Royal Arctic Line A/S pillugu inatsisartut peqqussutaat nr. 5, 6. juni 1997-imeersoq.

Pilersuineq, angalaneq, angallassineq, allakkerineq il.il. pillugit Kalaallit Nunaannut inatsimmi nr. 469, 6. november 1985-imeersumi § 4 aamma § 9 malillugit makku aalajangersarneqarput:

 

Peqqussutip atuuffii

§ 1. Peqqussut Royal Arctic Line A/S-imut ingerlatseqatigiiffinnullu aqutaanut atuuppoq.
Imm. 2. Naalakkersuisut aalajangersaasinnaapput peqqussut aktiaateqarluni piginneqataassute-qarluniluunniit ingerlatseqatigiiffinnut allanut, imaatigut angallassinermut tunngassuteqartuni sulianik ingerlatsisunut, atuutissasoq, namminersornerullutik oqartussat toqqaannartumik toqqaannanngitsumilluunniit aktiaateqarluni ingerlatseqatigiiffiit pillugit inatsimmi § 2-mi taaneqartumik ingerlatseqatigiiffimmut attaveqarsimappata.
Imm. 3. Naalakkersuisut aalajangersinnaavaataaq peqqussummi matumani maleruagassat ingerlatseqatigiiffimmut, imm. 1 aamma imm. 2 malillugit peqqussummi pineqartumut, atuutis-sanngitsut ilaannakuusumilluunniit atuutissasut.

 

Royal Arctic Line A/S-ip ingerlatsinera

§ 2. Ingerlatseqatigiiffiit nalinginnaasumik niuernermik tunngaveqarlutik imaatigut angallassinermut tunngassuteqartuni sulianik taamalu tamatumunnga atasunik sulianik siunertat malittarisassani allassimasut naapertorlugit ingerlatsissapput.
Imm. 2. Taamatuttaaq ingerlatseqatigiiffiit sulianik allanik ingerlatsisinnaapput, imaatigut angallassinermi nalinginnaasumik niuernermut atassuteqartunik.
Imm. 3. Ingerlatseqatigiiffiit ingerlatseqatigiiffinni aqutani tamakkiisumik ilaannakuusumilluunniit pigisaminni suliffeqarfiit allat suleqatigalugit allanillu ateqartitsillutik ingerlatsinertik ingerlatsisinnaapput.
Imm. 4. Namminersornerullutik Oqartussat toqqaannartumik toqqaannanngitsumilluunniit aktiaateqarluni ingerlatseqatigiiffiit pillugit inatsimmi § 2-mi taaneqartutut ingerlatseqatigiiffimmut, peqqussummi pineqartumut, attaveqarpata, naalakkersuisut ingerlatseqatigiiffik pisussaatissinnaavaat usinik ilaasunillu angallassinermi pisortat sullissinerat pillugu nalinginnaasumik niuernermik atugassaqartitsillutik isumaqatigiissuteqarnissaanut.

§ 3. Ingerlatseqatigiiffiit aktiaateqarluni ingerlatseqatigiiffiit piginneqataassuteqarluniluunniit ingerlatseqatigiifiit pillugit inatsisinut aamma aktiaateqarluni piginneqataassuteqarlunilu inger-latseqatigiiffiit pillugit inatsisiliornernut allanut Kalaallit Nunaanni atortussanngortinneqarsimasunut ilaatinneqarput. Ingerlatseqatigiiffinni aktiatigut aningaasaliissutitigulluunniit aningaasaatit ingerlatseqatigiiffiit pillugit inatsisini maleruagassat malillugit allanngortinneqarsinnaapput.

§ 4. Inatsisartut aningaasaqarnermut ataatsimiititaliaata akuersissuteqarnissaa apeqqutaatillugu naalakkersuisut piginnaatinneqarput Royal Arctic Line A/S-imi aktiat tunineqarnissaat pillugu isumaqatigiissuteqarnissamut.

 

Ingerlatseqatigiiffiit qilersorsimanatik inissisimanerat

§ 5. Ingerlatseqatigiiffinnut malittarisassat, ingerlatsineq naatsorsuutitigullu pissutsit imatut aaqqissuunneqassapput ingerlatseqatigiiffiit pisortaqarnermut, ingerlatsinermut, allaffissornikkut aqutsinermut kiisalu allaffissornikkut, aningaasaqarnikkut ingerlatseqatigiiffimmilu naatsor-suutitigut nakkutilliineq eqqarsaatigalugit qilersorsimanatik inissisimasussanngorlugit, tamatu-muuna ilaatigut isumannaarneqassalluni Namminersornerullutik Oqartussanut tunngatillugu ingerlatseqatigiiffiit immikkuullarissunik aningaasaateqarnissaat naatsorsuutinillu ingerlatsinissaat aamma ingerlatseqatigiiffiit ingerlataasa ilaasa pisortanit akiliivigineqartartut ingerlatallu ilaasa ingerlatseqatigiiffiit suliffeqarfinnut allanut unammilleqatigiissutaasa akornanni erseqqissumik immikkoortitsisoqarsimajuarnissaa.
Imm. 2. Ingerlatseqatigiiffiit ingerlatsissapput tunngaviit suliffeqarfinnut nalinginnaasumik niuerneq tunngavigalugu ingerlatsisunut atuuttut malillugit. Tamannattaaq atuuppoq pisortat sullissinerat pillugu pisussaaffinnut, Naalakkersuisut pisortat sullissinerat pillugu ingerlatseqati-giiffiit Namminersornerullutik Oqartussanut imaluunniit pisortat ingerlatsiviisa ilaannut allanut isumaqatigiissuteqarnerisigut ingerlatseqatigiiffinnut suliassiissutaannut.

 

Tjenestemandit

§ 6. Namminersornerullutik Oqartussani tjenestemandit, Inatsisartut peqqussutaanni nr. 14-imi, 30. oktober 1992-imeersumi § 11 naapertorlugu KNI Pilersuisoq A/S-imi sulisussaasutut atukkiussaasut pisussanngortinneqarsinnaapput Namminersornerullutik Oqartussat erseqqin-nerusumik unnersuussinerisigut ingerlatseqatigiiffímmi peqqussummi § 1, imm. 2 malillugu pineqartumi suliinnarnissaminnut, ingerlatseqatigiiffimmi peqqussummi § 1, imm. 2 malillugu pineqartumi atorfmissanngikkunik.
Imm. 2. Tjenestemandit imm. 1-imi taaneqartut allamik atorfminnissap soraarninngornissal-luunniit tungaanut aningaasarsiaqarnissamik, suliartoqquneqariataarnissamut akissarsiaqarnissamik imaluunniit soraarnerussutisiaqarnissamik piumasaqaateqarsinnaanngillat, ingerlatseqati-giiffimmi peqqussummi § 1, imm. 2 malillugu pineqartumi sulinertik pissutigalugu.
Imm. 3. Ingerlatseqatigiiffiit tjenestemandit Namminersornerullutik Oqartussat imm. 1 naa-pertorlugu erseqqinnerusumik innersuussinerat malillugu suliffeqarfigisaat, akissarsianut il.il. akiliutigineqartunut aningaasartuutit Namminersornerullutik Oqartussat akilersimasaat utertillugit akilissavaat. Ingerlatseqatigiiffiit piffissamut sulisup ingerlatseqatigiiffmni ukiunut soraar-nerussutisiaqaatigisassaanut Namminersornerullutik Oqartussat tjenestemandit soraarnerussuti-siassaannut aningaasartuutaasa matussutissaannut soraarnerussutisiassanut akiliutit ingerlaavartumik akilersussavaat.

 

Atuutilerfia

§ 7. Peqqussut atuutilerpoq ulloq 1. juli 1997.

Namminersornerullutik Oqartussat, ulloq 6. juni 1997

Lars Emil Johansen

/

Peter Grønvold Samuelsen