Atortussiassat aatsitassanit pisut pillugit suliniutit isumagineqarnissaannut ingerlatseqatigiiffik pillugu Inatsisartut inatsisaata allanngortinneqarneranik Inatsisartut inatsisaat nr. 12, 30. oktober 1998-imeersoq.

 

§ 1

Kalaallit Nunaanni kulbrintisiornerit isumagineqarnissaannut selskabiliornermut Inatsisartut inatsisaanni nr. 10, 22. november 1984-imeersumi, kingullermik Inatsisartut inatsisaatigut nr. 12, 28. oktober 1993-imeersukkut allanngortinneqartumi makku allannguutigitinneqassapput:

1. Inatsisartut inatsisaat ima taaguuteqassaaq:
"Kulbrintisiornerit isumagineqarnissaannut ingerlatseqatigiiffik pillugu Inatsisartut inatsisaat."

2. § 1 a ima oqaasertaqassaaq:
"§ 1 a. Naalakkersuisut piginnaatinneqarput Avatangiisinut Nukissiuuteqarnermullu ministeri isumaqatigiissuteqarfigissallugu ingerlatseqatigiiffiup ingerlatsinerata kulbrintisiornernut kiisalu suliassanut taakkununnga attuumassutilinnut allanngortinneqarnissaanut."

3. § 2-mi imm. 1-ip kingorna immikkoortutut nutaatut ilanngunneqassaaq:
"Imm. 2. Namminersornerullutik Oqartussat aamma Avatangiisinut Nukissiuuteqarnermullu ministerip tamarmik immikkut, isumaqatigeereerlutik, aktiat imm. 1-imi taaneqartut kiisalu aktianik piseqqissinnaanermut periarfissaq aktie- imaluunniit anpartsselskabimut, Namminersornerullutik Oqartussanit imaluunniit naalagaaffimmit toqqaannartumik toqqaannanngikkaluartumilluunniit tamakkiisumik pigineqartumut tunisinnaavaat."

4. § 2, imm. 2, matuma kingorna imm. 3-nngortoq ima oqaasertaqassaaq:
"Imm. 3. Ingerlatseqatigiiffimmi aktiaatillit isertitaat Kalaallit Nunaanni atortussiassat aatsitassanit pisut pillugit inatsimmi (atortussiassalerinermik inatsit) § 22-mi ilaatinneqarput. Tamannali aktiaatinik tunisinikkut isertitanut atuutinngilaq, tak. § 2, imm. 2."

5. § 3, imm. 4 ima oqaasertaqassaaq:
"Imm. 4. Immikkut ittunik pissutissaqartillugu suliassani imm. 2-mi 3-milu ilanngunneqartuni Inatsisartuni oqallinnerit matoqqasumik ingerlanneqartassapput."

 

§ 2

Inatsisartut inatsisaata atulerfissaa Naalakkersuisut aalajangersassavaat.

Namminersornerullutik Oqartussat, ulloq 30. oktober 1998.

Jonathan Motzfeldt

/

Kaj Kleist