1997-imi aalisarnermi pisassat pillugit Namminersornerullutik Oqartussat nalunaarutaat nr. 6,  2. april 1997-imeersoq

Aalisarneq pillugu Inatsisartut inatsisaanni nr. 18-imi 31. oktober 1996-imeersumi (Aalisarneq pillugu Inatsit) § 5, § 9, § 10, § 14 imm. 2, § 33 imm. 2 aamma § 34 imm. 3 aalajangersakkat timngavigalugit aalajangersarneqarpoq:

 

Atuuffii

§ 1. Nalunaarut manna imartani Kalaallit Nunaata aalisarnikkut oqartussaaffigisaani inuussutissarsiutigalugu aalisarnermut kiisalu Kalaallit Nunaata aalisarnikkut oqartussaaffigisaata avataani inuussutissarsiutigalugu kalaallit aalisarnerannut atuuppoq.
Imm. 2. Imartanut Kalaallit Nunaata aalisarnikkut oqartussaaffigisaanut ilaapput:
1) "Kalaallit Nunaata Kitaa" 44°00'W-ip kitaani 59°00'N-ip tungaanut tassanngaanniillu 42°00'W-ip kitaanut.
2) "Kalaallit Nunaata Kitaata Avannaa" NAFO-p imartaata ilaata 1-ip ilagisaa, 68°00'N-ip avannaaniittoq.
3) "Kalaallit Nunaata Kitaata Kujataa" NAFO-p imartaata ilaata 1-ip ilagisaa, 68°00'N-ip kuja-taaniittoq.
4) "Kalaallit Nunaata Tunua" 44°00'W-ip kangiani 59°00'N-ip tungaanut tassanngaanniillu 42°00'W-ip kangianut ICES-ip imartaasa II-p, V-ip, XII-ip aamma XIV-ip ilagisaannut.
Imm. 3. "Tunngaviusumik killeqarfiit" Kalaallit Nunaata eqqaani imartat aalisarnikkut oqartussaaffigisat pillugit statsministeriaqarfiup nalunaarutaani nr. 629, 22. december 1976-imeersumi, nr. 176, 14. maj 1980-imeersumi aamma nr. 637, 6. september 1991-imeersumi aalajanger-sarneqarsimapput.
Imm. 4. Avataasiorluni aalisarnertut isigineqarpoq aalisarneq angallatinik usitussutsimut uuttuutaat malillugu 75 BRT/BT 120-nik angissusilinnik anginerusunilluunniit imartani imm. 2 nr. 2 - 4-mi taaneqartuni kiisalu Kalaallit Nunaata aalisarnermut oqartussaaffigisaata avataani ingerlanneqartoq, nalunaarummi allami allanik aalajangiisoqarsimatinnagu.
Imm. 5. Sinerissamut qanittumi aalisarnertut isigineqarpoq aalisarneq angallatinik usitussutsi-mut uuttuutaat malillugu 75 BRT/BT 120-nik mikinerusunit imartami imm. 2, nr. 1-mi taane-qartumi ingerlanneqartoq, nalunaarummi allami allanik aalajangiisoqarsimatinnagu.

 

Pisat annertussusii

§ 2. Aalisakkanut aalajangersimasunut ilanngussaq 1-imi (aalisariutinut avataasiortunut aamma nunat allamiut aalisarnerannut Aalisarneq pillugu Inatsimmi § 7-imi taaneqartunut) aamma ilanngussaq 2-mi (sinerissamut qanittumi aalisariutinut) pisassiissutit tamarmiusut annertussusii ilanngussani alleriiaani 1-imi allassimasutut aalajangersarneqarput.

§ 3. Aalisakkanit ilanngussaq 1-imi taaneqartunit kalaallit angallataat, § 1 imm. 4 takuuk, kiisalu Aalisarneq pillugu inatsimmi § 6 takuuk, ilanngussami alleriiaani 2-mi allassimasunit pisassanit annertunerusunik aalisaqqusaanngillat.
Imm. 2. Kalaallit angallataat imartami pisassaqarfimmi "Kalaallit Nunaata Kitaata Avannaani" raajarniarsinnaanermut akuersissuteqarfigineqarsimasut ukiumullu pisassaqartitaasut, taamatuttaaq aamma ukiumut pisassat taakku "Kalaallit Nunaata Kujataata Kitaani" aalisarsinnaavaat.

§ 4. Aalisakkanit ilanngussaq 2-mi taaneqartunit kalaallit angallataat, § 1 imm. 5 takuuk, kiisalu Aalisarneq pillugu inatsimmi § 6 takuuk, ilanngussami alleriiaani 1-imi allassimasunit pisassanit annertunerusunik aalisaqqusaanngillat.

§ 5. Angallatit nunani EU-mut ilaasortaasuni nalunaarsorneqarsimasut taamaallaat katillugit pisassat ilanngussami 1-mi alleriiaani 3-imi allassimasut aalisarsinnaavaat.

§ 6. Angallatit Savalimmiuni nalunaarsorneqarsimasut taamaallaat katillugit pisassat ilanngussami 1-imi alleriiaani 4-mi allassimasut aalisarsinnaavaat.

§ 7. Angallatit Islandimi nalunaarsorneqarsimasut taamaallaat katillugit pisassat ilanngussami 1-imi alleriiaani 5-imi allassimasut aalisarsinnaavaat.

§ 8. Angallatit Norgemi nalunaarsorneqarsimasut taamaallaat katillugit pisassat ilanngussami 1-imi alleriiaani 6-imi allassimasut aalisarsinnaavaat.

§ 9. Angallatit Ruslandimi nalunaarsorneqarsimasut taamaallaat katillugit pisassat ilanngussa-mi 1-imi alleriiaani 7-imi allassimasut aalisarsinnaavaat.

§ 10. Aalisarnermut, Piniarnermut Nunalerinermullu Pisortaqarfik piginnaatinneqarpoq nalunaarutip matuma ilanngussartaasa iluarsaateqqittarnissaannut, Naalakkersuisut pisassat tamarmiusut (ilanngussani alleriiaani 1) allanngortissagaluarpassuk imaluunniit nunat tamalaat isumaqatigiissutaasa kingunerinik pisassat tamarmiusut (ilanngussami 1-imi alleriiaani 2-7) allatut agguaanneqassagaluarpata.

§ 11. Angallatinut §§ 3-miit 8-mut taaneqartunut akuersissutit naalakkersuisunut ilaasortap tunniussaasa amerlassusii atuuffissaalu pisassat annertussusiinut naapertuutissapput, tunniussi-nerlu pissallu angallatit taaneqartut aalisarsinnaassusiat sianiginiarlugu.

 

Aalisarnermik unitsitsineq

§ 12. Naalakkersuisuni ilaasortap pisassanik ilanngussani taaneqartunik atuinerup kingunerisaanik aalisakkanik pineqartunik aalisarneq angallatinit §§ 3-miit 9-mut taaneqartunit ingerlan-neqartoq unitsissavaa. Nunat ataasiakkaat pisassaat immikkoortillugit naatsorsorneqassapput EU-lu tamatumunnga atatillugu nunatut ataasiinnartut isigineqassalluni.
Imm. 2. Kalaallit angallataannut ataatsimut pisassanik aalisartunut unitsitsinissamut piffissaq ajornartinnagu radiukkut tusagassiuutitigullu nalunaarutigineqassaaq.
Imm. 3. Kalaallit angallatiginngisaannut, §§ 5-imiit 9-mut takukkit, unitsitsinissamut piffissaq angallammut pineqartumut telexikkut imaluunniit telegrammikkut nalunaarutigineqassaaq. EU-p angallataanut taamatut nalunaarut EU-kommissionimut nassiunneqassaaq. Kalaallit angallatiginngisaannut allanut taamatut nalunaarut nunap pineqartup aalisarnikkut oqartussaasuinut nassiunneqassaaq.
Imm. 4. Angallatit aalisarunnaassapput naalakkersuisuni ilaasortap piffissami aalajangigaani.

 

Pineqaatissiissutit

§ 13. Nalunaarummi aalajangersakkanik §§ 3-mit 9-mut aamma § 12-imi taaneqartunik unioqqutitsineq akiliisitsinermik kinguneqarsinnaavoq. Angallammiit unioqqutitsilluni aalisartoqartillugu aalisarnermut atortut atorneqartut, angallatip pisai tamakkerlugit taakkuluunniit nalingat arsaarinnissutigineqarsinnaapput, tamatumanili pisat unioqqutitsinani aalisarnermit pisutut uppernarsarneqartut ilanngunnagit. Tamakku pillugit suliassattaaq Aalisarneq pillugu inatsimmi maleruagassat malillugit suliarineqartassapput.

 

Atuutilerfia

§ 14. Nalunaarut manna 11. april 1997 atuutilerpoq. Tamatumunnga peqatigitillugu 1997-imi aalisarnermi pisassarititaasut pillugit Namminersornerullutik Oqartussat nalunaarutaat nr. 35, 17. december 1996-imeersoq.




Namminersornerullutik Oqartussat, ulloq 2. april 1997.




Pâviâraq Heilmann

/

Jørn Birk Olsen

Ilanngussaq 1 (pdf-format)

Ilanngussaq 2 (pdf-format)