Palasissaaleqineq aaqqiiviginiarlugu Inatsisartut peqqussutaat nr. 2, 6. juni 1997-imeersoq.
Kalaallit Nunaanni ilageeqarneq pillugu inatsimmi nr. 264-imi, ulloq 6. maj 1993-imeersumi § 5 tunngavigalugu aalajangersarneqarput:
Palasissaaleqinerup aaqqiiviginiarneqarnera
§ 1. Kalaallit Nunaanni ilageeqarneq pillugu Inatsisartut peqqussutaanni nr. 2-mi, 30. marts 1982-imeersumi § 4, imm. 2, ilageeqarneq pillugu peqqussummi nr. 15-imi, 28. oktober 1993-imeersumi § 36, imm. 3-kkut aalajangiusimaneqartoq naapertorlugu, palasitut atorfinitsinneqassagaanni ilinniagaqarsimanissamik piumasaqataasunik eqqortitsisimanngitsunik amigaateqartoqalersillugu Naalakkersuisut Ilageeqarneq pillugu peqqussummi aalajangersarneqarsimasunit allaanerusunik ilinniartitaanikkut piumassaqaatinik aalajangersaasinnaapput.
§ 2. Naalakkersuisut ilageeqarnikkut ilinniartitaanerit pikkorissartitsinerillu pillugit malittarisassanik aalajangersaasinnaapput.
Atortuulersitsinermi aalajangersakkat
§ 3. Inatsisartut peqqussutaat manna 1. juni 1997 aallarnerfigalugu atortuulersinneqarpoq.
Namminersornerullutik Oqartussat, ulloq 6. juni 1997.
Lars Emil Johansen/
Konrad Steenholdt