Kapisilinniarneq pillugu Namminersornerullutik Oqartussat nalunaarutaat nr. 14, 5. august 1997-imeersoq.

Aalisarneq pillugu Inatsisartut inatsisaanni nr. 18-mi 31. oktober 1996-meersumi § 5, § 8 imm. 5, § 10, § 22, imm. 2, § 23, § 24, imm 1, § 25, § 26, § 33, imm. 2 aamma § 34, imm. 3 kiisalu pinngortitamik allanngutsaaliuineq pillugu inatsisartut inatsisaanni nr. 11-mi 12. november 1980-imeersumi § 2 imm. 3 aamma § 19 naapertorlugit aalajangersarneqarpoq:

 

Atuuffíi

§ 1. Nalunaarut kapisilinniarnermut tamarmut imartani Kalaallit Nunaata aalisarnikkut oqartussaaffígisaani Nunap Isuata kitaani NAFO-p sumiiffilersuiffiani 1-mi ingerlanneqartumut atuuppoq. Tunngaviusumik killigititamiit 40 sømilit avataanni aalisarneq inerteqqutaavoq.
Imm. 2. Kalaallit Nunaata tunuata aalisarfittaani kapisilinniarnermi malittarisassat nalunaarummi §§ 5, 8, 9, 11 aamma § 12-mi taaneqartut taamatuttaaq atuupput. Tunngaviusumik killigitamiit 12 sømilit avataanni aalisarneq inerteqqutaavoq.

 

Kapisilittassat aalajangersarneqarnerat

§ 2. Ukiut tamaasa Kitaani kapisilittassat amerlassusissaat naalakkersuisut aalajangertassavaat. Aalajangiineq pisassaaq soorlu aamma nunat tamalaat akornanni isumaqatigiissutit tunngavigalugit.

 

Inuussutissarsiutigalugu kapisilittassat tamatumunngalu piumasaqaatit

§ 3. KNAPK-p aamma KANUKOKA-p isumasioqatigereernerisigut Naalakkersuisut aalajangertassavaat Kitaani pisassat qanoq aalisarneqassanersut agguaanneqassanersulluunniit kiisalu inuussutissarsiutigalugu kapisilinniarnerup ulloq aallartiffissaa. Tamanna pillugu kommuninut ataasiakkaanut, KNAPK-mut aamma KANOKOKA-mut kiisalu nuna tamakkerlugu tusagassiorfiit aqqutigalugit nalunaaruteqartoqartassaaq.

§ 4. Akuersissummik tunineqarsimasut kisimik inuutissarsiutigalugu kapisilinniarsinnaatitaapput. Inuussutissarsiutigalugu aalisarsinnaanermut akuersissutit Naalakkersuisunit tunniunneqartarput. Taamaattorli akuersissutinik tunniussisarnermut akisussaaffik kommunimut tunniunneqarsinnaavoq Naalakkersuisut sukumiinerusumik isumaqatigiissuteqarfigalugit.
Imm. 2. Qinnuteqartunut piumasaqaatinik makkuninnga naammassinnissimasunut akuersissutinik tunniussisoqarsinnaavoq:
1) Qinnuteqartoq nammineq kapisilinnut qassutaateqassaaq kapisilinniarmullu angallateqarluni;
2) Qinnuteqartup qinnuteqarnermut atatillugu kapisilinnut qassutit qassiuneri qanorlu ittuuneri imaluunnit ilisarnaataat nalunaarutigissavai.
Imm. 3. Akuersissut tunniunneqassaaq qinnuteqartunut angallammik 42 fod tikillugu taamatullu angissusilimmik pigisaqartunut. Angallatit raajarniarnissamut akuersissummik pigisaqartut inuussutissarsiutigalugu kapisilinniarnissamut akuersissummik tunineqaqqusaanngillat.
Imm. 4. Aalisartut akornanni naapertuuttumik agguaanissaq anguniarlugu Naalakkersuisut kapisilinniarnissamut sukumiinerusumik piumasaqaateqarsinnaapput. Aalajangiineq pisassaaq KNAPK KANUKOKA-lu isumaqatiginiareernerisigut. Tamanna kommuninut ataasiakkaanut, KNAPK-mut KANUKOKA-mullu nunalu tamakkerlugu tusagassiorfiit aqqutigalugit nalunaarutigineqassaaq.
Imm. 5. Illuatungeriit imm. 4-mi taaneqartut ukiumut pisassat kommuninut ataasiakkaanut qanoq agguaanneqarnissaat aalajangereerpassuk, pisassat aalisartunut ataasiakkaanut agguaanneqassapput kommunalbestyrelsip, nunaqarfinni aqutsisut najukkanilu aalisartut piniartullu peqatigiiffiata suleqatigiinnerisigut.

§ 5. Inuussutissarsiutigalugu kapisilinniarnissamut qinnuteqaammut itigartitaaneq tunngavi-lersorlugu naammagittaalliuutigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmut, Box 269, 3900 Nuuk, imaluunniit fax 2 47 04-kkut. Kommunip allaffianiit qinnuteqaammut akissutip tiguneqarneraniit ullut 14-it naammagittaalliuuteqarnissamut killiliunneqarput.
Imm. 2. Kommunit ataasiakkaat sapinngisamik piaarnerpaamik - kingusinnerpaamilli pisassat agguaanneqarnerisa kingornatigut ullut 14-it qaangiunneranni - Aalisarnermut, Piniarnermut Nunalerinermullu Pisortaqarfimmut akuersissummik pigisaqartut ataasiakkaat aqqi, inuttut normui, angallataasa angissusii, kapisilinnut qassutinik qassinik pigisaqarneri aammalu qassutit suuneri ilisarnaataalluunniit nalunaarutigissavaat.

 

In uussutissarsiutigalugu kapisilinniarnermi piniutit

§ 6. Kapisilinniarneq taamaallaat qarsorsat qassutilluunniit tasillugit 140 mm-inik nigartallit atorlugit ingerlanneqassaaq. Nigartaqqortussuseq 8%-mik sanioqqunneqarsinnaavoq.
Imm. 2. Qassutit nigartaat uuttorneqassaaq aalisarnermik nakkutilliisut uuttuutaata ½ kiilumik oqimaalutserlugu nigartamut ikkunneratigut nakkartillugulu. Nigartat 20-t qimiaanut ungaseqatigiit uuttorneqassapput. Nigartat tamarmik imm. 1-mi piumasaqaat eqqortissavaat.
Imm. 3. Kapisilinnut qassutit atorneqartut tamarmik piginnittup aqqanik imaluunniit taassumap angallataata normuanik nalunaaqutserneqarsimassapput.

 

Pisat aamma pisassat aqunneqarnerat tunisinerlu

§ 7. Inuussutissarsiutigalugu kapisilinniarneq aallartinneqassanngilaq ulloq aalajangerneqarsimasoq nallertinnagu, tak. § 3, imm. 1.
Imm. 2. Inuussutissarsiutigalugu kapisilinniarneq pisassat tamarmiusut iluanni taamaallaat ingerlanneqarsinnaavoq, takuuk § 2.
Imm. 3. Inuussutissarsiutigalugu aalisarnermi pisat Kalaallit Nunaanni tunitsivimmut tunineqassapput. Tunitsivittut paasineqassaaq aalisakkanik tunitsivik Danmarkimi Aalisarnermik
Nakkutilliisoqarfímmit, Fiskeriinspektoratimit, akuerisaasoq. Tamatuma saniatigut inuussutissarsiutigalugu aalisarnermi pisat najukkami kalaalimineerniarfikkut tunineqarsinnaapput.

§ 8. Kitaani inuussutissarsiutigalugu aalisarnermi pisassat nungungajalerpata Naalakkersuisut qaqugu inuussutissarsiutigalugu aalisarneq, pisanik tunisineq, pisanik pisineq inuussutissarsiutigalugulu aalisartut akuersissummik peqartut tunisisarnerat unissanersoq nalunaarutigissavaat.
Imm. 2. Pisassanut aalajangerneqarsimasunut sanilliullugu qanoq pisaqartigisoqarsimanera pisassanit aalajangerneqarsimasunit anneruppat minneruppalluunniit KNAPK KANUKOKA-lu isumasioqatigereerlugit Naalakkersuisut kommunini pisassat iluarsiissuteqarfigissavaat pisassat tamarmiusut kommuninut agguaanneqarsimappata.
Imm. 3. Kapisilinniarneq pisanillu tunisineq inerteqqutaapput ullut imm. 2-mi iluarsiissuteqarniarluni suliaqarfiusut nalaanni.
Imm, 4. Imm. 1 -mi aamma imm. 2-mi iliuuseriniakkat tusagassiorfitsigut nalunaarutigineqartassapput.
Imm. 5. Piffissap kapisilinniarnerup uniffissaata kingornatigut inuussutissarsiutigalugu kapisilinniarneq sunaluunniit inerteqqutaavoq, nunatsinniinnaq tuniniagassanik aalisarneq ilanngullugu.

 

Nammineq atugassanik kapisilinniarneq

§ 9. Kalaallit Nunaanni najugaqavissut tamarmik namminneq atugassaminnik kapisilinniarsinnaatitaapput.
Imm. 2. Nammineq atugassanik kapisilinniarneq taamaallaat ingerlanneqarsinnaavoq angalla-tit 42 fod angullugu angissusillit atorlugit. Nammineq atugassanik taamaallaat kapisilinniartoqarsinnaavoq inuussutissarsiutigalugu kapisilinniarnerup aallartinneraniit (tak. § 3, imm. 1) piffissami taassuma ingerlanneqarnerani, taamaattorli kingusinnerpaamik 15. september ilanngullugu, inuussutissarsiutigalugu pisassat piffissami tassani tamarmik pisarineqarsimanngippata.
Imm. 3. Nammineq atugassanik kapisilinniarnermi qarsorsat qissattaallu kiisalu angallammut ataatsimut qassutit nunamut pitutat 2000-inik putullit ataatsit (1), § 6-imi allaaserineqartutut, atorneqarsinnaapput. Nammineq atugassanik kapisilinniarnermi angallammut ataatsimut qassu-tinut nunamut pitutanut taarsiullugit qassutit tissukartittakkat nalinginnaasumik takissusillit ataatsit (1), § 6-imi allaaserineqartutut, atorneqarsinnaapput.
Imm. 4. Kapisilinnut qassutit piginnittup aqqanik imaluunniit angallatip normuanik ilisarnaaserneqarsimassapput. Kapisilinnut qassutit nalunaaquttap akunneri 24-it qaangiutsinnagit pisaa-jarneqartassapput. Imm. 1 malillugu kapisilittat Kalaallit Nunaanni nunaniluunniit allani tuniniaqqusaanngillat.

 

Akiliilluni kapisilinniarneq

§ 10. Takornariat taamaallaat kapisilinniarsinnaapput akiliilluni aallaaniarneq aalisarnerlu pillugit nalunaarut naapertorlugu.
Imm. 2. Akiliilluni kapisilinniarnermi qarsorsat qissataatillu kisimik atorneqarsinnaapput.
Imm. 3. Kapisillit imm. 1 naapertorlugu pisarineqartut Kalaallit Nunaanni nunaniluunniit allani tuniniarneqarsinnaanngillat pisiareqqusaanatillu.

 

Kommunini kapisilinniarneq pillugu ileqqoreqqusat

§ 11. Kommunalbestyrelsi aalisarneq pillugu inatsimmi tamanna pillugu aalajangersakkat iluanni najukkami aalisartut piniartullu peqatigiiffiat tusarniaavigereerlugu pissutsit immikkut ittut tamanna pisariaqartippassuk kommunip ileqqoreqqusaatigut kapisilinniarneq eqqarsaatiga-lugu § 6, imm. 1 aamma § 9, imm. 2 - 4-mi aalajangersakkanit sukanganerusunik aalajangersaasinnaavoq.

 

Kapisilittanik nalunaaruteqartarnerit

§ 12. Kapisilittat tamarmik aalisarneq pillugu inatsit naapertorlugu nalunaarutigineqassapput.

 

Pineqaatissiissutit

§ 13. § 4, imm. 1-imik, § 6-imik, § 7-imik, § 8, imm. 3-mik 5-imillu, § 9-mik aamma § 10-imik unioqqutitsineq akiliisitsinermik aamma pisanik arsaarinninnermik kinguneqarsinnaapput. §§9 aamma 10-mik unioqqutitsineq taamatuttaaq pisanik piniutinillu arsaarinninnermik kingu-neqarsinnaavoq.

§ 14. Nalunaarut atortuulerpoq 5. august 1997. Tamatuma peqatigisaanik kapisilinniarneq pillugu namminersornerullutik oqartussat nalunaarutaat nr. 21, 1. august 1995-imeersoq atorunnaarsinneqarpoq.

Namminersornerullutik Oqartussat, ulloq 5. august 1997.

Pâviâraq Heilmann

/

Emanuel Rosing