Eqalunniarneq pillugu Namminersornerullutik Oqartussat nalunaarutaat nr. 11,18. juni 1997-imeersoq.

Aalisarneq pillugu inatsisartut inatsisaanni nr. 18, 31. oktober 1996-meersumi § 23, § 25, § 26, § 33, imm. 2 aamma § 34, imm. 3 kiisalu pinngortitamik allanngutsaaliuineq pillugu Inatsisartut inatsisaanni nr. 11, 12. november 1980-imeersumi § 2, imm. 3 aamma § 19 naapertorlugit aalajangersarneqarput:

 

Nalunaarutip atuuffii

§ 1. Nalunaarummi uani pineqarpoq eqalunniarneq.

 

Piniutit.

§ 2. Eqalunniarnermi taamaallaat qarsorsat nuannariinnarlugu aalisarnermi atortakkat, qalut naatsunguamik ipullit qassutillu putui tasillugit minnerpaamik 100 mm-inik nigartoqqortussusillit, piniutitut atorneqarsinnaapput.
Imm. 2. Qassutit eqalunniarnermi atorneqartut 30 meter sinnerlugu takissuseqassanngillat.
Imm. 3. Qassutit piginnittup aqqanik, angallatip aqqanik angallatilluunniit normuanik nalunaaqutsersimassapput. Qassutit ningisimasut ateqanngitsut allatulluunniit nalunaaqutserneqarsi-manngitsut politiinit aalisarnermullu nakkutilliisunit peerneqarsinnaapput.
Imm. 4. Qassutit ningisimatillugit nakkutigineqartuassapput. Eqalunniarfik qimanneqarpat piffissaq apeqqutaatinnagu piginnittup qassutini qaqissavai.

§ 3. Piniutit piniariaatsillu makku eqalunniarnermi atoqqusaanngillat:
1) Sanninngaariniarneq,
2) qassutit tissukartittakkat, ungusilluni qalusiniutit (vod) kilisaatillu (trawl),
3) innaallagiaq atorlugu qupinnguallatsitsineq, aallaasit,
4) qaartartut toqunartullu, aamma
5) pullatit, taamaattoq imm. 2 takuuk.
Imm. 2. Imm. 1, nr. 5-imi aalajangersagaq apeqqutaatinnagu kommunalbestyrelsi kommunip pineqartup killeqarfiisa iluanni eqalunniarnermi pullatit atorneqarnissaannut akuersissuteqarsinnaavoq.
Imm. 3. Imm. 2 naapertorlugu akuersissutinut kommuni erseqqinnerusunik piumasaqaasiorsinnaavoq, tassunga ilanngullugit pullatit ilusissaat, piffissaq sumiiffillu atorneqarsinnaaffiat pillugit kiisalu qinnuteqaammik nassitsisoqartarnissaanik piumasaqarluni.

 

Qassusersornermi malittarisassat

§ 4. Kuunni taakkualu tasinngortaanni qassusersorluni eqalunniarneq inerteqqutaavoq.

§ 5. Tatsini eqalunniarnermi kuuit tatsimut akuaniit kuuillu aariaanniit 100 m-init qaninnerusumut qassuserneq inerteqqutaavoq.
Imm. 2. Tatsini qassusersornermi qassutit tatsip sinaaniit akimut ikertussusiata aggornerisa pingajorarterutaat sinnerlugu takissuseqassanngillat.

§ 6. Kuup akuani nalinginnaasumik ulinnerpaaffianiit kuup immallu naapiffianniit illugiinnik kuuk 150 m-init qaninnemllugu, kuup sinaa aallaavigalugu uuttorlugu, qassusersorneq inerteqqutaavoq. Ungasissusissamit tassannga alimasinnerusukkut kommuni qassusersorfissap killis-saanik nalunaaqutsiisimappat, nalunaaqutsikkap iluani qassusersorneq inerteqqutaavoq.
Imm. 2. Qassutit timaatungaat ulinnerani immap angusagaanut attuumasunngorlugit nivinngarneqartassapput.
Imm. 3. Qassutit imartap ikertussusiata pingajorarterutaa sinnerlugu takissuseqassanngillat.
Imm. 4. Qassutit narlusuumik nunamiit avammoorlugit nivinngarneqassapput. Amerlanaarlugit pisaqarnissaq siunertaralugu qassutit allatut ilusilerlugit nivinngarnissaat inerteqqutaavoq.
Imm. 5. Qassutit eqalunniutit qassutinut tullernut minnerpaamik 30 meterinik akunnilerlugit nivinngarneqartassapput.

§ 7. Ujaqqanik sapusiat atorlugit eqalunniarsimagaanni eqalunniarfik qimatsinnagu saputit ingerlaarfeqalerlugitammarneqassapput.

 

Piffissaq qassusersorluni eqalunniarfissaq

§ 8. Qassutit atorlugit eqalunniartoqarsinnaavoq taamaallaat junip 15-ianiit septemberip 25-iat ilanngullugu.

 

Kommunit ileqqorequsaat

§ 9. Kommunalbestyrelsi ukiut tallimakkaarlugit eqaloqarfitsialaat aalisarnerup annertuallaarneranit ulorianartorsiortinneqartutut nalilerneqartut nalunaarsortassavai. Nalunaarsuusiaq Aalisarnermut, Piniarnermut Nunalerinermullu Pisortaqarfimmut nassiunneqassaaq.
Imm. 2. Kommunalbestyrelsi ukiut tallimanngorneri tamaasa ileqqoreqqusakkut kommunip ilaani sumiiffínnik arlaliusinnaasunik eqaloqarfílinnik ukiuni tallimani atuuttussamik eqqissisimatitaliortassaaq. Kommunit ileqqoreqqusaat Aalisarnermut, Piniarnermut Nunalerinermullu Pisortaqarfimmit atulersinneqartassapput.
Imm. 3. Sumiiffiit imm. 2-imi taaneqartut imaq eqaluit kuunnit eqqissisimatitaneersut sisusimatillutik najortarunagaat toqqammavigalugu killilerneqartassapput. Killiliinermi imm. 1 naapertorlugu eqqissisitsinerup sunniutissaa annerpaaq anguniarneqassaaq, saniatigullu piniarnermi nakkutilliisunik allanilluunniit nakkutiginnittussatut Naalakkersuisut toqqarsimasaannik politiinillu nakkutilliiffigiuminarnissaa anguniarneqassalluni.
Imm. 4. Kommunalbestyrelsip sumiiffinnik eqqissisimatitassanik toqqaanermini, siusinneru-sukkut Kalaallit Nunaanni eqalunniarneq pillugu Namminersornerullutik Oqartussat nalunaarutaat nr. 23 26. maj 1994-meersoq tunngavigalugu toqqarsimasani toqqaqqissinnaavai.
Imm. 5. Kommunit ileqqoreqqusaat nalluutit qissattuutillu atorlugit eqaloqarfínni eqqissisimatitaasuni eqalunniarsinnaatitsisinnaapput, eqaloqarfiit qangaaniilli qasuersaarfmsartut pingaarutaat pigiinnarneqaqqullugu.
Imm. 6. Nalunaarutip matuma akuersissutigineqarnerata kingorna kommunip ileqqoreqqusaa siulleq kingusinnerpaamik januarip aallaqqaataani 1998 atuutilissaaq.
Imm. 7. Kommunalbestyrelsi imm. 6 malillugu ileqqoreqqusaliunngippat Naalakkersuisut nalunaarutikkut kommunimi pineqartumi eqaloqarfimmik eqaloqarfinnilluunniit eqqissisitsisin-naapput.

§ 10. Kommunalbestyrelsi eqalunniarneq eqqarsaatigalugu § 2, imm. 2-mi aamma §§ 5-imiit 8-mut aalajangersakkanit sakkortunerusunik kommunip ileqqoreqqusaatigut aalajangersaasin-naavoq, pissutsit immikkut ittut tamanna pisariaqartippassuk. Kommunalbestyrelsip kommunip ileqqoreqqusaatigut piumasaqaatit § 3, imm. 3-mi taaneqartut aalajangersarsinnaavai.

 

Immikkut akuersissuteqarneq

§ 11. Ilisimatusarnikkut siunertanut nalunaarummi aalajangersakkat atortinneqannginnissaat Naalakkersuisut immikkut akuersissutigisinnaavaat.
Imm. 2. Kommunit ataasiinnarmik kuummik eqaloqarfillit Naalakkersuisunut qinnuteqarsin-naapput § 9-p atuutinnginnissaanik.
Imm. 3. Imm. 2 naapertorlugu aatsaat akuersissuteqartoqarsinnaavoq uppernarsarneqarpat kommuni kuup eqaloqarneranut illersuiniutinik allanik iliuuseqarsimasoq, imaluunniit kommunimi kuunnik eqaloqarfeqanngitsoq.

 

Pineqaatissiinerit

§ 12. §§-inik 2-miit 8-mut unioqqutitsisoq akiliisitsinermik pineqaatissinneqarsinnaavoq.
Imm. 2. §§ 2-miit 6-mut aamma § 8 unioqqutillugit eqaluttat arsaarinnissutaasinnaapput.
Imm. 3. Imm. 1 aamma 2 pillugit suliassat aalisarneq pillugu inatsimmi malittarisassat malillugit suliarineqassapput.

 

Atulersitsineq

§ 13. Nalunaarut atortuulerpoq 20. juni 1997, peqatigalugulu atorunnaarluni Kalaallit Nunaanni eqalunniarneq pillugu Namminersornerullutik Oqartussat nalunaarutaat nr. 23, 26. maj 1994-meersoq.
Imm. 2. Kommunit ileqqoreqqusaat eqalunniarnerni maleruaqqusatut atuuttut, Inuutissarsiutigalugu aalisarneq pillugu Inatsisartut inatsisaat nr. 17, 22. oktober 1990-imeersumi § 19, imm. 2 naapertorlugu imaluunniit Kalaallit Nunaanni eqalunniarneq pillugu Namminersornerullutik Oqartussat nalunaarutaat nr. 23, 26. maj 1994-imeersoq naapertorlugu atulersitaasut 1. juni 1998-imiit atorunnaassapput.

Namminersornerullutik Oqartussat, ulloq 18.juni 1997.

Pâviâraq Heilmann

/

Peder Munk Pedersen