Inuussutissarsiutigalugu piniarnermut allagartat pillugit Namminersornerullutik Oqartussat nalunaarutaat nr. 32, 18. december 1997-imeersoq.

Piniarneq aallaaniarnerlu pillugit Inatsisartut inatsisaanni nr. 15-imi, 6. november 1997-imeersumi § 3, imm. 5 aamma 6, § 5, imm. 1, nr. 8, § 7, § 8, imm. 1 aamma § 12 malillugit aalajangersarneqarput:

 

Atuuffii

§ 1. Nalunaarut una Kalaallit Nunaata nunataani aalisarnikkullu oqartussaaffigisaani inuussutissarsiutigalugu piniarnermut aallaaniarnermullu atuuppoq.
Imm. 2. Nalunaarummi uumasut miluumasut timmissallu tamarmik pineqarput.

 

Inuussutissarsiutigalugu piniarnermut aallaaniarnermullu akuersissuteqartarneq

§ 2. Inuussutissarsiutigalugu piniarnermik aallaaniarnermillu ingerlatsisinnaapput taamaallaat inuit taamaaliornissamut akuerineqarsimasut.
Imm. 2. Akuersissut inuussutissarsiutigalugu piniarsinnaanermut allagartatut tunniunneqartarpoq.

§ 3. Inuussutissarsiutigalugu piniarsinnaanermut allagartaq qinnuteqartoqarneratigut tunniunneqartassaaq inunnut:
1) inuiaqatigiinnut kalaallinut aalajangersimasumik attuumassuteqartunut,
2) Kalaallit Nunaanni najugaqartutut inuit nalunaarsorsimaffianni nalunaarsorsimasunut, Kalaallit Nunaannilu inuit nalunaarsorsimaffianni ukiuni kingullerni marlunni nalunaarsorsimasunut,
3) Kalaallit Nunaannut tamakkiisumik akileraartartussaasunut, Kalaallit Nunaannullu ukiuni kingullerni marlunni tamakkiisumik akileraartartuusimasunut, aammalu
4) piniarnermit, aallaaniarnermit aalisarnermillu isertitaqartunut isertitat tamarmiusut ikinnerpaamik 50%-iisa nalinginik. Angallatit angallatip uuttuutaanut uppernarsaat naapertorlugu 150 BRT-init imaluunniit 210 BT-init anginerusut atorlugit aalisarnermit isertitat tamarmiusut piniarnermit, aallaaniarnermit aalisarnermillu isertitat tamarmisut naatsorsuusiorneqarnerannut ilanngunneqassanngillat. Qinikkatut pisortanillu toqqakkatut suliassaqartitaanermit aningaasarsiat imaluunniit KNAPK-p siulersuisuini sulinermit aningaasarsiat, piniarnermit, aallaaniarnermit aalisarnermillu isertitat tamarmiusut naatsorsorneqarnerannut imaluunniit isertitat ilanngaasigaanngitsut tamarmiusut naatsor-sorneqarnerannut ilanngunneqassanngillat.
Imm. 2. Inunnut imm. 1-imi nr. 1-imik, 2-mik 3-millu naammassinnissimasunut, najukkami aalisartut piniartullu peqatigiiffiannik siumut tusarniaasoqareerneratigut imm. 1, nr. 4-mi piumasaqaatip atuutinnginnissaa akuersissutigineqarsinnaavoq, qinnuteqartup siunissami imm. 1-imi nr. 4-mi piumasaqaat inuussutissarsiutigalugu piniartutut eqqortikkumappagu.
Imm. 3. Imm. 1-imi, nr. 2-mi 3-milu aalajangersakkat kommunimit inassuteqartoqarneratigut Naalakkersuisunit saneqqunneqarsinnaapput, tamanna qinnuteqartup Kalaallit Nunaannut attuumassuteqarnera tunngavigalugu naleqquttutut isigineqarpat, aammalu qinnuteqartoq Kalaallit Nunaanniit ilinniagaqarluni pissuseqataannilluunniit peqquteqarluni qimagusimasimappat.
Imm. 4. Inuit tjenestemanditut pensionisiallit, isumaginninnikkut siusinaartumik pensionisiallit imaluunniit isumaginninnikkut pensionisiallit inuussutissarsiutigalugu piniarsinnaanermut allagartartaarsinnaanngillat. Inuit isumaginninnikkut pensionisianik imaluunniit tjenestemanditut pensionisianik isertitaqartartut najukkami aalisartut piniartullu peqatigiiffîat siumut tusarniaavigeqqaarlugu inuussutissarsiutigalugu piniarsinnaanermut allagartartaarsinnaapput, tassa pensionisianik isertitaqarnermut nuunnerminni inuussutissarsiutigalugu piniarnermik ingerlataqarsimagunik.
Imm. 5. Meeqqat aqqaneq marluk ataallugit ukiullit, meeqqat atuartut ilinniagaqartullu inuussutissarsiutigalugu piniarsinnaanermut allagartartaarsinnaanngillat.

§ 4. Piniarsinnaanermut allagartaq killissarititaasut inatsisini allani aalajangersarneqartut iluanni piniarnissamut aallaaniarnissamullu pisinnaatitsivoq.

 

Inuussutissarsiutigalugu piniarnermut allagartartaarniarluni qinnuteqarneq

§ 5. Inuussutissarsiutigalugu piniarnermut allagartassamik qinnuteqaat qinnuteqarnermi immersuiffissaq naalakkersuisunit ilusilersugaq atorlugu naalakkersuisunut nassiunneqassaaq.
Imm. 2. Qinnuteqaat nassiunneqartinnagu najukkami aalisartut piniartullu peqatigiiffiannut tusarniaassutigalugu peqatigiiffimmit oqaaseqarfigineqartussanngorlugu saqqummiunneqassaaq. Tamatuma kingoraa qinnuteqaat kommunitnit najugarisamit uppernarsarlugu atsiorneqassaaq, tassani qularnaarneqassalluni § 3 malillugu piumasaqaatit naammassineqarsimanersut.
Imm. 3. Kommunimit najugarisamit isumaqarfigineqarpat qinnuteqartup § 3-mi piumasaqaatit naammassisimanngikkai, taamaattumillu qinnuteqaat uppernarsarneqaranilu naalakkersuisunut nassiunneqanngippat, taama pisoqarnera kommunip allakkatigut qinnuteqartumut nalunaarutigissavaa. Nalunaarut taamaattoq tunngavilersuutinik aamma naammagittaalliornissamut ilitsersuummik imaqassaaq. Tamakku tunngavigalugit qinnuteqartup kommunip aalajangiinera sapaatip akunneri sisamat qaangiutsimagit naalakkersuisunut naammagittaalliuutigisinnaavaa.

 

Inuussutissarsiutigalugu piniarnermut allagartap atorsinnaassusia

§ 6. Inuussutissarsiutigalugu piniarnermut allagartaq tassaavoq naalakkersuisut giro atorlugu akiliiffissiaata akiliisimanermut uppernarsaatitaa.
Imm. 2. Inuussutissarsiutigalugu piniarnermut allagartap tunniunneqarnerani 30 kr.-inik akiliuteqartitsisoqassaaq.
Imm. 3. Inuussutissarsiutigalugu piniarnermut allagartaq taamaallaat atuuppoq akiliisimaneq uppernarsarsimagaangat atuuttarlunilu qaammatisiutit ukiuat allagartap atuuffissaa naallugu. Akiliisimanermut uppernarsaat tassaavoq giro atorlugu akiliiffissami aningaaseriviup allakkerisarfmlluunniit naqitsisaa imaluunniit allatut iliorluni erseqqissumik qularnaatsumillu nalunaarsuineq, giro atorlugu akiliiffissami akileqquneqartup 30 kr.-inik aningaasartaqartup akilersimaneranut uppernarsaatitut.
Imm. 4. Naalakkersuisut inuussutissarsiutigalugu piniarsinnaanermut allagartat tunniuteriikkat atorunnaarsissinnaavaat inuussutissarsiutigalugu piniarnermut allagartaqarnissamut piumasaqaatit naammassineqarsimanngippata naammassineqarsinnaajunnaarsimappataluunniit.

§ 7. Inuussutissarsiutigalugu piniarnermut allagartamik piginnittoq aalajangersimasumik akissarsiaqarluni suliffittaarpat taamaalillunilu § 3-mi imm. 1-imi nr. 4-mi aalajangersakkat naammassisinnaajunnaarlugit imaluunniit allatut inuussutissarsiutigalugu piniarnermik aallaa-niarnermillu ingerlatsinerminik unitsitsippat, tamanna ullut 30-t qaangiutsinnagit kommunimut najugarisamut nalunaarutigineqassaaq. Allanngortoqarneranik paasissutissat naalakkersuisunut ingerlateqqinneqassapput, taakku pineqartoq suliffiup avataatigut aallaaniarsinnaanermut allagartat pillugit Namminersornerullutik Oqartussat nalunaarutaat malillugu aallaaniarnermut allagartartaarnissaanik neqeroorfigissavaat, § 6, imm. 4 naapertorlugu.
Imm. 2. Kommuni najukkami aalisartut piniartullu peqatigiiffiat tusarniaavigereerlugu isumaqarpat inuup § 3 malillugu inuussutissarsiutigalugu piniarnermut allagartaqarnissamut piumasaqaataasut naammassisinnaajunnaarsimagai, taava kommunip inuk aamma Aalisarnermut, Piniarnermut, Inuussutissarsiornermut Nunalerinermullu Pisortaqarfik pissutsit allanngornerannik allakkatigut nalunaarfigissavai. Nalunaarutip peqqutaasunut tunngavilersuutit naammagittaalliornissamullu ilitsersuutit imarissavai. Tamakku tunngavigalugit qinnuteqaateqartup kommunip aalajangiinera nalunaarutigineqartup tiguneraniit sapaatip akunneri sisamat qaangiutsinnagit naalakkersuisunut naammagittaalliuutigisinnaavaa. Tamatuma kingornatigut suliffiup avataatigut aallaaniarnissamut allagartaq inummut neqeroorutigineqartussanngussaaq, § 6, imm. 4 naapertorlugu.

§ 8. Inuussutissarsiutigalugu piniarnermut allagartaq piginnittumuinnaq tunngavoq allamullu tunniuteqqusaanani, tuneqqusaanani atukkiuteqqusaananiluunniit.
Imm. 2. Inuussutissarsiutigalugu piniarnermut allagartaq kinaassutsimut uppernarsaammut atuuttumut ilanngullugu piniarnermi aallaaniarnermilu nassarneqartassaaq nakkutilliinermullu atatillugu politiit, piniarnermik aalisarnermillu nakkutilliisut, taakku ikiortaasa imaluunniit inuit tamatumunnga piginnaatitaasut piumasaqarnerisigut takutinneqartassalluni.

 

Pisanik nalunaaruteqartarneq

§ 9. Inuussutissarsiutigalugu piniarnermut allagartalik kinaluunniit pisussaavoq pisaminik nalunaarsuissalluni. Qaammatit naaneri tamaasa pisarisimasat naatsorsuusiorneqartassapput. Ukiumut pisarisimasat kisitsisitaat piffissap pisanik nalunaarsuiffiusussap naanerani, tak. imm. 3, pisanik nalunaarsuiffissamut naalakkersuisunit suliarineqarsimasumut naatsorsuusiorneqassapput, oktoberillu 15-iat tikitsinnagu allakkerivikkut akeqanngitsumik utertinneqassallutik.
Imm. 2. Piffissaq pisanik nalunaarsuiffmsussaq tassaavoq oktoberip aallaqqaataaniit septemberip 30-iannut.
Imm. 3. Inuussutissarsiutigalugu piniarsinnaanermut allagartap ingerlaannaq nutaamik taarserneqarnissaanut piumasaqaatigineqarpoq pisanik nalunaarsuiffmp immersugaalluni piffissaq eqqorlugu nassiunneqarsimanissaa aammalu inuup inuussutissarsiutigalugu piniartuunerata allanngorsimannginnissaa, tak. § 7, imm. 2.

 

Immikkut akuersissuteqartarneq

§ 10. Naalakkersuisut nalunaarummi matumani piumasaqaatinit allaasumik immikkut akuersissuteqarsinnaapput tamanna ilisimatuutut misissuinerit pisariaqalersippassuk.

 

Pineqaatissiissutit

§ 11. § 2-imik, § 7-imi imm. 1-imik aamma § 8-imi imm. 1-imik 2-millu unioqqutitsisut akiliisitsinikkut pineqaatissinneqarsinnaapput.
Imm. 2. § 2-mik aamma § 8-imi imm. 2-imik unioqqutitsisoqartillugu pisat taakkuluunniit nalingat naalagaaffmp karsianut iluaqutissanngorlugit arsaarinnissutigineqarsinnaapput.

 

Atuutilerfia

§ 12. Nalunaarut atuutilerpoq ulloq 18. december 1997.
Imm. 2. Tamatumunnga peqatigitillugu inuussutissarsiutigalugu piniarnermut allagartat pillugit Namminersornerullutik Oqartussat nalunaarutaat nr. 33, 17. december 1996-imeersoq atorunnaarsinneqarpoq.
Imm. 3. Piniarnermut allagartat, nalunaarut imm. 2-mi taaneqartoq naapertorlugu qaammatisiutit ukiuannut 1997-imut atortussanngortitaasut taamaattoq atorunnaassapput, piniarnermut allagartap atuuffissaata sivisussusia apeqqutaatinnagu, aatsaat ulloq 28. februar 1998.

Namminersornerullutik Oqartussat, ulloq 18. december 1997.

Pâviâraq Heilmann

/

Peder Munk Pedersen