Suliffiup avataatigut aallaaniarsinnaanermut allagartat pillugit Namminersornerullutik Oqartussat nalunaarutaat nr. 31, 18. december 1997-imeersoq.

Piniarneq aallaaniarnerlu pillugit Inatsisartut inatsisaanni nr. 15-imi, 6. november 1997-imeersumi § 3, imm. 5 aamma 6, § 5, imm. 1, nr. 8, § 7, § 8, imm. 1 aamma § 12 aamma aalisarneq pillugu Inatsisartut inatsisaanni nr. 18-imi, 31. oktober 1996-imeersumi § 8, imm. 2, naapertorlugit makku aalajangersarneqarput:

 

Atuuffii

§ 1. Nalunaarut una Kalaallit Nunaata nunataani aalisarnikkullu oqartussaaffigisaani inuussutissarsiutiginagu piniarnermut, aallaaniarnermut aalisarnermullu atuuppoq.
Imm. 2. Nalunaarummi uumasut miluumasut timmissallu tamarmik aammalu kapisillit pineqarput.

 

Inuussutissarsiutiginagupiniarsinnaanermut, aallaaniarsinnaanermut aalisarsinnaanermullu akuersissuteqartarneq

§ 2. Inuussutissarsiutiginagu piniarneq, aallaaniarneq aalisarnerlu taamaallaat ingerlanneqarsinnaapput inunnit naalakkersuisunit taamaaliornissamut akuerineqarsimasunit.

§ 3. Inunnut piniarneq aallaaniarnerlu pillugit Inatsisartut inatsisaanni § 3, imm. 3-mi pineqartunut imaluunniit § 3, imm. 4 malillugu immikkut akuersissuteqarfigineqarsimasunut akuersissuteqartoqartarpoq suliffiup avataatigut aallaaniarsinnaanermut allagartaliinikkut.
Imm. 2. Inuit aqqaneq-marluk inorlugit ukiullit suliffiup avataatigut aallaaniarsinnaanermut allagartartaarsinnaanngillat.

§ 4. Suliffiup avataatigut aallaaniarsinnaanermut allagartaq killissarititaasut, inatsisini allani aalajangersarneqartut, iluanni piniarnissamut aallaaniarnissamullu pisinnaatitsivoq.

 

Suliffiup avataatigut aallaaniarsinnaanermut allagartartaarniarluni qinnuteqaat

§ 5. Suliffiup avataatigut aallaaniarsinnaanermut allagartamik qinnuteqaat qinnuteqarnermi immersuiffissaq naalakkersuisunit ilusililersugaq atorlugu naalakkersuisunut nassiunneqassaaq
Imm. 2. Paasissutissat qinnuteqaatip nassiutinnginnerani kommunimi najukkami inuit nalunaarsorsimaffiannit § 3-mi piumasaasut naammassineqarsimanerat uppernarsarlugu atsiorneqassapput.
Imm. 3. Kommuni najugarisaq isumaqarpat qinnuteqaateqartup § 3-mi piumasaqaatit naammassisimanngikkai, taamaattumillu qinnuteqaat uppernarsarlugu atsiornagu naalakkersuisunullu ingerlateqqillugu nassiunnagu, tamanna kommunip qinnuteqartumut allakkatigut nalunaarutigissavaa. Nalunaarut tunngavilersuutinik aamma naammagittaalliorsinnaanermut ilitsersuummik imaqassaaq. Tamakku tunngavigalugit qinnuteqaateqartup kommunip aalajangiinissamik innassuteqaataa itigartitsinerup tiguneraniit sapaatip akunneri sisamat qaangiutsinnagit naalakkersuisunut naammagittaalliuutigisinnaavaa.

 

Suliffiup avataatigut aallaaniarsinnaanermut allagartap atorsinnaassusia

§ 6. Suliffiup avataatigut aallaaniarsinnaanermut allagartaq tassaavoq naalakkersuisut giro atorlugu akiliiffissiaata akiliisimanermut uppernarsaatitaa.
Imm. 2. Suliffiup avataatigut aallaaniarsinnaanermut allagartap tunniunneqarnerani 30 kr.-inik akiliuteqartitsisoqassaaq.
Imm. 3. Suliffiup avataatigut aallaaniarsinnaanermut allagartaq taamaallaat atuuppoq akiliisimaneq uppernarsarsimagaangat atuuttarlunilu qaammatisiutit ukiuat allagartap atuuffissaa naallugu. Akiliisimanermut uppernarsaat tassaavoq giro atorlugu akiliiffissami aningaaseriviup allakkerisarfmlluunniit naqitsisaa imaluunniit allatut iliorluni erseqqissumik qularnaatsumillu nalunaarsuineq, giro atorlugu akiliiffissami akileqquneqartup 30 kr.-inik aningaasartaqartup akilersimaneranut uppernarsaatitut.
Imm. 4. Naalakkersuisut suliffiup avataatigut aallaaniarsinnaanermut allagartat tunniunneqarsimasut atorunnaarsissinnaavaat suliffiup avataatigut aallaaniarsinnaanermut allagartamik tunniussinermi piumasaqaataasut naammassineqarsinnaanngippata naammassineqarsinnaajunnaarsimappataluunniit.

§ 7. Suliffiup avataatigut aallaaniarsinnaanermut allagartaq inummut piginnittumuinnaq tunngavoq allamullu tunniuteqqusaanani, tuneqqusaanani atukkiuteqqusaananiluunniit.
Imm. 2. Suliffiup avataatigut aallaaniarsinnaanermut allagartaq piniarnermi aallaaniarnermilu kinaassutsimut allagartamut atuuttumut ilanngullugu nassarneqartassaaq nakkutilliinermullu atatillugu politiit, piniarnermik nakkutilliisut, taakku ikiortaasa imaluunniit inuit tamatumunnga piginnaatitaasut piumasaqarnerisigut takutinneqartassalluni.

 

Pisanik nalunaaruteqartarneq

§ 8. Suliffiup avataatigut aallaaniarsinnaanermut allagartalik kinaluunniit pisussaavoq pisaminik nalunaarsuissalluni. Qaammatit naaneri tamaasa pisat naatsorsorneqartassapput. Ukiumut pisarisimasat kisitsisitaat imm. 2 naapertorlugu piffissap pisanik nalunaarsuiffiusussap naanerani pisanik nalunaarsuiffissamut Naalakkersuisunit suliarineqarsimasumut nuunneqassapput oktoberillu 15-iat tikitsinnagu allakkerivikkut akeqanngitsumik utertinneqassallutik.
Imm. 2. Piffissaq pisanik nalunaarsuiffiusussaq tassaavoq oktoberip aallaqqaataaniit septemberip 30-iannut.
Imm. 3. Suliffiup avataatigut aallaaniarsinnaanermut allagartap ingerlaannartumik nutaamik taarsernissaanut piumasaqaatigineqarpoq pisanik nalunaarsuiffiup immersugaalluni piffissaq eqqorlugu nassiunneqarsimanissaa.

 

Immikkut akuersissuteqartarneq

§ 9. Naalakkersuisut nalunaarummi matumani maleruagassat atorneqannginnissaannik immikkut akuersissuteqarsinnaapput tamanna ilisimatuutut misissuinerit pisariaqartippassuk.

 

Pineqaatissiissutit

§ 10. Kialuunniit maleruagassat nalunaarummi uaniittut imaluunniit piniarnermi, aallaaniarnermi aalisarnermilu maleruagassat arlaleriartumik imaluunniit annertuumik unioqqutippagit, naalakkersuisut taamaaliortoq piffissami erseqqinnerusumik killissaa aalajangikkami suliffiup avataatigut aallaaniarsinnaanermut allagartartaarsinnaajunnaarsissinnaavaat. Taamaattoqassappat suliffiup avataatigut aallaaniarsinnaanermut allagartaq tunniunneqareersimasoq atorunnaarsinneqassaaq.

§ 11. § 2-mik, aamma § 7-imi, imm. 1-imik 2-millu unioqqutitsisut akiliisinneqarsinnaapput.
Imm. 2. § 2-mik, aamma § 7-imi, imm. 1-imik 2-millu unioqqutitsisoqartillugu pisat taakkuluunniit nalingat naalagaaffiup karsianut iluaqutissanngorlugit arsaarinnissutigineqarsinnaapput.

 

Atuutilerfia

§ 12. Nalunaarut atulerpoq ulloq 18. december 1997.
Imm. 2. Tamatumunnga peqatigitillugu suliffiup avataatigut aallaaniarsinnaanermut allagartat pillugit Namminersornerullutik Oqartussat nalunaarutaat nr. 34, 17. december 1996-imeersoq atorunnaarsinneqarpoq.
Imm. 3. Aallaaniarsinnaanermut allagartat, nalunaarut imm. 2-mi taaneqartoq naapertorlugu qaammatisiutit ukiuannut 1997-imut atortussanngortitaasut taamaattoq aatsaat atorunnaassapput, piniarnermut allagartap atuuffissaata sivisussusia apeqqutaatinnagu, ulloq 28. februar 1998.

Namminersornerullutik Oqartussat, ulloq 18. december 1997.

Pāviāraq Heilmann

/

Peder Munk Pedersen