Danmarkimi efterskolimiinnermut tapiissuteqartarneq pillugu Namminersornerullutik Oqartussat nalunaarutaat nr. 4, 21. februar 1997-imeersoq.

Meeqqat atuarfiat pillugu inatsisartut peqqussutaanni nr. 10-mi 25. oktober 1990-imeersumi kingullermik inatsisartut peqqussutaatigut nr. 4-kkut 2. maj 1996-imeersukkut allanngortinneqartumi § 10 a, imm. 2 naapertorlugu aalajangersarneqarput:

 

Kapitali 1.
Danmarkimi efterskolimiinnermut tapiissutit

Tapiissutisinissamut piumasarisat.

§ 1. Danmarkimi efterskolimiinnermut tapiissutit Kultureqarnermut, Ilinniartitaanermut Ilageeqarnermullu Pisortaqarfimmit aningaasanut inatsimmi aningaasaliissutigineqartut iluannit aningaasaliissutigineqartarput.
Imm. 2. Piumasarisat makku eqquutinneqarsimappata § 2 naapertorlugu tapiissuteqartoqar-sinnaavoq:
1) ilinniartoq aamma ilinniartumut angajoqqaatut oqartussaatitaasut efterskolimiinnerup aallartinnerani Kalaallit Nunaanni najugaqavissuussapput efterskolimiinnerullu aallartinnera sioqqullugu sivikinnerpaamik ukiumi ataatsimi Kalaallit Nunaanni najugaqavissuusimassallutik.
2) ilinniartoq efterskolimi atualernermini 18-inik ukioqalereersimassanngilaq,
3) ilinniartup efterskolimiilertinnani meeqqat atuarfianni 11. klassi naammassereersimassavaa,
4) ilinniartup efterskoli atualerfissaa Danmarkimi ilinniartitaanermut ministerimit akuerisaassaaq,
5) meeqqat atuarfiat ilinniartup kingullermik atuarfigisaa inassuteqaateqarsimassaaq,
6) ilinniartoq siusinnerusukkut Danmarkimi efterskolimiinnissamut Namminersornerullutik Oqartussanit tapiiffigineqarsimassanngilaq aamma
7) tapiiffigineqarnissamik qinnuteqaat Kultureqarnermut, Ilinniartitaanermut Ilageeqarnermullu Pisortaqarfimmi tiguneqarsimassaaq ukiumi efterskolimiilerfissami februaarip aallaqqaataa nallertinnagu.
Imm. 3. Kultureqarnermut, Ilinniartitaanermut Ilageeqarnermullu Pisortaqarfiup immikkut ittunik pissutissaqartillugu imm. 2, nr. 1, 2, 3, 6 aamma 7 tunngavissatut maleruanngitsoorsinnaavai.
Imm. 4. Efterskolimiinneq maanaannaq taamaatinneqarpat, imaluunniit ilinniartoq eftersko-limiilernissap aallartinnerani takkutinngingitsoorpat, tapiissuteqartarneq efterskolip taamaali-soqarneratigut maleruagassatut aalajangersagai naapertorlugit unitsinneqassaaq.

 

Tapiissutit annertussusii il. il.

§ 2. Efterskolimiinnermut atasumik aningaasartuutinut makkununnga tapiissuteqartoqarsinnaavoq:
1) Atuarnerup aallartilerneranut atuarunnaarnermullu atasumik Kalaallit Nunaata Danmarkillu akornanni siumut utimullu angalanernut.
2) Angalanermut atasumik unnuisariaqarnernut.
3) Angalanermi pisariaqartitsineq naapertorlugu inuussutissatigut isumagineqarnermut.
4) § 3 naapertorlugu efterskolimiinnermut.
Imm. 2. Aningaasartuutissat imm. 1-imi taaneqartut avataanniittut angajoqqaatut oqartus-saatitaasunit akilerneqassapput, taakkununnga ilanngullugu efterskolinut ataasiakkaanut, efterskolip aalajangersagai naapertorlugit, qularnaveeqqummik akiliuteqarneq.

§ 3. § 2, imm. 1, nr. 4 naapertorlugu ilinniartumut tapiissutit efterskolimiinnermut tapiissutit angajoqqaat akiligassaat tamaakkerlugit ilaannakorlugilluunniit matussusertarpaat. Tapiissutit ukiumi atualerfiusussami januaarip aallaqqaataa nallertinnagu Kultureqarnermut, Ilinniartitaanermut Ilageeqarnermullu Pisortaqarfimmit annertussusilerneqassapput.
Imm. 2. Tapiissutit, ilinniartup akiliutissaanut millisaataasussanngorlugit, efterskolimut atuarfiusussamut akiliutigineqassapput.

 

Qinnuteqaat.

§ 4. Angajoqqaatut oqartussaatitaasut namminneerlutik ilinniartoq efterskolimut qinnute-qaassutissavaat.
Imm. 2. Tapiiffigineqarnissamik qinnuteqarnermi qinnuteqarfissiaq Kultureqarnermut, Ilinniartitaanermut Ilageeqarnermullu Pisortaqarfimmit suliarineqarsimasoq atorneqassaaq. Qinnuteqarfissiaq kultureqarnermut atuartitaanermullu ingerlatsivimmit qinnuteqartussamut tunniunneqassaaq.
Imm. 3. Meeqqat atuarfiata, ilinniartup kingullermik atuarfigisimasaata, atuarfiup inassuteqaataa qinnuteqarfissiamut ilanngullugu allassavaa.
Imm. 4. Qinnuteqartup qinnuteqarfissiaq, tassungalu ilanngullugit ilinniartup efterskolimit ilinniartunngortussatut akuerisaaneranut efterskolip uppernarsaataa kiisalu misilitsissimanermut imaluunniit karakteerit kingulliit pillugit meeqqat atuarfiannit uppernarsaatit kultureqarnermut atuartitaanermullu ingerlatsivimmut nassiutissavaa.
Imm. 5. Kultureqarnermut atuartitaanermullu ingerlatsiviup qinnuteqarfissiaq ilanngussallu imm. 4-mi taaneqartut assilineri ilanngullugit Kultureqarnermut, Ilinniartitaanermut Ilageeqarnermullu Pisortaqarfimmut nassiutissavai.

 

Efterskolimiinnerup aallarnernera.

§ 5. Kultureqarnermut atuartitaanermullu ingerlatsiviup ilinniartup aallarnissaa piareersassavaa, tamatumunnga ilanngullugu angalanissaq pillugu allagartaliineq suliarissallugu kiisalu ilinniartoq, efterskole, Kalaallit Illuat attaveqaateqarfissaq kiisalu Kultureqarnermut, Ilinniartitaanermut Ilageeqarnermullu Pisortaqarfiup Danmarkimi immikkoortoqarfia nalunaarfigissallugit.

 

Kapitali 2.
Atulerfissaa

§ 6. Nalunaarut una atortuulissaaq 1. marts 1997, sunniuteqassalluni ukiumut atuarfiusumut 1997/98-imut.

Namminersornerullutik Oqartussat, 21. februar 1997.

Konrad Steenholdt

/

Karl Kristian Olsen