit utertittakkat immikkut nalunaarsoneqarfiat. Angissutsit tamarmik mm-iupput.