Sinerissamut qanittumi qaleralinniarneq pillugu Namminersornerullutik Oqartussat nalunaarutaat nr. 6, 5. februar 1998-imeersoq.

Aalisarneq pillugu Inatsisartut inatsisaanni nr. 18-imi, 31. oktober 1996-imeersumi, Inatsisartut inatsisaatigut nr. 12-ikkut, 6. november 1997-imeersukkut allanngortinneqartumi §§ 10, 11, 13 imm. 2, 22, 23, 26, 33 imm. 2 aamma 34 imm. 3 malillugit aalajangersarneqarpoq:

 

Atuuffii

§ 1. Nalunaarut atuuppoq angallatit 75/BRT/120 BT-mit minnerusut atorlugit qaleralinniarnermut, sinerissamullu qanittumi Kalaallit Nunaata aalisarnikkut oqartussaaffigisaani titarnermit aallaaviusumiit sųmilit pingasut iluanni ingerlanneqartumut.
Imm. 2. Nalunaarummi matumani "angallat" immakkut nunakkulluunniit assartuutitut suugaluartutulluunniit aalisarnermut atorneqartutut paasineqassaaq, Aalisarneq pillugu inatsimmi § 4, imm. 7 naapertorlugu.
Imm. 3. Nalunaarummi matumani kommunit killeqarfii Kalaallit Nunaata nunap immikkoortuinut kommuninullu aggorneqarnera pillugu Inatsisartut inatsisaanni nr. 5-imi, 6. november 1997-imeersukkut aalajangersarneqarput.

 

Inuussutissarsiutigalugu qaleralinniarneq

§ 2. Inuussutissarsiutigalugu qaleralinniarnissamut akuersissummik pigisaqarnissaq piumasaqaataavoq. Akuersissummi taaneqassaaq angallat suna imaluunniit angallatit suut atorneqarnersut. Akuersissut piffissamut killiligaavoq sivisunerpaamillu ukioq ataaseq atuuttussatut tunniunneqartassalluni.
Imm. 2. Akuersissummi sumiiffimmi aalisarsinnaatitaanerup killilerneqarnissaa aalajangersarneqarsinnaavoq.

§ 3. Akuersissut taassumaluunniit assilinera aalisartilluni nassatarineqartassaaq.

 

Inuussutissarsiutigalugu qaleralinniarnermi angallatit

§ 4. Aasiaat, Qasigiannguit, Qeqertarsuup, Ilulissat, Uummannap Upernaviullu kommuniini inuussutissarsiutigalugu qaleralinniarneq angallatinut 19,99 BRT/31,99 BT-init anginerusunut kiisalu angallatinut raajarniarsinnaanermut akuersissummik pigisaqartunut ajornartitaavoq.

§ 5. Aasiaat, Qasigiannguit, Qeqertarsuup, Ilulissat Uummannallu kommuniini angallammut 5 BRT/8 BT-imit anginerusumut, siornatigut qaleralinniarsimanngitsumut, inuussutissarsiutigalugu qaleralinniarnissamut akuersissut tunniunneqassanngilaq, aalisarnermit tassannga amerlaqataanik pisaqarsinnaasumik aalisarunnaartoqarsimanngippat.

 

Inuussutissarsiutigalugu qaleralinniarnermi piniutit

§ 6. Inuussutissarsiutigalugu qaleralinniarnermi qassutit qalorsuilluunniit atorneqarnissaat ajornartitaavoq.
Imm. 2. Taamaattorli qassutit 1999-imi 31. december tikillugu atorneqarsinnaapput.
Imm. 3. Qassutit atorlugit qaleralinniarnermi qassutini nigartaqqortussutsimut 220 mm-inik nigartakinnerpaaffissaq atuuppoq.
Imm. 4. Nigartaqqortussuseq nigartap tamakkerluni iluatungimigut nerutussusiata uuttuutigaa, Piujuartitsinissaq siunertaralugu aalisarnerup teknikikkut iluarsartuussivigineqarnera pillugu Namminersornerullutik Oqartussat nalunaarutaanni nr. 11-imi, 2. maj 1996-imeersumi § 2 aamma § 3 naapertorlugit.

§ 7. Aalisarnermi atortut nalunaaqutserneqassapput piginnittup atianik najugaanillu imaluunniit angallatip atianik GR-normuanillu. Nalunaaqutsiussaq immamit aanngartinneqarsinnaasuussanngilaq. Qassutini kivisittakkani nalunaaqutsiussaq qimiaanut qullermut ikkunneqassaaq. Ningittakkani ningittakkat qimiaannut ikkunneqassaaq. Atortuni uninngasuni allanittaaq puttaqutit atorneqartut taamatut nalunaaqutserneqassapput.

 

Pisat tunisinernillu nalunaarutit

§ 8. Inuussutissarsiutigalugu qaleralinniarnermi pisat Kalaallit Nunaanni umiarsuarmut nunamiluunniit tunitsivimmut tulaanneqassapput. Umiarsuartut nunamiluunniit tunitsivittut paasineqassaaq aalisakkanik tunitsivik pisortanit akuerineqarsimasoq.
Imm. 2. Tamatumani pineqanngillat angallatit angallammi namminermi suliarinnittussatut akuerineqarsimasut.

§ 9. Tunitsivik qalerallit tunineqartut pillugit Kalaallit Nunaanni Aalisarsinnaanermut Akuersissutinik Nakkutilliisoqarfimmut (KANUAANA) nalunaaruteqartassaaq. Paasissutissat makku tunniunneqartassapput:
1) Sumiiffik tunitsiviusoq (illoqarfik/nunaqarfik kiisalu kommuni)
2) Tunisisup aamma/imaluunniit angallatip atia
3) Tunisisup inuttut normua aamma/imaluunniit angallatip nalunaarsorneqarnermini normua kiisalu akuersissutip normua
4) Tunisat kiilunngorlugit amerlassusii aammalu qanoq, soorlu imatut suliarineqarsimaneri nalunaarlugit mhui (niaqui atatillugit erlaviikkat), uhui (niaquerlugit erlaviikkat) aamma uhhi (niaquerlugit, paperuerlugillu erlaviikkat)
5) Sumiiffik aalisarfiusimasoq.
Imm. 2. Paasissutissat qaammatinut tamanut, kingusinnerpaamik qaammatip tulliuttup qiteqqunnerani allakkatigut, faxikkut imaluunniit qarasaasiakkut atuarneqarsinnaasunngorlugit (KANUAANA isumaqatigalugu) nassiunneqartassapput uunga KANUAANA, Box 501, 3900 Nuuk imaluunniit Telefaxnr. 2 32 35.

 

Inuussutissarsiutiginagu qaleralinniarneq

§ 10. Nammineq atugassanik qaleralinniarneq danskisut innuttaassusilinnut tamanut aalaja-ngersimasumik Kalaallit Nunaanni najugaqartunut ajornartitaanngilaq. Nunani allani Danmarkiunngitsumi innuttaassusillit Kalaallit Nunaanni najugaqavissut ukiullu kingulliit marluk ataavartumik Kalaallit Nunaanniissimasut danskisut innuttaassuseqartutut pineqassapput, Aalisarneq pillugu inatsimmi § 8, imm. 1 naapertorlugu.
Imm. 2. Nammineq atugassanik qaleralinniarnermi qassutit qalorsuilluunniit atornissaat ajornartitaavoq. Piniutit atorneqartut tamarmik § 8 naapertorlugu piginnittup atianik nalunaaqutserneqarsimassapput.

 

Nakkutilliineq

§ 11. Angallatit nalunaarummi matumani pineqartut pisussaapput KANUAANA, GLK (sakkutuut imarsiortut) aamma politiit, oqartussaasut taakku sulineranni suleqatigissallugit, Aalisarneq pillugu inatsimmi §§ 27-29 naapertorlugit.
Imm. 2. Angallatit isumannaassavaat KANUAANA-p, GLK-p aamma politiit sulisuisa akornuserneqaratik angallammi angallatip immikkoortuinut tamanut nakkutilliinermut pisariaqartinneqartunut isersinnaatitaanissaat.

 

Immikkut akuersissuteqartarnerit

§ 12. Naalakkersuisut § 1 imm. 1-mi aalajangersakkap atorneqannginnissaanut immikkut akuersissuteqarsinnaapput, sumiiffinni aalisariutinik minnerusunik aalisarfiunngitsuni kiisalu aalisariutinik annerusunik aalisarneq sumiiffimmi aalisarnerup ineriartorneranut akornutaassanngippat.
Imm. 2. Naalakkersuisut §§-it 4-p 5-illu atorneqannginnissaannut immikkut akuersissuteqarsinnaapput, pisarineqarsinnaasut, qanoq pisaqartigisinnaanerup aammalu qaleralinniarnermik inuussutissarsiuteqarnerup siamasissumik ineriartortinneqarnissaata isiginiarneqarnissaata tamanna ajornartinngippagu.

 

Pineqaatissiissutit

§ 13. § 2, § 3, § 4, § 6, § 7, § 8, § 9, § 10 imm. 2, aamma § 11-mik unioqqutitsineq kiisalu akuersissummut piumasaqaataasunik sumiginnaaneq akiliisitsinermik kinguneqassapput.
Imm. 2. Aktiaateqarluni ingerlatseqatigiiffik, piginneqataassuteqarluni ingerlatseqatigiiffik, piginneqatigiiffik imaluunniit piginneqatigiilluni umiarsuaatileqatigiiffik unioqqutitsippat ingerlatseqatigiiffik taannaatillugu akiliisitassatut akisussaasunngortinneqarsinnaavoq.
Imm. 3. Pinerluttulerinermi inatsimmi arsaarinnittarneq pillugu malittarisassat taamatuttaaq atorneqassapput.
Imm. 4. Akuersissummi piumasaqaataasunik unioqqutitsineq tassannga atuisinnaatitaanermik killiliinernik kinguneqarsinnaavoq kiisalu sakkortunerusunik pisoqartillugu imaluunniit unioqqutitsisoqaqqitsillugu akuersissut arsaarinnissutigineqarsinnaalluni. Tamanna pillugu Naalakkersuisut aalajangiissapput, aalajangiinerlu nalunaarutigineqarnerminiit ullut 15-it qaangiutsinnagit Nunatta Eqqartuussivianut suliassiissutigineqarsinnaalluni, Aalisarneq pillugu inatsimmi § 21, imm. 3 naapertorlugu.
Imm. 5. Pineqaatissiinissamik suliat allattaaq Aalisarneq pillugu inatsimmi aalajangersakkat malillugit suliarineqartassapput.

 

Atortuulerfia

§ 14. Nalunaarut 15. februar 1998 atortuulerpoq.
Imm. 2. Tamatumunnga peqatigitillugu kommunini ileqqoreqqusat qaleralinniarneq pillugu kiisalu qaleralinniarnermi qassutit kivisittakkat atorneqartarnerat pillugu aalajangersakkanik imaqartut, Inuutissarsiutigalugu aalisarneq pillugu inatsisartut inatsisaat nr. 11, 21. november 1984-imeersoq, Inuutissarsiutigalugu aalisarneq pillugu inatsisartut inatsisaat nr. 17, 22. oktober 1990-imeersoq, Aalisarneq pillugu Inatsisartut inatsisaat nr, 18. 31. oktober 1996-imeersoq malillugu atulersitaasut atorunnaassapput.
Imm. 3. Taamaattorli kommunini ileqqoreqqusat imm. 2-mi taaneqartut 31. december 1999 ilanngullugu atortuussapput, qaleralinniarneq kiisalu qassutit kivisittakkat atorneqarnerat pillugu aalajangersakkanik nalunaarutip uani taaneqartup aalajangersagartaanit sakkortunerusumik imaqarunik.

Namminersornerullutik Oqartussat, ulloq 9. februar 1998.

Pāviāraq Heilmann

/

Peder Munk Pedersen