Meeqqat atuarfianni tjenestemanditut atorfinnik il.il. amerlassusiliineq pillugu Namminersornerullutik Oqartussat nalunaarutaat nr. 29, 27. november 1997-imeersoq.

Meeqqat atuarfiat pillugu Inatsisartut peqqussutaanni nr. 1-imi, 6. juni 1997-imeersumi § 23, imm. 2 aamma § 56, imm. 5 tunngavigalugit aalajangersarneqarput:

 

Kapitali 1.
Atuarfinni amerlassusiliineq pointilersuinerlu

Amerlassusiliineq.

§ 1. Nalunaarummi matumani atorfinnik amerlassusiliinertut pineqartoq tassaavoq atorfiit suussutsimikkut taaneqartut ( = atorfiit taaguutaat) amerlassusissaannik aalajangersaaneq.

§ 2. Atorfiit amerlassusissaat naatsorsorneqartassapput ukiut atuarfiusut tamaasa sioqqullugit nalunaarutigineqarlutillu Kultureqarnermut, Ilinniartitaanermut Ilageeqarnermullu Pisortaqarfimmut, tassanngaanniillu taakku pillugit tunaartarisassanik nassitsisoqartassaaq. Atorfiit innuttaasut amerlassusii tunngavigalugit amerlassusilerneqartassagaangata, inuit amerlassusii ukioq taanna 1. januarimi pisortatigoortumik naatsorsorneqarsimasut tunngavigineqartassapput.

§ 3. Namminersornerullutik Oqartussat atuarfiutaanni aamma Kultureqarnermut, Ilinniartitaanermut Ilageeqarnermullu Pisortaqarfimmi atorfiit amerlassusissaannik pilersaarusiaq Inatsisartut ukiumoortumik aningaasanut inatsisaannut ilanngunneqartassaaq.

 

Atuarfiit pointilersorneqarneri

§ 4. Atuarfinni tamani klassit amerlassusiat najoqqutaralugu imatut pointilersuisoqartassaaq:
1) 1. - 9. klassit: ........................................ klassimut ataatsimut 1 point
2) 10. - 12. klassit: .................................... klassimut ataatsimut 1 point imalt. 1,5 pointit
3) Klassit immikkut iluarsartuussat: ............. klassimut ataatsimut 2,5 pointit
Imm. 2. Klassinik imm. 1-imi taaneqartunik naatsorsuineq ima pisassaaq:
1) 1. - 9. klassit 11-nit amerlanerusunik atuartoqartut klassivittut naatsorsuunneqassapput.
2) 10. - 12. klassit klassivittut isigineqassapput atuartut qassiuneri apeqqutaatinnagit, kisiannili:
a) Klassit 12-it ataallugit atuartoqartut klassimut ataatsimut 1 pointiutillugu naatsor-sorneqassapput.
b) Klassit 12-inik amerlanerusunilluunniit atuartoqartut klassimut ataatsimut 1,5 pointiutillugit naatsorsorneqassapput.
3) Klassit immikkut iluarsartuussat ikinnerpaamik pingasunik atuartoqartut kisimik klassivittut immikkut iluarsartuussatut isigineqassapput. Klassit immikkut iluarsartuussat pingasunit ikinnerusunik atuartoqartut klassitut nalinginnaasutut isigineqassapput atuartut qassiuneri apeqqutaatinnagit.
Imm. 3. Klassit atuartullu imm. 2 malillugu ilanngullugit naatsorsuunneqanngitsut naatsorsuinermi ilanngunneqassapput amerlassusilersuinerit tulliuttumiittut malillugit, tassani pointit ataasiakkaat tamarmik klassitut ataatsitut naatsorsuutigineqassapput, atuarfiup klassiisa amerlassusaannik naatsorsuinermi:
Atuartut    0 - 12    =  1 point
Atuartut  13 - 25    =  2 pointit
Atuartut  26 - 39    =  3 pointit
Atuartut  40 - 53    =  4 pointit
Atuartut  54 - 67    =  5 pointit
Atuartut  68 - 81    =  6 pointit
Atuartut  82 - 95    =  7 pointit.

Kapitali 2.
Tjenestemandit

Atuarfimmi piareersarfiusumi ilinniartitsisut

§ 5. Kommunit atuarfiini atuarfimmi piareersarfmsumi atuartitsinissaq eqqarsaatigalugu, atuarfimmi piareersarfiusumi ilinniartitsisutut atorfiit amerlassusilersorneqartassapput, atuarfimmi piareersarfiusumi sap. akunneranut ilinniartitsisut skemami tiimiisa amerlassusiisa tamarmik 100%-ii kiisalu 2. aamma 3. klassini sap. akunneranut ilinniartitsisut skemami tiimiisa tamarmik 20%-ii tunngavigalugit.
Imm. 2. Atuarfimmi piareersarfiusumi ilinniartitsisut amerlassusissaat aalajangersarneqartassaaq, taamatut tiimissatut naatsorsuutigineqartut 27-inngorneri tamaasa ilinniartitsisoq ataasiutittarlugu. Atorfiit amerlassusii killilerneqarsinnaapput atuarfimmi ataatsimi skemami tiimissani 27-nik tiimeqarsinnaasunut.
Imm. 3. 2. aamma 3. klassini tiimit imm. 1 malillugu naatsorsorneqartut atuarfimmi piareersarfiusumi ilinniartitsisunik inuttalerneqarsinnaanngitsut, ilinniartitsisunik/ilinniartitsisuunernik atorfinitsitsinissat naatsorsornerannut tunngavigisamut ilanngunneqassapput.

 

Ilinniartitsisut/ilinniartitsisuunerit

§ 6. Kommunit atuarfiini ilinniartitsisutut/ ilinniartitsisuunertut atorfiit amerlassusilerneqartassapput tiimit amerlassusii makku tunngavigalugit:
1) 4. - 12. klassini sap. akunneranut ilinniartitsisut tiimii tamaasa, taakkununnga ilanngullugit immikkut atuartitsineq kiisalu sunngiffimmi atuartitsinermi tiimit atuartitsiffiusut, meeqqat atuarfiat pillugu Inatsisartut peqqussutaanni § 4 malillugu ilinniartitsisut pinngitsooratik tiimerisassaasa iluanni ilinniartitsisunut isumagisassanngortinneqartut.
2) 2. aamma 3. klassini ilinniartitsisut skemami tiimiisa tamarmik amerlassusiisa 80%-ii.
3) Malittarisassat atuuttut naapertorlugit tiiminut ilassutit, kisiannili viceskoleinspektørit, skoleinspektørit, atuarfeqarfinni pisortat kiisalu fritidsinspektørit perorsaanermut atatil-lugu/ingerlatsinermi tiimiinut ilassutigisaat pinnagit.
4) Atorfilittut suliffik sivikillisaq, meeqqat atuarfianni ilinniartitsisunut ukioq atuarfiusoq tamaat atuuttussamik akuersissutigineqarsimasoq aamma tiimit, atuarfinni/ilinniarfinni allatut iluseqartuni suliffeqarfinniluunniit sulinerup malitsigisaanik tiiminik ikilisaanikkut pissarsiarineqartut, Kultureqarnermut, Ilinniartitaanermut Ilageeqarnermullu Pisortaqarfimmit immikkut isumaqatigiissuteqarsimaneq tassanngaannilluunniit akuersissuteqarneq naapertorlugit pissarsiarineqartut.
5) § 5 naapertorlugu 2. aamma 3. klassini tiimit atuarfimmi piareersarfiusumi ilinniartitsisunut isumagisassanngortinneqarnissaat periarfissaqartinneqanngitsut.
6) Tiimit atuartitsiviusut amerlassusii, atorfinnut imm. 3-mi taaneqartunut pinngitsoorani atuartitsiviusussaatinneqartut iluanni isumagisassaanngortinneqartut, imm. 1-5 malillugit naatsorsuinermi tunngavigisanit ilanngaatigineqassapput.
7) Tiimit qaangiuttoorfissatut neriorsuutigineqarsimasut imm. 1-5 malillugit naatsorsuinermi tunngavissanit ilanngaatigineqassapput.
Imm. 2. Ilinniartitsisutut/ilinniartitsisuunertut atorfiit amerlassusii aalajangersarneqartassapput, taamatut tiimissatut naatsorsuutigineqartut 27-inngorneri tamaasa ilinniartitsisoq ataasiutittarlugu.
Imm. 3. Kommunini ilinniartitsisutut/ilinniartitsisuunertut tjenestemanditut atorfinnik ikinnerpaamik 30-inik inuttaliisimasuni ilinniartitsisutut/ilinniartitsisuunertut atorfimmik ataatsimik, aalajangersimasumik skemaqanngitsumik (aalajangersimasumik taartaasartoq), pilersitsisoqarsinnaavoq, tjenestemanditut atorfiit 30-it inuttalerneqareerneri tamaasa. Atorfinni ataasiakkaani tamani tiimit ilinniartitsisunut annerpaamik tallimanut agguarneqarsinnaapput, taamaaliortoqarpallu taartaalluni tiimitut skemamut inissinneqarsimasutut atuartitsiffiusassallutik.

 

Viceskoleinspektørit

§ 7. Atuarfinni ikinnerpaamik 17-inik pointilinni imaluunniit 280-inik atuartulinni imaluunniit atuarfeqarfimmi pisortaajutigisumik skoleinspektøreqartuni viceskoleinspektøritut atorfimmik pilersitsisoqassaaq.
Imm. 2. Atuarfinni atuarfeqarfimmi pisortaajutigisumik skoleinspektøreqartuni viceskoleinspektøritut atorfik ataaseq alla aamma pilersinneqassaaq, atuarfik ikinnerpaamik 35-inik pointeqarpat imaluunniit 520-nik atuartoqarpat.
Imm. 3. Atuarfinni, atuartunik 48-nik taakkualuunniit sinnerlugit najugaqarfigineqartunik, atuarfimmut atasunik atuartunut inissiaateqartuni, atorfiit imm. 1 - 2-mi taaneqartut saniatigut, viceskoleinspektøritut atorfik ataaseq pilersinneqassaaq.

 

Skoleinspektørit

§ 8. Atuarfinni ikinnerpaamik 8-nik pointeqartuni imaluunniit 95-inik atuartulinni skoleinspektøritut atorfimmik pilersitsisoqassaaq.
Imm. 2. Atuarfinnik nutaanik pilersitsinermi atuarfiup atulinnginnerani skoleinspektørimik atorfinitsitsisoqarsinnaavoq, klassit amerlassusaat naammaginartillugu, siusinnerpaamillli qaammatinik arfinilinnik sioqqutitsisumik.

 

Atuarfeqarfiit pisortaat

§ 9. Kommunini ataasiinnaanngitsunik, namminerisaminnik ingerlasunik atuarfeqarfiusuni, § 10-lu naapertorlugu skoledirektørimik atorfînitsitsinissamut tunngavissaqanngitsuni, qitiusumik atuarfimmi kommunimit toqqarneqartumi skoleinspektøriusoq atuarfeqarfiup pisortaatut atorfinitsinneqarsinnaavoq. Atuarfeqarfmp pisortaata kommunip meeqqat atuarfianik, sunngiffimmi sammisassaqartitsinermik, atuakkanik atorniartarfeqarnermik aamma kulturikkut qaammarsaanikkullu ingerlatsinermik aqutsinera isumagissavaa.

 

Skoledirektørit

§ 10. Kommunini ikinnerpaamik 5.000-inik inulinni imaluunniit 1.000-inik atuartulinni skoledirektørimik atorfinitsitsisoqarsinnaavoq. Skoledirektørip kommunip meeqqaat atuarfianik, sunngiffimmi sammisassaqartitsinermik, atuakkanik atorniartarfeqarnermik aamma kulturikkut qaammarsaanikkullu ingerlatsinermik aqutsinera isumagissavaa.

 

Fritidsinspektørit

§ 11. Kommunini ikinnerpaamik 1.500-nik inulinni fritidsinspektørimik atorfinitsitsisoqarsinnaavoq.
Imm. 2. Fritidsinspektørip tiimimut tapisiaasa, malittarisassat atuuttut naapertorlugit naatsorsorneqarsimasut, fritidsinspektørinut tiimimut tapisiaritinneqartussat amerlanerpaaffissaattut atuuttutut aalajangiunneqarsimasut sinnerpatigik, ilinniartitsisut ilaat perorsaanermi ikiortitut atorfinitsinneqassaaq. Atorfinitsinneqarneq ukiut atuarfiusut ataasiakkaarlugit atuutsinneqassaaq.
Imm. 3. Imm. 2 naapertorlugu tiiminut tapiliunneqartut sinneruttut 18-init amerlaneruppata, tiimit tapiliunneqartut sinneruttut 18-it aallartiffii tamaasa perorsaanermi ikiortit ataatsimik ilaneqassapput.

 

Kapitali 3.
Tjenestemandit ilaasa suliassaat immikkut ittut

Skolelederit

§ 12. Atuarfinni 8-nik ikinnerusunik pointeqartuni imaluunniit 95-init ikinnerusunik atuartoqartuni atuarfimmi ilinniartitsisutut/ilinniartitsisuunertut atorfeqartut ilaat skolelederinngortinneqassaaq.

 

Fritidslederit

§ 13. Kommunini 1.500-t inorlugit inoqartuni qitiusumik atuarfimmi ilinniartitsisut ilaat fritidslederinngortinneqarsinnaavoq.
Imm. 2. Nunaqarfinni ikinnerpaamik 60-inik arfinilinniit 19-inut ukiulinnik meerartalinni inuusuttortalinnilu atuarfimmi ilinniartitsisut ilaat fritidslederinngortinneqarsinnaavoq.
Imm. 3. Imm. 2 naapertorlugu nunaqarfinni fritidslederinngortitsiviunngitsuni suliaq skolelederimit isumagineqassaaq.

 

Ilinniartitsisut siunnersuisartut/atuartitsissutinik ilitsersuisartut

§ 14. Qitiusumik atuarfinni atuarfinnilu 120-it sinnerlugit atuartulinni atorfinitsinneqassapput,
1) atualeqqaarneq immikkullu atuartitsineq pillugit ilinniartitsisoq siunnersuisartoq, aamma
2) 7. - 12. klassit pillugit ilinniartitsisoq siunnersuisartoq.
Imm. 2. Ilinniartitsisut siunnersuisartut imm. 1-imi taaneqartut saniatigut atuarfinni 70-it sinnerlugit atuartulinni, atuartitsissutini aalajangersimasuni atuartitsissutiniluunniit ataatsimoortuni ilitsersuisussanik arlalinnik atorfinitsitsisoqassaaq.
Imm. 3. 7.-12. klassit pillugit ilinniartitsisumik siunnersuisartumik aammattaaq atorfinitsitsisoqassaaq atuarfinni 120-it inorlugit atuartulinni 10.-12. klassimilu 12 sinnerlugit atuartoqartuni.
Imm. 4. Ilinniartitsisut siunnersuisartut atuartitsisutinillu ilitsersuisartut ukiumi atuarfiusumi ataatsimi atasussatut atorfinitsinneqartassapput.

 

Atuarfinni bibliotekarit aamma atuarfinni bibliotekariunerit

§ 15. Atuarfinni ikinnerpaamik 6-inik pointilinni atuarfimmi ilinniartitsisut ilaat atuarfimmi bibliotekaritut atorfinitsinneqassaaq.
Imm. 2. Atuarfinni 20-nik imalunniit amerlanerusunik pointilinni aammattaaq atuarfimmi bibliotekarimut ikiortimik atorfinitsitsisoqarsinnaavoq.
Imm. 3. Qitiusumik atuarfimmi bibliotekariusoq atuarfimmi bibliotekariunertut atorfinitsinneqassaaq.
Imm. 4. Atuarfinni bibliotekarit imm. 1-imit 3-mut pineqartut ukiumi atuarfiusumi ataatsimi atasussatut atorfinitsinneqartassapput.

 

Kapitali 4.

Timelærerinik allanillu tjenestemanditut atorfinitsitaanngitsunik atorfinitsitsisarneq

Timelærerit, ukioq naallugu taartaasartut aamma taartaasartut

§ 16. § 6, imm. 2 naapertorlugu naatsorsuereernerup kingornatigut tiimini sinneruttuni atuartitsinerup isumagineqarnissaanut timelærerinik atorfinitsitsisoqarsinnaavoq.
Imm. 2. Ilinniartitsisutut/ilinniartitsisuunertut atorfinni inuttalerneqarsinnaanngitsuni tiimit atuartitsivigineqarnissaasa isumagineqarnissaannut aammattaaq timelærerinik imaluunniit ukioq naallugu taartaasussanik atorfinitsitsisoqarsinnaavoq.
Imm. 3. Ilinniartitsisut ukioq atuarfiusoq tamaat sulinngiffeqarsinnaanerat akuersissutigineqarsimappat, atuartitsinerup isumagineqarnissaanut timelærerinik imaluunniit ukioq naallugu taartaasussanik atorfinitsitsisoqarsinnaavoq.
Imm. 4. Ilinniartitsisut atuartitsisinnaanngikkallarnerini atuartisinerup isumagineqarnissaanut taartaasussanik atorfinitsitsisoqarsinnaavoq.

 

Isumaginninnermi perorsaasut aamma perorsaanermi ikiortit

§ 17. Isumaginninnermi perorsaasut aamma perorsaanermi ikiortit atorfinitsinneqarsinnaapput
1) atuartut innarluutillit ikiorserniarneranni suliassat isumagineqarnissaannut,
2) atuartunut inissiani aamma atuartunut angerlarsimaffinni nakkutilliinermi suliassanut, aamma
3) sunngiffimmi angerlarsimaffinni, atuartut nakkutiginerannik suliaqartinnerannillu isumaginniffiusuni, ikiortitut, taartaasartoqarnermik aaqqissuussinerni kingoraartitut imaluunnit atuarnerup ingerlanerani tiimini atuartitsiviunngitsuni assigisaannilu ikiortitut.

 

Kapitali 5.
Atortuulersitsineq il. il.

§ 18. Kultureqarnermut, Ilinniartitaanermut Ilageeqarnermullu Pisortaqarfik atorfiit nalunaarummi matumani amerlassusilikkat imarisassaat pillugit aalajangersakkanik erseqqinnerusunik aalajangersaasinnaavoq.

§ 19. Nalunaarut atuuttuulissaaq 1. december 1997. Tamatumunnga peqatigitillugu Meeqqat atuarfianni tjenestemanditut atorfinnik il.il. amerlassusiliisarneq pillugu Namminersornerullutik Oqartussat nalunaarutaat nr. 31, 1. december 1992-imeersoq atorunnaarsinneqarpoq.

Namminersornerullutik Oqartussaat, 27. november 1997.

Konrad Steenholdt

/

Karl Kristian Olsen