Kommunini misiligutitut aaqqissuussinerit pillugit Inatsisartut inatsisaat nr. 6, 6. november 1997-imeersoq.
Aalajangersakkat nalinginnaasut
§ 1. Inatsimmi matumani malittarisassat naapertorlugit Kalaallit Nunaanni kommuni sunaluunniit 2001-ip naanissaata tungaanut najukkami nammineerluni aqutsineq annertusarniarlugu, kommunip aqutsinerata najukkami pissutsinut naleqqussarneqarnera pitsaanerulersinniarlugu, innuttaasut kiffartuunneqarnerannik pitsanngorsaaniarluni aammalu kommunip ingerlanneqarnerani aningaasanik sulisunillu atuinerup pitsaanerulernissaanik angusaqarniarluni misiliinernik ingerlatsisinnaavoq. Misiliinerni innuttaasut peqqissusiat, inatsisitigut isumannaatsuunissaat atugarissaarnissaallu annerpaamik pingaartinneqassapput.
§ 2. Misiliineq kommunimi ataatsimi, arlalinni tamanulluunniit atuuttumik aallartinneqarsinnaavoq.
Imm. 2. Kommunimi misiliinissami tamanna pillugu siunnersuutip kommunalbestyrelsimi amerlanerussuteqartunit akuerineqarnissaa pisariaqarpoq.§ 3. Misiligutitut aaqqissuussineq suliaqarfinni makkunani pilersinneqarsinnaavoq soorlu assersuutigalugu isumaginninnermi, atuarfeqarnermi, sunngiffeqarnermi, teknikkimi, suliffissaqartitsinermi, inuussutissarsiornermi, kommunit aqunneqarneranni kommunillu aningaasaqarneranni.
Akuersineq il. il.
§ 4. Naalakkersuisut misiligutitut aaqqissuussinerit akuerisassavaat.
§ 5. Misiliineq inatsisit atuuttut iluanni ingerlanneqarsinnaanngikkaangat, Inatsisartut misiliinissamut immikkut akuersissuteqartarsinnaapput, Naalakkersuisut inassuteqareerneratigut.
§ 6. Naalakkersuisut misiliinennik piareersaanermi, akuersinermi, aallarnisaanermi inaarinermilu suleriaasissat kiisalu misiliinerit inernerisa misissorneqartarnerat nalilerneqartarnerallu pillugit malittarisassanik aalajangersaassapput.
§ 7. Naalakkersuisut ataatsimiititaliamik ataqatigiissaarisussamik pilersitsissapput oqartussat kommunit aqunneqarnerannut akisussaasut saniatigut pisortaqarfimmit susassaqartumit aammalu KANUKOKA-mit ilaasortaaffigineqartumik.
Imm. 2. Ataatsimiititaliap ataqatigiissaarisussap suliassaraa Naalakkersuisunut inassuteqartartuussalluni, ataqatigiissaarisuussalluni, aammalu misiliinerit tamaasa malinnaaffigissallugit nalilersortassallugillu.
Imm. 3. Naalakkersuisut ukiut tamaasa Inatsisartut nalinginnaasumik ukiakkut ataatsimiinneranni misiliinerit ataasiakkaat pillugit aammalu misiliinerit qanoq ingerlanerannik nassuiaammik saqqummiussaqartassapput.
Misiliinermi malittarisassat
§ 8. Kommunini misiliinerni ataasiakkaani malittarisassat misiliinermi malittarisassani aalajangersarneqassapput. Misiliinermi malittarisassat kommunalbestyrelsimit akuersissutigineqassapput aammalu Naalakkersuisunut ilaasortamit suliassaqarfimmut pineqartumut akisussaasumit akuerineqartassallutik.
§ 9. Misiliinermi malittarisassani ulloq atuutilerfissaq nalunaarsimassaaq.
Imm. 2. Kommunalbestyrelsip isumagissavaa misiliinermi malittarisassat imaluunniit misiliinerit imaasa naatsumik allaaserinerat kommunimi periaatsit nalinginnaasut atorlugit tamanut saqqummiutissallugit. Tamanut saqqummiussineq atortuulerfissaa sivikinnerpaamik sapaatip akunneranik ataatsimik sioqqullugu pissaaq.
Imm. 3. Kommunimi innuttaasut tamakkua saniatigut sapinngisamik kommunip misiliineranik tusarlerneqarnissaat kommunalbestyrelsip isumagissavaa.
Sumiiffiit kommunit aggornerisa avataanniittut
§ 10. Kangerlussuarmi Pituffimmilu sumiiffiit kommunit aggornerisa avataanniittut misiligutit aaqqissuussinermi, arlalinniluunniit, ilaatinneqaraissaat Naalakkersuisut aalajangersinnaavaat.
Atortuulersitsinissamik aalajangersakkat
§ 11. Inatsit atortuulerpoq ulloq 1. januar 1998.
Namminersornerullutik Oqartussat, ulloq 6. november 1997.
Jonathan Motzfeldt/
Kaj Kleist